ಬೆಂಗಳೂರು: ನಟ ಧನ್ವೀರ್ ಗೌಡ ಮತ್ತು ನಟ ದರ್ಶನ್ ಅವರ ಕುಟುಂಬದ ಸುತ್ತ ನಡೆಯುತ್ತಿರುವ ವಿವಾದದ ನಡುವೆ, ನಟಿ ಹಾಗೂ ಬಿಗ್ ಬಾಸ್ ಖ್ಯಾತಿಯ ಅಶ್ವಿನಿ ಗೌಡ ಅವರ ಸಾಮಾಜಿಕ ಜಾಲತಾಣದ ಪೋಸ್ಟ್ ಗಮನ ಸೆಳೆದಿದೆ. ಅಭಿಮಾನ, ಹೆಣ್ಣಿನ ಗೌರವ, ಕುಟುಂಬದ ಘನತೆ ಹಾಗೂ ಮಾನವೀಯತೆಯ ಕುರಿತು ಅವರು ಹಂಚಿಕೊಂಡಿರುವ ಮಾರ್ಮಿಕ ಸಂದೇಶ ಇದೀಗ ಚರ್ಚೆಗೆ ಗ್ರಾಸವಾಗಿದೆ. ಈ ಪೋಸ್ಟ್ ಧನ್ವೀರ್ಗೆ ಪರೋಕ್ಷ ತಿರುಗೇಟು ಎಂಬ ಚರ್ಚೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿದೆ.
ನಟ ದರ್ಶನ್ ಅವರ ಫೋಟೋ ಹಂಚಿಕೊಂಡು ಅಭಿಮಾನ ಮತ್ತು ಸಂಬಂಧಗಳ ಮೌಲ್ಯದ ಕುರಿತು ಸುದೀರ್ಘವಾಗಿ ಬರೆದುಕೊಂಡಿರುವ ಅಶ್ವಿನಿ ಗೌಡ, ಒಬ್ಬ ಕಲಾವಿದನನ್ನು ಪ್ರೀತಿಸುವವರು ಅವರ ಕುಟುಂಬವನ್ನೂ ಗೌರವಿಸುವ ಹೃದಯವಂತಿಕೆ ಬೆಳೆಸಿಕೊಳ್ಳಬೇಕು ಎಂಬ ಸಂದೇಶ ನೀಡಿದ್ದಾರೆ.
ಅಭಿಮಾನ ಎಂದರೆ ಹೆಸರನ್ನು ಕೂಗುವುದಷ್ಟೇ ಅಲ್ಲ!
ಅಶ್ವಿನಿ ಗೌಡ ತಮ್ಮ ಪೋಸ್ಟ್‌ನಲ್ಲಿ ಅಭಿಮಾನದ ನಿಜವಾದ ಅರ್ಥವನ್ನು ವಿವರಿಸಿದ್ದಾರೆ. ಒಬ್ಬ ಕಲಾವಿದನ ಮೇಲಿನ ಪ್ರೀತಿ ಕೇವಲ ಅವರ ಹೆಸರನ್ನು ಕೂಗುವುದಕ್ಕೆ ಅಥವಾ ಪರದೆಯ ಮೇಲಿನ ಅವರ ವ್ಯಕ್ತಿತ್ವವನ್ನು ಮೆಚ್ಚುವುದಕ್ಕೆ ಸೀಮಿತವಾಗಬಾರದು. ಆ ಕಲಾವಿದನೊಂದಿಗೆ ನಂಟು ಹೊಂದಿರುವ ಕುಟುಂಬದವರನ್ನೂ ಗೌರವಿಸುವ ಮನೋಭಾವ ಅಭಿಮಾನಿಗಳಲ್ಲಿ ಇರಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಕಲಾವಿದನ ಪತ್ನಿ, ಮಕ್ಕಳು ಹಾಗೂ ಮನೆಯ ಹೆಣ್ಣುಮಕ್ಕಳ ಗೌರವವನ್ನು ಕಾಪಾಡುವುದು ನಮ್ಮ ಸಂಸ್ಕಾರವಾಗಬೇಕು ಎಂಬ ಸಂದೇಶವನ್ನು ಅವರು ನೀಡಿದ್ದಾರೆ.
‘ಹೆಣ್ಣಿನ ಮೌನವನ್ನು ದೌರ್ಬಲ್ಯವೆಂದು ಭಾವಿಸಬೇಡಿ’
ಸಂಬಂಧಗಳಲ್ಲಿ ಮನಸ್ತಾಪಗಳು ಉಂಟಾದಾಗ ಈ ಹಿಂದೆ ಹಂಚಿಕೊಂಡ ಪ್ರೀತಿ, ವಿಶ್ವಾಸ ಹಾಗೂ ಕಷ್ಟ-ಸುಖಗಳನ್ನು ಮರೆತು, ಅದೇ ಸಂಬಂಧವನ್ನು ಮತ್ತೊಬ್ಬರನ್ನು ನೋಯಿಸುವ ಅಸ್ತ್ರವನ್ನಾಗಿ ಬಳಸಿಕೊಳ್ಳುವುದು ನೋವುಂಟುಮಾಡುವ ಸಂಗತಿ ಎಂದು ಅಶ್ವಿನಿ ಗೌಡ ತಮ್ಮ ಪೋಸ್ಟ್‌ನಲ್ಲಿ ಹೇಳಿದ್ದಾರೆ.
ಒಂದು ಹೆಣ್ಣಿನ ಮೌನವನ್ನು ದೌರ್ಬಲ್ಯವೆಂದು ಭಾವಿಸಬಾರದು. ಭಿನ್ನಾಭಿಪ್ರಾಯಗಳು ಅಥವಾ ವೈಯಕ್ತಿಕ ಮನಸ್ತಾಪಗಳು ಇದ್ದರೂ, ಮತ್ತೊಬ್ಬರ ಘನತೆಗೆ ಧಕ್ಕೆ ತರುವ ರೀತಿಯಲ್ಲಿ ವರ್ತಿಸುವುದು ಸರಿಯಲ್ಲ ಎಂಬ ಆಶಯವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ಮಾತುಗಳ ಮೂಲಕ ಯಾವುದೇ ಕುಟುಂಬದ ಗೌರವಕ್ಕೆ ಧಕ್ಕೆ ತರಬಾರದು. ವೈಯಕ್ತಿಕ ಸಂಬಂಧಗಳಲ್ಲಿ ಏನೇ ಸಮಸ್ಯೆಗಳಿದ್ದರೂ, ಅವುಗಳನ್ನು ಮತ್ತೊಬ್ಬರನ್ನು ಅವಮಾನಿಸುವ ಅಥವಾ ನೋಯಿಸುವ ಸಾಧನವನ್ನಾಗಿ ಮಾಡಿಕೊಳ್ಳಬಾರದು ಎಂದು ಹೇಳಿದ್ದಾರೆ.
ಧನ್ವೀರ್–ವಿಜಯಲಕ್ಷ್ಮಿ ವಿವಾದದ ನಡುವೆ ಪೋಸ್ಟ್ ವೈರಲ್
ನಟ ಧನ್ವೀರ್ ಗೌಡ ಮತ್ತು ದರ್ಶನ್ ಅವರ ಪತ್ನಿ ವಿಜಯಲಕ್ಷ್ಮಿ ನಡುವಿನ ವಿವಾದದ ಹಿನ್ನೆಲೆ ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಚರ್ಚೆಗಳು ನಡೆಯುತ್ತಿವೆ. ಈ ಬೆಳವಣಿಗೆಗಳ ನಡುವೆಯೇ ಅಶ್ವಿನಿ ಗೌಡ ಅವರ ಪೋಸ್ಟ್ ಮಾಡಿದ್ದು, ಇದನ್ನು ಧನ್ವೀರ್ಗೆ ನೀಡಿದ ಪರೋಕ್ಷ ಪ್ರತಿಕ್ರಿಯೆ ಎಂದು ಕೆಲವರು ಅರ್ಥೈಸುತ್ತಿದ್ದಾರೆ.
‘ಯಾರನ್ನೂ ನೋಯಿಸಿ ಅಭಿಮಾನ ಸಾಬೀತುಪಡಿಸಬೇಡಿ’
ಕಲಾವಿದ ಮತ್ತು ಅಭಿಮಾನಿಯ ನಡುವಿನ ಸಂಬಂಧವು ಕೇವಲ ಪರದೆಯ ಮೇಲಿನ ಆಕರ್ಷಣೆಯಲ್ಲ. ಅದು ಪ್ರೀತಿ, ನಂಬಿಕೆ ಮತ್ತು ಭಾವನೆಗಳ ಬಂಧ ಎಂದು ಅಶ್ವಿನಿ ಗೌಡ ಹೇಳಿದ್ದಾರೆ.
ನಿಜವಾದ ಅಭಿಮಾನಿ ಕಲಾವಿದನ ಯಶಸ್ಸಿನಲ್ಲಿ ಸಂಭ್ರಮಿಸುತ್ತಾನೆ, ಕಷ್ಟದ ಸಮಯದಲ್ಲಿ ಬೆಂಬಲವಾಗಿ ನಿಲ್ಲುತ್ತಾನೆ. ಆದರೆ ತನ್ನ ಅಭಿಮಾನವನ್ನು ಸಾಬೀತುಪಡಿಸಲು ಮತ್ತೊಬ್ಬರನ್ನು ನೋಯಿಸುವುದಾಗಲಿ, ಅವಮಾನಿಸುವುದಾಗಲಿ ಮಾಡಬಾರದು ಎಂಬ ಸಂದೇಶವನ್ನು ಅವರು ನೀಡಿದ್ದಾರೆ.
ಕಲಾವಿದನ ಮೇಲಿನ ಪ್ರೀತಿಯ ಹೆಸರಿನಲ್ಲಿ ದ್ವೇಷ ಬೆಳೆಸುವುದು ಅಥವಾ ಕುಟುಂಬದ ಸದಸ್ಯರನ್ನು ಗುರಿಯಾಗಿಸುವುದು ನಿಜವಾದ ಅಭಿಮಾನದ ಲಕ್ಷಣವಲ್ಲ ಎಂಬ ಅರ್ಥದಲ್ಲಿ ಅವರು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಮಾನವೀಯತೆ ಉಳಿಯಲಿ, ಹೆಣ್ಣಿನ ಗೌರವಕ್ಕೆ ಧಕ್ಕೆಯಾಗದಿರಲಿ
ಪೋಸ್ಟ್‌ನ ಕೊನೆಯಲ್ಲಿ ಅಭಿಮಾನ ಮತ್ತು ಮಾನವೀಯತೆಯ ನಡುವಿನ ಸಮತೋಲನದ ಅಗತ್ಯವನ್ನು ಅಶ್ವಿನಿ ಗೌಡ ಒತ್ತಿಹೇಳಿದ್ದಾರೆ. ಪ್ರೀತಿ ಇರಲಿ, ಆದರೆ ಹೆಣ್ಣಿನ ಗೌರವಕ್ಕೆ ಧಕ್ಕೆಯಾಗಬಾರದು. ಸಂಬಂಧಗಳು ಇರಲಿ, ಆದರೆ ಮನಸ್ಸುಗಳನ್ನು ಮುರಿಯುವಷ್ಟು ದ್ವೇಷ ಬೆಳೆಯಬಾರದು ಎಂಬ ಆಶಯವನ್ನು ವ್ಯಕ್ತಪಡಿಸಿದ್ದಾರೆ.
