ನಮ್ಮ ರಾಕಿಂಗ್ ಸ್ಟಾರ್ ಯಶ್ ಹಾಗೂ ರಣ್‌ಬೀರ್ ಕಪೂರ್ ನಟನೆಯ ರಾಮಾಯಣ ಚಿತ್ರದ ಸೆಟ್ ಬೆಂಕಿಗೆ ಆಹುತಿಯಾಗಿದೆ. ಕೋಟ್ಯಂತರ ರೂಪಾಯಿ ಮೌಲ್ಯದ ಸೆಟ್ ಸುಟ್ಟು ಕರುಕಲಾವಿದ್ದು, ಪಕ್ಕದಲ್ಲಿದ್ದ ಇತರೇ ಸಿನಿಮಾಗಳ ಸೆಟ್‌‌ಗಳೂ ಹಾನಿಗೊಂಡಿವೆ. ಇಷ್ಟಕ್ಕೂ ಅಂಥದ್ದೇನಾಯ್ತು..? ಇದು ರಾಮಾಯಣ ರಿಲೀಸ್‌ಗೆ ಎಫೆಕ್ಟ್ ಆಗುತ್ತಾ ಅನ್ನೋದ್ರ ಒಂದು ರಿಪೋರ್ಟ್ ಇಲ್ಲಿದೆ..
- ಯಶ್ ರಾಮಾಯಣ ಸೆಟ್‌ಗೆ ಬೆಂಕಿ.. ಲಾಸ್ ಆಗಿದ್ದೆಷ್ಟು ಕೋಟಿ..?
- ಯಾರಿಗೂ ಗಾಯಗಳಾಗಿಲ್ಲ.. ಮೈನ್ ಸೆಟ್‌‌ಗೂ ಹಾನಿ ಆಗಿಲ್ಲವಂತೆ
- ಮುಂಬೈ ಪ್ರೈಮ್ ಫೋಕಸ್ ಸ್ಟುಡಿಯೋದಲ್ಲಿ ಶಾರ್ಟ್ ಸರ್ಕ್ಯೂಟ್
- ರಾಮಾಯಣ ಪಾರ್ಟ್-1 ರಿಲೀಸ್‌‌ನಲ್ಲಿ ಯಾವುದೇ ವ್ಯತ್ಯಯ ಇಲ್ಲ
ರಾಮಾಯಣ.. ನಮ್ಮ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಅತಿ ದುಬಾರಿ ಸಿನಿಮಾ. ಎರಡೆರಡು ಭಾಗಗಳಲ್ಲಿ ತಯಾರಾಗ್ತಿರೋ ಈ ಸಿನಿಮಾದ ಬಂಡವಾಳ ಬರೋಬ್ಬರಿ 4 ಸಾವಿರ ಕೋಟಿ. ಮೊದಲ ಭಾಗ ಇದೇ ನವೆಂಬರ್ 6ರಂದು ದೀಪಾವಳಿ ಹಬ್ಬದ ವಿಶೇಷ ವರ್ಲ್ಡ್‌‌ವೈಡ್ ಬೆಳ್ಳಿತೆರೆ ಬೆಳಗಲಿದ್ದು, ಎರಡನೇ ಭಾಗ ಮುಂದಿನ ವರ್ಷ.. ಅಂದ್ರೆ 2027ರ ದೀಪಾವಳಿಗೆ ತೆರೆ ಕಾಣಲಿದೆ.
ನಮ್ಮ ರಾಕಿಂಗ್ ಸ್ಟಾರ್ ಯಶ್, ಬಾಲಿವುಡ್‌ನ ರಣ್‌ಬೀರ್ ಕಪೂರ್ ಹಾಗೂ ಸಾಯಿ ಪಲ್ಲವಿ ಮುಖ್ಯಭೂಮಿಕೆಯಲ್ಲಿರೋ ಈ ಮಹಾದೃಶ್ಯಕಾವ್ಯಕ್ಕೆ ದಂಗಲ್ ಡೈರೆಕ್ಟರ್ ನಿತೇಶ್ ತಿವಾರಿ ಆ್ಯಕ್ಷನ್ ಕಟ್ ಹೇಳ್ತಿದ್ದಾರೆ. ನಮಿತ್ ಮಲ್ಹೋತ್ರಾ ಜೊತೆ ನಮ್ಮ ಹೆಮ್ಮೆಯ ಕನ್ನಡಿಗ ಯಶ್ ಕೂಡ ಬಂಡವಾಳ ಹೂಡಿ, ಸಹ ನಿರ್ಮಾಪಕರಾಗಿ ಸೌಂಡ್ ಮಾಡ್ತಿದ್ದಾರೆ. ಇಲ್ಲಿಯ ತನಕ ಬಂದಿರೋ ಟೀಸರ್ ಹಾಗೂ ಸಾಂಗ್ ದೃಶ್ಯಗುಚ್ಚಗಳು ಸಿನಿಮಾ ಮೇಲಿನ ನಿರೀಕ್ಷೆ ಹೆಚ್ಚಿಸಿದ್ದು, ಇದ್ರಿಂದ ಗ್ಲೋಬಲ್ ಪ್ಲಾಟ್‌‌ಫಾರ್ಮ್‌‌ನಲ್ಲಿ ನಮ್ಮ ನೆಲದ ಕಥೆ ರಾರಾಜಿಸಲಿದೆ.
ಸಿನಿಮಾದ ರಿಲೀಸ್ ಡೇಟ್ ಲಾಕ್ ಆಗಿದ್ದು.. ಫಿಲ್ಮ್ ಟೀಂ ಭರ್ಜರಿ ಪ್ರಮೋಷನ್ಸ್ ಕೂಡ ಶುರುವಿಟ್ಟಿದೆ. ಆದ್ರೀಗ ರಾಮಾಯಣ ಸೆಟ್‌‌ನಿಂದ ಆಘಾತಕಾರಿ ಸುದ್ದಿಯೊಂದು ಹೊರಬಿದ್ದಿದೆ. ಅದೇನಪ್ಪಾ ಅಂದ್ರೆ.. ಮುಂಬೈನಲ್ಲಿ ಶೂಟಿಂಗ್‌ಗೆ ಹಾಕಲಾಗಿದ್ದ ಸೆಟ್ ಬೆಂಕಿಗೆ ಆಹುತಿ ಆಗಿದೆ. ಸಾಕಷ್ಟು ಸೆಟ್ ಪ್ರಾಪರ್ಟಿ ಸುಟ್ಟು ಕರಕಲಾಗಿದ್ದು, ಅದ್ರಿಂದ ಕೋಟ್ಯಂತರ ರೂಪಾಯಿ ನಷ್ಟವಾಗಿದೆ ಎನ್ನಲಾಗ್ತಿದೆ.
ಹೌದು.. ಅಕ್ಟೋಬರ್ 5ರ ಸಂಜೆ ಮುಂಬೈನ ಪ್ರೈಮ್ ಫೋಕಸ್ ಸ್ಟುಡಿಯೋದಲ್ಲಿ ಹಾಕಲಾಗಿದ್ದ ರಾಮಾಯಣ ಸಿನಿಮಾದ ಸೆಟ್.. ಶಾರ್ಟ್ ಸರ್ಕ್ಯೂಟ್‌‌ನಿಂದಾಗಿ ಹೊತ್ತಿ ಉರಿದಿದೆ. ವೈರಿಂಗ್, ಕೇಬಲ್ ಹಾಗೂ ಕೆಲವು ಶೂಟಿಂಗ್ ಪರಿಕರಗಳು ಬೆಂಕಿಗಾಹುತಿ ಆಗಿದ್ದು, ಟೆಂಟ್‌ಗಳು ಸಂಪೂರ್ಣವಾಗಿ ಸುಟ್ಟಿವೆ. ಆದ್ರೆ ಕೂಡಲೇ ಮುಂಬೈ ಅಗ್ನಿಶಾಮಕ ದಳ ಸ್ಥಳಕ್ಕೆ ಆಗಮಿಸಿ, ಪರಿಸ್ಥಿತಿಯನ್ನ ಹತೋಟಿಗೆ ತರುವಲ್ಲಿ ಯಶಸ್ವಿಯಾಗಿದೆ. ಲೆವೆಲ್-1 ನಲ್ಲೇ ಆಗುವ ಬಹುದೊಡ್ಡ ಅನಾಹುತವನ್ನ ತಪ್ಪಿಸಿದೆ ಅಗ್ನಿಶಾಮಕ ದಳ ಎನ್ನಲಾಗಿದೆ.
ಅಂದಹಾಗೆ ರಾಮಾಯಣ ಸೆಟ್‌ಗೆ ಬೆಂಕಿ ಬಿದ್ದ ಹಿನ್ನೆಲೆ ಯಾರಿಗೂ ಪ್ರಾಣಾಪಾಯ ಸಂಭವಿಸಿಲ್ಲ. ಸಣ್ಣ ಪುಟ್ಟ ಗಾಯಗಳು ಕೂಡ ಆಗಿಲ್ಲ. ಅಷ್ಟರಲ್ಲಿ ಸೆಟ್‌‌ನಿಂದ ಎಲ್ಲರೂ ಹೊರಬಂದು ಬಚಾವ್ ಆಗಿದ್ದಾರೆ. ಆದ್ರೆ ರಾಮಾಯಣ ಸೆಟ್‌ನ ಅಕ್ಕ ಪಕ್ಕದಲ್ಲೇ ಪತಿ ಪತ್ನಿ ಔರ್ ಪಂಗಾ-2 ಹಾಗೂ ಎಂಟಿವಿ ಹಸ್ಟಲ್-5 ಕೂಡ ಶೂಟಿಂಗ್ ನಡೆಯುತ್ತಿದ್ದು, ಬೆಂಕಿಯಿಂದ ಆ ಸೆಟ್‌‌ಗಳಿಗೂ ಹಾನಿಯಾಗಿದೆ ಎಂದು ವರದಿಯಾಗಿದೆ.
ಶೂಟಿಂಗ್ ಸೆಟ್‌‌ಗಳು ಅಂದಮೇಲೆ ಇಂಥದ್ದೆಲ್ಲಾ ಸರ್ವೇ ಸಾಮಾನ್ಯ. ಆದ್ರೆ ಯಾರಿಗೂ ಏನೂ ತೊಂದರೆ ಆಗಿಲ್ಲ ಅನ್ನೋದು ಕೊಂಚ ನಿರಾಳ ತರಿಸಿದೆ. ಎಲ್ಲಕ್ಕಿಂತ ಮಿಗಿಲಾಗಿ ಹೀಗೆ ಸೆಟ್ ಹಾಳಾಗಿರೋದು ಸಿನಿಮಾದ ರಿಲೀಸ್ ಮೇಲೆ ಯಾವುದೇ ಪರಿಣಾಮ ಬೀರಿಲ್ಲ. ಯಾಕಂದ್ರೆ ನವೆಂಬರ್ 6ಕ್ಕೆ ಮೊದಲ ಭಾಗ ರಿಲೀಸ್ ಫಿಕ್ಸ್ ಆಗಿದ್ದು, ಆ ದಿನಾಂಕದಲ್ಲಿ ಯಾವುದೇ ವ್ಯತ್ಯಯ ಇಲ್ಲ ಅನ್ನೋದನ್ನ ಸ್ಪಷ್ಟಪಡಿಸಿದೆ ಚಿತ್ರತಂಡ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
