ನಟಿ ಸಮಂತಾ ಋತ್ ಪ್ರಭು ತಮ್ಮ ಮದುವೆಗೆ ಸಂಬಂಧಿಸಿದ ಎಲ್ಲಾ ನೆನಪುಗಳನ್ನು ಕ್ರಮೇಣ ಮುಕ್ತಾಯಗೊಳಿಸುತ್ತಿದ್ದಾರೆ. ನಟ ನಾಗ ಚೈತನ್ಯರೊಂದಿಗಿನ ವಿಚ್ಛೇದನದ ನಂತರ, ಸಮಂತಾ ತಮ್ಮ ಜೀವನದ ಹೊಸ ಅಧ್ಯಾಯಕ್ಕೆ ಸಿದ್ಧರಾಗುತ್ತಿದ್ದಾರೆ. ಇತ್ತೀಚೆಗೆ, ಅವರು ತಮ್ಮ ಬೆನ್ನ ಮೇಲೆ ಹಾಕಿಸಿಕೊಂಡಿದ್ದ ‘ಯೇ ಮಾಯ ಚೇಸಾವೆ’ (YMC) ಟ್ಯಾಟೂವನ್ನು ಅಳಿಸಿ ಹಾಕಿದ್ದಾರೆ.
ಸಮಂತಾ ಚಿತ್ರರಂಗಕ್ಕೆ ಕಾಲಿಟ್ಟಿದ್ದು ‘ಏ ಮಾಯ ಚೇಸಾವೆ’ ಚಿತ್ರದ ಮೂಲಕ. ಈ ಚಿತ್ರದಲ್ಲಿ ನಾಗ ಚೈತನ್ಯ ಜೊತೆಗಿನ ಅವರ ಕೆಮಿಸ್ಟ್ರಿ ಎಲ್ಲರ ಗಮನ ಸೆಳೆದಿತ್ತು. ಈ ಚಿತ್ರವು ಬ್ಲಾಕ್ಬಸ್ಟರ್ ಆಗಿತ್ತು. ಈ ಸಿನಿಮಾದ ಸೆಂಟಿಮೆಂಟ್ಗೆ ಸಮಂತಾ, ತಮ್ಮ ಕತ್ತಿನ ಕೆಳಭಾಗದಲ್ಲಿ ‘ವೈಎಂಸಿ’ (ಯೇ ಮಾಯ ಚೇಸಾವೆ) ಎಂಬ ಟ್ಯಾಟೂ ಹಾಕಿಸಿಕೊಂಡಿದ್ದರು. ಈ ಟ್ಯಾಟೂ ಅವರಿಗೆ ವಿಶೇಷವಾಗಿತ್ತು.
ವಿಚ್ಛೇದನದ ನಂತರ ಸಮಂತಾ ತಮ್ಮ ಜೀವನದಲ್ಲಿ ಹೊಸ ಆರಂಭಕ್ಕಾಗಿ ಹಲವು ಬದಲಾವಣೆ ಮಾಡಿಕೊಂಡರು. ಕೆಲವು ಟ್ಯಾಟೂಗಳನ್ನು ಈಗಾಗಲೇ ತೆಗೆದುಹಾಕಿದ್ದ ಅವರು, ‘ವೈಎಂಸಿ’ ಟ್ಯಾಟೂವನ್ನು ಉಳಿಸಿಕೊಂಡಿದ್ದರು. ಆದರೆ, ಇತ್ತೀಚೆಗಿನ ಫೋಟೊಗಳು ಮತ್ತು ವಿಡಿಯೋಗಳಲ್ಲಿ ಈ ಟ್ಯಾಟೂ ಕಾಣಿಸದಿರುವುದನ್ನು ಗಮನಿಸಿದ ಅಭಿಮಾನಿಗಳು, ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಚರ್ಚೆ ಆರಂಭಿಸಿದ್ದಾರೆ. ಇನ್ಸ್ಟಾಗ್ರಾಮ್ನಲ್ಲಿ ಸಮಂತಾ ಹಂಚಿಕೊಂಡ ಇತ್ತೀಚಿನ ಚಿತ್ರಗಳಲ್ಲಿ ಈ ಟ್ಯಾಟೂ ಇಲ್ಲದಿರುವುದು, ಅವರು ತಮ್ಮ ಹಳೆಯ ನೆನಪುಗಳಿಂದ ಸಂಪೂರ್ಣವಾಗಿ ಮುಕ್ತರಾಗಲು ತೆಗೆದುಕೊಂಡಿರುವ ನಿರ್ಧಾರವಾಗಿದೆ.
2022ರಲ್ಲಿ ಅಭಿಮಾನಿಗಳೊಂದಿಗೆ ಸಾಮಾಜಿಕ ಜಾಲತಾಣದಲ್ಲಿ ಸಂವಾದ ನಡೆಸಿದ ಸಮಂತಾ, ಹತ್ತು ವರ್ಷದ ಹಿಂದಿನ ತಮ್ಮನ್ನು ಉದ್ದೇಶಿಸಿ ಸಲಹೆ ಕೊಡುವ ಬಗ್ಗೆ ಮಾತನಾಡಿದ್ದರು. “ಯಾವುದೇ ಕಾರಣಕ್ಕೂ ಟ್ಯಾಟೂ ಹಾಕಿಸಿಕೊಳ್ಳಬೇಡ” ಎಂದು ಅವರು ಹೇಳಿದ್ದರು. ಇದರ ಮೂಲಕ ‘ಏ ಮಾಯ ಚೇಸಾವೆ’ ಟ್ಯಾಟೂ ತಮ್ಮ ಜೀವನದ ಒಂದು ತಪ್ಪು ನಿರ್ಧಾರವಾಗಿತ್ತು ಎಂಬುದನ್ನು ಪರೋಕ್ಷವಾಗಿ ಹೇಳಿದ್ದರು.
ನಾಗ ಚೈತನ್ಯ, ವಿಚ್ಛೇದನದ ನಂತರ ನಟಿ ಶೋಭಿತಾ ಧೂಳಿಪಾಳ ಜೊತೆಗೆ ಮದುವೆಯಾಗಿದ್ದಾರೆ. ಇತ್ತ ಸಮಂತಾ, ರಾಜ್ ಎಂಬ ನಿರ್ದೇಶಕನ ಜೊತೆಗೆ ಸಾಕಷ್ಟು ಸಮಯ ಕಳೆಯುತ್ತಿರುವುದಾಗಿ ವದಂತಿಗಳಿವೆ. ಈ ಎಲ್ಲ ಬೆಳವಣಿಗೆಗಳ ಮಧ್ಯೆ, ಸಮಂತಾ ಅವರ ಈ ನಿರ್ಧಾರವು ಅವರ ಜೀವನದಲ್ಲಿ ಹೊಸ ಆರಂಭವನ್ನು ಸೂಚಿಸುತ್ತದೆ. ಟ್ಯಾಟೂ ತೆಗೆದುಹಾಕುವುದರ ಮೂಲಕ, ಅವರು ತಮ್ಮ ಹಿಂದಿನ ನೆನಪುಗಳನ್ನು ಸಂಪೂರ್ಣವಾಗಿ ಮುಕ್ತಾಯಗೊಳಿಸಿ ಮುಂದಕ್ಕೆ ಸಾಗಿದ್ದಾರೆ ಎಂಬ ಸಂದೇಶವನ್ನು ಅಭಿಮಾನಿಗಳಿಗೆ ನೀಡಿದ್ದಾರೆ.
