ಕೀರ್ತಿ ಪಾಟೀಲ್, ಫಿಲಂ ಬ್ಯೂರೋ, ಗ್ಯಾರಂಟಿ ನ್ಯೂಸ್.
ಆ್ಯಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಅಭಿಮಾನಿಗಳು ಈಗ ಫುಲ್ ಜೋಶ್ನಲ್ಲಿದ್ದಾರೆ. ಯಾಕಂದ್ರೆ ಕೆಡಿ ಅಬ್ಬರಕ್ಕೆ ಕೌಂಟ್ ಡೌನ್ ಶುರುವಾಗಿದೆ. ಆದ್ರೆ ನಿನ್ನೆ ಸಡನ್ ಆಗಿ ಚಿತ್ರದ ಟ್ರೈಲರ್ ಯೂಟ್ಯೂಬ್ನಿಂದ ಮಾಯವಾಗಿದ್ದು ಫ್ಯಾನ್ಸ್ಗೆ ದೊಡ್ಡ ಶಾಕ್ ಕೊಟ್ಟಿತ್ತು. ‘ಕೆಡಿ’ ಟ್ರೈಲರ್ ಡಿಲೀಟ್ ಆಗಿದ್ದೇಕೆ? ಕೆವಿಎನ್ ಪ್ರೊಡಕ್ಷನ್ಸ್ ಮಾಡಿದ ಆ ಮೈನರ್ ಸರ್ಜರಿ ಏನು? ಈಗ ರಿಲೀಸ್ ಆಗಿರೋ ನಯಾ ಟ್ರೈಲರ್ನಲ್ಲಿ ಏನೆಲ್ಲಾ ಬದಲಾವಣೆಗಳಾಗಿವೆ? ಯುದ್ಧಕ್ಕೆ ಮುನ್ನ ‘ಕೆಡಿ’ ಮಾಡಿರೋ ಈ ಹೊಸ ಪ್ಲಾನ್ ಹೇಗಿದೆ? ಅದ್ರ ಕಂಪ್ಲೀಟ್ ಡಿಟೈಲ್ಸ್ ಈ ಸ್ಟೋರಿಯಲ್ಲಿದೆ ನೋಡಿ.
- ಕೆಡಿ ಟ್ರೈಲರ್ ಗೆ ಮೈನರ್ ಸರ್ಜರಿ.. ಫ್ರೆಶ್ ಅವತಾರದಲ್ಲಿ ಬಂದ ಕೆಡಿ
- ನಯಾ ಟ್ರೈಲರ್ ನಲ್ಲಿ ಎರಡು ಹೊಸ ಶಾಟ್ಸ್ ಸೇರ್ಪಡೆ..!
- ಸೆನ್ಸಾರ್ ನಿಯಮಕ್ಕೆ ತಲೆಬಾಗಿದ ಪ್ರೇಮ್..ಕತ್ತರಿ ನಡುವೆಯೂ ಹೆಚ್ಚಾಯ್ತು ಕಿಕ್
- ಏಪ್ರಿಲ್ 30ಕ್ಕೆ ಕೆಡಿ ಸಾಮ್ರಾಜ್ಯ ಓಪನ್.. ಧ್ರುವ ಸರ್ಜಾ ಅಬ್ಬರಕ್ಕೆ ಕ್ಷಣಗಣನೆ..!
ಸ್ಯಾಂಡಲ್ವುಡ್ನ ಮೋಸ್ಟ್ ಅವೈಟೆಡ್ ಸಿನಿಮಾ ‘ಕೆಡಿ-ದಿ ಡೆವಿಲ್’ ಬಿಡುಗಡೆಗೆ ಈಗ ದಿನಗಣನೆ ಶುರುವಾಗಿದೆ. ರಿಲೀಸ್ಗೆ ಕೇವಲ ಒಂದು ವಾರ ಬಾಕಿ ಇರುವಾಗಲೇ ಚಿತ್ರತಂಡ ಟ್ರೈಲರ್ ಮೂಲಕ ಪ್ರಚಾರದ ಕಿಚ್ಚು ಹಚ್ಚಿತ್ತು. ಆದ್ರೆ ನಿನ್ನೆ ದಿಢೀರನೆ ಕೆವಿಎನ್ ಪ್ರೊಡಕ್ಷನ್ಸ್ ತನ್ನ ಅಧಿಕೃತ ಯೂಟ್ಯೂಬ್ ಚಾನಲ್ನಿಂದ ಟ್ರೈಲರ್ ಡಿಲೀಟ್ ಮಾಡಿ ಎಲ್ಲರಿಗೂ ಅಚ್ಚರಿ ನೀಡಿತ್ತು. ಟ್ರೈಲರ್ ಕಣ್ಮರೆಯಾಗುತ್ತಿದ್ದಂತೆ ಧ್ರುವ ಫ್ಯಾನ್ಸ್ ಆತಂಕಕ್ಕೊಳಗಾಗಿದ್ರು. ಆದ್ರೆ ಈಗ ಸೆನ್ಸಾರ್ ಮಂಡಳಿಯ ಮಾರ್ಗಸೂಚಿಗಳ ಅನ್ವಯ ಕೆಲವೊಂದು ಪವರ್ಫುಲ್ ಬದಲಾವಣೆಗಳೊಂದಿಗೆ ಹೊಸ ಟ್ರೈಲರ್ ಮತ್ತೆ ಅಖಾಡಕ್ಕೆ ಇಳಿದಿದೆ.
ಯೆಸ್, ಈ ಹೊಸ ಟ್ರೈಲರ್ನಲ್ಲಿ ಕೇವಲ ಕತ್ತರಿ ಮಾತ್ರ ಬಿದ್ದಿಲ್ಲ, ಬದಲಾಗಿ ಎರಡು ಹೆಚ್ಚುವರಿ ಶಾಟ್ಗಳನ್ನು ಸೇರಿಸುವ ಮೂಲಕ ಪ್ರೇಕ್ಷಕರಿಗೆ ಡಬಲ್ ಟ್ರೀಟ್ ನೀಡಲಾಗಿದೆ. ಈ ಹಿಂದೆ ಟ್ರೈಲರ್ ಆರಂಭದಲ್ಲಿ ರವಿಶಂಕರ್ ಅವರು ಹೇಳುತ್ತಿದ್ದ ಡೈಲಾಗ್ನಲ್ಲಿ ಸಣ್ಣ ಬದಲಾವಣೆ ಮಾಡಲಾಗಿದೆ. ಮೊದಲು ‘ಅಲೆಕ್ಸಾಂಡರ್’ ಎಂದು ಬಳಸಲಾಗಿದ್ದ ಪದದ ಬದಲು ಈಗ ‘ಅಶೋಕ ಚಕ್ರವರ್ತಿ’ ಎಂಬ ಪದ ಸೇರಿಸಲಾಗಿದ್ದು, ಈ ಬದಲಾವಣೆ ಹೊಸ ಕಳೆ ತಂದಿದೆ. ಅಷ್ಟೇ ಅಲ್ಲದೆ, ಶಿಲ್ಪಾ ಶೆಟ್ಟಿ ಅವರ ಡೈಲಾಗ್ನಲ್ಲೂ ಮೈನರ್ ಸರ್ಜರಿ ಮಾಡಲಾಗಿದ್ದು, ಟ್ರೈಲರ್ ಅನ್ನು ಮತ್ತಷ್ಟು ಅಚ್ಚುಕಟ್ಟಾಗಿ ಸಿದ್ಧಪಡಿಸಲಾಗಿದೆ.
ಟ್ರೈಲರ್ನಲ್ಲಿದ್ದ ಅಶ್ಲೀಲ ಎನಿಸುವ ಪದಗಳನ್ನು ಸಂಪೂರ್ಣವಾಗಿ ತೆಗೆದುಹಾಕಲಾಗಿದೆ. ಅಷ್ಟೇ ಅಲ್ಲ, ಹೆಚ್ಚು ಹಿಂಸಾತ್ಮಕವಾಗಿ ಕಾಣುತ್ತಿದ್ದ ಸಂಜಯ್ ದತ್ ಕೈ ಕತ್ತರಿಸಿ ಅದನ್ನು ಬಾಯಲ್ಲಿ ಇಟ್ಟುಕೊಳ್ಳುವ ದೃಶ್ಯಕ್ಕೂ ಕತ್ತರಿ ಬಿದ್ದಿದೆ. ಜೊತೆಗೆ ನೋಟಿನಿಂದ ಸಿಗಾರ್ ಹಚ್ಚಿಕೊಳ್ಳುವ ದೃಶ್ಯವನ್ನೂ ತೆಗೆದುಹಾಕುವ ಮೂಲಕ ಸೆನ್ಸಾರ್ ನಿಯಮಗಳಿಗೆ ಚಿತ್ರತಂಡ ಗೌರವ ನೀಡಿದೆ. ಈ ಬದಲಾವಣೆಗಳು ಸಿನಿಮಾದ ಘನತೆಯನ್ನು ಮತ್ತಷ್ಟು ಹೆಚ್ಚಿಸಿವೆ.
ಈ ಅಚಾತುರ್ಯದ ಬಗ್ಗೆ ಕೆವಿಎನ್ ಪ್ರೊಡಕ್ಷನ್ಸ್ ಪಾರದರ್ಶಕವಾಗಿ ತನ್ನ ‘ಎಕ್ಸ್’ ಖಾತೆಯಲ್ಲಿ ಸ್ಪಷ್ಟನೆ ನೀಡಿದೆ. ಟ್ರೈಲರ್ ಪ್ರಮಾಣೀಕರಣದ ಪ್ರಕ್ರಿಯೆಯಲ್ಲಿ ಅಜಾಗರೂಕತೆಯಿಂದ ಕೆಲವು ಅನ್ಸರ್ಟಿಫೈಡ್ ಕಂಟೆಂಟ್ ಸೇರ್ಪಡೆಯಾಗಿತ್ತು ಎಂದು ಸಂಸ್ಥೆ ವಿಷಾದ ವ್ಯಕ್ತಪಡಿಸಿದೆ. ಸರ್ಟಿಫಿಕೇಶನ್ ನಿಯಮಗಳನ್ನು ಪಾಲಿಸಲು ತಾವು ಬದ್ಧವಾಗಿದ್ದು, ಈಗ ಬಿಡುಗಡೆಯಾಗಿರುವ ಟ್ರೈಲರ್ ಸಂಪೂರ್ಣವಾಗಿ ಅಧಿಕೃತ ಮಾರ್ಗಸೂಚಿಗಳ ಅನ್ವಯ ಸಿದ್ಧವಾಗಿದೆ ಎಂದು ತಿಳಿಸಿದೆ. ಈ ಪ್ರಾಮಾಣಿಕ ನಡೆಗೆ ಸೋಷಿಯಲ್ ಮೀಡಿಯಾದಲ್ಲಿ ಈಗ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಒಟ್ಟಿನಲ್ಲಿ ಜೋಗಿ ಪ್ರೇಮ್ ನಿರ್ದೇಶನದ, ಧ್ರುವ ಸರ್ಜಾ ನಟನೆಯ ಈ ಮಾಸ್ ಎಂಟರ್ಟೈನರ್ ಈಗ ಎಲ್ಲ ಅಡೆತಡೆಗಳನ್ನು ದಾಟಿ ರಿಲೀಸ್ಗೆ ರೆಡಿಯಾಗಿದೆ. ಇದೇ ಏಪ್ರಿಲ್ 30ರಂದು ‘ಕೆಡಿ’ ರಾಜ್ಯಾದ್ಯಂತ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ. ಟ್ರೈಲರ್ನಲ್ಲಿ ಆಗಿರೋ ಈ ಹೊಸ ಬದಲಾವಣೆಗಳು ಮತ್ತು ಹೆಚ್ಚುವರಿ ದೃಶ್ಯಗಳು ಅಭಿಮಾನಿಗಳ ನಿರೀಕ್ಷೆಯನ್ನು ಮುಗಿಲು ಮುಟ್ಟಿಸಿವೆ. ಡೆವಿಲ್ ಅಬ್ಬರ ನೋಡಲು ಸಿನಿರಸಿಕರು ಈಗ ಬೆರಳಣಿಕೆಯ ದಿನಗಳನ್ನು ಎಣಿಸುತ್ತಿದ್ದಾರೆ.
