ಶಂಕರ್ ನಿರ್ದೇಶನದ ಮುಧಲ್ವನ್ ಚಿತ್ರ ಇಂದಿಗೂ ಇವರ್ಗ್ರೀನ್. ಅದ್ರಂತೆ ಇಂದು ರಾಜ್ಯಾದ್ಯಂತ ತೆರೆಕಂಡಿರೋ ಕಾಮನ್ ಮ್ಯಾನ್ ಕೂಡ ಪ್ರತಿಯೊಬ್ಬ ಕನ್ನಡಿಗನಿಗೆ ಕನೆಕ್ಟ್ ಆಗುವಂತಿದೆ. ಸಾಮಾನ್ಯ ವ್ಯಕ್ತಿಯೊಬ್ಬ ರಾಜ್ಯದ ಮುಖ್ಯಮಂತ್ರಿ ಆದ್ರೆ ಏನೆಲ್ಲಾ ಆಗುತ್ತೆ ಅನ್ನೋ ಪರಿಕಲ್ಪನೆಯ ಆಧಾರದ ಮೇಲೆ ಸಿನಿಮಾ ಕೇಂದ್ರೀಕೃತವಾಗಿದೆ. ಹಾಗಾದ್ರೆ ಕಥೆ ಏನು..? ಆರ್ಟಿಸ್ಟ್ಗಳು ಹೇಗೆ ಪರ್ಫಾಮ್ ಮಾಡಿದ್ದಾರೆ..? ಪ್ರೇಕ್ಷಕರು ಏನಂದ್ರು ಅನ್ನೋ ಕಂಪ್ಲೀಟ್ ರಿವ್ಯೂ ರಿಪೋರ್ಟ್ ಇಲ್ಲಿದೆ.
- ‘ಕಾಮನ್ ಮ್ಯಾನ್’ CM ಆದ್ರು.. ಚಿತ್ರಪ್ರೇಮಿಗಳು ಏನಂದ್ರು?
- ಪ್ರಸ್ತುತ ಸಮಾಜ, ವ್ಯವಸ್ಥೆ & ರಾಜಕೀಯ ವಿಡಂಬನೆಯ ಕಥೆ
- ಕೆರೆಬೇಟೆ ಗೌರಿಶಂಕರ್ ಕರಿಯರ್ಗೆ ಮತ್ತೊಂದು ಭರವಸೆ
- ಅನ್ನದಾತ ನರಸಿಂಹಮೂರ್ತಿ ಸಿನಿಮೋತ್ಸಾಹ ಮೆಚ್ಚುವಂತಿದೆ
ಕಾಮನ್ ಮ್ಯಾನ್.. ನಾನೇ ಸಿಎಂ. ಇಂದು ರಾಜ್ಯದಾದ್ಯಂತ ಅದ್ಧೂರಿಯಾಗಿ ತೆರೆಕಂಡಿರೋ ಸಿನಿಮಾ. ಟ್ರೈಲರ್, ಸಾಂಗ್ಸ್ ಹಾಗೂ ಮೇಕಿಂಗ್ನಿಂದ ಭರವಸೆ ಮೂಡಿಸಿದ್ದ ಈ ಸಿನಿಮಾ ರಿಲೀಸ್ ಬಳಿಕ ಆ ಭರವಸೆಯನ್ನ ಹುಸಿಯಾಗಿಸಿಲ್ಲ. ಹೌದು.. ಒಬ್ಬ ಸಾಮಾನ್ಯ ವ್ಯಕ್ತಿ ರಾಜ್ಯದ ಮುಖ್ಯಮಂತ್ರಿ ಆದ್ರೆ ಹೇಗಿರುತ್ತೆ ಅನ್ನೋದು ಈ ಚಿತ್ರದ ಒನ್ ಲೈನ್ ಸ್ಟೋರಿ. ಈ ಹಿಂದೆ ಶಂಕರ್ ನಿರ್ದೇಶನದಲ್ಲಿ ಅರ್ಜುನ್ ಸರ್ಜಾ ಹಾಗೂ ರಘುವರಣ್ ಕಾಂಬೋನಲ್ಲಿ ಮುಧಲ್ವನ್ ಸಿನಿಮಾ ಮೂಡಿಬಂದಿತ್ತು. ಈಗ ಅದೇ ಶೈಲಿಯ ಸಿನಿಮಾ ಆಗಿ ಕಾಮನ್ ಮ್ಯಾನ್ ಎಲ್ಲರ ಹುಬ್ಬೇರಿಸುವಂತಿದೆ.
ಕೆರೆಬೇಟೆ ಚಿತ್ರದ ನಾಯಕನಟ ಗೌರಿಶಂಕರ್ ಇಲ್ಲಿ ನಾಯಕನಟನಾಗಿ ಕುಮಾರ್ ಕಂಸಾಳೆ ಅನ್ನೋ ವಕೀಲನ ಪಾತ್ರ ನಿರ್ವಹಿಸಿದ್ದಾರೆ. ಇನ್ನೂ ಈ ಚಿತ್ರದ ಖಳನಟನಾಗಿ ಅಂದ್ರೆ ರಾಜ್ಯದ ಮುಖ್ಯಮಂತ್ರಿ ಹಾಗೂ ಮಾಜಿ ಮುಖ್ಯಮಂತ್ರಿ ಮಾವಳ್ಳಿ ಸದಾಶಿವರಾವ್ ಆಗಿ ಡಾ ಎನ್ ನರಸಿಂಹಮೂರ್ತಿ ಕಾಣಿಸಿಕೊಂಡಿದ್ದಾರೆ. ಅಲ್ಲದೆ, ರಮೇಶ್ ಭಟ್, ಸೋನಾ ಲದ್ವಾ, ಅಶೋಕ್, ನಾಗೇಂದ್ರ ಅರಸ್, ಬಲರಾಜ್ವಾಡಿ, ಪಿ ಡಿ ಸತೀಶ್, ಪ್ರಕಾಶ್ ತುಮ್ಮಿನಾಡು, ಗಣೇಶ್ ರಾವ್ ಕೇಸರ್ಕರ್.. ಹೀಗೆ ದೊಡ್ಡ ತಾರಾಗಣವಿದೆ.
ಇಂಟರೆಸ್ಟಿಂಗ್ ಅಂದ್ರೆ.. ಈ ಸಿನಿಮಾದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಉದ್ಯಮಿ, ಸಮಾಜ ಸೇವಕ ಡಾ ಎನ್ ನರಸಿಂಹಮೂರ್ತಿ ಪದಾರ್ಪಣೆ ಮಾಡಿದ್ದಾರೆ. ಚೊಚ್ಚಲ ಚಿತ್ರದಲ್ಲೇ ಸಹಜ ಅಭಿನಯದಿಂದ ಭೇಷ್ ಅನಿಸಿಕೊಂಡಿದ್ದಾರೆ. ಹೌದು.. ಸಮಾಜ ಹಾಗೂ ರಾಜಕೀಯ ವ್ಯವಸ್ಥೆಯ ಕೈಗನ್ನಡಿಯಂತಿರೋ ಈ ಕಾಮನ್ ಮ್ಯಾನ್ ಸಿನಿಮಾಗೆ ಕಥೆ ಬರೆದಿರೋದು ಕೂಡ ಅವರೇ. ಅಷ್ಟೇ ಅಲ್ಲ, ಕಥೆ ಬರೆದು, ಅದ್ಧೂರಿಯಾಗಿ ನಿರ್ಮಾಣ ಮಾಡಿ, ಗಮನ ಸೆಳೆಯುವ ಪಾತ್ರದಲ್ಲಿ ನಟಿಸೋ ಮೂಲಕ ತಮ್ಮ ಸಿನಿಮೋತ್ಸಾಹ ಎಂಥದ್ದು ಅನ್ನೋದನ್ನ ತೋರಿಸಿದ್ದಾರೆ.
ಬರೋಬ್ಬರಿ 106 ಸಿನಿಮಾಗಳನ್ನ ನಿರ್ದೇಶನ ಮಾಡಿರೋ ಹಿರಿಯ ನಿರ್ದೇಶಕ ಓಂ ಸಾಯಿ ಪ್ರಕಾಶ್ ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿರೋದು ವಿಶೇಷ. ಬರವಣಿಗೆ ಮೆಚ್ಚುವಂತಿದ್ದು, ಅಲ್ಲಲ್ಲಿ ಡೈಲಾಗ್ಸ್ ವೆರಿ ಇಂಪ್ರೆಸ್ಸೀವ್ ಅನಿಸಲಿವೆ. ಡಾ ವಿ ನಾಗೇಂದ್ರ ಪ್ರಸಾದ್ ಹಾಗೂ ಸಾಯಿ ಸರ್ವೇಶ್ ಅವರ ಸಾಹಿತ್ಯ, ಜೆ ಜೆ ಕೃಷ್ಣ-ದೀಪಕ್ ಕುಮಾರ್ ಅವ್ರ ಸಿನಿಮಾಟೋಗ್ರಫಿ, ವಿನಯ್ ಚಂದ್ರ ಸಂಗೀತ ಹಾಗೂ ಹಿನ್ನೆಲೆ ಸಂಗೀತ ಚಿತ್ರಕ್ಕೆ ಪ್ಲಸ್ ಆಗಿದೆ.
- ಸರ್ಕಾರದ ಆಸ್ತಿ ಸಾರ್ವಜನಿಕರ ಆಸ್ತಿ.. ವಿಧಾನಸೌಧದಲ್ಲಿ ಪಾಲು
- ರಾಜಕಾರಣಿಗಳ ಮನಸ್ಥಿತಿ.. ಸಮಾಜದ ಪರಿಸ್ಥಿತಿ & ‘ಅ’ವ್ಯವಸ್ಥೆ..!
ಸರ್ಕಾರದ ಆಸ್ತಿ ಸಾರ್ವಜನಿಕರ ಆಸ್ತಿ. ಹಾಗಾಗಿ ನನಗೂ ಅದರಲ್ಲಿ ಪಾಲು ಬೇಕಿದೆ ಅಂತ ಕೋರ್ಟ್ನಲ್ಲಿ ಕೇಸ್ ಹಾಕುವ ಮೂಲಕ ಸಿಎಂ ಕುರ್ಚಿಯನ್ನೇ ಅಲುಗಾಡಿಸೋ ಯೂತ್ ಕುರಿತ ಕಥಾನಕ ಇದಾಗಿದೆ. ಇದು ರಾಜಕೀಯ ವಿಡಂಬನಾತ್ಮಕ ಸಿನಿಮಾ ಆಗಿದ್ದು, ಇಲ್ಲಿ ರಾಜಕಾರಣಿಗಳ ಮನಸ್ಥಿತಿಗಳು, ಸಮಾಜದ ಪರಿಸ್ಥಿತಿಗಳು, ವ್ಯವಸ್ಥೆಯ ಅವ್ಯವಸ್ಥೆ ಕಣ್ಣಿಗೆ ಕಟ್ಟಿದಂತಿದೆ. ಕೆರೆಬೇಟೆ ಗೌರಿಶಂಕರ್ ಸಿಎಂ ಆದ ಬಳಿಕ ಹಾಕುವ ಮಾರುವೇಷಗಳು ಆಗ ರಾಜರುಗಳು ರಾಜ್ಯ ಪರ್ಯಟನೆ ವೇಳೆ ಜನರ ನೋವು-ನಲಿವು ವಿಚಾರಿಸಲು ಮಾರುವೇಷ ಹಾಕುತ್ತಿದ್ದರು ಅನ್ನೋದನ್ನ ನೆನಪಿಸುತ್ತೆ.
ಹಾಸ್ಯ, ಆ್ಯಕ್ಷನ್, ಡೈಲಾಗ್ ಪಂಚ್ಗಳ ಜೊತೆ ಪ್ರತಿಯೊಬ್ಬ ಕಾಮನ್ ಮ್ಯಾನ್ಗೂ ಕನೆಕ್ಟ್ ಆಗುವಂತಿದೆ ಈ ಸಿನಿಮಾ. ನಿರ್ದೇಶಕರು ಈ ಜನರೇಷನ್ನ GenZಗೆ ಇಷ್ಟವಾಗುವಂತೆ ಇನ್ನೊಂದಷ್ಟು ಸ್ಪೈಸಿಯಾಗಿ ಈ ಸಿನಿಮಾನ ಕಟ್ಟಿಕೊಡಬಹುದಿತ್ತು. ಹೀರೋ ಫ್ರೆಂಡ್ಸ್ ರೋಲ್ ಮಾಡಿರೋರಿಂದ ಅಭಿನಯ ತೆಗೆಸುವುದರಲ್ಲಿ ಫೇಲ್ ಆಗಿದ್ದಾರೆ. ಪ್ರಕಾಶ್ ತುಮ್ಮಿನಾಡ್ ಹಾಗೂ ಪಿಡಿ ಸತೀಶ್ರಿಂದ ಮತ್ತಷ್ಟು ಹಾಸ್ಯ ನಿರೀಕ್ಷಿಸಬಹುದಿತ್ತು. ಸಂಕಲನಕಾರ ಕೂಡ ತಮ್ಮ ಕೆಲಸವನ್ನ ಅಚ್ಚುಕಟ್ಟಾಗಿ ನಿರ್ವಹಿಸಿಲ್ಲ. ಉಳಿದಂತೆ ಪ್ರಸ್ತುತ ಸಮಾಜಕ್ಕೆ ಇದು ಹೇಳಿ ಮಾಡಿಸಿದಂತಹ ಸಿನಿಮಾ. ಇಡೀ ಟೀಂನ ಎಫರ್ಟ್ ಮೆಚ್ಚುವಂತಿದೆ. ನಿರ್ಮಾಪಕ ನರಸಿಂಹಮೂರ್ತಿ ಅವ್ರಿಗೆ ಆ ಕದಿರಿ ನರಸಿಂಹಸ್ವಾಮಿ ಕೈ ಹಿಡಿದು, ಬಾಕ್ಸ್ ಆಫೀಸ್ ಚೆನ್ನಾಗಿ ಆದಲ್ಲಿ ಅವ್ರ ಸಿನಿಮೋತ್ಸಾಹ ದುಪ್ಪಟ್ಟು ಆಗಲಿದೆ. ಮತ್ತಷ್ಟು ಇಂತಹ ಸದಭಿರುಚಿಯ ಚಿತ್ರಗಳನ್ನ ಮಾಡಲು ಹುಮ್ಮಸ್ಸು ಹೆಚ್ಚಲಿದೆ. ದುಡ್ಡು ಕೊಟ್ಟು ಸಿನಿಮಾ ನೋಡೋರಿಗೆ.. ಅದು ಮೋಸ ಆಗದಂತೆ ಒಂದು ಸ್ಟ್ರಾಂಗ್ ಮೆಸೇಜ್ ಅಂತೂ ಗ್ಯಾರಂಟಿ ಸಿಗಲಿದೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
