ನವದೆಹಲಿ: ಭಾರತದಲ್ಲಿ ಹೆದ್ದಾರಿ ಪ್ರಯಾಣವನ್ನು ಸುಗಮಗೊಳಿಸುವ ಫಾಸ್ಟ್ಟ್ಯಾಗ್ ವ್ಯವಸ್ಥೆಯು ಇತ್ತೀಚಿನ ದಿನಗಳಲ್ಲಿ ಹೊಸ ಆಯಾಮಗಳನ್ನು ಪಡೆದುಕೊಳ್ಳುತ್ತಿದೆ. ಕೇಂದ್ರ ಹೆದ್ದಾರಿ ಮತ್ತು ಸಾರಿಗೆ ಸಚಿವಾಲಯದ ಅಡಿಯಲ್ಲಿ ಕಾರ್ಯನಿರ್ವಹಿಸುವ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್ಎಚ್ಎಐ)ಯು ಆಗಸ್ಟ್ 15ರಿಂದ ಫಾಸ್ಟ್ಟ್ಯಾಗ್ ಆಧಾರಿತ ವಾರ್ಷಿಕ ಟೋಲ್ ಪಾಸ್ ಅನ್ನು ಜಾರಿಗೆ ತಂದಿದೆ.
ಇದು ಪ್ರಯಾಣಿಕರಿಗೆ ಟೋಲ್ ಗೇಟ್ಗಳಲ್ಲಿ ಕಾಯುವ ತೊಂದರೆಯನ್ನು ತಪ್ಪಿಸಿ, ಸುಲಭವಾಗಿ ಸಂಚರಿಸುವ ಅವಕಾಶವನ್ನು ನೀಡುತ್ತದೆ. ವಿಶೇಷವಾಗಿ ಹಬ್ಬದ ಸೀಸನ್ನಲ್ಲಿ, ದೀಪಾವಳಿಯಂತಹ ಸಂದರ್ಭಗಳಲ್ಲಿ ಈ ಪಾಸ್ ಅನ್ನು ಉಡುಗೊರೆಯಾಗಿ ನೀಡುವುದು ಒಂದು ಅದ್ಭುತ ಐಡಿಯಾ ಆಗಿದೆ. ನಿಮ್ಮ ಸಂಬಂಧಿಕರು ಅಥವಾ ಆಪ್ತರು ಹೆದ್ದಾರಿ ಪ್ರಯಾಣಿಕರಾಗಿದ್ದರೆ, ಈ ಫಾಸ್ಟ್ಟ್ಯಾಗ್ ವಾರ್ಷಿಕ ಪಾಸ್ ಅವರಿಗೆ ಸೂಕ್ತ ಉಡುಗೊರೆಯಾಗಬಲ್ಲದು.
ಈ ವಾರ್ಷಿಕ ಪಾಸ್ ಅನ್ನು ‘ರಾಜಮಾರ್ಗಯಾತ್ರಾ’ ಮೊಬೈಲ್ ಆ್ಯಪ್ ಮೂಲಕ ಸುಲಭವಾಗಿ ಖರೀದಿಸಬಹುದು ಮತ್ತು ಇನ್ನೊಬ್ಬರಿಗೆ ಗಿಫ್ಟ್ ಮಾಡಬಹುದು. ಎನ್ಎಚ್ಎಐಯ ಪ್ರಕಟಣೆಯ ಪ್ರಕಾರ, ಈ ಪಾಸ್ ದೇಶಾದ್ಯಂತ ರಾಷ್ಟ್ರೀಯ ಹೆದ್ದಾರಿಗಳು ಮತ್ತು ಎಕ್ಸ್ಪ್ರೆಸ್ವೇಗಳಲ್ಲಿ ಒಂದು ವರ್ಷದವರೆಗೆ ಅಥವಾ 200 ಟೋಲ್ ಪ್ಲಾಜಾಗಳನ್ನು ದಾಟುವವರೆಗೆ ಮಾನ್ಯವಾಗಿರುತ್ತದೆ. ಇದು ಪ್ರೀಪೇಯ್ಡ್ ವ್ಯವಸ್ಥೆಯಾಗಿದ್ದು, ಒಮ್ಮೆ ಖರೀದಿಸಿದ ನಂತರ ಪದೇಪದೇ ರೀಚಾರ್ಜ್ ಮಾಡುವ ಅಗತ್ಯವಿಲ್ಲ. ಪ್ರಯಾಣದ ಸಮಯದಲ್ಲಿ ಟೋಲ್ ಗೇಟ್ಗಳಲ್ಲಿ ಫಾಸ್ಟ್ಟ್ಯಾಗ್ ಸ್ಕ್ಯಾನ್ ಆಗುತ್ತಿದ್ದಂತೆ, ಬಳಸಿದ ಟೋಲ್ ಸಂಖ್ಯೆಯನ್ನು ಲೆಕ್ಕಹಾಕಲಾಗುತ್ತದೆ. ಇದರ ಬೆಲೆ ಕೇವಲ 3೦೦೦ ರೂಪಾಯಿಗಳು ಮಾತ್ರ, ಇದು ಸಾಮಾನ್ಯ ಪ್ರಯಾಣಿಕರಿಗೆ ಆರ್ಥಿಕವಾಗಿ ಲಾಭದಾಯಕವಾಗಿದೆ.
ದೀಪಾವಳಿಯಂತಹ ಹಬ್ಬದ ಸಂದರ್ಭದಲ್ಲಿ ಪ್ರಯಾಣವು ಹೆಚ್ಚಾಗುತ್ತದೆ. ಕುಟುಂಬದೊಂದಿಗೆ ದೂರದ ಊರುಗಳಿಗೆ ಹೋಗುವುದು, ಸ್ನೇಹಿತರೊಂದಿಗೆ ರೋಡ್ ಟ್ರಿಪ್ ಮಾಡುವುದು ಸಾಮಾನ್ಯ. ಆದರೆ ಟೋಲ್ ಗೇಟ್ಗಳಲ್ಲಿ ಕ್ಯೂ ನಿಲ್ಲುವುದು, ಹಣ ಪಾವತಿಸುವುದು ಸಮಯವನ್ನು ವ್ಯರ್ಥ ಮಾಡುತ್ತದೆ. ಇದಕ್ಕೆ ಪರಿಹಾರವಾಗಿ ಫಾಸ್ಟ್ಟ್ಯಾಗ್ ವಾರ್ಷಿಕ ಪಾಸ್ ಬಂದಿದೆ. ಇದು ಕೇವಲ ಟೋಲ್ ಮುಕ್ತ ಪ್ರಯಾಣವನ್ನು ನೀಡುವುದಲ್ಲ, ಪರಿಸರ ಸ್ನೇಹಿಯೂ ಆಗಿದೆ. ಟೋಲ್ ಗೇಟ್ಗಳಲ್ಲಿ ಕಡಿಮೆ ಸಮಯ ಕಳೆಯುವುದರಿಂದ ಇಂಧನ ಉಳಿತಾಯವಾಗುತ್ತದೆ.
ವಾರ್ಷಿಕ ಪಾಸ್ ಅನ್ನು ಉಡುಗೊರೆಯಾಗಿ ನೀಡುವ ಪ್ರಕ್ರಿಯೆಯು ಅತ್ಯಂತ ಸರಳ. ಮೊದಲು ರಾಜಮಾರ್ಗಯಾತ್ರಾ ಆ್ಯಪ್ ಅನ್ನು ಗೂಗಲ್ ಪ್ಲೇ ಸ್ಟೋರ್ ಅಥವಾ ಆಪಲ್ ಆಪ್ ಸ್ಟೋರ್ನಿಂದ ಡೌನ್ಲೋಡ್ ಮಾಡಿಕೊಳ್ಳಿ. ಆ್ಯಪ್ ತೆರೆದ ನಂತರ, ‘ಆಡ್ ಪಾಸ್’ ಆಯ್ಕೆಯನ್ನು ಕ್ಲಿಕ್ ಮಾಡಿ. ನೀವು ಗಿಫ್ಟ್ ಮಾಡುವ ವ್ಯಕ್ತಿಯ ವಾಹನ ಸಂಖ್ಯೆ (ವೆಹಿಕಲ್ ರಿಜಿಸ್ಟ್ರೇಶನ್ ನಂಬರ್) ಮತ್ತು ಸಂಪರ್ಕ ವಿವರಗಳನ್ನು ನಮೂದಿಸಿ. ನಂತರ ಓಟಿಪಿ ಪರಿಶೀಲನೆ ನಡೆಯುತ್ತದೆ. ಯಶಸ್ವಿಯಾದ ನಂತರ, ಆ ವಾಹನಕ್ಕೆ ಲಗತ್ತಿಸಲಾದ ಫಾಸ್ಟ್ಟ್ಯಾಗ್ನಲ್ಲಿ ಪಾಸ್ ಸಕ್ರಿಯಗೊಳ್ಳುತ್ತದೆ. ಇದು ಕೇವಲ ಕೆಲವೇ ನಿಮಿಷಗಳಲ್ಲಿ ಪೂರ್ಣಗೊಳ್ಳುತ್ತದೆ. ಗಮನಿಸಬೇಕಾದ ಸಂಗತಿ ಏನೆಂದರೆ, ಈ ಪಾಸ್ ಕೇವಲ ವಾಣಿಜ್ಯೇತರ ವಾಹನಗಳಿಗೆ ಮಾತ್ರ ಅನ್ವಯಿಸುತ್ತದೆ ಮತ್ತು ರಾಷ್ಟ್ರೀಯ ಹೆದ್ದಾರಿಗಳು ಮತ್ತು ಎಕ್ಸ್ಪ್ರೆಸ್ವೇಗಳಲ್ಲಿ ಮಾತ್ರ ಮಾನ್ಯ.
ಈ ಪಾಸ್ ಅನ್ನು ಎಲ್ಲಿ ಪಡೆಯಬಹುದು?
ರಾಜಮಾರ್ಗಯಾತ್ರಾ ಆ್ಯಪ್ ಜೊತೆಗೆ, ಎನ್ಎಚ್ಎಐಯ ಅಧಿಕೃತ ವೆಬ್ಸೈಟ್ ಮತ್ತು ಕೇಂದ್ರ ಸಾರಿಗೆ ಇಲಾಖೆಯ ಪೋರ್ಟಲ್ಗಳಲ್ಲಿ ಲಿಂಕ್ ಸಿಗುತ್ತದೆ. ಅಲ್ಲದೆ, ಫಾಸ್ಟ್ಟ್ಯಾಗ್ ಇಸ್ಯೂಯಿಂಗ್ ಬ್ಯಾಂಕ್ಗಳ ಮೂಲಕವೂ ಖರೀದಿಸಬಹುದು. ಆದರೆ ಗಿಫ್ಟ್ ಆಯ್ಕೆಯು ಮುಖ್ಯವಾಗಿ ಆ್ಯಪ್ ಮೂಲಕವೇ ಲಭ್ಯ. ರಾಜ್ಯ ಹೆದ್ದಾರಿಗಳು ಅಥವಾ ಖಾಸಗಿ ಹೆದ್ದಾರಿಗಳಾದ ನೈಸ್ ರಸ್ತೆಗಳಲ್ಲಿ ಈ ಪಾಸ್ ಮಾನ್ಯವಲ್ಲ ಎಂಬುದನ್ನು ನೆನಪಿಡಿ. ಇದು ಕೇವಲ ಎನ್ಎಚ್ಎಐ ನಿರ್ವಹಣೆಯ ಹೆದ್ದಾರಿಗಳಿಗೆ ಸೀಮಿತ.
