ಕನ್ನಡ ಸಂಗೀತ ಲೋಕದಲ್ಲಿ ತಮ್ಮ ವಿಶಿಷ್ಟ ಜಾನಪದ ಸಂಗೀತದ ಮೂಲಕ ಖ್ಯಾತಿ ಗಳಿಸಿರುವ ರಘು ದೀಕ್ಷಿತ್ ಅವರು ತಮ್ಮ ವೈಯಕ್ತಿಕ ಜೀವನದಲ್ಲಿ ಹೊಸ ತಿರುವನ್ನು ಪಡೆದಿದ್ದಾರೆ. 50 ವರ್ಷದ ಈ ಖ್ಯಾತ ಗಾಯಕ ಎರಡನೇ ಮದುವೆಗೆ ಸಜ್ಜಾಗಿದ್ದು, ಗ್ರ್ಯಾಮಿ ನಾಮನಿರ್ದೇಶಿತ ಗಾಯಕಿ ಮತ್ತು ಕೊಳಲು ವಾದಕಿ ವಾರಿಜಶ್ರೀ ವೇಣುಗೋಪಾಲ್ ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ. ಇದೇ ಅಕ್ಟೋಬರ್ ತಿಂಗಳಾಂತ್ಯದಲ್ಲಿ ನಡೆಯಲಿರುವ ಈ ಮದುವೆ ಸಮಾರಂಭ ಆಪ್ತರ ಮಧ್ಯೆ ಸರಳವಾಗಿ ನೆರವೇರಲಿದೆ.
ಬೆಂಗಳೂರಿನಲ್ಲಿ ಹುಟ್ಟಿ ಬೆಳೆದ ರಘು, ಇಂಜಿನಿಯರಿಂಗ್ ಪದವಿ ಪಡೆದ ನಂತರ ಸಂಗೀತ ಕ್ಷೇತ್ರಕ್ಕೆ ಧುಮುಕಿದರು. ಅವರ ಬ್ಯಾಂಡ್ ಯುಕೆ, ಯುಎಸ್ಎ ಸೇರಿದಂತೆ ಅನೇಕ ದೇಶಗಳಲ್ಲಿ ಕಚೇರಿಗಳನ್ನು ನೀಡಿದೆ. ‘ಪರಾಶಕ್ತಿ’, ‘ಜಗ್ ಚಂಗಾ’ ಮುಂತಾದ ಹಾಡುಗಳು ಅವರನ್ನು ಸ್ಟಾರ್ ಗಾಯಕರನ್ನಾಗಿ ಮಾಡಿವೆ. 2009ರಲ್ಲಿ ಖ್ಯಾತ ನೃತ್ಯಕಲಾವಿದೆ ಮಯೂರಿ ಉಪಾಧ್ಯ ಅವರನ್ನು ವಿವಾಹವಾಗಿದ್ದ ರಘು, 2019ರಲ್ಲಿ ವೈಯಕ್ತಿಕ ಕಾರಣಗಳಿಂದಾಗಿ ಡಿವೋರ್ಸ್ ಪಡೆದರು. ಆ ಸಮಯದಲ್ಲಿ ಲೈಂಗಿಕ ದೌರ್ಜನ್ಯ ಆರೋಪಗಳು ಕೂಡ ಕೇಳಿಬಂದಿದ್ದವು. ಆದರೆ ಅವರು ಅದನ್ನು ನಿರಾಕರಿಸಿದ್ದರು. ಡಿವೋರ್ಸ್ ನಂತರ ರಘು ಏಕಾಂಗಿಯಾಗಿ ಜೀವನ ನಡೆಸುವ ನಿರ್ಧಾರಕ್ಕೆ ಬಂದಿದ್ದರು.
ರಘು ಮತ್ತು ವಾರಿಜಶ್ರೀ ಅವರು ಹಲವು ವರ್ಷಗಳಿಂದ ಸ್ನೇಹಿತರಾಗಿದ್ದರು. ಅವರ ಮೊದಲ ಸಹಕಾರ ‘ಭರವಸೆಯ ಬದುಕು’ ಆಲ್ಬಂನ ‘ಸಾಕು ಇನ್ನು ಸಾಕು’ ಹಾಡಿನಲ್ಲಿ ನಡೆಯಿತು. ಇಬ್ಬರೂ ಸಂಗೀತದಲ್ಲಿ ಸಾಮಾನ್ಯ ಆಸಕ್ತಿಗಳನ್ನು ಹೊಂದಿದ್ದರು. ವಾರಿಜಶ್ರೀ ಅವರು ಬೆಂಗಳೂರಿನ ಚಕ್ರಫೋನಿಕ್ಸ್ ಬ್ಯಾಂಡ್ನ ಸದಸ್ಯರಾಗಿದ್ದು, ಕರ್ನಾಟಕ ಸಂಗೀತ ಮತ್ತು ಜಾಝ್ ಮಿಶ್ರಣದ ‘ಕರ್ನಾಟಿಕ್ ಸ್ಕ್ಯಾಟ್ ಸಿಂಗಿಂಗ್’ ಕಲೆಯ ಸೃಷ್ಟಿಕರ್ತರಾಗಿದ್ದಾರೆ.
ಅವರ ‘ಎ ರಾಕ್ ಸಮ್ವೇರ್’ ಕೃತಿಗೆ ಗ್ರ್ಯಾಮಿ ನಾಮನಿರ್ದೇಶನ ಸಿಕ್ಕಿದೆ. ಕನ್ನಡ ಸಿನಿಮಾಗಳಾದ ‘ಪ್ರಿಯೆ’, ‘ಕಡಲ ತೀರದ ಭಾರ್ಗವ’, ‘ಟಗರು’, ‘ಆಚಾರ್ ಮತ್ತು ಕಂಪನಿ’ಯಲ್ಲಿ ಅವರು ಹಾಡಿದ್ದಾರೆ. ತಮಿಳು, ತೆಲುಗು ಸಿನಿಮಾರಂಗದಲ್ಲೂ ಅವರು ಕೆಲಸ ಮಾಡಿದ್ದಾರೆ. ಸಂಗೀತ ಕುಟುಂಬದ ಹಿನ್ನೆಲೆಯಿಂದ ಬಂದ ವಾರಿಜಶ್ರೀ, ಕೊಳಲು ವಾದನದಲ್ಲಿ ಪರಿಣತಿ ಹೊಂದಿದ್ದಾರೆ.
ರಘು ದೀಕ್ಷಿತ್ ಅವರು ಟೈಮ್ಸ್ ಆಫ್ ಇಂಡಿಯಾ ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ. “ನಾನು ನಿಜವಾಗಿಯೂ ಇದನ್ನು ನಿರೀಕ್ಷಿಸಿರಲಿಲ್ಲ. ನನ್ನ ಜೀವನದ ಉಳಿದ ಭಾಗವನ್ನು ಒಂಟಿಯಾಗಿ ಮತ್ತು ಏಕಾಂಗಿಯಾಗಿ ಕಳೆಯಲು ಸಿದ್ಧನಾಗಿದ್ದೆ. ಆದರೆ, ಜೀವನಕ್ಕೆ ಬೇರೆ ಯೋಜನೆಗಳಿದ್ದವು. ಬಲವಾದ ಸ್ನೇಹದಿಂದ ಆರಂಭವಾದದ್ದು ಸಹಜವಾಗಿಯೇ ಪ್ರೀತಿ ಮತ್ತು ಒಡನಾಟವಾಗಿ ಬೆಳೆಯಿತು. ನಾವು ಇಬ್ಬರೂ ಸಮಾನ ಆಸಕ್ತಿಗಳನ್ನು ಹೊಂದಿದ್ದೇವೆ ಮತ್ತು ಆಳವಾಗಿ ಸಂಪರ್ಕ ಹೊಂದಿದ್ದೇವೆ. ವಾರಿಜಶ್ರೀ ಅವರ ಪೋಷಕರ ಆಶೀರ್ವಾದದೊಂದಿಗೆ ನಾವು ನಮ್ಮ ಜೀವನದ ಈ ಹೊಸ ಅಧ್ಯಾಯವನ್ನು ಒಟ್ಟಿಗೆ ಪ್ರಾರಂಭಿಸಲು ಉತ್ಸುಕರಾಗಿದ್ದೇವೆ” ಎಂದು ಅವರು ಹೇಳಿದ್ದಾರೆ.
ಇಬ್ಬರೂ ಕಲಾವಿದರು ತಮ್ಮ ವೃತ್ತಿಯಲ್ಲಿ ಯಶಸ್ವಿಯಾಗಿದ್ದು, ಒಟ್ಟಿಗೆ ಹಲವು ಕಾರ್ಯಕ್ರಮಗಳನ್ನು ನೀಡಿದ್ದಾರೆ. ರಘು ಅವರ ವಯಸ್ಸು 50 ಮತ್ತು ವಾರಿಜಶ್ರೀ ಅವರದು 34 ಆಗಿದ್ದು, ವಯಸ್ಸಿನ ಅಂತರವು ಅವರ ಪ್ರೇಮಕ್ಕೆ ಅಡ್ಡಿಯಾಗಿಲ್ಲ. ಸ್ನೇಹದಿಂದ ಆರಂಭವಾದ ಈ ಸಂಬಂಧವು ಸಹಜವಾಗಿ ಪ್ರೀತಿಯಾಗಿ ಬೆಳೆದಿದೆ ಎಂದು ರಘು ಹೇಳಿದ್ದಾರೆ. ವಾರಿಜಶ್ರೀ ಅವರ ಪೋಷಕರು ಈ ಮದುವೆಗೆ ಆಶೀರ್ವಾದ ನೀಡಿದ್ದಾರೆ.
