ಪ್ರತಿ ವರ್ಷದಂತೆ 2025 ಮುಗಿದು 2026ರ ಸ್ವಾಗತಕ್ಕೆ ಇಡೀ ಜಗತ್ತು ಸಜ್ಜಾಗಿದೆ. ಡಿಸೆಂಬರ್ 31ರ ಮಧ್ಯರಾತ್ರಿ 12 ಗಂಟೆಯಾಗುತ್ತಿದ್ದಂತೆ ಪಟಾಕಿ ಸಿಡಿಸಿ, ಕೇಕ್ ಕತ್ತರಿಸಿ ಸಂಭ್ರಮಿಸುವುದು ವಾಡಿಕೆ. ಆದರೆ, ಭೂಮಿಯ ಕಾಲಮಾನದ (Time Zone) ವಿಭಿನ್ನತೆಯಿಂದಾಗಿ ಜಗತ್ತಿನ ಎಲ್ಲ ದೇಶಗಳು ಒಂದೇ ಸಮಯದಲ್ಲಿ ಹೊಸ ವರ್ಷವನ್ನು ಸ್ವಾಗತಿಸುವುದಿಲ್ಲ. ಸೂರ್ಯನ ಉದಯ ಮತ್ತು ಅಂತರಾಷ್ಟ್ರೀಯ ದಿನಾಂಕದ ಆಧಾರದ ಮೇಲೆ ಕೆಲವು ದೇಶಗಳು ಭಾರತಕ್ಕಿಂತ ಮೊದಲೇ ಸಂಭ್ರಮಿಸಿದರೆ, ಇನ್ನು ಕೆಲವು ದೇಶಗಳು ನಾವು ಸಂಭ್ರಮಿಸಿ ಎಷ್ಟೋ ಗಂಟೆಗಳ ನಂತರ ಹೊಸ ವರ್ಷಕ್ಕೆ ಕಾಲಿಡುತ್ತವೆ.
ವಿಶ್ವದ ಮೊದಲ ಆಚರಣೆ ಎಲ್ಲಿ?
2026ನೇ ವರ್ಷವನ್ನು ಜಗತ್ತಿನಲ್ಲೇ ಮೊದಲು ಬರಮಾಡಿಕೊಳ್ಳುವ ಹೆಗ್ಗಳಿಕೆ ‘ಕಿರಿತಿಮತಿ’ (Kiritimati) ದ್ವೀಪಕ್ಕೆ ಸಲ್ಲುತ್ತದೆ. ಇದನ್ನು ‘ಕ್ರಿಸ್ಮಸ್ ದ್ವೀಪ’ ಎಂದೂ ಕರೆಯಲಾಗುತ್ತದೆ. ಸುಮಾರು 1.2 ಲಕ್ಷ ಜನಸಂಖ್ಯೆಯನ್ನು ಹೊಂದಿರುವ ಈ ಪುಟ್ಟ ದ್ವೀಪ ರಾಷ್ಟ್ರವು ಪೆಸಿಫಿಕ್ ಮಹಾಸಾಗರದಲ್ಲಿದೆ. ಆಶ್ಚರ್ಯಕರ ಸಂಗತಿಯೆಂದರೆ, ಇಲ್ಲಿನ ಹಳ್ಳಿಗಳಿಗೆ ಬನಾನಾ, ಪ್ಯಾರಿಸ್, ಪೋಲೆಂಡ್ ಮತ್ತು ಲಂಡನ್ ಎಂಬ ಹೆಸರಿಡಲಾಗಿದೆ. ಭಾರತೀಯ ಕಾಲಮಾನದ ಪ್ರಕಾರ ಡಿಸೆಂಬರ್ 31ರ ಮಧ್ಯಾಹ್ನವೇ ಇಲ್ಲಿ ಹೊಸ ವರ್ಷ ಆರಂಭವಾಗುತ್ತದೆ.
ಕಿರಿತಿಮತಿಯ ನಂತರ ನ್ಯೂಜಿಲೆಂಡ್ ಹೊಸ ವರ್ಷವನ್ನು ಸ್ವಾಗತಿಸುವ ಎರಡನೇ ಪ್ರಮುಖ ದೇಶವಾಗಿದೆ. ನ್ಯೂಜಿಲೆಂಡ್‌ನ ಚಾಥಮ್ ದ್ವೀಪಗಳು ಭಾರತೀಯ ಕಾಲಮಾನ ಮಧ್ಯಾಹ್ನ 3:45ಕ್ಕೆ ಹೊಸ ವರ್ಷವನ್ನು ಆಚರಿಸಿದರೆ, ಆಕ್ಲೆಂಡ್ ಮತ್ತು ವೆಲ್ಲಿಂಗ್ಟನ್‌ನಂತಹ ಪ್ರಮುಖ ನಗರಗಳು ಸಂಜೆ 4:30ಕ್ಕೆ (IST) ಸಂಭ್ರಮಾಚರಣೆಯಲ್ಲಿ ಮುಳುಗುತ್ತವೆ.
ನ್ಯೂಜಿಲೆಂಡ್ ನಂತರ ಸರದಿ ಆಸ್ಟ್ರೇಲಿಯಾದ್ದು. ಸಿಡ್ನಿ ಹಾರ್ಬರ್‌ನಲ್ಲಿ ನಡೆಯುವ ಭವ್ಯ ಪಟಾಕಿ ಪ್ರದರ್ಶನ ಇಡೀ ಜಗತ್ತಿನ ಗಮನ ಸೆಳೆಯುತ್ತದೆ. ಭಾರತೀಯ ಕಾಲಮಾನ ರಾತ್ರಿ 7:30ಕ್ಕೆ ಸಿಡ್ನಿ, ಮೆಲ್ಬೋರ್ನ್ ಮತ್ತು ಕ್ಯಾನ್‌ಬೆರಾದಲ್ಲಿ ಹೊಸ ವರ್ಷದ ಸಂಭ್ರಮ ಕಳೆಗಟ್ಟುತ್ತದೆ. ಆಸ್ಟ್ರೇಲಿಯಾದ ಉತ್ತರ ಭಾಗ ಮತ್ತು ಕ್ವೀನ್ಸ್‌ಲ್ಯಾಂಡ್‌ನಲ್ಲಿ ರಾತ್ರಿ 8 ಗಂಟೆಗೆ (IST) ಹೊಸ ವರ್ಷ ಆರಂಭವಾಗುತ್ತದೆ.
ಇಡೀ ಜಗತ್ತು ಹೊಸ ವರ್ಷದ ಸಂಭ್ರಮ ಮುಗಿಸಿ ನಿದ್ರೆಗೆ ಜಾರುವ ಸಮಯದಲ್ಲಿ, ಕೆಲವು ದ್ವೀಪಗಳು ಆಗಷ್ಟೇ 2026ಕ್ಕೆ ಕಾಲಿಡುತ್ತಿರುತ್ತವೆ. ಹೊಸ ವರ್ಷವನ್ನು ಸ್ವಾಗತಿಸುವ ಭೂಮಿಯ ಮೇಲಿನ ಕೊನೆಯ ಸ್ಥಳವೆಂದರೆ ಅಮೆರಿಕನ್ ಸಮೋವಾ (American Samoa). ಇದು ಅಂತರಾಷ್ಟ್ರೀಯ ದಿನಾಂಕ ರೇಖೆಯ ಪಶ್ಚಿಮಕ್ಕೆ ಇರುವುದರಿಂದ, ಇಲ್ಲಿ ಜೂನ್ 1ರ ರಾತ್ರಿ 11:00 (UTC) ಕ್ಕೆ ಅಂದರೆ ಭಾರತದಲ್ಲಿ ಜನವರಿ 1ರ ಸಂಜೆಯಾಗುತ್ತಿರುವಾಗ ಹೊಸ ವರ್ಷ ಅಚರಿಸಲಾಗುತ್ತದೆ. ಜನವಸತಿ ಇಲ್ಲದ ಬೇಕರ್ ದ್ವೀಪ ಮತ್ತು ಹೌಲ್ಯಾಂಡ್ ದ್ವೀಪಗಳು ತಾಂತ್ರಿಕವಾಗಿ ಕೊನೆಯ ಸ್ಥಳಗಳಾದರೂ, ಜನವಸತಿ ಇರುವ ಪ್ರದೇಶಗಳಲ್ಲಿ ಅಮೆರಿಕನ್ ಸಮೋವಾ ಕೊನೆಯದಾಗಿದೆ.
