ಹೊಸ ಯೂಟ್ಯೂಬರ್‌ ಗಳಿಗೆ ಶಾಕ್: ಕೆಲವು ನಿಯಮಗಳು ಜಾರಿ

ನವದೆಹಲಿ, ಆಗಸ್ಟ್ 16: ಯೂಟ್ಯೂಬ್ ತನ್ನ ಯೂಟ್ಯೂಬ್ ಪಾರ್ಟ್‌ನರ್ ಪ್ರೋಗ್ರಾಂ (YouTube Partner Program) (YPP) ಹಣಗಳಿಕೆ ನಿಯಮಗಳಲ್ಲಿ 2018ರ ಬಳಿಕದ ಅತಿದೊಡ್ಡ ಬದಲಾವಣೆಯನ್ನು ಘೋಷಿಸಿದೆ. ಈ ಹೊಸ ನಿಯಮಗಳು 2027ರ ಫೆಬ್ರವರಿ 1ರಿಂದ ಯೂಟ್ಯೂಬ್ ಪಾರ್ಟ್‌ನರ್ ಪ್ರೋಗ್ರಾಂಗೆ ಹೊಸದಾಗಿ ಅರ್ಜಿ ಸಲ್ಲಿಸುವ ಕ್ರಿಯೇಟರ್‌ಗಳಿಗೆ ಮಾತ್ರ ಅನ್ವಯವಾಗಲಿದ್ದು, ಈಗಾಗಲೇ ಯೂಟ್ಯೂಬ್ ಪಾರ್ಟ್‌ನರ್ ಪ್ರೋಗ್ರಾಂ ಸದಸ್ಯರಾಗಿರುವ ಯೂಟ್ಯೂಬರ್‌ಗಳ ಆದಾಯದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ.

ಇನ್ನು ಮುಂದೆ ಜಾಹೀರಾತು (Ads) ಹಾಗೂ ಯೂಟ್ಯೂಬ್ ಪ್ರೀಮಿಯಂ (YouTube Premium) ಮೂಲಕ ಆದಾಯ ಗಳಿಸಲು ಬಯಸುವ ಹೊಸ ಕ್ರಿಯೇಟರ್‌ಗಳು ಹೆಚ್ಚಿನ ವೀಕ್ಷಣೆ ಮತ್ತು ಚಟುವಟಿಕೆಯ ಮಾನದಂಡಗಳನ್ನು ಪೂರೈಸಬೇಕಾಗುತ್ತದೆ. ಕಳೆದ 365 ದಿನಗಳಲ್ಲಿ 8,000 ಅರ್ಹ ವಾಚ್ ಅವರ್ಸ್ ಅಥವಾ ಕಳೆದ 90 ದಿನಗಳಲ್ಲಿ 2 ಕೋಟಿ ಅರ್ಹ Shorts ವೀಕ್ಷಣೆಗಳು ಹೊಂದಿರುವುದು ಕಡ್ಡಾಯವಾಗಲಿದೆ. ಆದರೆ 1,000 ಸಬ್‌ಸ್ಕ್ರೈಬರ್ ನಿಯಮದಲ್ಲಿ ಯಾವುದೇ ಬದಲಾವಣೆ ಇಲ್ಲ.

AI ಕಂಟೆಂಟ್‌ಗೆ ಕಟ್ಟುನಿಟ್ಟಿನ ನಿಯಮ

ಯೂಟ್ಯೂಬ್ ಕೃತಕ ಬುದ್ಧಿಮತ್ತೆ (AI) ಬಳಸಿ ಒಂದೇ ಮಾದರಿಯ ಟೆಂಪ್ಲೇಟ್ ವಿಡಿಯೋಗಳನ್ನು ದೊಡ್ಡ ಪ್ರಮಾಣದಲ್ಲಿ ನಿರ್ಮಿಸುವ ಚಾನೆಲ್‌ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದೆ. ಕ್ರಿಯೇಟರ್‌ಗಳು ತಮ್ಮದೇ ಧ್ವನಿ, ನಿರೂಪಣೆ, ವಿಶ್ಲೇಷಣೆ ಅಥವಾ ಮೂಲ ಸಂಪಾದನೆಯನ್ನು ಸೇರಿಸದಿದ್ದರೆ ಅಂತಹ ಚಾನೆಲ್‌ಗಳು ಡಿ-ಮಾನಿಟೈಸ್ ಆಗುವ ಸಾಧ್ಯತೆ ಇದೆ.

ಈ ಕ್ರಮದ ಉದ್ದೇಶ ಗುಣಮಟ್ಟದ, ಮೂಲ ಮತ್ತು ಸೃಜನಶೀಲ ವಿಡಿಯೋಗಳಿಗೆ ಹೆಚ್ಚಿನ ಆದ್ಯತೆ ನೀಡುವುದಾಗಿದೆ.

ಫ್ಯಾನ್ ಫಂಡಿಂಗ್‌ಗೆ ಬದಲಾವಣೆ ಇಲ್ಲ

ಸೂಪರ್ ಚಾಟ್, ಚಾನೆಲ್ ಮೆಂಬರ್‌ಶಿಪ್ ಹಾಗೂ ಯೂಟ್ಯೂಬ್ ಶಾಪಿಂಗ್ (YouTube Shopping) ಮೂಲಕ ಆದಾಯ ಗಳಿಸಲು ಇರುವ ಹಳೆಯ ಅರ್ಹತಾ ನಿಯಮಗಳು ಮುಂದುವರಿಯಲಿವೆ. ಹೊಸ ಮಾನದಂಡಗಳು ಕೇವಲ Ads ಮತ್ತು ಪ್ರೀಮಿಯಂ ಆದಾಯಕ್ಕೆ ಮಾತ್ರ ಅನ್ವಯಿಸುತ್ತವೆ.

ಇದರ ಜೊತೆಗೆ ಯೂಟ್ಯೂಬ್ ಪ್ರೀಮಿಯಂ ಲೈಟ್ (YouTube Premium Lite) ಸೇವೆಯು ಪ್ರೀಮಿಯಂ ಲಭ್ಯವಿರುವ ಎಲ್ಲಾ ಮಾರುಕಟ್ಟೆಗಳಲ್ಲಿ ವಿಸ್ತರಿಸಲಿದ್ದು, ಭಾರತದಲ್ಲಿ ಇದರ ಮಾಸಿಕ ಶುಲ್ಕ 89 ರೂ ಆಗಿರುತ್ತದೆ. ಪ್ರೀಮಿಯಂ (Premium) ಹಾಗೂ ಪ್ರೀಮಿಯಂ ಲೈಟ್ (Premium Lite) ಆದಾಯವನ್ನು ವೀಕ್ಷಣಾ ಸಮಯದ ಆಧಾರದಲ್ಲಿ ಕ್ರಿಯೇಟರ್‌ಗಳೊಂದಿಗೆ ಹಂಚಿಕೊಳ್ಳಲಾಗುತ್ತದೆ.

ಪ್ರಮುಖ ಅಂಶಗಳು

• 2027 ಫೆಬ್ರವರಿ 1ರಿಂದ ಹೊಸ YPP ನಿಯಮ ಜಾರಿ

• ವಾಚ್ ಅವರ್ಸ್ 4,000ರಿಂದ 8,000ಕ್ಕೆ ಏರಿಕೆ

• Shorts ವೀಕ್ಷಣೆ 1 ಕೋಟಿಯಿಂದ 2 ಕೋಟಿಗೆ ಹೆಚ್ಚಳ

• 1,000 ಸಬ್‌ಸ್ಕ್ರೈಬರ್ ನಿಯಮ ಯಥಾಸ್ಥಿತಿ

• AI ಟೆಂಪ್ಲೇಟ್ ವಿಡಿಯೋಗಳಿಗೆ ಡಿ-ಮಾನಿಟೈಸ್ ಎಚ್ಚರಿಕೆ

• ಹಾಲಿ YPP ಸದಸ್ಯರಿಗೆ ಯಾವುದೇ ಪರಿಣಾಮ ಇಲ್ಲ

  ಹಳೆಯ vs ಹೊಸ ನಿಯಮ
  

  ಹೊಸ ನಿಯಮದ ಪ್ರಕಾರ ಕಳೆದ 365 ದಿನಗಳಲ್ಲಿ 8,000 ವೀಕ್ಷಣಾ ಅವಧಿ ಹೊಂದಿರಬೇಕು. ಹಿಂದಿನ ನಿಯಮದ ಪ್ರಕಾರ 4,000 ಗಂಟೆ ವೀಕ್ಷಣಾ ಅವಧಿ ಇತ್ತು. ಹೊಸ  ನಿಯಮದ ಪ್ರಕಾರ ಶಾರ್ಟ್ಸ್ ವೀಕ್ಷಣೆ ಕಳೆದ 90 ದಿನಗಳಲ್ಲಿ 2 ಕೋಟಿ. ಹಳೆಯ ನಿಯಮದ ಪ್ರಕಾರ 1 ಕೋಟಿ. ಸಬ್‌ಸ್ಕ್ರೈಬರ್‌ಗಳು  2027 ಹೊಸ ನಿಯಮ 1,000 ಹಳೆಯ ನಿಯಮ 1,000 ಇದರಲ್ಲಿಯಾವುದೇ ರೀತಿಯಲ್ಲಿ ಬದಲಾವಣೆ ಮಾಡಲಿಲ್ಲ