ಮುಂಬೈ: ಅಂತರರಾಷ್ಟ್ರೀಯ ಯೋಗ ದಿನಾಚರಣೆಯ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ದಕ್ಷಿಣ ಭಾರತದ ಖ್ಯಾತ ನಟಿ ಶ್ರೀಲೀಲಾ ಅವರಿಗೆ ಅವಮಾನವಾಗಿದೆ ಎಂಬ ಆರೋಪ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರ ಪತ್ನಿ ಅಮೃತಾ ಫಡ್ನವೀಸ್ ಅವರ ವರ್ತನೆಗೆ ಸಂಬಂಧಿಸಿದ ವಿಡಿಯೋವೊಂದು ವೈರಲ್ ಆಗಿದ್ದು, ನೆಟ್ಟಿಗರು ಮತ್ತು ನಟಿಯ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಕನ್ನಡ ಮತ್ತು ತೆಲುಗು ಚಿತ್ರರಂಗದಲ್ಲಿ ಅತಿ ಹೆಚ್ಚು ಬೇಡಿಕೆಯ ನಾಯಕಿಯರಲ್ಲಿ ಒಬ್ಬರಾದ ಶ್ರೀಲೀಲಾ, ಯೋಗ ದಿನದ ಕಾರ್ಯಕ್ರಮದಲ್ಲಿ ಭಾಗವಹಿಸಿ ತಮ್ಮ ಯೋಗಾಸನಗಳನ್ನು ಪ್ರದರ್ಶಿಸಿದ್ದರು. ಆರೋಗ್ಯಕರ ಜೀವನಶೈಲಿಯ ಬಗ್ಗೆ ಮಾತನಾಡಿದ ಅವರು, ಕಾರ್ಯಕ್ರಮದುದ್ದಕ್ಕೂ ಎಲ್ಲಾ ಗಣ್ಯರ ಜೊತೆ ಸೌಜನ್ಯದಿಂದ ವರ್ತಿಸಿದ್ದರು. ಆದರೆ, ಕಾರ್ಯಕ್ರಮದ ಅಂತ್ಯದಲ್ಲಿ ನಡೆದ ಘಟನೆಯೊಂದು ಈ ಸುಂದರ ಕಾರ್ಯಕ್ರಮದ ಮೇಲೆ ಮಸಿ ಬಳಿದಿದೆ.
ವೇದಿಕೆಯ ಮೇಲೆ ಯೋಗ ಪ್ರದರ್ಶನ ಮುಗಿದ ನಂತರ, ಮಾಧ್ಯಮಗಳ ಫೋಟೋ ಸೆಷನ್ ಆರಂಭವಾಯಿತು. ಅಮೃತಾ ಫಡ್ನವೀಸ್, ಅವರ ಪುತ್ರಿ ಮತ್ತು ನಟಿ ಶ್ರೀಲೀಲಾ ಮೂವರೂ ಒಟ್ಟಿಗೆ ಪೋಸ್ ನೀಡುತ್ತಿದ್ದರು. ಆದರೆ, ಕೆಲವು ಛಾಯಾಗ್ರಾಹಕರು ಮುಖ್ಯಮಂತ್ರಿ ಪತ್ನಿ ಮತ್ತು ಅವರ ಮಗಳ ಫೋಟೋವನ್ನು ಮಾತ್ರ ಪ್ರತ್ಯೇಕವಾಗಿ ತೆಗೆಯಲು ಕೇಳಿಕೊಂಡರು. ಆಗ ನಡೆದ ಘಟನೆಯೇ ಸದ್ಯ ಸುದ್ದಿಯಾಗಿದೆ.
ವಿಡಿಯೋದಲ್ಲಿ, ಛಾಯಾಗ್ರಾಹಕರ ಮಾತನ್ನು ಕೇಳಿ ಅಮೃತಾ ಫಡ್ನವೀಸ್ ಅವರು ಪಕ್ಕದಲ್ಲೇ ನಿಂತಿದ್ದ ಶ್ರೀಲೀಲಾ ಅವರನ್ನು ಕನಿಷ್ಠ ಸೌಜನ್ಯವನ್ನು ತೋರದೆ, ತಮ್ಮ ಕೈಯ ಬೆರಳುಗಳಿಂದ ‘ಪಕ್ಕಕ್ಕೆ ಸರಿಯಿರಿ’ ಎಂಬ ಸನ್ನೆಯನ್ನು ಮಾಡಿದ್ದಾರೆ. ಅದನ್ನೂ ನಿರ್ಲಕ್ಷಿಸಿದಂತೆ ಶ್ರೀಲೀಲಾ ಅಲ್ಲೇ ನಿಲ್ಲಲು ಪ್ರಯತ್ನಿಸಿದಾಗ, ಮತ್ತೊಮ್ಮೆ ಸ್ವಲ್ಪ ಕೋಪದಿಂದಲೇ ಪಕ್ಕಕ್ಕೇ ಸರಿಯುವಂತೆ ಸನ್ನೆ ಮಾಡಿದ್ದಾರೆ. ಈ ವೇಳೆ ಅಮೃತಾ ಅವರ ಮುಖಭಾವದಲ್ಲಿನ ಅಹಂಕಾರ ಮತ್ತು ಅಸಹನೆ ಕಾಣುತ್ತಿದೆ. ಸ್ಟಾರ್ ನಟಿಯಾಗಿದ್ದರೂ, ಶ್ರೀಲೀಲಾ ಅವರು ಆ ಸನ್ನೆಗೆ ತಲೆತಗ್ಗಿಸಿ ಪಕ್ಕಕ್ಕೆ ಸರಿದಿದ್ದನ್ನು ಕಂಡು ಅಭಿಮಾನಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ.
‘ತಾವು ಮುಖ್ಯಮಂತ್ರಿ ಪತ್ನಿ ಎಂಬ ಅಹಂಕಾರದಲ್ಲಿ ಶ್ರೀಲೀಲಾ ಅವರನ್ನು ಕೀಳಾಗಿ ಕಾಣಲಾಗಿದೆ’, ‘ಸ್ಟಾರ್ ನಟಿ ಎಂಬ ಗೌರವವನ್ನೂ ಇವರು ಕೊಡುವಂತಿಲ್ಲವೇ?’, ‘ಇದು ಸಾರ್ವಜನಿಕ ವೇದಿಕೆ, ಇಲ್ಲಿ ಮಾಡಿದ ಅವಮಾನ ಸರಿಯಲ್ಲ’ ಎಂಬ ಅಭಿಪ್ರಾಯಗಳು ಸೋಶಿಯಲ್ ಮೀಡಿಯಾದಲ್ಲಿ ಹಾರಾಡುತ್ತಿವೆ.
ಇನ್ನು, ಯೋಗ ದಿನದಂಗವಾಗಿ ಏರ್ಪಡಿಸಿದ್ದ ಈ ಕಾರ್ಯಕ್ರಮ ಶಾಂತಿ ಮತ್ತು ಸೌಹಾರ್ದತೆಯ ಸಂದೇಶ ಸಾರಬೇಕಿತ್ತು. ಆದರೆ, ರಾಜಕೀಯ ಗಣ್ಯರ ಪತ್ನಿಯ ಸಣ್ಣ ಘಟನೆ ದೊಡ್ಡ ವಿವಾದಕ್ಕೆ ಎಡೆಮಾಡಿಕೊಟ್ಟಿದೆ. ಇನ್ನೂ ಶ್ರೀಲೀಲಾ ಅಥವಾ ಅಮೃತಾ ಫಡ್ನವೀಸ್ ಅವರು ಈ ಬಗ್ಗೆ ಸಾರ್ವಜನಿಕವಾಗಿ ಪ್ರತಿಕ್ರಿಯೆ ನೀಡಿಲ್ಲ.
