ಬೆಂಗಳೂರು (ಜ.30): ನಟ ಡಾಲಿ ಧನಂಜಯ್ ಅವರು ಮಾಂಸಾಹಾರ ಸೇವನೆ ಸಂಬಂಧಿಸಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಎದ್ದಿದ್ದ ಪರ-ವಿರೋಧ ಚರ್ಚೆಗಳ ಬಗ್ಗೆ ಕೊನೆಗೂ ಮೌನ ಮುರಿದಿದ್ದಾರೆ. ಇತ್ತೀಚೆಗೆ ಡಾಲಿ ಧನಂಜಯ್ ಅವರು ನಾನ್ ವೆಜ್ ಬಿರಿಯಾನಿ ಸೇವಿಸಿರುವ ವಿಡಿಯೋ ಮತ್ತು ಫೋಟೋಗಳು ವೈರಲ್ ಆಗುತ್ತಿದ್ದಂತೆ, ಆಹಾರ ಪದ್ಧತಿಯನ್ನು ಸಮುದಾಯ, ಜಾತಿ ಮತ್ತು ಧಾರ್ಮಿಕ ವಿಚಾರಗಳೊಂದಿಗೆ ಜೋಡಿಸಿ ಕೆಲವರು ಪ್ರಶ್ನೆಗಳನ್ನು ಎತ್ತಿದ್ದರು. ಈ ವಿಚಾರ ತೀವ್ರ ವಿವಾದಕ್ಕೆ ತಿರುಗುತ್ತಿದ್ದಂತೆ, ಸ್ವತಃ ಧನಂಜಯ್ ಸುದ್ದಿಗೋಷ್ಠಿ ನಡೆಸಿ ತಮ್ಮ ನಿಲುವನ್ನು ಸ್ಪಷ್ಟಪಡಿಸಿದ್ದಾರೆ.
ಮಾಂಸಾಹಾರ ಸೇವನೆ ಕುರಿತು ಮಾತನಾಡಿದ ಡಾಲಿ ಧನಂಜಯ್, “ನನ್ನ ಆಹಾರ ನನ್ನ ವೈಯಕ್ತಿಕ ಆಯ್ಕೆ. ಆಹಾರ ಪದ್ಧತಿ ಬಗ್ಗೆ ನಾನು ಎಂದಿಗೂ ಸಾರ್ವಜನಿಕವಾಗಿ ಮಾತನಾಡಲು ಆಸಕ್ತಿ ಹೊಂದಿರಲಿಲ್ಲ. ಆದರೆ, ಈ ವಿಚಾರ ಇಷ್ಟೊಂದು ದೊಡ್ಡ ವಿವಾದವಾಗುತ್ತದೆ ಎಂದು ನಾನು ನಿರೀಕ್ಷಿಸಿರಲಿಲ್ಲ” ಎಂದು ಹೇಳಿದ್ದಾರೆ. ತಮ್ಮ ಸ್ನೇಹಿತನ ಹೋಟೆಲ್ಗೆ ಹೋಗಿ ಪ್ರೀತಿಯಿಂದ ಬಿರಿಯಾನಿ ಸೇವಿಸಿದ್ದೇ ಈ ಚರ್ಚೆಗೆ ಕಾರಣವಾಗಿದೆ ಎಂಬುದನ್ನು ಅವರು ವಿವರಿಸಿದ್ದಾರೆ.
“ನಾನು ಇನ್ಸೆಂಟ್ ಆಗಿ ಸ್ನೇಹಿತನ ಹೋಟೆಲ್ಗೆ ಹೋಗಿದ್ದೆ. ಅಲ್ಲಿ ಪ್ರೀತಿಯಿಂದ ಕೊಟ್ಟ ಬಿರಿಯಾನಿ ತಿಂದೆ. ಅದನ್ನೇ ದೊಡ್ಡ ವಿಷಯ ಮಾಡಿದ್ದು ನನಗೆ ಆಘಾತ ತಂದಿದೆ. ನಾನು ಈಗಾಗಲೇ 10 ರಿಂದ 15 ಬಿರಿಯಾನಿ ಶಾಪ್ಗಳನ್ನು ಆರಂಭಿಸಿದ್ದೇನೆ. ಆದರೂ, ನಾನು ಊಟ ಮಾಡಿದ ವಿಚಾರವೇ ಇಷ್ಟು ಚರ್ಚೆಗೆ ಕಾರಣವಾಗಿರುವುದು ಬೇಜಾರು ತಂದಿದೆ” ಎಂದು ಧನಂಜಯ್ ತಮ್ಮ ಬೇಸರ ವ್ಯಕ್ತಪಡಿಸಿದರು.
ಈ ವಿವಾದದಲ್ಲಿ ಸಮುದಾಯ ಮತ್ತು ಜಾತಿಯನ್ನು ಎಳೆದು ತರಲಾಗಿರುವುದರ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ ಅವರು, “ಡಾಲಿ ಧನಂಜಯ್ ನಾನ್ ವೆಜ್ ತಿನ್ನುತ್ತಾನೆ ಅಂದ್ರೆ ಒಕೆ. ಆದರೆ, ಅದರ ನಡುವೆ ಸಮುದಾಯ, ಜಾತಿ, ಬೇರೆ ಕಲಾವಿದರ ಹೆಸರನ್ನು ಎಳೆದು ತರುವುದೇನು ಸರಿ? ಇದೆಲ್ಲಾ ನನಗೆ ತುಂಬಾ ಬೇಜಾರಾಗಿದೆ” ಎಂದು ಹೇಳಿದರು.
ತಮ್ಮ ಜೀವನಶೈಲಿ ಕುರಿತು ಮಾತನಾಡಿದ ಧನಂಜಯ್, “ನಾನು ಆಗಾಗ ಪಾರ್ಟಿ ಮಾಡುತ್ತೇನೆ. ಹಿಂದೆ ಧೂಮಪಾನ ಮಾಡುತ್ತಿದ್ದೆ, ಈಗ ಅದನ್ನು ನಿಲ್ಲಿಸಿದ್ದೇನೆ. ಸಮುದ್ರ ಆಹಾರ ನನಗೆ ಬಹಳ ಇಷ್ಟ. ಆದರೆ, ನಾನು ಲಿಂಗ ಹಾಕಿ ಊಟ ಮಾಡುವುದಿಲ್ಲ. ನಾನು ಎಲ್ಲಿ, ಏನು ತಿಂದಿದ್ದೇನೆ ಎಂಬುದನ್ನು ಪ್ರತಿಸಾರಿ ವಿವರಿಸಲು ಹೋಗುವುದಿಲ್ಲ. ಅದರಿಂದ ಚರ್ಚೆ ಆರಂಭಿಸಿದವರಿಗೆ ಉತ್ತರ ಕೊಟ್ಟಂತಾಗುತ್ತದೆ, ಅದು ನನಗೆ ಇಷ್ಟವಿಲ್ಲ” ಎಂದು ಸ್ಪಷ್ಟಪಡಿಸಿದರು.
ನಟನಾಗಿ ಮತ್ತು ನಿರ್ಮಾಪಕರಾಗಿ ತಮ್ಮ ಪ್ರಯಾಣದ ಕುರಿತು ಮಾತನಾಡಿದ ಅವರು, “ನಾನು ಏನೇ ಮಾಡಿದರೂ ಬಹಳ ಪ್ರಶ್ನೆಗಳು ಬರುತ್ತವೆ. ಅದರಲ್ಲಿ ನನಗೆ ಖುಷಿಯೂ ಇದೆ. ನಾನು ನಟನಾಗಿ ಬಂದು, ನಿರ್ಮಾಣ ಕ್ಷೇತ್ರಕ್ಕೆ ಕಾಲಿಟ್ಟಿದ್ದೇನೆ. ಇಂಡಸ್ಟ್ರಿಗೆ ಅನೇಕ ಸಿನಿಮಾಗಳನ್ನು ಕೊಟ್ಟಿದ್ದೇನೆ. ನೂರಾರು ಕೋಟಿ ವ್ಯಾಪಾರ ಮಾಡುವ ದೊಡ್ಡ ಪ್ರೊಡ್ಯೂಸರ್ ಅಲ್ಲ ನಾನು. ಆದರೆ, ಸಿನಿಮಾಕ್ಕಾಗಿ ನಿರಂತರವಾಗಿ ಒದ್ದಾಡುತ್ತೇನೆ, ಶ್ರಮಿಸುತ್ತೇನೆ. ಉತ್ತಮ ಸಿನಿಮಾ ನೀಡಲು ಸದಾ ಪ್ರಯತ್ನಿಸುತ್ತೇನೆ” ಎಂದು ಹೇಳಿದರು.
ಆದರೆ, ತಮ್ಮ ಕೆಲಸದ ಬಗ್ಗೆ ಚರ್ಚೆಯಾಗದೇ, ವೈಯಕ್ತಿಕ ವಿಚಾರಗಳೇ ಸುದ್ದಿಯಾಗುತ್ತಿರುವುದರ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ ಧನಂಜಯ್, “ನಾನು ಇಂಡಸ್ಟ್ರಿಗಾಗಿ ಮಾಡುತ್ತಿರುವ ಕೆಲಸದ ಬಗ್ಗೆ ಚರ್ಚೆ ಆಗಬೇಕು ಅನ್ನೋದು ನನ್ನ ಆಸೆ. ಆದರೆ, ಯಾಕೆ ಅದು ನಡೆಯುತ್ತಿಲ್ಲ ಗೊತ್ತಿಲ್ಲ. ನಾನು ಊಟ ಮಾಡಿದ ವಿಚಾರವನ್ನೇ ದೊಡ್ಡ ವಿಷಯ ಮಾಡ್ತಾರೆ ಅಂದ್ರೆ ಅದು ತಪ್ಪಲ್ಲವಾ?” ಎಂದು ಪ್ರಶ್ನಿಸಿದರು.
“ಬಡವರ ಮಕ್ಕಳು ಬೆಳೀಬೇಕು, ಸಂಬಂಧಗಳನ್ನು ಸೆಲೆಬ್ರೇಟ್ ಮಾಡೋಣ ಅನ್ನೋದನ್ನ ನಾನು ಹೇಳಿದ್ದೇನೆ. ಅದನ್ನೂ ಕೆಲವರು ತಮ್ಮ ತಮ್ಮ ಅರ್ಥಕ್ಕೆ ತಕ್ಕಂತೆ ಬದಲಾಯಿಸಿಕೊಂಡು ಮಾತನಾಡಿದ್ದಾರೆ. ಸಿನಿಮಾ ನಟರು ಅಂದ್ರೆ ಒಂದೇ ವಿಚಾರದ ಬಗ್ಗೆ ಮಾತನಾಡಬೇಕು ಅನ್ನೋ ನಿಯಮ ಇಲ್ಲ. ಎಲ್ಲರೂ ಎಲ್ಲ ವಿಚಾರಗಳನ್ನೂ ಮಾತನಾಡಬಹುದು” ಎಂದು ಡಾಲಿ ಧನಂಜಯ್ ತಮ್ಮ ಸ್ಪಷ್ಟ ನಿಲುವು ವ್ಯಕ್ತಪಡಿಸಿದರು.
