ಡಾಲಿ ಧನಂಜಯ ಮದರ್ ಪ್ರಾಮಿಸ್ ಇನ್ಮೇಲೆ ಸಿನಿಮಾ ಮಾಡಲ್ಲ ಅಂದಿದ್ದಾರೆ. ಅರೇ.. ಶಾಕ್ ಆಗ್ಬೇಡಿ. ನಟಿಸಲ್ಲ ಅಂತ ಹೇಳಿಲ್ಲ. ಬದಲಿಗೆ ಫಿಲ್ಮ್ ಪ್ರೊಡಕ್ಷನ್ ಮಾಡಲ್ಲ ಅಂದಿದ್ದಾರೆ. ಅದಕ್ಕೆ ಕಾರಣ ಚಿತ್ರಪ್ರೇಮಿಗಳು ಹಾಗೂ ಕೆಲ ಕಿಡಿಗೇಡಿಗಳು ಅನ್ನೋದು ಎದ್ದು ಕಾಣ್ತಿದೆ. ಪೋಸ್ಟ್ ಕೊರೋನಾ ಕನ್ನಡ ಚಿತ್ರರಂಗದಲ್ಲಿ ಸಾಲು ಸಾಲು ಎಕ್ಸ್ಪೆರಿಮೆಂಟ್ಸ್ ಮಾಡ್ತಿರೋ ಡಾಲಿಗೆ ಜನ ಕೊಡೋ ರಿಟರ್ನ್ ಗಿಫ್ಟ್ ಇದೇನಾ..?!
- ಮದರ್ ಪ್ರಾಮಿಸ್ ಸಿನಿಮಾ ಮಾಡಲ್ಲ.. ಡಾಲಿ ಡೇಂಜರ್ ಡಿಸಿಷನ್
- ಪ್ರೊಡಕ್ಷನ್ ಬಹುಶಃ ಇದೇ ಕೊನೆಯ ಚಿತ್ರ ಅಂದ್ಬಿಟ್ರು ಡಾಲಿ
- ಕೊರೋನಾ ನಂತ್ರ ಚಿತ್ರರಂಗಕ್ಕೆ ಆಸರೆ..
- ಡಾಲಿಗೆ ಇದೇನಾ ರಿಟರ್ನ್ ಗಿಫ್ಟ್..?
- ಧನು ಮಾಡಿದಷ್ಟು ಎಕ್ಸ್ಪೆರಿಮೆಂಟ್ಸ್ ಬೇರಾರೂ ಮಾಡಿಲ್ಲ..!
ಡಾಲಿ ನಟ ರಾಕ್ಷಸನೂ ಹೌದು.. ನಟರಕ್ಷಕನೂ ಹೌದು. ಯಾಕಂದ್ರೆ ಝೀರೋದಿಂದ ಬಂದು ಹೀರೋ ಆದವ್ರು ಡಾಲಿ. ಹೀರೋಗಿಂತ ವಿಲನ್ಗೆ ಡಿಮ್ಯಾಂಡ್ ಜಾಸ್ತಿ ಅಂತ ಖಳನಾಯಕನಾಗಿಯೂ ಮಿಂಚು ಹರಿಸಿದವ್ರು. ಡಾಲಿ ಪಿಕ್ಚರ್ಸ್ ಸಂಸ್ಥೆ ಕಟ್ಟಿ, ಹತ್ತಾರು ಹೊಚ್ಚ ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡಿದವರು. ಅದೆಷ್ಟೋ ಮಂದಿ ಸಿನಿಮೋತ್ಸಾಹಿ ಪ್ರತಿಭೆಗಳು ಅವ್ರ ಟ್ಯಾಲೆಂಟ್ಗೆ ವೇದಿಕೆ ಸಿಗದೇ ಇದ್ದಾಗ ತಾವೇ ಆ ವೇದಿಕೆ ಆದವ್ರು. ಕೆರೆಯ ನೀರನ್ನ ಕೆರೆಗಢೇ ಚೆಲ್ಲಿ ಅನ್ನುವಂತೆ ತಾನು ಹೀರೋ ಆಗಿ ದುಡಿದ ಹಣದಿಂದ ಸಿನಿಮಾಗಳನ್ನ ಮಾಡಿ, ಬೇರೊಬ್ಬರ ಮುಖದಲ್ಲಿ ಸಂತಸ ನೋಡಿದವ್ರು.
ಕನ್ನಡದ ಜೊತೆ ತೆಲುಗು, ತಮಿಳು ಸೇರಿದಂತೆ ಪರಭಾಷಾ ನಿರ್ದೇಶಕ, ಸೂಪರ್ ಸ್ಟಾರ್ಗಳ ಅಚ್ಚುಮೆಚ್ಚಿನ ನಟ ನಮ್ ಡಾಲಿ. ತನು ಮನ ಧನವನ್ನ ಸಿನಿಮಾಗಾಗಿ ಮುಡಿಪಾಗಿಟ್ಟ ಅವರು ಆಡುವ ಮಾತು, ತಗೊಳ್ಳೋ ಶ್ವಾಸ, ಹರಿಯೋ ರಕ್ತ, ಕಾಣೋ ಕನಸು ಎಲ್ಲವೂ ಸಿನಿಮಾನೇ ಆಗಿತ್ತು. ಅದ್ರಲ್ಲೂ ಪೋಸ್ಟ್ ಕರೋನಾ ನಮ್ಮ ಕನ್ನಡ ಚಿತ್ರರಂಗದಲ್ಲಿ ಡಾಲಿ ಮಾಡಿದಷ್ಟು ಪ್ರಯೋಗಗಳು, ಸಾಹಸಗಳು ಬೇರಾರೂ ಮಾಡಲೇ ಇಲ್ಲ. ಅವ್ರ ಬ್ಯಾನರ್ನಿಂದ ಬಡವ ರಾಸ್ಕಲ್, ಹೆಡ್ಬುಷ್, ಆರ್ಕೆಸ್ಟ್ರಾ ಮೈಸೂರು, ಟಗರುಪಲ್ಯ, ಡೇರ್ಡೆವಿಲ್ ಮುಸ್ತಫಾ.. ಹೀಗೆ ಒಂದಾ ಎರಡಾ.. ಸಾಲು ಸಾಲು ಸಿನಿಮಾಗಳು ಬಂದವು.
ಸಾಕಷ್ಟು ಚಿತ್ರಗಳಿಗೆ ಡಾಲಿಯೇ ಬಂಡವಾಳ ಹಾಕಿದ್ರು. ಸ್ನೇಹಿತರೂ ಕೈ ಜೋಡಿಸಿದ್ರು. ಕೆಲವುಗಳನ್ನ ಪ್ರೆಸೆಂಟ್ ಮಾಡಿದ್ರು. ಆದ್ರೆ ಮದರ್ ಪ್ರಾಮಿಸ್ ಅನ್ನೋ ಕಳೆದ ವಾರ ತೆರೆಕಂಡ ಚಿತ್ರ ಔಟ್ ಅಂಡ್ ಔಟ್ ಕಾಮಿಡಿ ಎಂಟರ್ಟೈನರ್. ಪೂರ್ಣಚಂದ್ರ ಮೈಸೂರು ನಿರ್ದೇಶನದ ಈ ಚಿತ್ರದಲ್ಲಿ ಚಿತ್ರಸಾಹಿತಿ, ನಟ ಹಾಗೂ ನಿರ್ಮಾಪಕನಾಗಿ ಡಾಲಿ ಧನಂಜಯ ತೊಡಗಿಸಿಕೊಂಡ ಪರಿ ಅದ್ಭುತ, ಅನನ್ಯ. ಆದ್ರೆ ಇಷ್ಟೆಲ್ಲಾ ಮಾಡಿದ ಡಾಲಿಗೆ ಜನ ಕೊಟ್ಟ ರಿಟರ್ನ್ ಗಿಫ್ಟ್ ಏನು..? ಸಿನಿಮಾ ಚೆನ್ನಾಗಿದ್ರೂ ಚೆನ್ನಾಗಿಲ್ಲ ಅನ್ನೋ ನೆಗೆಟಿವ್ ಪಬ್ಲಿಸಿಟಿ. ಅದ್ರಿಂದ ಬೇಸರಗೊಂಡಿರೋ ಡಾಲಿ, ನಾನು ಇನ್ಮೇಲೆ ಫಿಲ್ಮ್ ಪ್ರೊಡಕ್ಷನ್ ಮಾಡಲ್ಲ ಅನ್ನೋ ಡೇಂಜರ್ ಡಿಸಿಷನ್ ತಗೊಂಡ್ಬಿಟ್ಟಿದ್ದಾರೆ.
ಹೌದು.. ಎಲ್ಲೆಡೆ ಹೌಸ್ಫುಲ್ ಪ್ರದರ್ಶನ ಕಾಣ್ತಿರೋ ಮದರ್ ಪ್ರಾಮಿಸ್ ಸಿನಿಮಾಗೆ ಬಹುತೇಕ ಮಂದಿ ನಮ್ ತಾಯಾಣೆ ಸಿನಿಮಾ ಅದ್ಭುತವಾಗಿದೆ. ನೀವು ಕೊಡೋ ಕಾಸಿಗೆ ಮೋಸ ಇಲ್ಲ ಅಂತ ಆರ್ಗ್ಯಾನಿಕ್ ರಿವ್ಯೂಸ್ ಕೊಡ್ತಿದ್ದಾರೆ. ಅದ್ರ ನಡುವೆ ಖಾಲಿ ಇರೋ ಸ್ಕ್ರೀನ್ಗಳನ್ನ ವಿಡಿಯೋ ಮಾಡಿ, ಸಿನಿಮಾದ ವಿರುದ್ಧ ಅಪಪ್ರಚಾರ ಮಾಡಿದ್ರೆ ಯಾರಿಗೆ ತಾನೇ ಬೇಜಾರಲ್ಲ ನೀವೇ ಹೇಳಿ. ಡಾಲಿಗೂ ಅದೇ ಆಗಿದೆ. ನಟನೆ ಮಾಡ್ತೀನಿ. ಆದ್ರೆ ಬಹುಶಃ ಇದೇ ನನ್ನ ಕೊನೆಯ ಸಿನಿಮಾ ಅಂದಿರೋದು ಸದ್ಯ ಟಾಕ್ ಆಫ್ ದಿ ಟೌನ್ ಆಗಿದೆ. ಮೊದಲೇ ಸಿನಿಮಾಗಳನ್ನ ನಿರ್ಮಾಣ ಮಾಡೋದು ಕಷ್ಟವಾಗಿಬಿಟ್ಟಿದೆ. ಮಾಡಿರೋ ಒಳ್ಳೆಯ ಸಿನಿಮಾಗಳಿಗೆ ಹೀಗಾಗಿಬಿಟ್ರೆ ಮುಂದೊಂದು ದಿನ ಹಣ ಹಾಕೋರೇ ಇಲ್ಲದಂತಾಗುತ್ತೆ. ಸೋ.. ಜನ ಕೂಡ ಬದಲಾಗಬೇಕಿದೆ. ಡಾಲಿ ಅವ್ರೇ ನೀವೂ ಸಹ ನಿಮ್ಮ ನಿರ್ಧಾರವನ್ನ ಒಮ್ಮೆ ಪರಾಮರ್ಶಿಸಿಕೊಳ್ಳಿ ಅನ್ನೋದು ನಮ್ಮದೊಂದು ಸಣ್ಣ ಸಲಹೆ, ಸೂಚನೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
