ಬೆಂಗಳೂರು, ಜೂನ್ 17: ಕನ್ನಡ ಚಿತ್ರರಂಗದ ಜನಪ್ರಿಯ ನಟಿ ಶರ್ಮಿಳಾ ಮಾಂಡ್ರೆ (Sharmila Mandre) ಅವರು ವೈವಾಹಿಕ ಜೀವನಕ್ಕೆ ಕಾಲಿಡಲು ಸಜ್ಜಾಗಿದ್ದಾರೆ. ಕನ್ನಡದ ಮಣ್ಣಿನಲ್ಲಿ ಬೆಳೆದು, ತಮಿಳು, ತೆಲುಗು ಸೇರಿದಂತೆ ಹಲವು ಭಾಷಾ ಚಿತ್ರಗಳಲ್ಲಿ ತಮ್ಮ ಅಭಿನಯದ ಮೂಲಕ ಜನಪ್ರಿಯತೆ ಗಳಿಸಿದ ಶರ್ಮಿಳಾ ಅವರು ತಮಿಳುನಾಡಿನ ಸೊಸೆಯಾಗಲಿದ್ದಾರೆ.
ಶರ್ಮಿಳಾ ಅವರ ನಿಶ್ಚಿತಾರ್ಥವು ಜೂನ್ 25 ರಂದು ಕುಟುಂಬಸ್ಥರ ಸಮ್ಮುಖದಲ್ಲಿ ನಡೆಯಲಿದೆ ಎಂದು ಅವರ ಕುಟುಂಬದ ಮೂಲಗಳು ತಿಳಿಸಿವೆ. ಸುದ್ದಿಯನ್ನು ಖಚಿತಪಡಿಸಿರುವ ನಟಿಯ ಪರಿವಾರದವರು, ಈ ನಿಶ್ಚಿತಾರ್ಥವು ಅತ್ಯಂತ ಸರಳ ಮತ್ತು ಆಪ್ತರ ಸಮ್ಮುಖದಲ್ಲಿ ನಡೆಯಲಿದೆ ಎಂದು ತಿಳಿಸಿದ್ದಾರೆ.
ವರು ಯಾರು?
ಶರ್ಮಿಳಾ ಮಾಂಡ್ರೆ ಅವರು ತಮಿಳು ಚಿತ್ರರಂಗದ ಪ್ರತಿಷ್ಠಿತ ನಿರ್ಮಾಪಕ ಸುಧನ್ ಸುಂಧರಮ್ (Sudhan Sundharam) ಅವರ ಕೈ ಹಿಡಿಯಲಿದ್ದಾರೆ. ಸುಧನ್ ಅವರು ಖ್ಯಾತ ನಿರ್ಮಾಣ ಸಂಸ್ಥೆಯಾದ ಪ್ಯಾಷನ್ ಸ್ಟುಡಿಯೋಸ್ನ ಮಾಲೀಕರಾಗಿದ್ದು, ಸಿನಿಮಾ ನಿರ್ಮಾಣ ಮತ್ತು ವಿತರಣೆಯಲ್ಲಿ ಸಕ್ರಿಯರಾಗಿದ್ದಾರೆ.
ಸುಧನ್ ಅವರು 2024ರಲ್ಲಿ ಬಿಡುಗಡೆಯಾಗಿ ಸೂಪರ್ ಹಿಟ್ ಆಗಿದ್ದ ತಮಿಳು ಚಿತ್ರ ‘ಮಹಾರಾಜ’ (Maharaja) ನ ನಿರ್ಮಾಪಕರಾಗಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾಗಿ ಭಾರೀ ಯಶಸ್ಸು ಕಂಡ ‘ತಾಕ್ ಕಿಳವಿ’ (Thak Kilavi) ಚಿತ್ರಕ್ಕೂ ಅವರು ಸಹ-ನಿರ್ಮಾಪಕರಾಗಿದ್ದಾರೆ.
ಇದರ ಜೊತೆಗೆ ‘ಬೆಂಜ್’, ‘ಇರೈವನ್’ ಮುಂತಾದ ಹಲವು ತಮಿಳು ಚಿತ್ರಗಳನ್ನು ಸುಧನ್ ಅವರು ನಿರ್ಮಿಸಿದ್ದಾರೆ. ಕರಾಟೆ ಕೋವಿಯಂಡ್ ಹೆಸರಿನ ಪ್ರಸಿದ್ಧ ಕುಟುಂಬಕ್ಕೆ ಸೇರಿರುವ ಸುಧನ್ ಅವರು, ತಮಿಳು ಚಿತ್ರರಂಗದಲ್ಲಿ ಜನಪ್ರಿಯತೆ ಗಳಿಸಿದ್ದಾರೆ..
ಶರ್ಮಿಳಾ ಮಾಂಡ್ರೆ ಸಿನಿಮಾ ಜರ್ನಿ
2007ರಲ್ಲಿ ‘ಸಜನಿ’ (Sajani) ಚಿತ್ರದ ಮೂಲಕ ಬೆಳ್ಳಿತೆರೆಗೆ ಪಾದಾರ್ಪಣೆ ಮಾಡಿದ ಶರ್ಮಿಳಾ ಮಾಂಡ್ರೆ, ಕನ್ನಡ, ತೆಲುಗು, ತಮಿಳು ಸೇರಿದಂತೆ ಹಲವು ಭಾಷೆಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ‘ಗುಲಾಮ’, ‘ಜಾನಿ ಮೇರಾ ನಾಮ್’ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಪ್ರಸ್ತುತ ಅವರು ತಮಿಳು ಚಿತ್ರ ‘ಅದೃಷ್ಟಶಾಲಿ’ (Adrushtashali) ಮತ್ತು ಕನ್ನಡ ಚಿತ್ರ ‘ದಸರಾ’ (Dasara) ಎಂಬ ಎರಡು ಪ್ರಮುಖ ಯೋಜನೆಗಳಲ್ಲಿ ನಟಿಸುತ್ತಿದ್ದಾರೆ.
ಶರ್ಮಿಳಾ ಕೇವಲ ನಟಿಯಾಗಿರದೆ, ನಿರ್ಮಾಪಕಿಯೂ ಆಗಿದ್ದಾರೆ. ತಮಿಳಿನಲ್ಲಿ ನಾಲ್ಕು ಚಿತ್ರಗಳನ್ನು ನಿರ್ಮಿಸಿರುವ ಅವರು, ಇದೀಗ ಕನ್ನಡದ ‘ದಸರಾ’ ಮತ್ತು ತಮಿಳಿನ ‘ಕಾದಲ್ ಕೊಂಜಂ ತೂಕಲಾ’ (Kaadhal Konjam Thookala) ಎಂಬ ಚಿತ್ರಗಳನ್ನು ಸಹ ನಿರ್ಮಾಣ ಮಾಡುತ್ತಿದ್ದಾರೆ.
ಮದುವೆಯ ದಿನಾಂಕ ಮತ್ತು ವಿಶೇಷತೆ
ಜೂನ್ 25ರಂದು ನಡೆಯಲಿರುವ ನಿಶ್ಚಿತಾರ್ಥವು ಕೇವಲ ಕುಟುಂಬಸ್ಥರಿಗಷ್ಟೇ ಸೀಮಿತವಾಗಿದ್ದು, ಮುಂದಿನ ದಿನಗಳಲ್ಲಿ ಅದ್ದೂರಿಯಾಗಿ ಮದುವೆ ನೆರವೇರಲಿದೆ ಎಂದು ಮೂಲಗಳು ತಿಳಿಸಿವೆ. ಮದುವೆಯು ಸಹ 2026ರ ಒಳಗಾಗಿಯೇ ನೆರವೇರಲಿದೆ ಎನ್ನಲಾಗಿದೆ. ತಮಿಳು ಮತ್ತು ಕನ್ನಡ ಚಿತ್ರರಂಗದ ಈ ಮೇಳವು ಸಿನಿಮಾ ವಲಯದಲ್ಲಿ ವಿಶೇಷ ಕುತೂಹಲವನ್ನು ಮೂಡಿಸಿದ್ದು, ಇಬ್ಬರ ಅಭಿಮಾನಿಗಳು ಮತ್ತು ಸಹ-ಕಲಾವಿದರು ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ.
