ಹಿಂದೂ ಯುವಕನ ಜೊತೆ ಇದ್ದ ಮುಸ್ಲಿಂ ಯುವತಿಯ ಬುರ್ಖಾ ಕಿತ್ತು, ಜಡೆ ಎಳೆದು ಹಲ್ಲೆ

ಉತ್ತರ ಪ್ರದೇಶದ ಮುಜಫರ್‌ನಗರದಲ್ಲಿ ಹಿಂದೂ ಯುವಕನೊಂದಿಗೆ ಬೈಕ್‌ನಲ್ಲಿ ಹೋಗುತ್ತಿದ್ದ ಮುಸ್ಲಿಂ ಯುವತಿಯ ಬುರ್ಖಾವನ್ನು ಕಿತ್ತು, ಜಡೆ ಎಳೆದು ಕಪಾಳಮೋಕ್ಷ ಮಾಡಿದ ಘಟನೆ ಮುಜಫರ್‌ನಗರದಲ್ಲಿ ನಡೆದಿದೆ. ಈ ಘೋರ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಜನರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ಶನಿವಾರ ಸಂಜೆ ಖಲಾಪರ್ ಪೊಲೀಸ್ ಠಾಣಾ ವ್ಯಾಪ್ತಿಯ ದರ್ಜಿ ಬೀದಿಯಲ್ಲಿ ಈ ಘಟನೆ ಸಂಭವಿಸಿದೆ. ಟಕಿಯಾ ಖುರೇಷಿಯಾನ್ ಪ್ರದೇಶದ ಮುಸ್ಲಿಂ ಯುವತಿ ಮತ್ತು ಶಾಮ್ಲಿಯ ಇಸ್ಮಾಯಿಲ್‌ಪುರ ಗ್ರಾಮದ ಸಚಿನ್ ಎಂಬ ಯುವಕ ಒಂದೇ ಹಣಕಾಸು ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಆ ದಿನ ಇಬ್ಬರೂ ಹಣ ಸಂಗ್ರಹಿಸಿ ಬೈಕ್‌ನಲ್ಲಿ ಹಿಂದಿರುಗುತ್ತಿದ್ದಾಗ, 8-10 ಯುವಕರ ಗುಂಪು ಅವರನ್ನು ತಡೆದು ನಿಲ್ಲಿಸಿತು.

ಯುವಕರ ಗುಂಪು ಮೊದಲಿಗೆ ಇಬ್ಬರ ಹೆಸರನ್ನು ಕೇಳಿತು. ಸಚಿನ್ ಹಿಂದೂ ಎಂದು ತಿಳಿದಾಗ, ಅವನನ್ನು ಬಲವಂತವಾಗಿ ಹತ್ತಿರದ ಬ್ಯಾಟರಿ ಅಂಗಡಿಗೆ ಕರೆದೊಯ್ದು ತೀವ್ರವಾಗಿ ಹೊಡೆದರು. ಜೊತೆಗೆ, ಯುವತಿಯ ಬುರ್ಖಾವನ್ನು ಕಿತ್ತು, ಆಕೆಯ ಕೂದಲನ್ನು ಎಳೆದು ಸಾರ್ವಜನಿಕವಾಗಿ ಕಪಾಳಮೋಕ್ಷ ಮಾಡಿದರು. ಕೂಗಾಟ ಕೇಳಿ ಸ್ಥಳೀಯರು ಧಾವಿಸಿ ಇಬ್ಬರನ್ನೂ ರಕ್ಷಿಸಿ ಕಳುಹಿಸಿದರು.

ಸಂತ್ರಸ್ತರ ದೂರಿನ ಮೇರೆಗೆ, ಯುವತಿ ಮಹಿಳಾ ಕಾನ್ಸ್‌ಟೇಬಲ್ ಜೊತೆಗೆ ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದಳು. ಆದರೆ, ಆರಂಭದಲ್ಲಿ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳಲಿಲ್ಲ. ಭಾನುವಾರ ವಿಡಿಯೋ ವೈರಲ್ ಆದ ನಂತರ ಒತ್ತಡ ಹೆಚ್ಚಾಯಿತು. ಪೊಲೀಸರು ತಕ್ಷಣ ದಾಳಿ ನಡೆಸಿ ಆರು ಆರೋಪಿಗಳಾದ ಸರ್ತಾಜ್, ಶಾದಾಬ್, ಉಮರ್, ಅರ್ಶ್, ಶೋಯೆಬ್, ಮತ್ತು ಶಮಿಯನ್ನು ಬಂಧಿಸಿದರು.

ಆರೋಪಿಗಳಿಗೆ ಪೊಲೀಸರು ಕಠಿಣ ಶಿಕ್ಷಣ ನೀಡಿದ್ದಾರೆ. ಬಂಧಿತ ಆರೋಪಿಗಳು ಕುಂಟುತ್ತಾ ಪೊಲೀಸ್ ಠಾಣೆಗೆ ಸಾಗುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. ಆರೋಪಿಗಳಿಗೆ ನಡೆಯಲೂ ಕಷ್ಟವಾಗುತ್ತಿತ್ತು. ಮುಜಫರ್‌ನಗರ ಸಿಒ ಸಿಟಿ ರಾಜು ಶಾ ಅವರು, ಎಲ್ಲಾ ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಲಾಗಿದೆ ಎಂದು ತಿಳಿಸಿದ್ದಾರೆ.