ಈಕ್ವಿಟಿ ಮಾರುಕಟ್ಟೆಯಲ್ಲಿ ಷೇರುಗಳನ್ನು ಖರೀದಿಸಿ ದೀರ್ಘಾವಧಿ ಹಿಡಿದಿಟ್ಟುಕೊಂಡರೆ ಭಾರೀ ಲಾಭ ಸಿಗುತ್ತದೆ ಎಂಬುದು ಸಾಮಾನ್ಯ ಭಾವನೆ. ಆದರೆ, ಈ ಅಭಿಪ್ರಾಯವನ್ನು ಹೀಲಿಯೋಸ್ ಕ್ಯಾಪಿಟಲ್ ಸಂಸ್ಥಾಪಕ ಮತ್ತು ಫಂಡ್ ಮ್ಯಾನೇಜರ್ ಸಮೀರ್ ಅರೋರಾ ತಳ್ಳಿಹಾಕಿದ್ದಾರೆ. ಸಾವಿರಾರು ಷೇರುಗಳಲ್ಲಿ ಕೇವಲ ಶೇ.5ಕ್ಕಿಂತ ಕಡಿಮೆ ಷೇರುಗಳು ಮಾತ್ರ ದೀರ್ಘಾವಧಿಗೆ ಸೂಕ್ತವೆನಿಸುವುದರಿಂದ, ಇಂತಹ ಷೇರುಗಳನ್ನು ಗುರುತಿಸುವುದು ಬಹಳ ಕಷ್ಟಕರ ಎಂದು ಅವರು ಎಚ್ಚರಿಸುತ್ತಾರೆ.
ಕೆಲವೊಮ್ಮೆ, ದಶಕಗಳ ಹಿಂದೆ ಖರೀದಿಸಿದ ಷೇರುಗಳು ಇಂದು ಲಕ್ಷಾಂತರ ಅಥವಾ ಕೋಟ್ಯಂತರ ರುಪಾಯಿಗಳ ಮೌಲ್ಯವನ್ನು ತಲುಪಿರುವ ಸುದ್ದಿಗಳು ಮಾಧ್ಯಮಗಳಲ್ಲಿ ಕೇಳಿಬರುತ್ತವೆ. ಇಂತಹ ಕಥೆಗಳು ದೀರ್ಘಾವಧಿ ಷೇರು ಹೂಡಿಕೆಯ ಬಗ್ಗೆ ಒ ಒಂದು ಆಕರ್ಷಕ ಚಿತ್ರಣವನ್ನು ಸೃಷ್ಟಿಸಿವೆ. ಆದರೆ, ಸಮೀರ್ ಅರೋರಾ ಅವರು ಈ ಕಥೆಗಳನ್ನು ಮಿಥ್ ಎಂದು ಕರೆಯುತ್ತಾರೆ. ಅವರ ಸ್ನೇಹಿತರು ಮತ್ತು ಬಂಧುಗಳು 80 ಮತ್ತು 90ರ ದಶಕಗಳಲ್ಲಿ ಖರೀದಿಸಿದ ಷೇರುಗಳು ಇಂದು ಶೂನ್ಯ ಮೌಲ್ಯವನ್ನು ಹೊಂದಿವೆ ಎಂದು ಅವರು ಉದಾಹರಣೆ ನೀಡುತ್ತಾರೆ.
ಸಮೀರ್ ಅರೋರಾ ಅವರ ಪ್ರಕಾರ, ದೀರ್ಘಾವಧಿಗೆ ಷೇರುಗಳನ್ನು ಹಿಡಿದಿಟ್ಟುಕೊಳ್ಳುವುದಕ್ಕಿಂತ ಸರಿಯಾದ ಷೇರುಗಳ ಆಯ್ಕೆ ಮಾಡುವುದು ಮುಖ್ಯ. ಒಂದು ಕಂಪನಿಯ ಷೇರು ದೀರ್ಘಾವಧಿಗೆ ಲಾಭದಾಯಕವಾಗಿರಬೇಕಾದರೆ, ಆ ಕಂಪನಿಯು ನಿರಂತರ ಬೆಳವಣಿಗೆಯನ್ನು ಕಾಯ್ದುಕೊಳ್ಳಬೇಕು. ಇದಕ್ಕೆ ಕಂಪನಿಯ ವ್ಯವಹಾರ ಕ್ಷೇತ್ರ, ಮ್ಯಾನೇಜ್‌ಮೆಂಟ್ ತಂಡ, ಮತ್ತು ಮಾರುಕಟ್ಟೆಯ ಪರಿಸ್ಥಿತಿಗಳನ್ನು ಎಚ್ಚರಿಕೆಯಿಂದ ವಿಶ್ಲೇಷಿಸಬೇಕಾಗುತ್ತದೆ.
ಅರೋರಾ ಅವರ ಪ್ರಕಾರ, ಷೇರು ಮಾರುಕಟ್ಟೆಯಲ್ಲಿ ಸಾವಿರಾರು ಕಂಪನಿಗಳ ಷೇರುಗಳಿವೆ, ಆದರೆ ದೀರ್ಘಾವಧಿಗೆ ಲಾಭದಾಯಕವಾದ ಷೇರುಗಳು ಕೇವಲ ಶೇ.5ಕ್ಕಿಂತ ಕಡಿಮೆ. ಇಂತಹ ಷೇರುಗಳನ್ನು ಗುರುತಿಸುವುದು ಬಹಳ ಸವಾಲಿನ ಕೆಲಸ. ಕಂಪನಿಯ ಮ್ಯಾನೇಜ್‌ಮೆಂಟ್ ತಂಡಕ್ಕೆ ಕೂಡ ತಮ್ಮ ಕಂಪನಿಯ ಭವಿಷ್ಯದ ಬೆಳವಣಿಗೆಯ ಬಗ್ಗೆ ಸ್ಪಷ್ಟತೆ ಇರದಿರಬಹುದು ಎಂದು ಅವರು ಎಚ್ಚರಿಕೆ ನೀಡುತ್ತಾರೆ. ಆದ್ದರಿಂದ, ದೀರ್ಘಾವಧಿ ಲಾಭಕ್ಕಾಗಿ ಷೇರುಗಳನ್ನು ಆಯ್ಕೆ ಮಾಡುವಾಗ ವಿಶ್ಲೇಷಣೆ ಮತ್ತು ನಿರಂತರ ಗಮನ ಅಗತ್ಯ ಎಂದು ಸಮೀರ್ ಅರೋರಾ ಸಲಹೆ ನೀಡುತ್ತಾರೆ.
