ಬೆಂಗಳೂರು: ಕಾರಿನ ಒಳಗೆ ಕುಳಿತರೂ ಮನೆಯ ಸೋಫಾದ ಮೇಲೆ ಕುಳಿತಷ್ಟೇ ಆರಾಮದಾಯಕವಾಗಿರಬೇಕು ಎಂದು ಬಯಸುವ ಗ್ರಾಹಕರಿಗಾಗಿ, ಫ್ರಾನ್ಸ್ ಮೂಲದ ಖ್ಯಾತ ಕಾರು ತಯಾರಕ ಸಂಸ್ಥೆ ‘ಸಿಟ್ರನ್’ ಹೊಸ ಕಾರೊಂದನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ. ಸಿಟ್ರನ್ ತನ್ನ ಜಾಗತಿಕ ಮಟ್ಟದ 108ನೇ ವರ್ಷದ ವಾರ್ಷಿಕೋತ್ಸವದ ಅಂಗವಾಗಿ, ಭಾರತದಲ್ಲಿ ‘ಏರ್ಕ್ರಾಸ್ ಕಂಫರ್ಟ್ ಎಡಿಷನ್’ ಎಂಬ ಕಾರನ್ನು ಮಾರುಕಟ್ಟೆಗೆ ತಂದಿದೆ.
ಕೈಗೆಟುಕುವ ದರದಲ್ಲಿ ಅತ್ಯುತ್ತಮ ಫೀಚರ್ಸ್ ಹಾಗೂ ಪ್ರೀಮಿಯಂ ಅನುಭವವನ್ನು ನಿರೀಕ್ಷಿಸುವ ಭಾರತೀಯ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು, ಅವರ ನಿರೀಕ್ಷೆಯನ್ನು ಹುಸಿಗೊಳಿಸದಂತೆ ಈ ಹೊಸ ಕಾರನ್ನು ವಿನ್ಯಾಸಗೊಳಿಸಲಾಗಿದೆ.
ಏನು ಈ ಕಾರಿನ ವಿಶೇಷತೆ?
ಈ ಕಾರಿನ ಅತಿ ದೊಡ್ಡ ಹೈಲೈಟ್ ಎಂದರೆ ಇದರ ಒಳಾಂಗಣ ವಿನ್ಯಾಸ. ಸಾಮಾನ್ಯವಾಗಿ ಯಾವುದೇ ಕಾರಿನ ಬೇಸ್ ಮಾಡೆಲ್ (ಆರಂಭಿಕ ಆವೃತ್ತಿ) ಖರೀದಿಸಿದರೆ ಅದರಲ್ಲಿ ಫ್ಯಾಬ್ರಿಕ್ ಸೀಟ್ಗಳು ಬರುತ್ತವೆ. ಆದರೆ ಸಿಟ್ರನ್ ಈ ಸೆಗ್ಮೆಂಟ್ನಲ್ಲೇ ಮೊದಲ ಬಾರಿಗೆ, ಕಾರಿನ ಎಲ್ಲಾ ವೇರಿಯೆಂಟ್ಗಳಲ್ಲೂ (ಬೇಸ್ ಮಾಡೆಲ್ನಿಂದ ಟಾಪ್ ಮಾಡೆಲ್ವರೆಗೆ) ಪ್ರೀಮಿಯಂ ‘ಲೆದರೆಟ್ ಸೀಟ್ಗಳನ್ನು ಸ್ಟ್ಯಾಂಡರ್ಡ್ ಆಗಿ ನೀಡುತ್ತಿದೆ.
ಜೊತೆಗೆ ಉತ್ತಮ ಎರ್ಗೊನಾಮಿಕ್ಸ್ಗಾಗಿ ಮುಂಭಾಗ ಮತ್ತು ಹಿಂಭಾಗದ ಸೀಟ್ಗಳಿಗೆ ಅಡ್ಜಸ್ಟ್ ಮಾಡಬಹುದಾದ ‘ಹೆಡ್ರೆಸ್ಟ್’ಗಳನ್ನು ನೀಡಲಾಗಿದೆ.
ನಿಮ್ಮ ಬಜೆಟ್ಗೆ ತಕ್ಕಂತೆ ಆರಿಸಿಕೊಳ್ಳಿ ‘ಕಂಫರ್ಟ್ ಪ್ಯಾಕ್ʼ
ಈ ಕಾರಿನ ಮತ್ತೊಂದು ವಿಶೇಷತೆ ಎಂದರೆ, ಗ್ರಾಹಕರು ತಮ್ಮ ಬಜೆಟ್ ಹಾಗೂ ಅಗತ್ಯಕ್ಕೆ ತಕ್ಕಂತೆ ಕಾರಿನ ಫೀಚರ್ಸ್ಗಳನ್ನು ಅಪ್ಗ್ರೇಡ್ ಮಾಡಿಕೊಳ್ಳಲು 3 ಬಗೆಯ ಆಕ್ಸೆಸರೀಸ್ ಪ್ಯಾಕ್ಗಳನ್ನು ಪರಿಚಯಿಸಲಾಗಿದೆ.
* YOU ಪ್ಯಾಕ್ (₹36,600): ಇದರಲ್ಲಿ 10-ಇಂಚಿನ ಇನ್ಫೋಟೈನ್ಮೆಂಟ್ ಸಿಸ್ಟಮ್ (ವೈರ್ಲೆಸ್ ಆಪಲ್ ಕಾರ್ ಪ್ಲೇ ಮತ್ತು ಆಂಡ್ರಾಯ್ಡ್ ಆಟೋ ಜೊತೆಗೆ), ರಿವರ್ಸ್ ಕ್ಯಾಮರಾ, ಫಾಗ್ ಲ್ಯಾಂಪ್, ಫುಲ್ ವೀಲ್ ಕವರ್ ಮತ್ತು ಕ್ರೋಮ್ ಇನ್ಸರ್ಟ್ ಡೋರ್ ಕ್ಲಾಡಿಂಗ್ ಸಿಗುತ್ತದೆ.
* PLUS ಪ್ಯಾಕ್ (₹8,460): ಇದರಲ್ಲಿ ರಿವರ್ಸ್ ಕ್ಯಾಮರಾ, ವೈರ್ಲೆಸ್ ಫೋನ್ ಚಾರ್ಜರ್ ಹಾಗೂ ಕ್ರೋಮ್ ಇನ್ಸರ್ಟ್ ಡೋರ್ ಕ್ಲಾಡಿಂಗ್ ಅನ್ನು ಸೇರಿಸಲಾಗಿದೆ.
* MAX ಪ್ಯಾಕ್ (₹40,000): ಇದು ಟೆಕ್-ಪ್ರಿಯರಿಗಾಗಿಯೇ ಇರುವ ಪ್ಯಾಕ್. ಇದರಲ್ಲಿ ಪ್ರೀಮಿಯಂ JBL ಸ್ಪೀಕರ್ಗಳು (ಆಂಪ್ಲಿಫೈಯರ್ ಜೊತೆಗೆ) ಹಾಗೂ ಅತ್ಯಾಧುನಿಕ ಸೇಫ್ಟಿ ಫೀಚರ್ಸ್ ಇರುವ ಫ್ರಂಟ್, ಕ್ಯಾಬಿನ್ & ರಿಯರ್ ಡ್ಯಾಶ್ಕ್ಯಾಮ್ ಸಿಗುತ್ತದೆ. ಇದು ಮುಂದಿರುವ ವಾಹನಗಳು ಅಥವಾ ಪಾದಚಾರಿಗಳ ಡಿಕ್ಕಿಯನ್ನು ತಪ್ಪಿಸಲು ಆಡಿಯೋ ಅಲರ್ಟ್ ನೀಡುತ್ತದೆ.
ಈ ಬಿಡುಗಡೆಯ ಬಗ್ಗೆ ಮತ್ತಷ್ಟು ಮಾಹಿತಿ ಹಂಚಿಕೊಂಡಿರುವ ಸ್ಟೆಲ್ಲಾಂಟಿಸ್ ಇಂಡಿಯಾದ ಆಟೋಮೋಟಿವ್ ಬ್ರಾಂಡ್ಸ್ ನಿರ್ದೇಶಕ ಕುಮಾರ್ ಪ್ರಿಯೇಶ್, “ಗ್ರಾಹಕರಿಗೆ ಆರಾಮದಾಯಕ ಪ್ರಯಾಣ ಒದಗಿಸುವುದೇ ಸಿಟ್ರನ್ನ ಮುಖ್ಯ ಗುರಿ. ಹಣಕ್ಕೆ ತಕ್ಕ ಮೌಲ್ಯದೊಂದಿಗೆ ಹೆಚ್ಚು ಫೀಚರ್ಸ್ ಹಾಗೂ ಪ್ರೀಮಿಯಂ ಅನುಭವವನ್ನು ಗ್ರಾಹಕರು ನಿರೀಕ್ಷಿಸುತ್ತಿದ್ದಾರೆ. ಅವರ ಈ ಬೇಡಿಕೆಗೆ ನಮ್ಮ ‘ಏರ್ಕ್ರಾಸ್ ಕಂಫರ್ಟ್ ಎಡಿಷನ್’ ನೇರ ಉತ್ತರವಾಗಿದೆ” ಎಂದರು.
ಬೆಲೆ ಎಷ್ಟು?
ಈ ಲಿಮಿಟೆಡ್ ಎಡಿಷನ್ ಸಿಟ್ರನ್ ಏರ್ಕ್ರಾಸ್ ಕಂಫರ್ಟ್ ಕಾರುಗಳ ಆರಂಭಿಕ ಬೆಲೆ 9.09 ಲಕ್ಷ ರೂ.ನಿಂದ (ಎಕ್ಸ್-ಶೋರೂಂ) ಪ್ರಾರಂಭವಾಗುತ್ತದೆ.
* YOU NA MT ಮಾಡೆಲ್ ಬೆಲೆ: ₹9,09,000
* PLUS NA MT ಮಾಡೆಲ್ ಬೆಲೆ: ₹9,99,000
* PLUS TURBO 7s MT ಮಾಡೆಲ್ ಬೆಲೆ: ₹11,99,000
ಗ್ರಾಹಕರು ದೇಶಾದ್ಯಂತ ಇರುವ ಎಲ್ಲಾ ಸಿಟ್ರನ್ ಡೀಲರ್ಗಳ ಬಳಿ ಹಾಗೂ ಬ್ರ್ಯಾಂಡ್ನ ಅಧಿಕೃತ ವೆಬ್ಸೈಟ್ ಮೂಲಕ ಈ ಕಾರನ್ನು ಇಂದೇ ಬುಕ್ ಮಾಡಬಹುದಾಗಿದೆ.
