ಯುಗಾದಿ ಹಬ್ಬವು ಹೊಸ ವರ್ಷದ ಪ್ರಾರಂಭವನ್ನು ಸೂಚಿಸುವ ಹಬ್ಬವಾಗಿದೆ. ಕರ್ನಾಟಕ, ಆಂಧ್ರಪ್ರದೇಶ ಮತ್ತು ತೆಲಂಗಾಣ ರಾಜ್ಯಗಳಲ್ಲಿ ಈ ಹಬ್ಬವನ್ನು ಸಂಭ್ರಮದಿಂದ ಆಚರಿಸಲಾಗುತ್ತದೆ. ಎಣ್ಣೆ ಸ್ನಾನ, ಹೊಸ ಬಟ್ಟೆ ಧರಿಸುವುದು, ಬೇವು-ಬೆಲ್ಲ ಸೇವಿಸುವುದು, ಪಂಚಾಂಗ ಶ್ರವಣ, ಹಾಗೂ ಕುಟುಂಬದ ಎಲ್ಲರೂ ಸೇರಿ ಹಬ್ಬವನ್ನು ಆಚರಿಸುವುದು ಇದರ ಪ್ರಮುಖ ಭಾಗಗಳಾಗಿವೆ. ಆದರೆ, ಕೆಲವೊಂದು ಪ್ರದೇಶಗಳಲ್ಲಿ ಯುಗಾದಿಯಂದು ಚಂದ್ರನನ್ನು ನೋಡುವ ವಿಶೇಷ ಸಂಪ್ರದಾಯವಿದೆ. ಈ ಸಂಪ್ರದಾಯದ ಹಿಂದೆ ಹಲವು ಪುರಾಣ ಕಥೆಗಳು ಮತ್ತು ಜ್ಯೋತಿಷ್ಯ ಕಾರಣಗಳಿವೆ.
ಗಣೇಶನ ಶಾಪ ಮತ್ತು ಚಂದ್ರನ ದರ್ಶನ
ಪೌರಾಣಿಕ ಕತೆಗಳ ಪ್ರಕಾರ, ಗಣೇಶ ಚತುರ್ಥಿಯ ದಿನದಲ್ಲಿ ಚಂದ್ರನನ್ನು ನೋಡುವುದು ಅಪಶಕುನವೆಂದು ಹೇಳಲಾಗಿದೆ. ಈ ನಂಬಿಕೆಯ ಹಿಂದಿನ ಪೌರಾಣಿಕ ಕತೆಯೊಂದನ್ನು ಇದೆ ಎಂದು ಹೇಳಲಾಗಿದೆ
ಒಮ್ಮೆ ಗಣಪತಿಯು ತನ್ನ ವಾಹನವಾದ ಇಲಿಯ ಮೇಲೆ ಹೋಗುತ್ತಿದ್ದಾಗ ಆಯ ತಪ್ಪಿ ಕೆಳಗೆ ಬೀಳುತ್ತಾರೆ. ಈ ದೃಶ್ಯವನ್ನು ಕಂಡ ಚಂದ್ರನು ಮೇಲಿನಿಂದ ನಗುತ್ತಾನೆ. ಇದನ್ನು ಗಮನಿಸಿದ ಗಣಪತಿ ಚಂದ್ರನಿಗೆ ಶಾಪ ನೀಡುತ್ತಾರೆ. “ಈ ದಿನದಿಂದಲೂ ನಿನ್ನನ್ನು ನೋಡುವವರು ಅಪವಾದಕ್ಕೆ ಒಳಗಾಗುವರು.” ಈ ಶಾಪದಿಂದ ಮುಕ್ತಿಯನ್ನು ಪಡೆಯಲು, ಚಂದ್ರನು ಗಣಪತಿಯ ಬಳಿ ಕ್ಷಮೆಯಾಚಿಸಿದಾಗ, ಆ ಶಾಪವು ಯುಗಾದಿ ಹಬ್ಬದಂದು ಚಂದ್ರನ ದರ್ಶನ ಮಾಡುವ ಮೂಲಕ ಪರಿಹಾರವಾಗುತ್ತದೆ ಎಂಬ ನಂಬಿಕೆ ಇದೆ. ಆದ್ದರಿಂದ, ಈ ದಿನ ಚಂದ್ರನನ್ನು ನೋಡುವುದು ಪಾಪ ವಿಮೋಚನೆಯಾಗುತ್ತದೆ ಎಂಬ ನಂಬಿಕೆ ಬೆಳೆದಿದೆ.
ಜ್ಯೋತಿಷ್ಯ ಮತ್ತು ಚಂದ್ರನ ಪ್ರಭಾವ
ಚಂದ್ರನು ನವಗ್ರಹಗಳಲ್ಲಿ ಪ್ರಮುಖವಾದ ಗ್ರಹವಾಗಿದೆ. ಜ್ಯೋತಿಷ್ಯ ಶಾಸ್ತ್ರದಲ್ಲಿ ಚಂದ್ರನನ್ನು ಮನಸ್ಸಿನ ಸ್ಥಿರತೆ, ಶುದ್ಧತೆ, ಜ್ಞಾನ ಮತ್ತು ಸುಖ-ಶಾಂತಿಯ ಸಂಕೇತವೆಂದು ಪರಿಗಣಿಸಲಾಗಿದೆ. ಯುಗಾದಿಯಂದು ಚಂದ್ರನನ್ನು ನೋಡಿದರೆ ಇಡೀ ವರ್ಷ ಸುಖ-ಸಮೃದ್ಧಿಯಿಂದ ಕೂಡಿರುತ್ತದೆ ಎಂಬ ನಂಬಿಕೆ ಇದೆ.
ಯುಗಾದಿ ದಿನವು ಸಾಮಾನ್ಯವಾಗಿ ಅಮಾವಾಸ್ಯೆಯ ದಿನದ ಮುಂದೆ ಬರುವುದರಿಂದ ಆ ರಾತ್ರಿ ಚಂದ್ರನ ದರ್ಶನ ದೊರೆಯುವುದಿಲ್ಲ. ಆದ್ದರಿಂದ ಮರುದಿನ (ಪಾಡ್ಯಮಿ) ಚಂದ್ರನನ್ನು ನೋಡುವುದು ಸಂಪ್ರದಾಯವಾಗಿದೆ. ಈ ದಿನದಂದು ಚಂದ್ರನನ್ನು ನೋಡಿದರೆ ಇಡೀ ವರ್ಷ ಸಂತೋಷ, ಸಮೃದ್ಧಿ ಮತ್ತು ಶುಭ ಫಲಗಳನ್ನು ಪಡೆಯಬಹುದು ಎಂದು ಭಾವಿಸಲಾಗಿದೆ.
ಯುಗಾದಿ ಹಬ್ಬದ ವಿಶೇಷತೆ
ಯುಗಾದಿಯು ಹೊಸ ವರ್ಷಾಚರಣೆಯ ಹಬ್ಬವಾಗಿರುವುದರಿಂದ, ಈ ದಿನ ಎಲ್ಲರೂ ಎಣ್ಣೆ ಸ್ನಾನ ಮಾಡಿ ಹೊಸ ಬಟ್ಟೆ ತೊಟ್ಟು ಪಂಡಿತರಿಂದ ಪಂಚಾಂಗ ಶ್ರವಣ ಮಾಡುತ್ತಾರೆ. ಹಬ್ಬದ ವಿಶೇಷ ಆಹಾರವಾಗಿ ಬೇವು-ಬೆಲ್ಲ ಸೇವನೆ ಮಾಡುವುದರಿಂದ, ಜೀವನದಲ್ಲಿ ಸುಖ-ದುಃಖಗಳ ಸಮತೋಲನವನ್ನು ಒಪ್ಪಿಕೊಳ್ಳಬೇಕು ಎಂಬ ಸಂದೇಶ ನೀಡುತ್ತದೆ.
ಯುಗಾದಿಯಂದು ಚಂದ್ರನನ್ನು ನೋಡಿ ಮನೆಯ ಹಿರಿಯರ ಆಶೀರ್ವಾದ ಪಡೆಯುವುದು, ಮುಂದಿನ ವರ್ಷಕ್ಕೆ ಶ್ರೇಯಸ್ಕರವೆಂದು ಪರಿಗಣಿಸಲಾಗಿದೆ. ಈ ಹಬ್ಬ ನಮ್ಮ ಸಂಸ್ಕೃತಿ, ಪರಂಪರೆಯ ಪ್ರತಿಬಿಂಬವಾಗಿದ್ದು, ಅದರಲ್ಲಿ ಅಡಗಿರುವ ವೈಜ್ಞಾನಿಕ ಹಾಗೂ ಪೌರಾಣಿಕ ಕಾರಣಗಳು ಬಹುಮೌಲ್ಯವಾಗಿವೆ.
