ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು 14 ದೇಶಗಳ ಮೇಲೆ 25% ರಿಂದ 40% ರವರೆಗಿನ ಆಮದು ಸುಂಕ (ಟ್ಯಾರಿಫ್) ವಿಧಿಸಿದ್ದಾರೆ. ಇದರಲ್ಲಿ ಬಾಂಗ್ಲಾದೇಶಕ್ಕೆ 35% ಟ್ಯಾರಿಫ್ ಘೋಷಿಸಲಾಗಿದೆ, ಇದು ಆ ದೇಶದ ಜವಳಿ ಉದ್ಯಮಕ್ಕೆ ಭಾರೀ ಆಘಾತವನ್ನುಂಟುಮಾಡಿದೆ. ಬಾಂಗ್ಲಾದೇಶದ ಆರ್ಥಿಕತೆಯ ಬಹುಪಾಲು ಜವಳಿ ರಫ್ತಿನ ಮೇಲೆ ಅವಲಂಬಿತವಾಗಿದ್ದು, ಈ ತೆರಿಗೆಯಿಂದ ದೇಶದ ಆರ್ಥಿಕತೆ ಸಂಕಷ್ಟಕ್ಕೆ ಸಿಲುಕುವ ಭೀತಿಯಿದೆ. ಇದರಿಂದಾಗಿ ಬಾಂಗ್ಲಾದೇಶ ತತ್ತರಿಸಿದ್ದು, ಅಮೆರಿಕದೊಂದಿಗೆ ಒಪ್ಪಂದಕ್ಕಾಗಿ ಮನವಿ ಮಾಡಲು ಶುರುವಾಗಿದೆ. ಆದರೆ, ಈ ತೆರಿಗೆಯಿಂದ ಭಾರತದ ಜವಳಿ ಉದ್ಯಮಕ್ಕೆ ಲಾಭವಾಗುವ ಸಾಧ್ಯತೆಯಿದೆ, ಇದರಿಂದ ಭಾರತೀಯ ಜವಳಿ ಕಂಪನಿಗಳ ಷೇರುಗಳು ಷೇರುಪೇಟೆಯಲ್ಲಿ ಏರಿಕೆ ಕಂಡಿವೆ.
ಬಾಂಗ್ಲಾದೇಶದ ಆರ್ಥಿಕತೆಯ ಬುನಾದಿಯೇ ಜವಳಿ ಉದ್ಯಮ. ಈ ಉದ್ಯಮವು ದೇಶದ ಒಟ್ಟು ರಫ್ತಿನ 80% ರಷ್ಟನ್ನು ಒಳಗೊಂಡಿದೆ, ವಿಶೇಷವಾಗಿ ಗಾರ್ಮೆಂಟ್ಗಳು. ಬಾಂಗ್ಲಾದೇಶವು ವಾರ್ಷಿಕವಾಗಿ ಅಮೆರಿಕಕ್ಕೆ 8.4 ಬಿಲಿಯನ್ ಡಾಲರ್ ಮೌಲ್ಯದ ಸರಕುಗಳನ್ನು ರಫ್ತು ಮಾಡುತ್ತದೆ, ಇದರಲ್ಲಿ 7.34 ಬಿಲಿಯನ್ ಡಾಲರ್ ಜವಳಿ ಉತ್ಪನ್ನಗಳಿಂದ ಬರುತ್ತದೆ. ಆಗಸ್ಟ್ 1, 2025 ರಿಂದ 35% ಟ್ಯಾರಿಫ್ ಜಾರಿಗೆ ಬಂದರೆ, ಈ ಉದ್ಯಮಕ್ಕೆ ಭಾರೀ ನಷ್ಟವಾಗುವ ಸಾಧ್ಯತೆಯಿದೆ. ಈ ತೆರಿಗೆಯಿಂದಾಗಿ ಉತ್ಪಾದನಾ ವೆಚ್ಚ ಏರಿಕೆಯಾಗಿ, ಅಮೆರಿಕದ ಖರೀದಿದಾರರು ಬಾಂಗ್ಲಾದೇಶದಿಂದ ಆರ್ಡರ್ಗಳನ್ನು ಕಡಿಮೆ ಮಾಡಬಹುದು. ಇದರಿಂದ ಕಾರ್ಖಾನೆಗಳು ಮುಚ್ಚಬಹುದು ಮತ್ತು ಲಕ್ಷಾಂತರ ಕಾರ್ಮಿಕರಿಗೆ ಉದ್ಯೋಗ ನಷ್ಟವಾಗಬಹುದು.
ಭಾರತಕ್ಕೆ ಲಾಭದ ಸಾಧ್ಯತೆ
ಭಾರತವು ಜವಳಿ ರಫ್ತಿನಲ್ಲಿ ಪ್ರಮುಖ ಆಟಗಾರನಾಗಿದ್ದು, ವಾರ್ಷಿಕವಾಗಿ 36 ಬಿಲಿಯನ್ ಡಾಲರ್ ಮೌಲ್ಯದ ಜವಳಿ ಉತ್ಪನ್ನಗಳನ್ನು ರಫ್ತು ಮಾಡುತ್ತದೆ. ಇದರಲ್ಲಿ 10.4 ಬಿಲಿಯನ್ ಡಾಲರ್ (28.5%) ಅಮೆರಿಕಕ್ಕೆ ರಫ್ತಾಗುತ್ತದೆ. ಬಾಂಗ್ಲಾದೇಶಕ್ಕೆ ಹೋಲಿಸಿದರೆ ಭಾರತದ ಜವಳಿ ಉದ್ಯಮವು ಚಿಕ್ಕದಾಗಿದ್ದರೂ, ಟ್ರಂಪ್ರ 35% ಟ್ಯಾರಿಫ್ನಿಂದ ಬಾಂಗ್ಲಾದೇಶದ ಆರ್ಡರ್ಗಳು ಭಾರತಕ್ಕೆ ವರ್ಗಾಯಿಸುವ ಸಾಧ್ಯತೆಯಿದೆ. ಇದರಿಂದ ಭಾರತೀಯ ಜವಳಿ ಕಂಪನಿಗಳಾದ ಗೋಕಲ್ದಾಸ್ ಎಕ್ಸ್ಪೋರ್ಟ್ಸ್, ವರ್ಧಮಾನ್, ಕೆಪಿಆರ್ ಮಿಲ್, ಮತ್ತು ವೆಲ್ಸ್ಪನ್ ಲಿವಿಂಗ್ನಂತಹವುಗಳ ಷೇರುಗಳು ಶೇ. 8ರಷ್ಟು ಏರಿಕೆ ಕಂಡಿವೆ.
ಆದರೆ, ಭಾರತದ ಜವಳಿ ಉದ್ಯಮವು ಬಾಂಗ್ಲಾದೇಶದಷ್ಟು ಸ್ಪರ್ಧಾತ್ಮಕವಾಗಿಲ್ಲ. ಬಾಂಗ್ಲಾದೇಶವು ಚೀನಾದಿಂದ ಅಗ್ಗದ ಕಚ್ಛಾ ವಸ್ತುಗಳನ್ನು ಪಡೆಯುತ್ತದೆ, ಕಾರ್ಮಿಕ ವೆಚ್ಚ ಕಡಿಮೆ ಮತ್ತು ದೊಡ್ಡ ಪ್ರಮಾಣದ ಆರ್ಡರ್ಗಳನ್ನು ನಿರ್ವಹಿಸುವ ಮೂಲಸೌಕರ್ಯವನ್ನು ಹೊಂದಿದೆ. ಭಾರತದ ಜವಳಿ ಉದ್ಯಮವು ಇನ್ನೂ ಚಿಕ್ಕದಾಗಿದ್ದರು, ದೊಡ್ಡ ಆರ್ಡರ್ಗಳನ್ನು ಸಮಯಕ್ಕೆ ಸರಿಯಾಗಿ ಪೂರ್ಣಗೊಳಿಸಲು ಮತ್ತು ಕಡಿಮೆ ಬೆಲೆಗೆ ಒದಗಿಸಲು ಸವಾಲುಗಳಿವೆ. ಆದಾಗ್ಯೂ, ಬಾಂಗ್ಲಾದೇಶದ ಮೇಲಿನ ಟ್ಯಾರಿಫ್ನಿಂದ 1.3 ಬಿಲಿಯನ್ ಡಾಲರ್ ಮೌಲ್ಯದ ಆರ್ಡರ್ಗಳು ಭಾರತಕ್ಕೆ ವರ್ಗಾಯಿಸುವ ಸಾಧ್ಯತೆಯಿದೆ, ಇದು ಭಾರತೀಯ ಜವಳಿ ಕಂಪನಿಗಳಿಗೆ ಗಮನಾರ್ಹ ಲಾಭವನ್ನು ತರಬಹುದು.
ಬಾಂಗ್ಲಾದೇಶದ ತಾತ್ಕಾಲಿಕ ಸರ್ಕಾರದ ಮುಖ್ಯಸ್ಥ ಮುಹಮ್ಮದ್ ಯೂನುಸ್ ಅವರು ಟ್ರಂಪ್ಗೆ ಪತ್ರ ಬರೆದು, ಟ್ಯಾರಿಫ್ಗಳನ್ನು ಮೂರು ತಿಂಗಳ ಕಾಲ ಮುಂದೂಡುವಂತೆ ಕೋರಿದ್ದಾರೆ. ಅಮೆರಿಕದಿಂದ ಕೃಷಿ ಉತ್ಪನ್ನಗಳಾದ ಹತ್ತಿ, ಗೋಧಿ, ಜೋಳ ಮತ್ತು ಸೋಯಾಬೀನ್ ಆಮದುಗಳನ್ನು ಹೆಚ್ಚಿಸುವ ಯೋಜನೆಯನ್ನು ಒಡ್ಡಿದ್ದಾರೆ. ಇದರ ಜೊತೆಗೆ, ಸುಂಕ-ರಹಿತ ಕಾಟನ್ ಆಮದಿಗಾಗಿ ಬಾಂಡೆಡ್ ವೇರ್ಹೌಸ್ ಸೌಲಭ್ಯವನ್ನು ಅಂತಿಮಗೊಳಿಸಲಾಗುತ್ತಿದೆ. ಈ ಕ್ರಮಗಳು ಟ್ರಂಪ್ ಆಡಳಿತವನ್ನು ಮನವೊಲಿಸಬಹುದೆಂಬ ಆಶಾಭಾವನೆಯಿದೆ.
ಭಾರತವು ಅಮೆರಿಕದೊಂದಿಗೆ ವ್ಯಾಪಾರ ಒಪ್ಪಂದಕ್ಕೆ ಸಮೀಪದಲ್ಲಿದೆ ಎಂದು ಟ್ರಂಪ್ ಘೋಷಿಸಿದ್ದಾರೆ. ಭಾರತಕ್ಕೆ 26% ಟ್ಯಾರಿಫ್ ವಿಧಿಸಲಾಗಿದೆ, ಇದು ಬಾಂಗ್ಲಾದೇಶಕ್ಕಿಂತ ಕಡಿಮೆ. ಇದರಿಂದ ಭಾರತೀಯ ಜವಳಿ ಉತ್ಪನ್ನಗಳು ಅಮೆರಿಕದ ಮಾರುಕಟ್ಟೆಯಲ್ಲಿ ಸ್ಪರ್ಧಾತ್ಮಕವಾಗಿರಲಿವೆ. ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಫೆಬ್ರವರಿಯಲ್ಲಿ ವಾಷಿಂಗ್ಟನ್ಗೆ ಭೇಟಿ ನೀಡಿ, 2030ರ ವೇಳೆಗೆ ದ್ವಿಪಕ್ಷೀಯ ವ್ಯಾಪಾರವನ್ನು 500 ಬಿಲಿಯನ್ ಡಾಲರ್ಗೆ ದ್ವಿಗುಣಗೊಳಿಸುವ ಗುರಿಯೊಂದಿಗೆ ಚರ್ಚೆಗಳನ್ನು ಆರಂಭಿಸಿದ್ದಾರೆ.
