ಕಳೆದ ಕೆಲವು ದಿನಗಳಿಂದ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ನಾಯಕಿ ಸ್ಮೃತಿ ಮಂದಾನ ಮತ್ತು ಸಂಗೀತ ನಿರ್ದೇಶಕ–ಗಾಯಕ ಪಾಲಾಶ್ ಮುಚ್ಚಲ್ ಅವರ ಮದುವೆ ಕುರಿತು ಅನೇಕ ವದಂತಿಗಳು ಹರಿದಾಡುತ್ತಿವೆ. ನಿಗದಿಯಾಗಿದ್ದ ಮದುವೆ ಅಕಸ್ಮಾತ್ ಮುಂದೂಡಲ್ಪಟ್ಟ ಹಿನ್ನೆಲೆಯಲ್ಲಿ, ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಊಹಾಪೋಹಗಳು ಸದ್ದು ಮಾಡುತ್ತಿವೆ.
ಮದುವೆ ಮುಂದೂಡಲು ಕಾರಣವಾಗಿ ಪಾಲಾಶ್ ಮುಚ್ಚಲ್ ಅವರ “ಅಕ್ರಮ ಸಂಬಂಧ” ಎಂದು ಹೇಳುವ ಸುಳ್ಳು ಸುದ್ದಿಗಳು ವ್ಯಾಪಕವಾಗಿ ಹರಿದಾಡುತ್ತಿವೆ. ಇದರ ಬೆನ್ನಲ್ಲೇ ಸ್ಮೃತಿ ಮಂದಾನ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಪಾಲಾಶ್ ಜೊತೆಗಿನ ಎಂಗೇಜ್ಮೆಂಟ್ ಹಾಗೂ ಮದುವೆಗೆ ಸಂಬಂಧಿಸಿದ ಕೆಲವು ಫೋಟೋಗಳು ಮತ್ತು ವಿಡಿಯೋಗಳನ್ನು ಡಿಲೀಟ್ ಮಾಡಿದ್ದರು, ಇದು ಈ ವದಂತಿಗಳಿಗೆ ಮತ್ತಷ್ಟು ಬೆಂಕಿ ಹಚ್ಚಿದಂತಾಯಿತು.
ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿರುವ ಕೆಲವು ಸ್ಕ್ರೀನ್ಶಾಟ್ಗಳಲ್ಲಿ, ಪಾಲಾಶ್ ಮತ್ತೊಬ್ಬ ಯುವತಿಯೊಂದಿಗೆ ಚಾಟ್ ನಡೆಸಿದ್ದಾರೆ ಎನ್ನುವ ಮಾತುಕತೆಗಳು ಹರಿದಾಡುತ್ತಿವೆ. ಈ ಸ್ಕ್ರೀನ್ಶಾಟ್ಗಳು ನಿಜವೇ ಅಥವಾ ಸುಳ್ಳಾ ಎನ್ನುವುದಕ್ಕೆ ಯಾವುದೇ ದೃಢವಾದ ಸಾಕ್ಷ್ಯಗಳಿಲ್ಲ. ಆದರೂ, ಅವು ಇಂಟರ್ನೆಟ್ನಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿವೆ. ಆದರೆ ಈ ಎಲ್ಲ ಆರೋಪಗಳಿಗೆ ಮುಚ್ಚಲ್ ಕುಟುಂಬದವರು ಸ್ಪಷ್ಟನೆ ನೀಡಿದ್ದು, ಎಲ್ಲವೂ ಸುಳ್ಳು ಎಂದು ತಳ್ಳಿ ಹಾಕಿದ್ದಾರೆ.
ಪಾಲಾಶ್ ತಾಯಿ ಅಮಿತಾ ಮುಚ್ಚಲ್ ಮಾಹಿತಿ
ಈ ನಡುವೆ, ವದಂತಿಗಳಿಗೆ ಪಾಲಾಶ್ ಮುಚ್ಚಲ್ ಅವರ ತಾಯಿ ಅಮಿತಾ ಮುಚ್ಚಲ್ ಸ್ವತಃ ಅವರೇ ಈ ವಿಷಯಕ್ಕೆ ಸ್ಪಷ್ಟನೆ ನೀಡಿದ್ದಾರೆ. ಮದುವೆ ಮುಂದೂಡುವುದು ಅಥವಾ ರದ್ದುಪಡಿಸುವುದಕ್ಕೆ “ಅಕ್ರಮ ಸಂಬಂಧ” ಎನ್ನುವ ವದಂತಿ ಸುಳ್ಳು ಎಂದು ಅವರು ಹೇಳಿದರು.
ಸ್ಮೃತಿ ಮಂದಾನ ಮತ್ತು ಪಾಲಾಶ್ ಅವರ ಮದುವೆ ಮುಂದೂಡಲು ಇರುವ ಏಕೈಕ ಕಾರಣ ಸ್ಮೃತಿಯ ತಂದೆಯ ಅನಾರೋಗ್ಯ. ಸ್ಮೃತಿಯ ತಂದೆಯ ಆರೋಗ್ಯ ಸ್ಥಿತಿ ಹದಗೆಟ್ಟ ಹಿನ್ನೆಲೆಯಲ್ಲಿ, ಕುಟುಂಬಗಳ ಸಹಮತದಿಂದ ಮದುವೆಯನ್ನು ಮುಂದೂಡಲಾಯಿತು ಪಾಲಾಶ್ ಮುಚ್ಚಲ್ ಅವರ ತಾಯಿ ಹೇಳಿದ್ದಾರೆ.
ಪಾಲಾಶ್ ಮತ್ತು ಸ್ಮೃತಿ ಮಂದಾನರ ಕುಟುಂಬಗಳ ಬಾಂಧವ್ಯ ಗಾಢವಾಗಿದೆ. “ಪಾಲಾಶ್, ಸ್ಮೃತಿಯ ತಂದೆಯೊಂದಿಗೆ ಅತ್ಯಂತ ಹತ್ತಿರವಾಗಿದ್ದಾನೆ. ಇಂತಹ ಸಂದರ್ಭದಲ್ಲಿ ಮದುವೆ ವಿರಾಮ ನೀಡುವುದು ಎಲ್ಲರಿಗೂ ಸರಿಯಾದ ನಿರ್ಧಾರವಾಗಿತ್ತು,” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
ಮತ್ತೊಂದು ವದಂತಿ ಪಾಲಾಶ್ ಅಕಸ್ಮಾತ್ ಆಸ್ಪತ್ರೆಗೆ ದಾಖಲಾಗಿದ್ದರು. ಇದನ್ನೂ ಹಲವು ರೀತಿಯಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ತಪ್ಪಾಗಿ ಅರ್ಥೈಸಲಾಗುತ್ತಿತ್ತು. ಆದರೆ ಪಾಲಾಶ್ ತಾಯಿ ನಿಜವಾದ ಕಾರಣವನ್ನು ಬಹಿರಂಗಪಡಿಸಿದ್ದಾರೆ.
ಅರಶಿಣ ಕಾರ್ಯಕ್ರಮದ ಬಳಿಕ ಪಾಲಾಶ್ನನ್ನು ಸುರಕ್ಷತೆ ಕಾರಣಕ್ಕಾಗಿ ಹೊರಗೆ ಹೋಗಲು ಬಿಡಲಾಗಿರಲಿಲ್ಲ. ಇದರಿಂದ ಅವನಿಗೆ ತೀವ್ರ ಮಾನಸಿಕ ಒತ್ತಡ ಉಂಟಾಯಿತು. ಆತ ತುಂಬಾ ಅಳುತ್ತಿದ್ದನು ಮತ್ತು ಆತಂಕದಿಂದ ಬಳಲುತ್ತಿದ್ದನು. ಈ ಒತ್ತಡದ ಪರಿಣಾಮವಾಗಿ ಅವನ ಆರೋಗ್ಯ ಇದ್ದಕ್ಕಿದ್ದಂತೆ ಹದಗೆಟ್ಟಿತ್ತು. ತಕ್ಷಣವೇ ಅವನನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು.
ಸದ್ಯ ಪಾಲಾಶ್ ಚೇತರಿಸಿಕೊಂಡಿದ್ದು, ಮನೆಯಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದಾನೆ ಎಂದು ತಾಯಿ ತಿಳಿಸಿದ್ದಾರೆ. “ಯಾವುದೂ ಗಂಭೀರವಾಗಿಲ್ಲ. ಎಲ್ಲವೂ ಸರಿಯಾಗಿ ನಡೆಯುತ್ತಿದ್ದು, ಮದುವೆಯೂ ಶೀಘ್ರದಲ್ಲೇ ನಡೆಯಲಿದೆ,” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
“ಅವಶ್ಯವಿಲ್ಲದ ಆರೋಪಗಳು ಮತ್ತು ಕೃತಕ ಸ್ಕ್ರೀನ್ಶಾಟ್ಗಳು ನಮ್ಮಿಬ್ಬರ ಕುಟುಂಬಗಳನ್ನೂ ನೋಯಿಸುತ್ತಿವೆ. ದಯವಿಟ್ಟು ವದಂತಿಗಳನ್ನು ನಂಬಬೇಡಿ,” ಎಂದು ವಿನಂತಿಸಿದ್ದಾರೆ.
