ನಾನಿ ಇನ್ಮೇಲೆ ನ್ಯಾಚುರಲ್ ಸ್ಟಾರ್ ಅಲ್, ಹಿಟ್ ಮಷೀನ್ ಅನ್ನೋದನ್ನ ಸ್ವತಃ ರಾಜಮೌಳಿಯೇ ಹೇಳಿದ್ರು. ಇದೀಗ ನಾನಿ ಅನ್ಸ್ಟಾಪಬಲ್ ಹಿಟ್ ಮಷೀನ್ ಅನ್ನೋದನ್ನ ಪ್ರೂವ್ ಮಾಡಿದ್ದಾರೆ. ನಾಲ್ಕೇ ದಿನಕ್ಕೆ 101 ಕೋಟಿ ಗಳಿಸೋ ಮೂಲಕ ಬಾಕ್ಸ್ ಆಫೀಸ್‌‌ನಲ್ಲಿ ಧೂಳೆಬ್ಬಿಸಿದೆ ಹಿಟ್-3.
ಅಸಿಸ್ಟೆಂಟ್ ಡೈರೆಕ್ಟರ್ ಆಗಿದ್ದ ಒಬ್ಬ ಸಾಧಾರಣ ಹುಡುಗ ಇಂದು ಪಕ್ಕದ ತೆಲುಗು ಚಿತ್ರರಂಗದ ಸೆನ್ಸೇಷನಲ್ ಸ್ಟಾರ್. ಸಹಜ ಹಾಗೂ ಸ್ವಾಭಾವಿಕ ನಟನೆಯಿಂದ ಚಿತ್ರಪ್ರೇಮಿಗಳಿಂದ ನ್ಯಾಚುರಲ್ ಸ್ಟಾರ್ ಪಟ್ಟ ಗಿಟ್ಟಿಸಿಕೊಂಡಿರೋ ನಾನಿ, ಖ್ಯಾತ ನಿರ್ದೇಶಕ ರಾಜಮೌಳಿಯ ನಿರೀಕ್ಷೆಯನ್ನೇ ಮೀರಿಸೋ ರೇಂಜ್‌ಗೆ ಬೆಳೆದು ನಿಂತಿದ್ದಾರೆ. ಅದಕ್ಕೆ ಕಾರಣ ಆತನ ಸಕ್ಸಸ್ ರೇಟ್ ಹಾಗೂ ಗ್ರಾಫ್.
ಮೇ 1ಕ್ಕೆ ತೆರೆಕಂಡ ಹಿಟ್-3 ಸಿನಿಮಾ ನಾನಿ ಕರಿಯರ್‌‌ನ ಮಹತ್ವದ ಸಿನಿಮಾ ಆಗಿ ಹೊರಹೊಮ್ಮಿದೆ. ಇದು ಹಿಟ್ ಫ್ರಾಂಚೈಸ್‌‌ನ ಮೂರನೇ ಸಿನಿಮಾ. ಇಲ್ಲಿಯವರೆಗೆ ಹಿಟ್ ಸೀರೀಸ್ ಸಿನಿಮಾಗಳಿಗೆ ಪ್ರೊಡ್ಯೂಸರ್ ಆಗಿದ್ದ ನಾನಿ, ಈ ಬಾರಿ ಬಂಡವಾಳ ಹೂಡುವುದರ ಜೊತೆಗೆ ತಾವೇ ಮೂರನೇ ಕೇಸ್‌‌ನ ಬಗೆಹರಿಸೋಕೆ ಮುಂದಾಗಿದ್ದರು. ಅದಕ್ಕೀಗ ಅಭೂತಪೂರ್ವ ಯಶಸ್ಸು ಸಿಕ್ಕಿದೆ.
ಹಿಟ್-3 ಸಿನಿಮಾಗೆ ವರ್ಲ್ಡ್‌ವೈಡ್ ಬೊಂಬಾಟ್ ರೆಸ್ಪಾನ್ಸ್ ಸಿಗ್ತಿದ್ದು, ರಿಲೀಸ್ ಆದ ನಾಲ್ಕೇ ದಿನದಲ್ಲಿ ಬರೋಬ್ಬರಿ 101 ಕೋಟಿ ಪೈಸಾ ವಸೂಲ್ ಮಾಡಿದೆ. ಇಲ್ಲಿ ನಾನಿ ಅರ್ಜುನ್ ಸರ್ಕಾರ್ ಅನ್ನೋ ಪೊಲೀಸ್ ಕಾಪ್ ಆಗಿ ರಕ್ತದ ಕೋಡಿ ಹರಿಸಿದ್ದಾರೆ. ಅಂದಹಾಗೆ ಹೈ ವೋಲ್ಟೇಜ್ ಸಸ್ಪೆನ್ಸ್ ಥ್ರಿಲ್ಲರ್ ಜಾನರ್ ಸಿನಿಮಾ ಆಗಿರೋ ಹಿಟ್-3ನಲ್ಲಿ ನಮ್ಮ ಕನ್ನಡತಿ, ಕೆಜಿಎಫ್ ಕ್ವೀನ್ ಶ್ರೀನಿಧಿ ಶೆಟ್ಟಿ ನಾಯಕನಟಿಯಾಗಿ ಕಾಣಿಸಿಕೊಂಡಿದ್ದಾರೆ.
ಇನ್ನು ಹಿಟ್-3 ಸಿನಿಮಾ ರಿಲೀಸ್‌ಗೂ ಮುನ್ನ ನಡೆದ ಪ್ರೀ ರಿಲೀಸ್ ಇವೆಂಟ್‌‌ನಲ್ಲಿ ರಾಜಮೌಳಿ ಭಾಗಿಯಾಗಿ, ನಾನಿಯ ಬೆಳವಣಿಗೆಯನ್ನ ಕೊಂಡಾಡಿದ್ರು. ಅಲ್ಲದೆ, ನನ್ನ ನಿರೀಕ್ಷೆ ಮೀರಿ ಬೆಳೆದಿರೋ ನಾನಿಯ ಕುರಿತು ಹೆಮ್ಮೆಯಿದೆ. ಆತ ನಮ್ಮ ಇಂಡಸ್ಟ್ರಿ ಪಾಲಿಗೆ ಹಿಟ್ ಮಷೀನ್ ಅಂದಿದ್ರು. ಆದ್ರೀಗ ನಾನಿ ನ್ಯಾಚುರಲ್ ಸ್ಟಾರ್ ಮಾತ್ರವಲ್ಲ, ಅನ್ಸ್ಟಾಪಬಲ್ ಹಿಟ್ ಮಷೀನ್ ಅನ್ನೋದು ಸಾಬೀತಾಗಿದೆ.
ಅದಕ್ಕೆ ಕಾರಣ ಅವ್ರ ಈ ಹಿಂದಿನ ಸಕ್ಸಸ್‌‌ಫುಲ್ ಸಿನಿಮಾಗಳು. ನಾನಿಯ ಈ ಹಿಂದಿನ ಸರಿಪೋದಾ ಶನಿವಾರಂ ಸಿನಿಮಾ ಗೆದ್ದು, ನೂರು ಕೋಟಿ ಕ್ಲಬ್ ಸೇರಿತ್ತು. ಅದಕ್ಕೂ ಮುಂಚಿನ ದಸರಾ ಸಿನಿಮಾ ಕೂಡ 100 ಕೋಟಿ ಗಳಿಸಿತ್ತು. ಇವೆರಡರ ನಡುವೆ ಬಂದಂತಹ ಹಾಯ್ ನಾನ್ನ ಚಿತ್ರ 74 ಕೋಟಿ ರೂಪಾಯಿ ಗಲ್ಲಾ ಪೆಟ್ಟಿಗೆ ತುಂಬಿಸಿತ್ತು. ಹೀಗೆ ಬ್ಯಾಕ್ ಟು ಬ್ಯಾಕ್ ಹಿಟ್ ಸಿನಿಮಾಗಳಿಂದ ನಾನಿಯ ಸ್ಟಾರ್ಡಮ್ ದಿನೇ ದಿನೆ ಹೆಚ್ಚಾಗ್ತಿದೆ. ಇನ್ನು ಮುಂದೆ ಬರೋಕೆ ಸಜ್ಜಾಗಿರೋ ಪ್ಯಾರಡೈಸ್ ಸಿನಿಮಾದಿಂದ ಮತ್ತೇನು ದಾಖಲೆ ಬರೀತಾರೆ ನಾನಿ ಅನ್ನೋದನ್ನ ನಿರೀಕ್ಷಿಸಬೇಕಿದೆ.
