ಹಾಸನ: ಹಾಸನ ಜಿಲ್ಲೆಯಲ್ಲಿ ಜನರಲ್ಲಿ ಆತಂಕ ಮೂಡಿಸಿದ್ದ ನರಹಂತಕ ಕಾಡಾನೆಗಳ ಸೆರೆ ಕಾರ್ಯಾಚರಣೆಯಲ್ಲಿ ಅರಣ್ಯ ಇಲಾಖೆ ಮಹತ್ವದ ಯಶಸ್ಸು ಸಾಧಿಸಿದೆ. ಬೇಲೂರು ಭಾಗದಿಂದ ಸಕಲೇಶಪುರದತ್ತ ಬಂದಿದ್ದ ಎರಡು ಪುಂಡಾನೆಗಳನ್ನು ಒಂದೇ ದಿನ ಸೆರೆಹಿಡಿಯುವಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ಯಶಸ್ವಿಯಾಗಿದ್ದಾರೆ. ಡ್ರೋನ್ ಮೂಲಕ ಆನೆಗಳ ಚಲನವಲನ ಪತ್ತೆಹಚ್ಚಿ, ಅರವಳಿಕೆ ಮದ್ದು ನೀಡಿ, ಏಳು ಕುಮ್ಕಿ ಆನೆಗಳ ನೆರವಿನಿಂದ ಕಾರ್ಯಾಚರಣೆ ಪೂರ್ಣಗೊಳಿಸಲಾಗಿದೆ.
ಸಕಲೇಶಪುರ ತಾಲೂಕಿನ ಉದೇವಾರ ಗ್ರಾಮದ ಸಮೀಪದ ಕಾಫಿ ತೋಟದಲ್ಲಿ ಎರಡು ಕಾಡಾನೆಗಳು ಇರುವ ಬಗ್ಗೆ ಅರಣ್ಯ ಇಲಾಖೆ ಸಿಬ್ಬಂದಿಗೆ ಮಾಹಿತಿ ಲಭ್ಯವಾಗಿತ್ತು. ಸಿಬ್ಬಂದಿ ಡ್ರೋನ್ ಕ್ಯಾಮೆರಾ ಮೂಲಕ ಆನೆಗಳ ಇರುವಿಕೆಯನ್ನು ಪತ್ತೆಹಚ್ಚಿದರು. ಬಳಿಕ ಕಾರ್ಯಾಚರಣೆಗೆ ಅಗತ್ಯ ಸಿದ್ಧತೆ ಮಾಡಿಕೊಂಡು ಸ್ಥಳಕ್ಕೆ ತೆರಳಿದರು. ಆದರೆ ಅರಣ್ಯ ಸಿಬ್ಬಂದಿ ಸ್ಥಳಕ್ಕೆ ಬರುತ್ತಿದ್ದಂತೆ ಎರಡೂ ಆನೆಗಳು ಒಟ್ಟಿಗೆ ಓಡಲು ಆರಂಭಿಸಿದ್ದರು.
ಈ ವೇಳೆ ಅರಣ್ಯ ಸಿಬ್ಬಂದಿ ಮೊದಲಿಗೆ ಒಂದು ಆನೆಗೆ ಅರವಳಿಕೆ ಮದ್ದು ಪ್ರಯೋಗಿಸಿದರು. ಆದರೆ ಮದ್ದು ನೀಡಿದರೂ ಆನೆ ತಕ್ಷಣ ನಿತ್ರಾಣಗೊಳ್ಳಲಿಲ್ಲ. ಬದಲಿಗೆ ಸಾಕಷ್ಟು ದೂರ ಓಡಿಹೋಗಿದೆ. ಅರವಳಿಕೆ ಮದ್ದು ನೀಡಿದ ಸುಮಾರು ಒಂದು ಗಂಟೆಯಾದರೂ ಆನೆಯ ಮೇಲೆ ನಿರೀಕ್ಷಿತ ಪರಿಣಾಮ ಬೀರದ ಹಿನ್ನೆಲೆ ಮತ್ತೊಂದು ಡಾರ್ಟ್ ಪ್ರಯೋಗಿಸಲಾಯಿತು. ನಂತರ ಕಾಫಿ ತೋಟದೊಳಗೆ ಓಡಿಹೋದ ಆನೆ ಕ್ರಮೇಣ ನಿತ್ರಾಣಗೊಂಡು ನಿಂತುಕೊಂಡಿತು.
ಇದೇ ಸಂದರ್ಭದಲ್ಲಿ ಕಾರ್ಯಾಚರಣೆಗೆ ನಿಯೋಜಿಸಲಾಗಿದ್ದ ಕುಮ್ಕಿ ಆನೆಗಳು ಸ್ಥಳಕ್ಕೆ ಆಗಮಿಸಿ ನಿತ್ರಾಣಗೊಂಡಿದ್ದ ಆನೆಯನ್ನು ಸುತ್ತುವರಿಯಲು ಮುಂದಾದವು.. ತಕ್ಷಣ ಎಚ್ಚೆತ್ತ ಅರಣ್ಯ ಸಿಬ್ಬಂದಿ ಎರಡನೇ ಆನೆಗೂ ಅರವಳಿಕೆ ಮದ್ದು ನೀಡಿದರು.
ಅರವಳಿಕೆ ಮದ್ದು ಪ್ರಯೋಗದ ಬಳಿಕ ಎರಡನೇ ಆನೆ ಕೂಡ ಓಡಿಹೋಗಿ ಸ್ವಲ್ಪ ದೂರದಲ್ಲಿ ನಿತ್ರಾಣಗೊಂಡು ನಿಂತುಕೊಂಡಿತು. ಬಳಿಕ ಎರಡೂ ಆನೆಗಳನ್ನು ಕುಮ್ಕಿ ಆನೆಗಳು ಸುತ್ತುವರಿದು ನಿಯಂತ್ರಣಕ್ಕೆ ತೆಗೆದುಕೊಂಡವು. ಅರಣ್ಯ ಇಲಾಖೆ ಸಿಬ್ಬಂದಿ ಆನೆಗಳಿಗೆ ಹಗ್ಗ ಕಟ್ಟಿ ಸುರಕ್ಷಿತವಾಗಿ ರಸ್ತೆಯತ್ತ ಕರೆತರುವ ಕಾರ್ಯಾಚರಣೆ ನಡೆಸಿದರು. ಹೀಗೆ ಎರಡೂ ಪುಂಡಾನೆಗಳನ್ನು ಸೆರೆಹಿಡಿಯುವಲ್ಲಿ ಸಿಬ್ಬಂದಿ ಯಶಸ್ವಿಯಾದರು.
ಕ್ಯಾಪ್ಟನ್ ಪ್ರಶಾಂತ್ ನೇತೃತ್ವದಲ್ಲಿ ಕಾರ್ಯಾಚರಣೆ
ಈ ಮಹತ್ವದ ಕಾರ್ಯಾಚರಣೆ ಕ್ಯಾಪ್ಟನ್ ಪ್ರಶಾಂತ್ ಅವರ ನೇತೃತ್ವದಲ್ಲಿ ನಡೆಯಿತು. ಶ್ರೀಕಂಠ, ಅಶೋಕ, ರೋಹಿತ್, ಮಾಣಿಕ್ಯ, ಅಯ್ಯಪ್ಪ ಹಾಗೂ ಏಕಲವ್ಯ ಸೇರಿದಂತೆ ಏಳು ಕುಮ್ಕಿ ಆನೆಗಳು ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದವು. ಡ್ರೋನ್ ತಂತ್ರಜ್ಞಾನ, ಅರಣ್ಯ ಸಿಬ್ಬಂದಿಯ ಸಮಯಪ್ರಜ್ಞೆ ಮತ್ತು ಕುಮ್ಕಿ ಆನೆಗಳ ನೆರವಿನಿಂದ ಕಾರ್ಯಾಚರಣೆ ಯಶಸ್ವಿಯಾಗಿದೆ.
10 ಕಾಡಾನೆಗಳ ಪೈಕಿ ಮೊದಲ ಗಂಡಾನೆ ಸೆರೆ
ಹಾಸನ ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಸಂಚರಿಸುತ್ತಿದ್ದ ಸುಮಾರು 10 ಕಾಡಾನೆಗಳ ಹಿಂಡಿನ ಪೈಕಿ ಮೊದಲ ಗಂಡಾನೆಯನ್ನು ಸೆರೆಹಿಡಿಯಲಾಗಿದೆ. ಎರಡು ದಿನಗಳಿಂದ ಅರಣ್ಯ ಇಲಾಖೆ ಸಿಬ್ಬಂದಿ ನಡೆಸುತ್ತಿದ್ದ ಕಾರ್ಯಾಚರಣೆಗೆ ಕೊನೆಗೂ ಯಶಸ್ಸು ಸಿಕ್ಕಿದೆ.





