ಮುಂಬೈ: ಭಾರತೀಯ ಚಿತ್ರರಂಗದಲ್ಲಿ ಸದ್ಯ ಎಲ್ಲಿ ನೋಡಿದರೂ ‘ಧುರಂಧರ್ 2’ (Dhurandhar: The Revenge) ಸಿನಿಮಾದ್ದೇ ಸದ್ದು. ಬಾಕ್ಸ್ ಆಫೀಸ್ನಲ್ಲಿ ಕೋಟಿ ಕೋಟಿ ಲೂಟಿ ಮಾಡುತ್ತಿರುವ ಈ ಸಿನಿಮಾ, ಈಗ ಜನಪ್ರಿಯತೆಯಲ್ಲೂ ಹೊಸ ದಾಖಲೆ ಬರೆದಿದೆ. ಈ ವಾರದ ‘ಐಎಂಡಿಬಿ ಜನಪ್ರಿಯ ಭಾರತೀಯ ಸೆಲೆಬ್ರಿಟಿಗಳ ಪಟ್ಟಿ’ಯಲ್ಲಿ (IMDb Popular Indian Celebrities list) ಚಿತ್ರದ ಪ್ರಮುಖ ನಟರನ್ನು ಹಿಂದಿಕ್ಕಿ ನಿರ್ದೇಶಕ ಆದಿತ್ಯ ಧರ್ ಮೊದಲ ಸ್ಥಾನ ಪಡೆಯುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಸಾಮಾನ್ಯವಾಗಿ ಐಎಂಡಿಬಿ ಇಂತಹ ಪಟ್ಟಿಗಳನ್ನು ಬಿಡುಗಡೆ ಮಾಡಿದಾಗ ರಣವೀರ್ ಸಿಂಗ್ ಅಥವಾ ಸಾರಾ ಅರ್ಜುನ್ ಅಂತಹ ಸ್ಟಾರ್ ನಟರು ಅಗ್ರಸ್ಥಾನದಲ್ಲಿರುತ್ತಾರೆ. ಆದರೆ, ಈ ಬಾರಿ ಆದಿತ್ಯ ಧರ್ ಅವರ ಮೇಕಿಂಗ್ ಮತ್ತು ಕಥೆ ಹೇಳುವ ಶೈಲಿಗೆ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಹೀಗಾಗಿಯೇ ಅವರು ನಟರನ್ನೆಲ್ಲಾ ಹಿಂದಿಕ್ಕಿ ಮೊದಲ ಸ್ಥಾನಕ್ಕೇರಿದ್ದಾರೆ. ಇದು ಚಿತ್ರದ ತಾಂತ್ರಿಕ ಗುಣಮಟ್ಟಕ್ಕೆ ಸಿಕ್ಕ ಜಯ ಎಂದು ಅಭಿಮಾನಿಗಳು ಂತಸ ವ್ಯಕ್ತಪಡಿಸಿದ್ದಾರೆ.
ಈ ವಾರದ ಟಾಪ್ 20 ಪಟ್ಟಿಯಲ್ಲಿ ಚಿತ್ರದ ಬಹುತೇಕ ತಾರೆಯರು ಸ್ಥಾನ ಪಡೆದಿದ್ದಾರೆ:
-
ಆದಿತ್ಯ ಧರ್ (ನಿರ್ದೇಶಕ): 1ನೇ ಸ್ಥಾನ
-
ಸಾರಾ ಅರ್ಜುನ್: 2ನೇ ಸ್ಥಾನ
-
ರಣವೀರ್ ಸಿಂಗ್: 3ನೇ ಸ್ಥಾನ
-
ಉದಯ್ಬೀರ್ ಸಂಧು: 7ನೇ ಸ್ಥಾನ
-
ಅರ್ಜುನ್ ರಾಮ್ಪಾಲ್: 9ನೇ ಸ್ಥಾನ
-
ಸೌಮ್ಯಾ ಟಂಡನ್: 10ನೇ ಸ್ಥಾನ
ಇವರಲ್ಲದೆ ಗೌರವ್ ಗೇರಾ (12), ಡ್ಯಾನಿಶ್ ಇಕ್ಬಾಲ್ (13) ಮತ್ತು ಹಿರಿಯ ನಟ ರಾಕೇಶ್ ಬೇಡಿ (20) ಕೂಡ ಪಟ್ಟಿಯಲ್ಲಿದ್ದಾರೆ. ಮೊದಲ ಭಾಗದಲ್ಲಿ ನಟಿಸಿದ್ದ ಅಕ್ಷಯ್ ಖನ್ನಾ ಸಹ 16ನೇ ಸ್ಥಾನ ಪಡೆದುಕೊಂಡಿದ್ದಾರೆ.
ಮಾರ್ಚ್ 19ರಂದು ಬಿಡುಗಡೆಯಾದ ಈ ಸಿನಿಮಾ ಕರಾಚಿಯ ಲಿಯಾರಿ ಪ್ರದೇಶದ ಹಿನ್ನೆಲೆಯಲ್ಲಿ ಸಾಗುತ್ತದೆ. ಭಾರತೀಯ ಸಂಸತ್ತಿನ ಮೇಲಿನ ದಾಳಿ, 26/11 ಮುಂಬೈ ಭಯೋತ್ಪಾದನಾ ದಾಳಿ ಮತ್ತು ಕಂದಹಾರ್ ವಿಮಾನ ಹೈಜಾಕ್ನಂತಹ ನೈಜ ಹಾಗೂ ಸೂಕ್ಷ್ಮ ಘಟನೆಗಳನ್ನು ಇಟ್ಟುಕೊಂಡು ಆದಿತ್ಯ ಧರ್ ಈ ಚಿತ್ರವನ್ನು ಕಟ್ಟಿಕೊಟ್ಟಿದ್ದಾರೆ.
ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದರೂ, ಪ್ರೇಕ್ಷಕರು ಮಾತ್ರ ಚಿತ್ರಮಂದಿರಕ್ಕೆ ಲಗ್ಗೆ ಇಡುತ್ತಿದ್ದಾರೆ. ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಭಾರತದಲ್ಲಿ 450 ಕೋಟಿ ರೂ. ಹಾಗೂ ವಿಶ್ವದಾದ್ಯಂತ 750 ಕೋಟಿ ರೂ. ಗಳಿಕೆ ಮಾಡುವ ಮೂಲಕ ‘ಧುರಂಧರ್ 2’ ಈ ವರ್ಷದ ಅತಿದೊಡ್ಡ ಬ್ಲಾಕ್ಬಸ್ಟರ್ ಎನಿಸಿಕೊಂಡಿದೆ.
ಏನಿದು ಐಎಂಡಿಬಿ ರೇಟಿಂಗ್ ?
ಐಎಂಡಿಬಿ (IMDb) ಜಾಗತಿಕವಾಗಿ ಸಿನಿಮಾಗಳು ಮತ್ತು ಸೆಲೆಬ್ರಿಟಿಗಳ ಬಗ್ಗೆ ಮಾಹಿತಿ ನೀಡುವ ವಿಶ್ವಾಸಾರ್ಹ ವೇದಿಕೆಯಾಗಿದೆ. ಪ್ರೇಕ್ಷಕರು ನೀಡುವ ರೇಟಿಂಗ್ ಮತ್ತು ಅವರ ಸರ್ಚ್ ಟ್ರೆಂಡ್ ಆಧಾರದ ಮೇಲೆ ಈ ಪಟ್ಟಿಯನ್ನು ಸಿದ್ಧಪಡಿಸಲಾಗುತ್ತದೆ. ಈ ವೇದಿಕೆಯಲ್ಲಿ ನಂಬರ್ 1 ಸ್ಥಾನ ಪಡೆಯುವುದು ಚಿತ್ರರಂಗದ ಸಾಧನೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ.
