ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ ‘ಟಾಕ್ಸಿಕ್’ (Toxic) ರಿಲೀಸ್ಗೆ ಮುನ್ನವೇ ಭಾರತೀಯ ಸಿನಿಮಾ ಉದ್ಯಮದಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಸಿನಿಮಾ ಬಿಡುಗಡೆಯಾಗುವ ಮೊದಲೇ ಥಿಯೇಟ್ರಿಕಲ್, ಡಿಜಿಟಲ್ ಮತ್ತು ಓವರ್ಸೀಸ್ ಹಕ್ಕುಗಳಿಗೆ ದಾಖಲೆ ಮಟ್ಟದ ಬೇಡಿಕೆ ಕಂಡುಬಂದಿದ್ದು, ‘ಟಾಕ್ಸಿಕ್’ ಈಗಾಗಲೇ ಬಿಸಿನೆಸ್ ವಿಚಾರದಲ್ಲಿ ಹೊಸ ಇತಿಹಾಸ ಬರೆಯುವ ಹಂತಕ್ಕೆ ತಲುಪಿದೆ.
ಯಶ್ ಅವರ ಕೆಜಿಎಫ್ ಸರಣಿಯ ಭಾರೀ ಕ್ರೇಜ್ ಬಳಿಕ ‘ಟಾಕ್ಸಿಕ್’ ಮೇಲಿನ ನಿರೀಕ್ಷೆ ಗಗನಕ್ಕೇರಿದೆ. ಇದೇ ಕಾರಣಕ್ಕೆ ಸಿನಿಮಾ ರಿಲೀಸ್ಗೆ ಮುನ್ನವೇ ವಿತರಕರು ಮತ್ತು ಓಟಿಟಿ ಪ್ಲಾಟ್ಫಾರ್ಮ್ಗಳು ‘ಟಾಕ್ಸಿಕ್’ ಹಕ್ಕುಗಳನ್ನು ಪಡೆಯಲು ನಾ ಮುಂದು, ತಾ ಮುಂದು ಎನ್ನುವಂತೆ ಪೈಪೋಟಿ ನಡೆಸುತ್ತಿವೆ.
ಈಗಾಗಲೇ ಆಂಧ್ರಪ್ರದೇಶ ಮತ್ತು ತೆಲಂಗಾಣದ ವಿತರಣೆ ಹಕ್ಕುಗಳು 120 ಕೋಟಿ ರೂಪಾಯಿಗೆ ಸೇಲಾಗಿರುವುದು ಸಿನಿಮಾ ಬಿಸಿನೆಸ್ನಲ್ಲಿ ದೊಡ್ಡ ಸುದ್ದಿಯಾಗಿದ್ದು, ‘ಟಾಕ್ಸಿಕ್’ ಕ್ರೇಜ್ ಎಷ್ಟಿದೆ ಎಂಬುದಕ್ಕೆ ಇದು ಸ್ಪಷ್ಟ ಸಾಕ್ಷಿಯಾಗಿದೆ. ಸಾಮಾನ್ಯವಾಗಿ ಸ್ಟಾರ್ ಸಿನಿಮಾಗಳಿಗೂ ಇಷ್ಟೊಂದು ಮೊತ್ತ ರಿಲೀಸ್ಗೂ ಮುನ್ನ ಲಭಿಸುವುದು ಅಪರೂಪವೇ ಸರಿ.
ಇದೀಗ ‘ಟಾಕ್ಸಿಕ್’ ಬಿಸಿನೆಸ್ನ ಹಾಟ್ ಟಾಪಿಕ್ ಆಗಿರುವುದು ಓಟಿಟಿ ರೈಟ್ಸ್. ನೆಟ್ಫ್ಲಿಕ್ಸ್, ಅಮೆಜಾನ್ ಪ್ರೈಮ್ ವಿಡಿಯೋ, Z5 ಸೇರಿದಂತೆ ಪ್ರಮುಖ ಎಲ್ಲಾ ಓಟಿಟಿ ಪ್ಲಾಟ್ಫಾರ್ಮ್ಗಳು ‘ಟಾಕ್ಸಿಕ್’ ಡಿಜಿಟಲ್ ಹಕ್ಕುಗಳಿಗಾಗಿ ಭಾರೀ ಆಸಕ್ತಿ ತೋರಿಸುತ್ತಿವೆ. ಮೂಲಗಳ ಪ್ರಕಾರ, ಓಟಿಟಿ ರೈಟ್ಸ್ಗೆ ಬರೋಬರಿ 300 ಕೋಟಿ ರೂಪಾಯಿ ಆಫರ್ಗಳು ಬಂದಿವೆ ಎನ್ನಲಾಗಿದೆ. ಇದು ಅಂತಿಮಗೊಂಡರೆ, ಭಾರತೀಯ ಸಿನಿ ಇತಿಹಾಸದಲ್ಲೇ ಅತಿದೊಡ್ಡ ಡಿಜಿಟಲ್ ಡೀಲ್ಗಳಲ್ಲಿ ಒಂದಾಗುವ ಸಾಧ್ಯತೆ ಇದೆ.
ದಕ್ಷಿಣ ಭಾರತದ ಇತರೆ ರಾಜ್ಯಗಳಲ್ಲಿಯೂ ‘ಟಾಕ್ಸಿಕ್’ಗೆ ಅದ್ಭುತ ಬೇಡಿಕೆ ಇದೆ. ತಮಿಳುನಾಡಿನ ವಿತರಣೆ ಹಕ್ಕುಗಳು ಸನ್ ನೆಟ್ವರ್ಕ್ ಪಾಲಾಗುವ ಸಾಧ್ಯತೆ ಹೆಚ್ಚಿದೆ ಎನ್ನಲಾಗಿದ್ದು, ತಮಿಳು ಮಾರುಕಟ್ಟೆಯಲ್ಲೂ ಯಶ್ ಫ್ಯಾನ್ಸ್ ಸಿನಿಮಾ ನೋಡಲು ತುದಿಗಾಲಲ್ಲಿ ನಿಂತಿದ್ದಾರೆ.
ಇನ್ನು ಕೇರಳದಲ್ಲಿ ದುಲ್ಕರ್ ಸಲ್ಮಾನ್ ಅಥವಾ ಪೃಥ್ವಿರಾಜ್ ಸುಕುಮಾರನ್ ಮೂಲಕ ಸಿನಿಮಾ ರಿಲೀಸ್ ಆಗಬಹುದು ಎಂಬ ಚರ್ಚೆ ಜೋರಾಗಿದ್ದು, ಇದು ‘ಟಾಕ್ಸಿಕ್’ಗೆ ಮತ್ತಷ್ಟು ದೊಡ್ಡ ಓಪನಿಂಗ್ ನೀಡುವ ಸಾಧ್ಯತೆ ಇದೆ.
ಕರ್ನಾಟಕದಲ್ಲಿ ‘ಟಾಕ್ಸಿಕ್’ ಸಿನಿಮಾ ರಿಲೀಸ್ ಮಾಡುವ ಹೊಣೆಗಾರಿಕೆಯನ್ನು ಕೆವಿಎನ್ ಪ್ರೊಡಕ್ಷನ್ ವಹಿಸಿಕೊಂಡಿದೆ. ಈಗಾಗಲೇ ವಿತರಣಾ ತಂತ್ರ ರೂಪಿಸಿರುವ ಕೆವಿಎನ್, ರಿಲೀಸ್ಗೂ ಮುನ್ನವೇ ಬಿಸಿನೆಸ್ನಲ್ಲೇ ಹೊಸ ದಾಖಲೆ ಬರೆಯುವ ಗುರಿ ಇಟ್ಟುಕೊಂಡಿದೆ.
ಇನ್ನು ಓವರ್ಸೀಸ್ ಮಾರುಕಟ್ಟೆಯಲ್ಲಿಯೂ ‘ಟಾಕ್ಸಿಕ್’ಗೆ ಭಾರೀ ಡಿಮ್ಯಾಂಡ್ ಕಂಡುಬಂದಿದೆ. ಅಮೆರಿಕಾ, ಯುರೋಪ್, ಮಧ್ಯಪ್ರಾಚ್ಯ, ಆಸ್ಟ್ರೇಲಿಯಾ ಸೇರಿದಂತೆ ಎಲ್ಲಾ ಪ್ರಮುಖ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಸಿನಿಮಾ ಎಲ್ಲಾ ಭಾಷೆಗಳಲ್ಲೂ ಬಿಡುಗಡೆಯಾಗುವ ನಿರೀಕ್ಷೆ ಇದೆ.
ಸದ್ಯ ಲಭ್ಯವಿರುವ ಮಾಹಿತಿಯ ಪ್ರಕಾರ, ‘ಟಾಕ್ಸಿಕ್’ ಸಿನಿಮಾ ರಿಲೀಸ್ಗೆ ಮುನ್ನವೇ 650 ಕೋಟಿ ರೂಪಾಯಿಗೂ ಹೆಚ್ಚು ಬಿಸಿನೆಸ್ ಮಾಡಿರುವ ಅಂದಾಜು ಇದೆ. ಇನ್ನು ಕೆವಿಎನ್ ಪ್ರೊಡಕ್ಷನ್, ರಿಲೀಸ್ಗೂ ಮುನ್ನವೇ 1000 ಕೋಟಿ ರೂಪಾಯಿ ಬಿಸಿನೆಸ್ ಗುರಿ ಇಟ್ಟುಕೊಂಡು ಕಾರ್ಯತಂತ್ರ ರೂಪಿಸುತ್ತಿದೆ ಎನ್ನಲಾಗಿದೆ.
