ಮುಂಬೈ, ಏಪ್ರಿಲ್ 1: ನಟಿ ಪೂನಂ ಪಾಂಡೆ ಅವರು ಮಂಗಳವಾರ (ಮಾರ್ಚ್ 31) ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಗರ್ಭಿಣಿ (Baby Bump) ಫೋಟೋಗಳನ್ನು ಹಂಚಿಕೊಂಡು ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದ್ದರು. ಆದರೆ, ಬುಧವಾರ (ಏಪ್ರಿಲ್ 1) ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ ಈ ಸುದ್ದಿಯು ಏಪ್ರಿಲ್ ಫೂಲ್ ಪ್ರಾಂಕ್ ಎಂದು ಸ್ಪಷ್ಟಪಡಿಸಿದ್ದಾರೆ.
“ನಿಮ್ಮೆಲ್ಲರ ಶುಭಾಶಯಗಳಿಗೆ ಧನ್ಯವಾದಗಳು. ಆದರೆ ನಾನು ಗರ್ಭಿಣಿಯಲ್ಲ. ಇಂದು ಏಪ್ರಿಲ್ ಫೂಲ್ ಆಗಿರುವುದರಿಂದ ನಾನು ಈ ಪ್ರಾಂಕ್ ಮಾಡಿದ್ದೇನೆ. ಜಗತ್ತಿನಲ್ಲಿ ಯುದ್ಧ ನಡೆಯುತ್ತಿದೆ, ಎಲ್ಲರೂ ಒತ್ತಡದಲ್ಲಿದ್ದಾರೆ. ನಿಮ್ಮನ್ನು ಸ್ವಲ್ಪ ಮನರಂಜಿಸೋಣ ಎಂದು ಈ ರೀತಿ ಮಾಡಿದೆ” ಎಂದು ವಿಡಿಯೋದಲ್ಲಿ ಪೂನಂ ಹೇಳಿದ್ದಾರೆ.
“ನಾನು ಪೂನಂ ಪಾಂಡೆ, ನಿಮ್ಮನ್ನು ಶಾಕ್ ಮಾಡುವುದು ನನ್ನ ಹಕ್ಕು. ಜೀವನವನ್ನು ಗಂಭೀರವಾಗಿ ತೆಗೆದುಕೊಳ್ಳಬೇಡಿ,” ಎಂದು ತಿಳಿಸಿದ್ದಾರೆ. ಈ ವಿಡಿಯೋ ಹೊರಬಿದ್ದ ಕೂಡಲೇ ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಕೆಲವರು ಇದನ್ನು ಮನರಂಜನೆಯಾಗಿ ಸ್ವೀಕರಿಸಿದರೆ, ಇನ್ನೂ ಕೆಲವರು ಗಂಭೀರ ವಿಷಯಗಳನ್ನು ಹೀಗೆ ಪ್ರಾಂಕ್ ಮಾಡುವುದು ಸೂಕ್ತವಲ್ಲ ಎಂದು ಟೀಕಿಸಿದ್ದಾರೆ.
ಎಐ ಫೋಟೋಗಳಿಂದ ಮೊದಲೇ ಮೂಡಿತ್ತು ಅನುಮಾನ:
ಪೂನಂ ಅವರು ಹಂಚಿಕೊಂಡಿದ್ದ Baby Bump ಫೋಟೋಗಳ ಕೆಳಗೆ ಎಕ್ಸ್ (ಟ್ವಿಟ್ಟರ್) ವೇದಿಕೆಯಲ್ಲಿ “Made with AI” ಎಂಬ ಸಂದೇಶವನ್ನು ಸ್ಪಷ್ಟವಾಗಿ ನಮೂದಿಸಲಾಗಿತ್ತು. ಈ ಕಾರಣದಿಂದಾಗಿಯೇ ಅನೇಕ ಅಭಿಮಾನಿಗಳು ಮತ್ತು ನೆಟ್ಟಿಗರು ಫೋಟೋಗಳು ನಿಜವಲ್ಲ ಎಂದು ಮೊದಲೇ ಅನುಮಾನ ವ್ಯಕ್ತಪಡಿಸಿದ್ದರು. ಅಲ್ಲದೆ, ಕೆಲವು ವಾರಗಳ ಹಿಂದಷ್ಟೇ ಮುಂಬೈನಲ್ಲಿ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದ ಅವರಲ್ಲಿ ಗರ್ಭಧಾರಣೆಯ ಯಾವುದೇ ಲಕ್ಷಣಗಳು ಇರಲಿಲ್ಲ. ಹೀಗಾಗಿ, ಈ ಪ್ರಾಂಕ್ ಬಗ್ಗೆ ಅನೇಕರು ನಿರೀಕ್ಷೆ ವ್ಯಕ್ತಪಡಿಸಿದ್ದರು.
ಹಲವು ವಿವಾದಗಳಲ್ಲಿ ಪೂನಂ ಪಾಂಡೆ
ನಟಿ ಪೂನಂ ಪಾಂಡೆ ಇಂತಹ ವಿವಾದಾತ್ಮಕ ಪ್ರಚಾರಗಳಿಗೆ ಹೊಸಬರೇನಲ್ಲ. ಫೆಬ್ರವರಿ 2024 ರಲ್ಲಿ ತಾವು ಗರ್ಭಕಂಠದ ಕ್ಯಾನ್ಸರ್ (Cervical Cancer) ನಿಂದ ಸಾವನ್ನಪ್ಪಿರುವುದಾಗಿ ಸುಳ್ಳು ಸುದ್ದಿ ಹಬ್ಬಿಸಿ ತೀವ್ರ ಟೀಕೆಗೆ ಗುರಿಯಾಗಿದ್ದರು. ನಂತರ ಅದು ಕೇವಲ ಕ್ಯಾನ್ಸರ್ ಜಾಗೃತಿ ಮೂಡಿಸಲು ಮಾಡಿದ ‘ಮಾರ್ಕೆಟಿಂಗ್ ತಂತ್ರ’ ಎಂದು ಸಮರ್ಥಿಸಿಕೊಂಡಿದ್ದರು. ಆ ಘಟನೆಯು ಸಾಕಷ್ಟು ವಿವಾದ ಸೃಷ್ಟಿಸಿತ್ತು. ನಂತರದ ದಿನಗಳಲ್ಲಿ ವೈಯಕ್ತಿಕ ಜೀವನ ಮತ್ತು ವಿವಾದಗಳ ಮೂಲಕವೇ ಅವರು ಸುದ್ದಿಯಲ್ಲಿದ್ದರು.
