ನವದೆಹಲಿ: ಬ್ಯಾಂಕ್‌ ಗ್ರಾಹಕರಿಗೆ ಮುಂದಿನ ವಾರ ಮಹತ್ವದ ದಿನಗಳು ಎದುರಾಗಲಿವೆ. ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಬ್ಯಾಂಕ್‌ ನೌಕರರ ಒಕ್ಕೂಟಗಳು ಸೆಪ್ಟೆಂಬರ್‌ 28ರಿಂದ 30ರವರೆಗೆ ಸತತ ಮೂರು ದಿನಗಳ ರಾಷ್ಟ್ರವ್ಯಾಪಿ ಮುಷ್ಕರಕ್ಕೆ ಕರೆ ನೀಡಿವೆ. ಇದರಿಂದ ಬ್ಯಾಂಕ್‌ ಶಾಖೆಗಳಲ್ಲಿ ನಡೆಯುವ ಹಲವು ನೇರ ಸೇವೆಗಳಿಗೆ ವ್ಯತ್ಯಯ ಉಂಟಾಗುವ ಸಾಧ್ಯತೆಯಿದೆ.
ಮುಷ್ಕರದ ಹಿನ್ನೆಲೆ ಗ್ರಾಹಕರಿಗೆ ತೊಂದರೆಯಾಗದಂತೆ ಸೆಪ್ಟೆಂಬರ್‌ 27ರ ಭಾನುವಾರ ಬ್ಯಾಂಕ್‌ ಶಾಖೆಗಳನ್ನು ತೆರೆಯುವಂತೆ ಸೂಚಿಸಲಾಗಿದೆ. ಹೀಗಾಗಿ ಮುಂದಿನ ವಾರ ಬ್ಯಾಂಕ್‌ಗೆ ಸಂಬಂಧಿಸಿದ ತುರ್ತು ಕೆಲಸಗಳಿದ್ದರೆ ಭಾನುವಾರವೇ ಮುಗಿಸಿಕೊಳ್ಳುವುದು ಸೂಕ್ತ.
ಮುಷ್ಕರ ಯಾವಾಗ?
ಯುನೈಟೆಡ್‌ ಫೋರಂ ಆಫ್ ಬ್ಯಾಂಕ್‌ ಯೂನಿಯನ್ಸ್‌ (UFBU) ನೇತೃತ್ವದಲ್ಲಿ ಸೆಪ್ಟೆಂಬರ್‌ 28, ಸೋಮವಾರದಿಂದ ಸೆಪ್ಟೆಂಬರ್‌ 30, ಬುಧವಾರದವರೆಗೆ ಮೂರು ದಿನಗಳ ಕಾಲ ಮುಷ್ಕರ ನಡೆಯಲಿದೆ. ಏಳು ಪ್ರಮುಖ ಬ್ಯಾಂಕ್‌ ಒಕ್ಕೂಟಗಳನ್ನು ಒಳಗೊಂಡಿರುವ UFBU, ದೇಶದ ಬ್ಯಾಂಕಿಂಗ್‌ ಕ್ಷೇತ್ರದ ಬಹುಪಾಲು ಸಿಬ್ಬಂದಿಯನ್ನು ಪ್ರತಿನಿಧಿಸುವುದಾಗಿ ಹೇಳಿಕೊಂಡಿದೆ.
5 ದಿನ ಕೆಲಸಕ್ಕೆ ಪ್ರಮುಖ ಬೇಡಿಕೆ
ಬ್ಯಾಂಕ್‌ ನೌಕರರ ಪ್ರಮುಖ ಬೇಡಿಕೆ ಎಂದರೆ ವಾರದಲ್ಲಿ ಐದು ದಿನಗಳ ಕೆಲಸದ ಪದ್ಧತಿ ಜಾರಿ ಮಾಡಬೇಕು ಎಂಬುದು. ಪ್ರಸ್ತುತ ಬ್ಯಾಂಕ್‌ಗಳಿಗೆ ಎರಡನೇ ಮತ್ತು ನಾಲ್ಕನೇ ಶನಿವಾರ ರಜೆ ಇದ್ದು, ಮೊದಲ, ಮೂರನೇ ಮತ್ತು ಐದನೇ ಶನಿವಾರ ಕೆಲಸದ ದಿನಗಳಾಗಿವೆ.
ಎಲ್ಲ ಶನಿವಾರಗಳನ್ನೂ ರಜೆಯನ್ನಾಗಿ ಮಾಡಿದರೆ ಸೋಮವಾರದಿಂದ ಶುಕ್ರವಾರದವರೆಗೆ ಕೆಲಸದ ಸಮಯವನ್ನು ಸ್ವಲ್ಪ ಹೆಚ್ಚಿಸಲು ಸಿದ್ಧವಿರುವುದಾಗಿ ನೌಕರರ ಸಂಘಟನೆಗಳು ತಿಳಿಸಿವೆ. 2024ರ ಮಾರ್ಚ್‌ನಲ್ಲಿ ಈ ಸಂಬಂಧ ಒಪ್ಪಂದವಾಗಿದ್ದರೂ, ಅನುಷ್ಠಾನ ವಿಳಂಬವಾಗಿದೆ ಎಂಬುದು ಸಂಘಟನೆಗಳ ಆರೋಪವಾಗಿದೆ.
ಇದರ ಜೊತೆಗೆ ಪ್ರೋತ್ಸಾಹಧನ (PLI) ಯೋಜನೆಯಲ್ಲಿ ಬದಲಾವಣೆ, ಈ ಕುರಿತು ಮಾತುಕತೆ ಮುಂದುವರಿಸುವುದು ಹಾಗೂ ಬಾಕಿ ಇರುವ ಇತರ ಸಮಸ್ಯೆಗಳನ್ನು ಪರಿಹರಿಸುವುದು ಕೂಡ ನೌಕರರ ಪ್ರಮುಖ ಬೇಡಿಕೆಗಳಾಗಿವೆ.
ಯಾವ ಸೇವೆಗಳಲ್ಲಿ ವ್ಯತ್ಯಯ?
ಮುಷ್ಕರದ ಅವಧಿಯಲ್ಲಿ ಬ್ಯಾಂಕ್‌ ಶಾಖೆಗಳಲ್ಲಿ ಸಿಬ್ಬಂದಿ ನೇರವಾಗಿ ನಿರ್ವಹಿಸುವ ಹಲವು ಸೇವೆಗಳಿಗೆ ತೊಂದರೆಯಾಗುವ ಸಾಧ್ಯತೆಯಿದೆ. ಚೆಕ್‌ ಕ್ಲಿಯರೆನ್ಸ್‌, ಡಿಮ್ಯಾಂಡ್‌ ಡ್ರಾಫ್ಟ್‌ (DD), ಹೊಸ ಖಾತೆ ತೆರೆಯುವುದು, ಲಾಕರ್‌ ಸಂಬಂಧಿತ ಸೇವೆಗಳು ಹಾಗೂ ಖುದ್ದಾಗಿ ಶಾಖೆಗೆ ಭೇಟಿ ನೀಡಿ ಮಾಡಬೇಕಾದ ಕೆಲವು ಖಾತೆ ಕೆಲಸಗಳು ವಿಳಂಬವಾಗಬಹುದು.
ಅದೇ ವೇಳೆ UPI ಪಾವತಿ, ಮೊಬೈಲ್‌ ಬ್ಯಾಂಕಿಂಗ್‌, ಇಂಟರ್‌ನೆಟ್‌ ಬ್ಯಾಂಕಿಂಗ್‌ ಮತ್ತು ATM ಸೇವೆಗಳು ಸಾಮಾನ್ಯವಾಗಿ ಮುಂದುವರಿಯುವ ನಿರೀಕ್ಷೆಯಿದೆ. ATMಗಳಲ್ಲಿ ನಗದು ಕೊರತೆಯಾಗದಂತೆ ಬ್ಯಾಂಕ್‌ಗಳು ಅಗತ್ಯ ಕ್ರಮ ಕೈಗೊಳ್ಳುವಂತೆ ಸೂಚಿಸಲಾಗಿದೆ.
ಖಾಸಗಿ ಬ್ಯಾಂಕ್‌ಗಳ ಮೇಲಿನ ಪರಿಣಾಮ ಸಾರ್ವಜನಿಕ ವಲಯದ ಬ್ಯಾಂಕ್‌ಗಳಿಗಿಂತ ಕಡಿಮೆ ಇರಬಹುದಾದರೂ, ಬ್ಯಾಂಕಿಂಗ್‌ ವ್ಯವಸ್ಥೆಯ ಒಟ್ಟಾರೆ ವಹಿವಾಟಿನ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ.
ಸೆ.27 ಭಾನುವಾರ ಬ್ಯಾಂಕ್‌ ಓಪನ್‌ ಏಕೆ?
ಸೆಪ್ಟೆಂಬರ್‌ 27 ಭಾನುವಾರವಾಗಿರುವುದರಿಂದ ಸಾಮಾನ್ಯವಾಗಿ ಬ್ಯಾಂಕ್‌ಗಳಿಗೆ ರಜೆ ಇರುತ್ತದೆ. ಆದರೆ ಸತತ ಮೂರು ದಿನಗಳ ಮುಷ್ಕರದ ಹಿನ್ನೆಲೆಯಲ್ಲಿ ಗ್ರಾಹಕರಿಗೆ ಹೆಚ್ಚುವರಿ ತೊಂದರೆಯಾಗದಂತೆ ಭಾನುವಾರ ಬ್ಯಾಂಕ್‌ಗಳನ್ನು ತೆರೆಯುವ ಕ್ರಮ ಕೈಗೊಳ್ಳಲಾಗಿದೆ. ಹೀಗಾಗಿ ಶಾಖೆಗೆ ತೆರಳಿ ಮಾಡಬೇಕಾದ ತುರ್ತು ಕೆಲಸಗಳನ್ನು ಈ ದಿನವೇ ಪೂರ್ಣಗೊಳಿಸಿಕೊಳ್ಳಬಹುದು.
ಸರ್ಕಾರದ ನಿಲುವೇನು?
ಮುಷ್ಕರ ಕೈಬಿಟ್ಟು ಮಾತುಕತೆ ಮುಂದುವರಿಸುವಂತೆ ಸರ್ಕಾರ ನೌಕರರ ಸಂಘಟನೆಗಳಿಗೆ ಮನವಿ ಮಾಡಿದೆ. ATMಗಳಲ್ಲಿ ನಗದು ಲಭ್ಯತೆ ಖಚಿತಪಡಿಸಿಕೊಳ್ಳುವಂತೆ ಬ್ಯಾಂಕ್‌ಗಳಿಗೆ ಸೂಚಿಸಲಾಗಿದೆ. PLI ಯೋಜನೆಯನ್ನು ಸದ್ಯಕ್ಕೆ ತಡೆಹಿಡಿಯುವ ಕುರಿತು ಸಂಧಾನದಲ್ಲಿ ಒಪ್ಪಿಗೆ ದೊರೆತಿದ್ದರೂ, ಐದು ದಿನಗಳ ಕೆಲಸದ ಬೇಡಿಕೆ ಇನ್ನೂ ಪರಿಶೀಲನೆಯಲ್ಲಿದೆ ಎಂದು ಸರ್ಕಾರ ತಿಳಿಸಿದೆ.
ಸೆಪ್ಟೆಂಬರ್‌ 28ರೊಳಗೆ ಮಾತುಕತೆಯಲ್ಲಿ ಪರಿಹಾರ ಸಿಗದಿದ್ದರೆ, ಅಕ್ಟೋಬರ್‌ 26ರಿಂದ ಅನಿರ್ದಿಷ್ಟಾವಧಿ ಮುಷ್ಕರ ನಡೆಸುವ ಎಚ್ಚರಿಕೆಯನ್ನೂ ಬ್ಯಾಂಕ್‌ ಒಕ್ಕೂಟಗಳು ನೀಡಿವೆ.
