ಭಾರತದ ಪ್ರಮುಖ ಆನ್ಲೈನ್ ಫುಡ್ ಡೆಲಿವರಿ ಪ್ಲಾಟ್ಫಾರ್ಮ್ ಸ್ವಿಗ್ಗಿ ತನ್ನ ಹೋಟೆಲ್ ಹಾಗೂ ರೆಸ್ಟೋರೆಂಟ್ ಪಾಲುದಾರರಿಗಾಗಿ ಹೊಚ್ಚಹೊಸ ತಂತ್ರಜ್ಞಾನವೊಂದನ್ನು ಪರಿಚಯಿಸಿದೆ. ಹೋಟೆಲ್ ಉದ್ಯಮವನ್ನು ಮತ್ತಷ್ಟು ಸುಲಭ ಮತ್ತು ಲಾಭದಾಯಕವಾಗಿಸಲು ‘ಗುರು’ ಎಂಬ 24×7 ಕಾರ್ಯನಿರ್ವಹಿಸುವ ಕೃತಕ ಬುದ್ಧಿಮತ್ತೆ ಆಧಾರಿತ ಬಿಸಿನೆಸ್ ಪಾರ್ಟ್ನರ್ ಅನ್ನು ಬಿಡುಗಡೆ ಮಾಡಿದೆ.
ಏನಿದು ಸ್ವಿಗ್ಗಿಯ ‘ಗುರು’?
‘ಗುರು’ ಎನ್ನುವುದು ಸ್ವಿಗ್ಗಿಯ ರೆಸ್ಟೋರೆಂಟ್ ಪಾಲುದಾರರ ಆ್ಯಪ್ನಲ್ಲಿ ಲಭ್ಯವಿರುವ ಒಂದು ಎಐ ಅಸಿಸ್ಟೆಂಟ್. ಇದೊಂದು ಸ್ಮಾರ್ಟ್ ಚಾಟ್ಬಾಟ್ ರೀತಿಯಲ್ಲಿ ಕೆಲಸ ಮಾಡಲಿದ್ದು, ಹೋಟೆಲ್ ಮಾಲೀಕರು ತಮ್ಮ ಬಿಸಿನೆಸ್ಗೆ ಸಂಬಂಧಿಸಿದ ಯಾವುದೇ ಮಾಹಿತಿಯನ್ನು ಸೆಕೆಂಡುಗಳಲ್ಲಿ ಪಡೆಯಲು ಇದು ಸಹಾಯ ಮಾಡಲಿದೆ.
ವಿಶೇಷವೆಂದರೆ, ಹೋಟೆಲ್ ಮಾಲೀಕರಿಗೆ ಇಂಗ್ಲಿಷ್ ಬರಲೇಬೇಕು ಎಂದೇನಿಲ್ಲ. ಈ ‘ಗುರು’, ಕನ್ನಡ, ಹಿಂದಿ ಸೇರಿದಂತೆ 20ಕ್ಕೂ ಹೆಚ್ಚು ಸ್ಥಳೀಯ ಭಾಷೆಗಳಲ್ಲಿ ಕಾರ್ಯನಿರ್ವಹಿಸುತ್ತದೆ. ಹೋಟೆಲ್ ಮಾಲೀಕರು ತಮ್ಮ ಭಾಷೆಯಲ್ಲೇ ಚಾಟ್ ಮಾಡುವ ಮೂಲಕ ಇದರ ಲಾಭ ಪಡೆಯಬಹುದು.
ಹೋಟೆಲ್ ಮಾಲೀಕರಿಗೆ ಏನೆಲ್ಲಾ ಲಾಭ?
ಹೋಟೆಲ್ ಮಾಲೀಕರಿಗೆ ತಮ್ಮ ರೆಸ್ಟೋರೆಂಟ್ನ ಆಫರ್ಗಳು, ಡಿಸ್ಕೌಂಟ್ಗಳು ಮತ್ತು ಜಾಹೀರಾತುಗಳನ್ನು ತಕ್ಷಣವೇ ಪ್ರಾರಂಭಿಸಲು ಅಥವಾ ಬದಲಾಯಿಸಲು ‘ಗುರು’ ಸಹಾಯ ಮಾಡುತ್ತದೆ. ಕೇವಲ ಒಂದು ಮೆಸೇಜ್ ಮಾಡಿದರೆ ಸಾಕು.
ಪ್ರತಿದಿನದ ಲೆಕ್ಕಾಚಾರ, ಟ್ಯಾಕ್ಸ್ ರಿಪೋರ್ಟ್, ಪಾವತಿ ಸಾರಾಂಶ ಸೇರಿದಂತೆ ಹಣಕಾಸಿನ ಸಂಪೂರ್ಣ ಮಾಹಿತಿಯನ್ನು ಇದು ನಿಖರವಾಗಿ ನೀಡುತ್ತದೆ.
ಇದಲ್ಲದೆ, ನಿಮ್ಮ ಹೋಟೆಲ್ನಲ್ಲಿ ಯಾವುದು ಹೆಚ್ಚು ಮಾರಾಟವಾಗುತ್ತಿದೆ? ಯಾವ ಉತ್ಪನ್ನಕ್ಕೆ ಬೇಡಿಕೆ ಇಲ್ಲ? ಯಾವ ಕೊಡುಗೆಗಳು ವರ್ಕ್ ಆಗುತ್ತಿಲ್ಲ? ಎಂಬಿತ್ಯಾದಿ 30ಕ್ಕೂ ಹೆಚ್ಚು ಬಿಸಿನೆಸ್ ಮೆಟ್ರಿಕ್ಗಳನ್ನು ವಿಶ್ಲೇಷಿಸಿ, ಉದ್ಯಮ ಬೆಳೆಸಲು ಬೇಕಾದ ಉಚಿತ ಸಲಹೆಗಳನ್ನು ಸಹ ಇದು ನೀಡುತ್ತದೆ.
ಇದರ ಜೊತೆಗೆ ಮೆನುಗೆ ಹೊಸ ತಿನಿಸುಗಳನ್ನು ಸೇರಿಸಲು, ಅವುಗಳ ಬಗ್ಗೆ ಆಕರ್ಷಕ ವಿವರಣೆ ಬರೆಯಲು ಹಾಗೂ ಹೆಚ್ಚಾಗಿ ಮಾರಾಟವಾಗುವ ಉತ್ಪನ್ನಗಳನ್ನು ಹೈಲೈಟ್ ಮಾಡಲು ಇದು ನೆರವಾಗುತ್ತದೆ.
ಈ ಬಗ್ಗೆ ಮತ್ತಷ್ಟು ವಿವರಗಳನ್ನು ಹಂಚಿಕೊಂಡಿರುವ ಸ್ವಿಗ್ಗಿ ಫುಡ್ ಮಾರ್ಕೆಟ್ಪ್ಲೇಸ್ನ ಸಿಇಒ ರೋಹಿತ್ ಕಪೂರ್, “ಇಂದಿನ ಯುಗದಲ್ಲಿ ಎಐ ತಂತ್ರಜ್ಞಾನ ಪ್ರತಿಯೊಂದು ಉದ್ಯಮವನ್ನೂ ಬದಲಾಯಿಸುತ್ತಿದೆ. ಕಳೆದ 12 ವರ್ಷಗಳಿಂದ ಹೋಟೆಲ್ ಮಾಲೀಕರ ಜೊತೆ ಕೆಲಸ ಮಾಡುತ್ತಿರುವ ನಮಗೆ, ಅವರ ದಿನನಿತ್ಯದ ಉದ್ಯಮದ ಒತ್ತಡಗಳ ಅರಿವಿದೆ. ಹೀಗಾಗಿ, ಅವರ ದೈನಂದಿನ ಕೆಲಸವನ್ನು ಸುಲಭಗೊಳಿಸಲು ಹಾಗೂ ಉದ್ಯಮ ಬೆಳೆಸಲು ಸಹಾಯ ಮಾಡುವ ನಿಟ್ಟಿನಲ್ಲಿ 24×7 ಬೆಂಬಲ ನೀಡುವ ಗುರು ಎಂಬ ಸ್ಮಾರ್ಟ್ ಅಸಿಸ್ಟೆಂಟ್ ಅನ್ನು ಪರಿಚಯಿಸಿದ್ದೇವೆ,” ಎಂದು ಮಾಹಿತಿ ನೀಡಿದರು.
2.7 ಲಕ್ಷಕ್ಕೂ ಹೆಚ್ಚು ಹೋಟೆಲ್ಗಳಿಗೆ ಲಾಭ!
ಸ್ವಿಗ್ಗಿಯ ಈ ಹೊಸ ಆವಿಷ್ಕಾರದಿಂದ ದೇಶದ 720ಕ್ಕೂ ಹೆಚ್ಚು ನಗರಗಳಲ್ಲಿರುವ ಬರೋಬ್ಬರಿ 2.7 ಲಕ್ಷ ರೆಸ್ಟೋರೆಂಟ್ಗಳಿಗೆ (ಸಣ್ಣ ಹೋಟೆಲ್ಗಳಿಂದ ಹಿಡಿದು ದೊಡ್ಡ ರೆಸ್ಟೋರೆಂಟ್ಗಳವರೆಗೆ) ನೇರ ಲಾಭ ಸಿಗಲಿದೆ.
ಒಟ್ಟಿನಲ್ಲಿ, ಹೋಟೆಲ್ ಮಾಲೀಕರ ಶ್ರಮವನ್ನು ಕಡಿಮೆ ಮಾಡಿ, ಅವರ ಉದ್ಯಮಕ್ಕೆ ಡಿಜಿಟಲ್ ಟಚ್ ನೀಡುವಲ್ಲಿ ಸ್ವಿಗ್ಗಿ ʼಗುರುʼ ಮಹತ್ವದ ಪಾತ್ರ ವಹಿಸಲಿದೆ.
