ಏಪ್ರಿಲ್ 22, 2025ರಂದು ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ನ ಭೈಸರಾನ್ ವ್ಯಾಲಿಯಲ್ಲಿ ನಡೆದ ಭಯಾನಕ ಭಯೋತ್ಪಾದಕ ದಾಳಿಯ ತನಿಖೆಯಲ್ಲಿ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ) ಮಹತ್ವದ ಯಶಸ್ಸು ಸಾಧಿಸಿದೆ. ಈ ದಾಳಿಯಲ್ಲಿ 26 ಪ್ರವಾಸಿಗರು ಸಾವನ್ನಪ್ಪಿದ್ದು, 16 ಜನರು ಗಂಭೀರವಾಗಿ ಗಾಯಗೊಂಡಿದ್ದರು. ದಾಳಿಕೋರರಿಗೆ ಆಶ್ರಯ, ಆಹಾರ, ಮತ್ತು ಲಾಜಿಸ್ಟಿಕ್ ಬೆಂಬಲ ನೀಡಿದ್ದ ಆರೋಪದ ಮೇಲೆ ಬಂಧಿತರಾದ ಇಬ್ಬರು ಸಹೋದರರನ್ನು ಎನ್ಐಎ ಜಮ್ಮುವಿನ ಸ್ಥಳೀಯ ಕೋರ್ಟ್ಗೆ ಹಾಜರುಪಡಿಸಿದ್ದು, ಕೋರ್ಟ್ ಇವರಿಗೆ ಐದು ದಿನಗಳ ಕಸ್ಟಡಿಯನ್ನು ನೀಡಿದೆ.
ಬಂಧಿತ ಆರೋಪಿಗಳನ್ನು ಪಹಲ್ಗಾಮ್ನ ಬಟ್ಕೋಟೆಯ ಪರ್ವೇಜ್ ಅಹಮದ್ ಜೋತರ್ ಮತ್ತು ಹಿಲ್ ಪಾರ್ಕ್ನ ಬಶೀರ್ ಅಹಮದ್ ಜೋತರ್ ಎಂದು ಗುರುತಿಸಲಾಗಿದೆ. ಈ ಇಬ್ಬರು ಸಹೋದರರು ದಾಳಿಯ ಮೊದಲು ಭೈಸರಾನ್ ವ್ಯಾಲಿಯಿಂದ ಕೇವಲ 3 ಕಿಮೀ ದೂರದಲ್ಲಿರುವ ಹಿಲ್ ಪಾರ್ಕ್ನ ಒಂದು ತಾತ್ಕಾಲಿಕ ಗುಡಿಸಲಿನಲ್ಲಿ (ಧೋಕ್) ಮೂವರು ಶಸ್ತ್ರಸಜ್ಜಿತ ಭಯೋತ್ಪಾದಕರಿಗೆ ಆಶ್ರಯ ನೀಡಿದ್ದರು. ಈ ಭಯೋತ್ಪಾದಕರು ಪಾಕಿಸ್ತಾನದ ಲಷ್ಕರ್-ಎ-ತೊಯ್ಬಾ (ಎಲ್ಇಟಿ) ಸಂಘಟನೆಗೆ ಸಂಬಂಧಿಸಿದವರಾಗಿದ್ದಾರೆ ಎಂದು ಆರೋಪಿಗಳ ವಿಚಾರಣೆಯಲ್ಲಿ ದೃಢಪಟ್ಟಿದೆ. ಪರ್ವೇಜ್ ಮತ್ತು ಬಶೀರ್ ತಾವು ಆಶ್ರಯ ನೀಡಿದವರು ಭಯೋತ್ಪಾದಕರು ಎಂದು ತಿಳಿದಿದ್ದರೂ ಸಹಾಯ ಮಾಡಿದ್ದಾರೆ ಎಂದು ಎನ್ಐಎ ತಿಳಿಸಿದೆ.
ಎನ್ಐಎ ತನಿಖೆಯ ಪ್ರಗತಿ
ಪಹಲ್ಗಾಮ್ ದಾಳಿಯ ತನಿಖೆಯನ್ನು ಏಪ್ರಿಲ್ 27, 2025ರಂದು ಕೇಂದ್ರ ಗೃಹ ಸಚಿವಾಲಯದ ಆದೇಶದ ಮೇರೆಗೆ ಎನ್ಐಎ ವಹಿಸಿಕೊಂಡಿತ್ತು. ಈ ದಾಳಿಯನ್ನು ಲಷ್ಕರ್-ಎ-ತೊಯ್ಬಾದ ಪ್ರಾಕ್ಸಿ ಸಂಘಟನೆಯಾದ ದಿ ರೆಸಿಸ್ಟೆನ್ಸ್ ಫ್ರಂಟ್ (ಟಿಆರ್ಎಫ್) ಜವಾಬ್ದಾರಿ ವಹಿಸಿಕೊಂಡಿತ್ತು. ಎನ್ಐಎ ತನಿಖೆಯಲ್ಲಿ ಈ ದಾಳಿಯ ಹಿಂದೆ ಪಾಕಿಸ್ತಾನದ ಐಎಸ್ಐ (ಇಂಟರ್-ಸರ್ವೀಸಸ್ ಇಂಟೆಲಿಜೆನ್ಸ್) ಮತ್ತು ಪಾಕ್ ಸೇನೆಯ ಕೈವಾಡವಿದೆ ಎಂದು ಆರಂಭಿಕ ವರದಿಯಲ್ಲಿ ದೃಢಪಟ್ಟಿದೆ.
ತನಿಖೆಯ ಭಾಗವಾಗಿ, ಎನ್ಐಎ 2,800ಕ್ಕೂ ಹೆಚ್ಚು ಜನರನ್ನು ವಿಚಾರಣೆಗೊಳಪಡಿಸಿದ್ದು, 150 ಜನರನ್ನು ವಶಕ್ಕೆ ಪಡೆದಿದೆ. ದಾಳಿಯಲ್ಲಿ ಭಾಗಿಯಾದ ಮೂವರು ಪಾಕಿಸ್ತಾನಿ ಭಯೋತ್ಪಾದಕರ ಗುರುತನ್ನು ಪರ್ವೇಜ್ ಮತ್ತು ಬಶೀರ್ ಬಹಿರಂಗಪಡಿಸಿದ್ದಾರೆ. ಈ ಭಯೋತ್ಪಾದಕರು 2022ರಿಂದ ಜಮ್ಮು ಮತ್ತು ಕಾಶ್ಮೀರದಲ್ಲಿ ಸಕ್ರಿಯರಾಗಿದ್ದು, ಭಾರತೀಯ ಭದ್ರತಾ ಪಡೆಗಳು ಮತ್ತು ಸಾಮಾನ್ಯರ ಮೇಲೆ ಹಲವಾರು ದಾಳಿಗಳನ್ನು ನಡೆಸಿದ್ದಾರೆ.
ಭಯೋತ್ಪಾದಕರ ಚಟುವಟಿಕೆಯ ಜಾಡು
ಎನ್ಐಎ ಪ್ರಕಾರ, ಈ ಭಯೋತ್ಪಾದಕರು 2022ರಲ್ಲಿ ಪೂಂಚ್ ಜಿಲ್ಲೆಯ ದೇರಾ ಕಾ ಗಲ್ಲಿ ಮಾರ್ಗವಾಗಿ ಪಾಕಿಸ್ತಾನದಿಂದ ಭಾರತಕ್ಕೆ ಒಳನುಸುಳಿದ್ದರು. 2023ರ ಡಿಸೆಂಬರ್ 1ರಂದು ದೇರಾ ಕಿ ಗಲ್ಲಿಯಲ್ಲಿ ಭಾರತೀಯ ಸೇನೆಯ ಮೇಲೆ ನಡೆದ ದಾಳಿಯಲ್ಲಿ ಈ ತಂಡವೇ ಭಾಗಿಯಾಗಿತ್ತು, ಇದರಲ್ಲಿ ನಾಲ್ವರು ಯೋಧರು ಹುತಾತ್ಮರಾಗಿದ್ದರು. 2024ರ ಮೇ ತಿಂಗಳಲ್ಲಿ ಪೂಂಚ್ನಲ್ಲಿ ಏರ್ಫೋರ್ಸ್ ಬೆಂಗಾವಲು ವಾಹನದ ಮೇಲೆ ದಾಳಿ ನಡೆಸಿದ್ದ ಈ ಗುಂಪು, 2024ರ ಉತ್ತರಾರ್ಧದಲ್ಲಿ ಕಾಶ್ಮೀರಕ್ಕೆ ಸ್ಥಳಾಂತರಗೊಂಡಿತ್ತು.
2024ರ ಅಕ್ಟೋಬರ್ನಲ್ಲಿ, ಸ್ಥಳೀಯ ಭಯೋತ್ಪಾದಕ ಜುನೇದ್ ಈ ತಂಡದೊಂದಿಗೆ ಸೇರಿಕೊಂಡು ಸೋನಮಾರ್ಗ್ನಲ್ಲಿ ವಲಸಿಗ ಕಾರ್ಮಿಕರ ಮೇಲೆ ದಾಳಿ ನಡೆಸಿದ್ದ. ಈ ದಾಳಿಯಲ್ಲಿ ಎರಡು ತಂಡಗಳಾಗಿ ವಿಭಜನೆಗೊಂಡು ಕಾರ್ಯಾಚರಣೆ ನಡೆಸಿದ್ದ ಭಯೋತ್ಪಾದಕರು, ಶ್ರೀನಗರದ ಬಳಿ ಜುನೇದ್ನನ್ನು ಭಾರತೀಯ ಸೇನೆ ಎನ್ಕೌಂಟರ್ನಲ್ಲಿ ಕೊಂದಾಗ ಈ ತಂಡದ ಕಾರ್ಯಾಚರಣೆಯ ವಿವರಗಳು ಬೆಳಕಿಗೆ ಬಂದವು. ಈ ಎರಡು ತಂಡಗಳು ಒಗ್ಗೂಡಿ ಏಪ್ರಿಲ್ 2025ರಲ್ಲಿ ಪಹಲ್ಗಾಮ್ನಲ್ಲಿ ಪ್ರವಾಸಿಗರ ಮೇಲೆ ದಾಳಿ ನಡೆಸಿದ್ದವು.
ಭಯೋತ್ಪಾದಕರ ಸಂಚಾರ ಮಾರ್ಗ
ತನಿಖೆಯಲ್ಲಿ, ಭಯೋತ್ಪಾದಕರು ರಸ್ತೆಗಳನ್ನು ಬಿಟ್ಟು ಬೆಟ್ಟಗುಡ್ಡಗಳ ಮಾರ್ಗವನ್ನು ಬಳಸಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಈ ಬೆಟ್ಟಗುಡ್ಡಗಳು ಒಂದಕ್ಕೊಂದು ಸಂಪರ್ಕಿತವಾಗಿದ್ದು, ಭಯೋತ್ಪಾದಕರ ಸಂಚಾರಕ್ಕೆ ಸೂಕ್ತವಾಗಿತ್ತು. ಇದರಿಂದ ಭದ್ರತಾ ಪಡೆಗಳಿಗೆ ಇವರನ್ನು ಟ್ರ್ಯಾಕ್ ಮಾಡುವುದು ಕಷ್ಟವಾಯಿತು. ಹಫತನಾರ್, ಟ್ರಾಲ್, ಮತ್ತು ಡಿಎಚ್ ಪುರ ಪ್ರದೇಶಗಳಲ್ಲಿ ಸಂವಹನ ಸಿಗ್ನಲ್ಗಳನ್ನು ಎನ್ಐಎ ವಿಶ್ಲೇಷಿಸಿದ್ದು, ಭಯೋತ್ಪಾದಕರ ಚಲನವಲನಗಳನ್ನು ದೃಢಪಡಿಸಿದೆ.
ಭಯೋತ್ಪಾದಕರು ತಮ್ಮ ದಾಳಿಗಳನ್ನು ಯೋಜಿತವಾಗಿ ನಡೆಸಿದ್ದು, ಏಪ್ರಿಲ್ 15ರಂದು ಭೈಸರಾನ್ ವ್ಯಾಲಿ, ಆರು ವ್ಯಾಲಿ, ಬೀಟಾಬ್ ವ್ಯಾಲಿ, ಮತ್ತು ಸ್ಥಳೀಯ ಅಮ್ಯೂಸ್ಮೆಂಟ್ ಪಾರ್ಕ್ನಂತಹ ನಾಲ್ಕು ಸ್ಥಳಗಳ ರೆಕ್ಕಿಯನ್ನು ನಡೆಸಿದ್ದರು. ಭದ್ರತೆಯ ಕೊರತೆಯಿರುವ ಭೈಸರಾನ್ ವ್ಯಾಲಿಯನ್ನು ದಾಳಿಗೆ ಆಯ್ಕೆ ಮಾಡಿಕೊಂಡಿದ್ದರು.
ಎನ್ಐಎ ಕಾರ್ಯಾಚರಣೆ
ಈ ದಾಳಿಯನ್ನು ತಡೆಗಟ್ಟಲು ಭಾರತೀಯ ಭದ್ರತಾ ಪಡೆಗಳು ದಕ್ಷಿಣ ಕಾಶ್ಮೀರದ ಅನಂತನಾಗ್ ಮತ್ತು ಪುಲ್ವಾಮಾ ಜಿಲ್ಲೆಗಳಲ್ಲಿ ವ್ಯಾಪಕ ಕಾರ್ಯಾಚರಣೆ ನಡೆಸಿವೆ. ಎನ್ಐಎ 40ಕ್ಕೂ ಹೆಚ್ಚು ಕಾರ್ಟ್ರಿಡ್ಜ್ಗಳನ್ನು ದಾಳಿಯ ಸ್ಥಳದಿಂದ ಸಂಗ್ರಹಿಸಿದ್ದು, ಬ್ಯಾಲಿಸ್ಟಿಕ್ ಮತ್ತು ರಾಸಾಯನಿಕ ವಿಶ್ಲೇಷಣೆಗೆ ಕಳುಹಿಸಿದೆ. ಜೊತೆಗೆ, ಸ್ಥಳದ 3ಡಿ ಮ್ಯಾಪಿಂಗ್ ಮತ್ತು ಮೊಬೈಲ್ ಟವರ್ಗಳ ಟವರ್ ಡಂಪ್ ಡೇಟಾವನ್ನು ವಿಶ್ಲೇಷಿಸಲಾಗಿದೆ.
