ವಿಶ್ವ ಸಿನಿಮಾ ದುನಿಯಾದಲ್ಲೇ ಭಾರತದ ಬಾವುಟ ಮತ್ತೊಮ್ಮೆ ಬಾನೆತ್ತರಕ್ಕೆ ಹಾರಿದೆ. ಹಾಲಿವುಡ್ ದಿಗ್ಗಜರ ನಡುವೆ ಬಾಲಿವುಡ್ ಕಿಂಗ್ ಖಾನ್ ಈಗ ಜಾಗತಿಕ ಮಟ್ಟದಲ್ಲಿ ದೊಡ್ಡ ಸದ್ದು ಮಾಡ್ತಿದ್ದಾರೆ. ಕೇವಲ ಬಾಕ್ಸ್ ಆಫೀಸ್ ಕಲೆಕ್ಷನ್ ಅಲ್ಲ, ಸಿನಿಮಾ ಇತಿಹಾಸದಲ್ಲಿ ಬೀರಿರುವ ಪ್ರಭಾವಕ್ಕೆ ಸಿಕ್ಕಿರೋ ಈ ಗೌರವ ಈಗ ಇಡೀ ದೇಶವೇ ಹೆಮ್ಮೆಪಡುವಂತೆ ಮಾಡಿದೆ. ಅಷ್ಟಕ್ಕೂ ಕಿಂಗ್ ಖಾನ್ ಬರೆದಿರೋ ಆ ಗ್ಲೋಬಲ್ ಹಿಸ್ಟರಿ ಏನು? ಹಾಲಿವುಡ್ನ ದೊಡ್ಡ ದೊಡ್ಡ ಸ್ಟಾರ್ಗಳನ್ನೇ ಹಿಂದಿಕ್ಕಿ ಅವರು ಮಾಡಿರೋ ಮ್ಯಾಜಿಕ್ ಏನು? ಕಂಪ್ಲೀಟ್ ರಿಪೋರ್ಟ್ ಇಲ್ಲಿದೆ.
- ಶಾರೂಖ್ ನ್ಯೂ ರೆಕಾರ್ಡ್.. ವಿಶ್ವದ ಸಾರ್ವಕಾಲಿಕ ಶ್ರೇಷ್ಠ ನಟ
- ವಿಶ್ವದ 100 ಶ್ರೇಷ್ಠ ಸಿನಿಮಾ ತಾರೆಯರ ಪಟ್ಟಿಯಲ್ಲಿ SRK
- ಎಮ್ಮಾ ಸ್ಟೋನ್, ಸ್ಟಲ್ಲೋನ್ಗೂ ಸವಾಲಾದ ಕಿಂಗ್ ಖಾನ್
- ಬಾಜಿಗರ್ನಿಂದ ಗ್ಲೋಬಲ್ ಸ್ಟಾರ್ವರೆಗೆ ಶಾರುಖ್ ಜರ್ನಿ
ವಿಶ್ವದ ಸಿನಿಮಾ ಇತಿಹಾಸದಲ್ಲೇ ಬಾಲಿವುಡ್ ಕಿಂಗ್ ಖಾನ್ ಶಾರುಖ್ ಖಾನ್ ಮತ್ತೊಮ್ಮೆ ಹೊಸ ಇತಿಹಾಸ ಬರೆದಿದ್ದಾರೆ. ಅಂತಾರಾಷ್ಟ್ರೀಯ ಖ್ಯಾತಿಯ ‘ವೆರೈಟಿ’ ನಿಯತಕಾಲಿಕೆ ಬಿಡುಗಡೆ ಮಾಡಿರುವ ‘ದಿ 100 ಗ್ರೇಟೆಸ್ಟ್ ಮೂವಿ ಸ್ಟಾರ್ಸ್ ಆಫ್ ಆಲ್ ಟೈಮ್’ ಪಟ್ಟಿಯಲ್ಲಿ ಕಿಂಗ್ ಖಾನ್ 92ನೇ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಈ ದಿಗ್ಗಜರ ಪಟ್ಟಿಯಲ್ಲಿ ಸ್ಥಾನ ಪಡೆದ ಏಕೈಕ ಭಾರತೀಯ ನಟ ಎಂಬ ಹೆಗ್ಗಳಿಕೆ ಶಾರುಖ್ ಖಾನ್ ಪಾಲಾಗಿದ್ದು, ಭಾರತೀಯ ಚಿತ್ರರಂಗಕ್ಕೆ ಇದು ಅತ್ಯಂತ ಹೆಮ್ಮೆಯ ಕ್ಷಣವಾಗಿದೆ.
ವೆರೈಟಿಯ ಐವರು ಸಿನಿಮಾ ವಿಮರ್ಶಕರು ಸಿದ್ಧಪಡಿಸಿರುವ ಈ ಪಟ್ಟಿಯಲ್ಲಿ ಕೇವಲ ಬಾಕ್ಸ್ ಆಫೀಸ್ ಕಲೆಕ್ಷನ್ ಅಥವಾ ಫ್ಯಾನ್ ಫಾಲೋಯಿಂಗ್ ಮಾತ್ರ ಮಾನದಂಡವಲ್ಲ, ನಟನಾ ಪ್ರತಿಭೆ, ವಿಭಿನ್ನ ಪಾತ್ರಗಳ ಆಯ್ಕೆ, ತೆರೆಯ ಮೇಲಿನ ವರ್ಚಸ್ಸು ಹಾಗೂ ಜಾಗತಿಕ ಸಾಂಸ್ಕೃತಿಕ ಪ್ರಭಾವವನ್ನು ಪರಿಗಣಿಸಲಾಗಿದೆ. ಇದೇ ಮಾನದಂಡದಲ್ಲಿ ಹಾಲಿವುಡ್ನ ಘಟಾನುಘಟಿ ತಾರೆಯರನ್ನೇ ಶಾರುಖ್ ಹಿಂದಿಕ್ಕಿದ್ದಾರೆ. ಆಸ್ಕರ್ ವಿಜೇತರಾದ ಜೋಕ್ವಿನ್ ಫೀನಿಕ್ಸ್ , ಎಮ್ಮಾ ಸ್ಟೋನ್, ಫಿಲಿಪ್ ಸೆಮೌರ್ ಹಾಫ್ಮನ್ ಹಾಗೂ ಸಿಲ್ವೆಸ್ಟರ್ ಸ್ಟಲ್ಲೋನ್ , ಎಡ್ಡಿ ಮರ್ಫಿ ಅವರಂತಹ ದಿಗ್ಗಜರಿಗಿಂತ ಮೇಲಿನ ಸ್ಥಾನದಲ್ಲಿ ಕಿಂಗ್ ಖಾನ್ ಮಿಂಚಿದ್ದಾರೆ.
ಶಾರುಖ್ ಖಾನ್ ಅವರ ಈ ಜಾಗತಿಕ ಮನ್ನಣೆಯ ಹಿಂದೆ ಮೂರು ದಶಕಗಳ ಸುದೀರ್ಘ ಪರಿಶ್ರಮ ಹಾಗೂ ವೈವಿಧ್ಯಮಯ ಪಾತ್ರಗಳ ಪಯಣವಿದೆ. ಆರಂಭದಲ್ಲಿ ಬಾಜಿಗರ್ ಮತ್ತು ಡರ್ ಚಿತ್ರಗಳ ಮೂಲಕ ನೆಗೆಟಿವ್ ಶೇಡ್ ಪಾತ್ರಗಳಲ್ಲೂ ಬೆಚ್ಚಿಬೀಳಿಸುವಂತೆ ನಟಿಸಿದ್ದ ಅವರು, ಮುಂದೆ ‘ದಿಲ್ವಾಲೆ ದುಲ್ಹನಿಯಾ ಲೇ ಜಾಯೇಂಗೇ’ ಹಾಗೂ ‘ದೇವದಾಸ್’ ಮೂಲಕ ಲವರ್ ಬಾಯ್ ಮತ್ತು ಭಾವನಾತ್ಮಕ ನಾಯಕನಾಗಿ ವಿಶ್ವದಾದ್ಯಂತ ಕೋಟ್ಯಂತರ ಹೃದಯ ಗೆದ್ದರು. ವಿಶೇಷವೆಂದರೆ, ಶಾರುಖ್ ಅವರ ವೃತ್ತಿಜೀವನವನ್ನು ಪ್ರತಿನಿಧಿಸುವ ಚಿತ್ರವಾಗಿ ‘ದೇವದಾಸ್’ ಅನ್ನು ವೆರೈಟಿ ಆಯ್ಕೆ ಮಾಡಿದೆ.
ಹಾಲಿವುಡ್ನಿಂದ ಹಿಡಿದು ಜಾಗತಿಕ ಸಿನಿಮಾ ಲೋಕದ ಶ್ರೇಷ್ಠ ಕಲಾವಿದರನ್ನು ಒಳಗೊಂಡ ಈ ಪಟ್ಟಿಯಲ್ಲಿ, 1950ರ ದಶಕದ ಐಕಾನಿಕ್ ನಟಿ ಮರ್ಲಿನ್ ಮನ್ರೋ ಮೊದಲ ಸ್ಥಾನ ಪಡೆದಿದ್ದಾರೆ. ಎರಡನೇ ಸ್ಥಾನದಲ್ಲಿ ಹಾಲಿವುಡ್ ದಂತಕಥೆ ಹಂಫ್ರಿ ಬೊಗಾರ್ಟ್ ಇದ್ದರೆ, ವಿಶ್ವವಿಖ್ಯಾತ ಹಾಸ್ಯನಟ ಚಾರ್ಲಿ ಚಾಪ್ಲಿನ್ ಮೂರನೇ ಸ್ಥಾನವನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಇಂತಹ ಶ್ರೇಷ್ಠ ಕಲಾವಿದರ ಸಾಲಿನಲ್ಲಿ ಒಬ್ಬ ಭಾರತೀಯ ನಟನ ಹೆಸರು ರಾರಾಜಿಸುತ್ತಿರುವುದು ಸಿನಿಪ್ರಿಯರಿಗೆ ರೋಮಾಂಚನ ತಂದಿದೆ.
ಒಟ್ಟಿನಲ್ಲಿ ಶಾರುಖ್ ಖಾನ್ ಕೇವಲ ಬಾಲಿವುಡ್ನ ಸ್ಟಾರ್ ಆಗಿ ಉಳಿಯದೆ, ಜಾಗತಿಕ ಮಟ್ಟದಲ್ಲಿ ಭಾರತೀಯ ಸಿನಿಮಾದ ಮುಖವಾಗಿ ಬೆಳೆದು ನಿಂತಿದ್ದಾರೆ. ಪಾತ್ರಗಳ ಮೇಲಿನ ಹಿಡಿತ, ಮಾತುಗಾರಿಕೆಯ ಚತುರತೆ ಮತ್ತು ಪ್ರೇಕ್ಷಕರನ್ನು ಸೆಳೆಯುವ ವಿಶಿಷ್ಟ ಶೈಲಿಯಿಂದ ಅವರು ಪಡೆದಿರುವ 92ನೇ ಸ್ಥಾನ, ಮುಂದಿನ ತಲೆಮಾರಿನ ಕಲಾವಿದರಿಗೆ ದೊಡ್ಡ ಸ್ಫೂರ್ತಿಯಾಗಿದೆ.
ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್





