ಕರ್ನಾಟಕದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಓಡಾಟ ದಿನೇ ದಿನೇ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಮತ್ತು ಬೆಸ್ಕಾಂ ದೇಶದಲ್ಲೇ ಮೊದಲ ಬಾರಿಗೆ ಇವಿ ಚಾರ್ಜಿಂಗ್ ಸ್ಟೇಷನ್ ಜೊತೆಗೆ ಬ್ಯಾಟರಿ ಸ್ವಾಪ್ ವ್ಯವಸ್ಥೆ ಜಾರಿಗೆ ತರುವ ನಿರ್ಧಾರ ಕೈಗೊಂಡಿದೆ. ಇದರ ಮೂಲಕ ಇವಿ ಬಳಕೆದಾರರಿಗೆ ಚಾರ್ಜಿಂಗ್ ಸಮಯ ಕಡಿಮೆ ಮಾಡಿ, ವೇಗವಾಗಿ ಪ್ರಯಾಣ ಮಾಡುವ ಅನುಕೂಲ ಒದಗಿಸಲಾಗುವುದು.
ಇಂಧನ ಇಲಾಖೆಯು ಏಕಗವಾಕ್ಷಿ ಯೋಜನೆಯಡಿ ಒಂದೇ ಪೋರ್ಟಲ್ ಮೂಲಕ ಇವಿ ಚಾರ್ಜಿಂಗ್ ಸ್ಟೇಷನ್ ಮತ್ತು ಬ್ಯಾಟರಿ ಸ್ವಾಪ್ ಸ್ಟೇಷನ್‌ಗಳಿಗೆ ಅನುಮತಿ ನೀಡುವ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಇದರ ಪೋರ್ಟಲ್ ಅನ್ನು ಇಂಧನ ಸಚಿವ ಕೆ.ಜೆ. ಜಾರ್ಜ್ ಅವರು ಇತ್ತೀಚೆಗೆ ಬಿಡುಗಡೆ ಮಾಡಿದ್ದಾರೆ.
ಸಾರ್ವಜನಿಕರು ಮತ್ತು ಖಾಸಗಿ ಸಂಸ್ಥೆಗಳು ಈ ಪೋರ್ಟಲ್ ಮೂಲಕ ಒಂದೇ ಅರ್ಜಿಯಲ್ಲಿ ಇವಿ ಚಾರ್ಜಿಂಗ್ ಮತ್ತು ಬ್ಯಾಟರಿ ವಿನಿಮಯ ಸೌಲಭ್ಯಕ್ಕೆ ಅನುಮತಿ ಪಡೆಯಬಹುದು. ಹೆದ್ದಾರಿಗಳು, ನಗರ ಪ್ರದೇಶಗಳು, ಪಾರ್ಕಿಂಗ್ ಸೌಲಭ್ಯಗಳು, ಪೆಟ್ರೋಲ್ ಬಂಕ್‌ಗಳು, ಮಾಲ್‌ಗಳು ಸೇರಿದಂತೆ ಎಲ್ಲೆಡೆ ಈ ಸೌಲಭ್ಯ ಸ್ಥಾಪಿಸಲು ಅವಕಾಶ ನೀಡಲಾಗಿದೆ.
ಬೆಸ್ಕಾಂಗೆ ದೇಶದ ಮೊದಲ ಗೌರವ
ಬೆಂಗಳೂರಿನಲ್ಲಿ ಇವಿ ಚಾರ್ಜಿಂಗ್ ಸ್ಟೇಷನ್‌ಗಳನ್ನು ಆರಂಭಿಸಿ ದೇಶದಲ್ಲಿ ಮೊದಲು ಈ ವ್ಯವಸ್ಥೆ ಜಾರಿಗೊಳಿಸಿದ ಖ್ಯಾತಿ ಬೆಸ್ಕಾಂಗೆ ಸಲ್ಲಿದೆ. ಈಗ ಬ್ಯಾಟರಿ ಸ್ವಾಪ್ ವ್ಯವಸ್ಥೆಯನ್ನೂ ಸೇರಿಸಿ ಇವಿ ಎಕೋಸಿಸ್ಟಮ್ ಅನ್ನು ಇನ್ನಷ್ಟು ಬಲಪಡಿಸಲು ಸರ್ಕಾರ ಮುಂದಾಗಿದೆ. ಇದರಿಂದ ಇವಿ ಬಳಕೆದಾರರಿಗೆ ಚಾರ್ಜಿಂಗ್ ಸಮಯದ ತೊಂದರೆ ಕಡಿಮೆಯಾಗಿ, ದೀರ್ಘ ದೂರ ಪ್ರಯಾಣಕ್ಕೂ ಸುಲಭವಾಗುವ ನಿರೀಕ್ಷೆ ಇದೆ.
ಇವಿ ಚಾರ್ಜಿಂಗ್ ಮತ್ತು ಬ್ಯಾಟರಿ ಸ್ವಾಪ್ ಸೌಲಭ್ಯಗಳು ಬೆಂಗಳೂರಿನಲ್ಲಿ ಹೆಚ್ಚುತ್ತಿರುವುದರಿಂದ ರಾಜ್ಯದಲ್ಲಿ ಇವಿ ಅಳವಡಿಕೆ ಇನ್ನಷ್ಟು ವೇಗಗೊಳ್ಳಲಿದೆ. ಸಾರ್ವಜನಿಕರು ಈ ಯೋಜನೆಯ ಪೋರ್ಟಲ್ ಮೂಲಕ ತಮ್ಮ ಸ್ಥಳದಲ್ಲಿ ಚಾರ್ಜಿಂಗ್/ಸ್ವಾಪ್ ಸೌಲಭ್ಯ ತರಲು ಅರ್ಜಿ ಸಲ್ಲಿಸಬಹುದು.
