ಮೆಟ್ರೋ ನಗರಗಳಲ್ಲಿ ಕ್ಯಾಬ್ ಸೇವೆಗಳು ದೈನಂದಿನ ಜೀವನದ ಅವಿಭಾಜ್ಯ ಅಂಗವಾಗಿವೆ. ಆದರೆ, ದಿನವಿಡೀ ರಸ್ತೆಯಲ್ಲಿ ಕಷ್ಟಪಡುವ ಕ್ಯಾಬ್ ಚಾಲಕರಿಗೆ ಈಗ ಕೇವಲ ಟ್ರಾಫಿಕ್ ಸಮಸ್ಯೆ ಮಾತ್ರವಲ್ಲದೆ, ಗ್ರಾಹಕರ ವಿಲಕ್ಷಣ ಮತ್ತು ಅಸಭ್ಯ ವರ್ತನೆಗಳು ದೊಡ್ಡ ತಲೆನೋವಾಗಿ ಪರಿಣಮಿಸಿವೆ. ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ಕೆಲವು ವಿಡಿಯೋ ತೀವ್ರ ಚರ್ಚೆಗೆ ಗ್ರಾಸವಾಗಿವೆ.
ಕಾರಿನಲ್ಲೇ ರೋಮಾನ್ಸ್
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ವಿಡಿಯೋವೊಂದರಲ್ಲಿ ಕ್ಯಾಬ್ ಚಾಲಕನೊಬ್ಬ ತನಗಾದ ಕಹಿ ಅನುಭವವನ್ನು ಹಂಚಿಕೊಂಡಿದ್ದಾನೆ. ಚಲಿಸುವ ಕಾರಿನ ಹಿಂಬದಿಯ ಸೀಟಿನಲ್ಲಿ ಕುಳಿತಿದ್ದ ಜೋಡಿಯೊಂದು ಸಾರ್ವಜನಿಕ ಸ್ಥಳ ಎಂಬ ಅರಿವಿಲ್ಲದೆ ಅಸಭ್ಯವಾಗಿ ವರ್ತಿಸಿದ್ದಾರೆ. ಚುಂಬನದಿಂದ ಶುರುವಾದ ಇವರ ರೋಮಾನ್ಸ್ ಅತಿರೇಕದ ಮಟ್ಟಕ್ಕೆ ತಲುಪಿತ್ತು, ಕನ್ನಡಿಯ ಮೂಲಕ ಇದನ್ನು ನೋಡಿದ ನನಗೆ ಏನು ಮಾಡಬೇಕೆಂದೇ ತೋಚಲಿಲ್ಲ ಎಂದು ಚಾಲಕ ಅಳಲು ತೋಡಿಕೊಂಡಿದ್ದಾನೆ. ಕ್ಯಾಬ್ ಅನ್ನು ತಮ್ಮ ಖಾಸಗಿ ಓಯೋ ರೂಮ್ ಅಂದುಕೊಂಡಂತೆ ವರ್ತಿಸುವ ಇಂತಹ ಜೋಡಿಗಳಿಂದಾಗಿ ಚಾಲಕರು ಬೇಸರ ವ್ಯಕ್ತಪಡಿಸಿದ್ದಾರೆ.
ಗ್ರಾಹಕಿಯಿಂದ ಸೆಕ್ಸ್ ಆಫರ್: ಬೆಚ್ಚಿಬಿದ್ದ ಚಾಲಕ
ದೆಹಲಿಯ ಇಸ್ಕಾನ್ ದೇವಸ್ಥಾನಕ್ಕೆ ಹೋಗಲು ರೈಡ್ ಬುಕ್ ಮಾಡಿದ್ದ ಮಹಿಳೆಯೊಬ್ಬರು ಚಾಲಕನಿಗೆ ಚಾಟಿಂಗ್ ಮೂಲಕವೇ ಸೆಕ್ಸ್ ಆಫರ್ ನೀಡಿದ್ದಾರೆ. ಹಲೋ ಬ್ರೋ ಎಂದು ಮಾತು ಆರಂಭಿಸಿ, ನೇರವಾಗಿ ಅಶ್ಲೀಲ ಬೇಡಿಕೆಯಿಟ್ಟಿದ್ದಾಳೆ. ಚಾಲಕ ಆಫರ್ ತಿರಸ್ಕರಿಸಿದ ತಕ್ಷಣ ರೈಡ್ ಕ್ಯಾನ್ಸಲ್ ಮಾಡಿದ್ದಾಳೆ. ದೇವರ ದರ್ಶನಕ್ಕೆ ಹೋಗುವ ನೆಪದಲ್ಲಿ ಇಂತಹ ಕೃತ್ಯಗಳಿಗೆ ಮುಂದಾಗುತ್ತಿರುವುದು ಜನರ ಮನಸ್ಥಿತಿ ಎತ್ತ ಸಾಗುತ್ತಿದೆ ಎಂಬ ಪ್ರಶ್ನೆ ಮೂಡಿಸಿದೆ.
ಬೆಂಗಳೂರು, ದೆಹಲಿ, ಮುಂಬೈನಂತಹ ನಗರಗಳಿಗೆ ಉದ್ಯೋಗ ಅಥವಾ ಶಿಕ್ಷಣಕ್ಕಾಗಿ ಬರುವ ಯುವಜನತೆ ತಮಗೆ ಸಿಕ್ಕ ಸ್ವಾತಂತ್ರ್ಯವನ್ನು ಅತಿಯಾಗಿ ದುರುಪಯೋಗಪಡಿಸಿಕೊಳ್ಳುತ್ತಿದ್ದಾರೆ ಎಂಬ ಆರೋಪ ಕೇಳಿಬರುತ್ತಿದೆ. ಸಂಜೆ ಹೊತ್ತಿನಲ್ಲಿ ಮದ್ಯಪಾನ ಮಾಡಿ ಕ್ಯಾಬ್ ಏರುವವರು, ಚಾಲಕರೊಂದಿಗೆ ಕಿರಿಕ್ ಮಾಡುವುದು ಮಾತ್ರವಲ್ಲದೆ, ಅಶ್ಲೀಲ ಕೃತ್ಯಗಳಲ್ಲಿ ತೊಡಗುತ್ತಿದ್ದಾರೆ. ಸಾರ್ವಜನಿಕವಾಗಿ ಹೇಗೆ ವರ್ತಿಸಬೇಕು ಎಂಬ ಕನಿಷ್ಠ ಜ್ಞಾನವೂ ಇಲ್ಲದೆ ವರ್ತಿಸುತ್ತಿರುವುದು ವಿಷಾದನೀಯ.
ಕ್ಯಾಬ್ ಚಾಲಕರ ಅಳಲು
ಬೆಂಗಳೂರಿನಂತಹ ನಗರಗಳಲ್ಲಿ ಭಾಷಾ ಸಮಸ್ಯೆ ಮತ್ತು ಟ್ರಾಫಿಕ್ ಕಿರಿಕಿರಿ ನಡುವೆಯೂ ಕ್ಯಾಬ್ ಚಾಲಕರು ಸೇವೆ ನೀಡುತ್ತಿದ್ದಾರೆ. ಆದರೆ, ಇಂತಹ ಅಸಭ್ಯ ಗ್ರಾಹಕರಿಂದಾಗಿ ಅವರು ಮಾನಸಿಕವಾಗಿ ಕುಗ್ಗುತ್ತಿದ್ದಾರೆ. ನಾವು ನಿಮ್ಮನ್ನು ಗುರಿ ತಲುಪಿಸಲು ಇರುವುದೇ ಹೊರತು ನಿಮ್ಮ ಅಸಭ್ಯ ವರ್ತನೆಗಳನ್ನು ಸಹಿಸಿಕೊಳ್ಳಲಿಕ್ಕಲ್ಲ ಎಂದು ಚಾಲಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
