ಅಪ್ಪು.. ಅಪ್ಪು.. ಅಪ್ಪು.. ಈ ನಗುಮುಖದ ಒಡೆಯ ಇಲ್ಲ ಅಂತ ಯಾರ್ ರೀ ಹೇಳಿದ್ದು. ಅವರು ಇಲ್ಲೇ ಇದ್ದಾರೆ. ಶುಕ್ರವಾರ ನೀವಿರುವಲ್ಲಿಗೆ ಬರ್ತಿದ್ದಾರೆ. ಆತ್ಮೀಯ ಕನ್ನಡಿಗರೇ ನಿಮ್ಮಲ್ಲಿ ಒಂದು ವಿನಂತಿ. ಅಪ್ಪು ಇದೇ ಶುಕ್ರವಾರ ಬರ್ತಿದ್ದಾರೆ.. ಕಣ್ತುಂಬಿಕೊಳ್ಳಿ. ಹೌದು.. 23 ವರ್ಷಗಳ ನಂತ್ರ ಅದೇ ಅಪ್ಪು, ಅದೇ ಖದರ್ ನಲ್ಲಿ, ಅದೇ ಪವರ್ ಫುಲ್ ಎಂಟ್ರಿ ಕೊಡ್ತಿದ್ದಾರೆ ಅದೂ ನಿಮ್ಮ ಹತ್ತಿರದ ಚಿತ್ರಮಂದಿರಗಳಿಗೆ. ಬೆಳ್ಳಿತೆರೆ ಬೆಳಗೋಕೆ ಕಾತರರಾಗಿದ್ದಾರೆ.
ಪಿಆರ್ ಕೆ ಪ್ರೊಡಕ್ಷನ್ಸ್ ಅಪ್ಪು ಸಿನಿಮಾನ ಇದೇ ಮಾರ್ಚ್ 14ರಂದು ಪುನೀತ್ ರಾಜ್ ಕುಮಾರ್ ಅವರ 50ನೇ ಬರ್ತ್ ಡೇ ಹಿನ್ನೆಲೆಯಲ್ಲಿ ರೀ-ರಿಲೀಸ್ ಮಾಡೋಕೆ ಸಜ್ಜಾಗಿದೆ. ಬಾಲನಟನಾಗಿ ಕನ್ನಡ ಚಿತ್ರರಂಗವನ್ನು ರೂಲ್ ಮಾಡಿ, ನ್ಯಾಷನಲ್ ಅವಾರ್ಡ್ ಪಡೆದ ಮಾಸ್ಟರ್ ಲೋಹಿತ್ ಅಲಿಯಾಸ್ ಅಪ್ಪು, ಹೀರೋ ಆಗಿ ಲಾಂಚ್ ಆದ ಸಿನಿಮಾ ಇದು.
ಪುನೀತ್ ರಾಜ್ ಕುಮಾರ್ ಅವರನ್ನ ದೊಡ್ಮನೆ ಜೊತೆಗೆ ಅವರ ಆಪ್ತ ವಲಯ, ನೆಂಟರೆಲ್ಲಾ ಅಪ್ಪು ಅಂತಲೇ ಕರೆಯುತ್ತಿದ್ರು. ಹಾಗಾಗಿಯೇ ಅದೇ ಟೈಟಲ್ ನ ಸಿನಿಮಾಗಿಟ್ಟು, ಅಪ್ಪು ಅಂತಲೇ ಸಿನಿಮಾ ಮಾಡಿದ್ರು ಪಾರ್ವತಮ್ಮ ರಾಜ್ ಕುಮಾರ್. ಯೂತ್ ಫುಲ್ ಸಬ್ಜೆಕ್ಟ್, ಕಾಲೇಜ್ ಸ್ಟೋರಿ, ಹೆಂಗೆಳೆಯರ ಅಚ್ಚುಮೆಚ್ಚಿನ ಕಥೆಯಾಗಿ ಎಲ್ಲರ ಮನಸಿಗೆ ಇಳಿದಿತ್ತು ಅಪ್ಪು. ಪುನೀತ್ ರಾಜ್ ಕುಮಾರ್ ಗೆ ನಾಯಕಿಯಾಗಿ ರಕ್ಷಿತಾ ಗ್ಲಾಮರ್ ಕೂಡ ಸಾಥ್ ಕೊಟ್ಟಿತ್ತು. ಎಂ ಎಸ್ ರಮೇಶ್ ಹಾಗೂ ಆರ್ ರಾಜಶೇಖರ್ ಡೈಲಾಗ್ಸ್ ಸಿನಿಮಾದ ತೂಕ ಹೆಚ್ಚಿಸಿತ್ತು. ಬೆಂಗಳೂರು ಸಿಟಿ ಕಮಿಷನರ್ ಆಗಿ ಅವಿನಾಶ್ ಮನೋಜ್ಞ ಅಭಿನಯ ನೀಡಿದ್ರು.
ಗುರುಕಿರಣ್ ಸಂಗೀತ, ಎಸ್ ಮನೋಹರ್ ಸಂಕಲನ ವ್ಹಾವ್ ಫೀಲ್ ತರಿಸಿತ್ತು. ಅದ್ರಲ್ಲೂ ಸದಾ ಲವಲವಿಕೆಯಿಂದ ಇರೋ ಅಪ್ಪು, ಅವ್ರ ಫ್ರೆಂಡ್ಸ್ ಗ್ಯಾಂಗ್, ರಕ್ಷಿತಾ ಜೊತೆಗಿನ ಇಂಟೆನ್ಸ್ ಲವ್, ಅಪ್ಪು ನಾನು ಪಕ್ಕಾ ಲೋಕಲ್ ಅನ್ನೋ ಡೈಲಾಗ್ ಹೀಗೆ ಎಲ್ಲವೂ ಅಪ್ಪು ಸಿನಿಮಾ ದೊಡ್ಡ ಮಟ್ಟದ ಗೆಲುವಿಗೆ ಕಾರಣವಾಯ್ತು. ಉಪೇಂದ್ರ ಬರೆದ ತಾಲಿಬಾನ್ ಅಲ್ಲ ಅಲ್ಲ ಹಾಡನ್ನ ಸ್ವತಃ ಪುನೀತ್ ಅವರೇ ಹಾಡಿದ್ರು. ಹಂಸಲೇಖ, ಶ್ರೀರಂಗ, ಕೆ ಕಲ್ಯಾಣ್ ರ ಸಾಹಿತ್ಯದ ಹಾಡುಗಳು ಎಲ್ಲವೂ ಸೂಪರ್ ಹಿಟ್. ಅದ್ರಲ್ಲೂ ಅಣ್ಣಾವ್ರು ಹಾಡಿದ ಪಣವಿಡು ಪಣವಿಡು, ಆ ದೇವರ ಹಾಡಿದು ಸಾಂಗ್ಸ್ ಅಪ್ಪು ಸಿನಿಮಾಗೆ ಮತ್ತಷ್ಟು ಪುಷ್ಠಿ ನೀಡಿತ್ತು.
ಇನ್ನು ಸಿನಿಮಾ ಹಿಟ್ ಆದ ಪರಿಗೆ ಇಡೀ ಕರುನಾಡೇ ದಂಗಾಯ್ತು. ಅಷ್ಟರ ಮಟ್ಟಿಗೆ ಕ್ರೇಜ್ ಹುಟ್ಟಿಸಿತ್ತು. ಬಾಕ್ಸ್ ಆಫೀಸ್ ನಲ್ಲಿ ದೊಡ್ಡ ಮಟ್ಟಕ್ಕೆ ಪೈಸಾ ವಸೂಲ್ ಮಾಡಿತು. ಇದರ ಶತದಿನೋತ್ಸವ ಫಂಕ್ಷನ್ ಗೆ ಸ್ವತಃ ರಜನೀಕಾಂತ್ ಅವರೇ ಚೆನ್ನೈನಿಂದ ಬೆಂಗಳೂರಿಗೆ ಆಗಮಿಸಿದ್ರು. ತಲೈವಾ ರಜನೀಕಾಂತ್, ಡಾ ರಾಜ್ ಕುಮಾರ್ ದಂಪತಿಯ ಮುಂದೆ ಶಿವಣ್ಣ-ರಾಘಣ್ಣ-ಅಪ್ಪು ಸ್ಟೇಜ್ ಪರ್ಫಾಮೆನ್ಸ್ ಸಹ ನೀಡಿದ್ರು. ಅಲ್ಲಿ ಮಾತನಾಡುತ್ತಾ ಅಪ್ಪು ನಟನೆಯನ್ನ ಕೊಂಡಾಡಿದ್ದ ಸೂಪರ್ ಸ್ಟಾರ್ ರಜನಿ, ಅಪ್ಪು ಮುಂದೊಂದು ದಿನ ದೊಡ್ಡ ಸ್ಟಾರ್ ಆಗ್ತಾರೆ ಅಂತ ಭವಿಷ್ಯ ಕೂಡ ನುಡಿದಿದ್ರು. ಅದು ನಿಜವೂ ಆಯ್ತು.
ಅಂದಹಾಗೆ ಅಪ್ಪು ಸಿನಿಮಾನ ಪುನೀತ್ ರಾಜ್ ಕುಮಾರ್ ಗೆ ಮಾಡೋಕೆ ರೆಫರ್ ಮಾಡಿದ್ದೇ ಶಿವರಾಜ್ ಕುಮಾರ್ ಅನ್ನೋದು ಎಷ್ಟೋ ಮಂದಿಗೆ ಗೊತ್ತಿಲ್ಲ. ಇದನ್ನ ಸ್ವತಃ ಚಿತ್ರದ ಡೈರೆಕ್ಟರ್ ಪೂರಿ ಜಗನ್ನಾಥ್ ಅವರೇ ವಿಡಿಯೋ ಮೂಲಕ ಸ್ಪಷ್ಟ ಪಡಿಸಿದ್ದಾರೆ. ಶಿವಣ್ಣ ಜೊತೆ ಯುವರಾಜ ಸಿನಿಮಾ ಮಾಡಿದ್ದ ಪೂರಿಗೆ ಒಳ್ಳೆಯ ಬಾಂಧವ್ಯ ಏರ್ಪಟ್ಟಿತ್ತು. ಅಪ್ಪು ಕಥೆಯನ್ನ ತೆಲುಗಿನಲ್ಲಿ ಇಡಿಯಟ್ ಹಾಗೂ ಕನ್ನಡದಲ್ಲಿ ಅಪ್ಪು ಅಂತ ಮಾಡೋಕೆ ಮುಂದಾದಾಗ ಡೈರೆಕ್ಟರ್ ನ ಡಾ ರಾಜ್ ಕುಮಾರ್ ಹಾಗೂ ಪಾರ್ವತಮ್ಮ ರಾಜ್ ಕುಮಾರ್ ಅವರಿಗೆ ಪರಿಚಯಿಸಿದ್ದೇ ಶಿವಣ್ಣನಂತೆ.
ಅಂದಹಾಗೆ ಇದೇ ಮಾರ್ಚ್ 17ರಂದು ಅಪ್ಪು ಅವರ 50ನೇ ಜನುಮ ದಿನವನ್ನು ಅಭಿಮಾನಿ ದೇವರುಗಳು ಬಹಳ ವಿಜೃಂಭಣೆಯಿಂದ ಆಚರಿಸಲಿದ್ದಾರೆ. ಅದಕ್ಕೂ ಮುನ್ನ ಮಾರ್ಚ್ 14ರಂದೇ ಅಪ್ಪು ಸಿನಿಮಾ ರೀ-ರಿಲೀಸ್ ಆಗ್ತಿದೆ. ಕರ್ನಾಟಕ ರಾಜ್ಯಾದ್ಯಂತ ಅದ್ಧೂರಿಯಾಗಿ ತೆರೆಗಪ್ಪಳಿಸುತ್ತಿರೋ ಸಿನಿಮಾನ, ಪುನೀತ್ ರಾಜ್ ಕುಮಾರ್ ಅವರ ಹೊಸ ಸಿನಿಮಾಗಳ ರಿಲೀಸ್ ರೇಂಜ್ ಗೆ ಬಹಳ ಸಂಭ್ರಮಾಚರಣೆಗಳ ಮೂಲಕ ಬಿಡುಗಡೆ ಮಾಡ್ತಿರೋದು ಇಂಟರೆಸ್ಟಿಂಗ್. ಈಗಾಗ್ಲೇ ಒಂದಷ್ಟು ಥಿಯೇಟರ್ ಗಳ ಬಳಿ ಕಟೌಟ್ಸ್ ತಲೆ ಎತ್ತಿವೆ. ಮೊದಲ ದಿನದ ಟೆಕೆಟ್ಸ್ ಕೂಡ ಸೋಲ್ಡ್ ಔಟ್ ಆಗಿವೆ. ಇದಲ್ಲವೇ ಅಪ್ಪು ಮತ್ತು ಆ ಹೆಸರಿಗಿರೋ ತಾಕತ್ತು. ಅಪ್ಪು ವಿ ಲವ್ ಯೂ ಫಾರ್ ಎವರ್.
– ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
