ಮಧ್ಯಪ್ರಾಚ್ಯ ಯುದ್ಧದ ಎಫೆಕ್ಟ್: ಬಟ್ಟೆಗಳ ದರ ಭಾರೀ ಏರಿಕೆ ಸಾಧ್ಯತೆ

ಬೆಂಗಳೂರು: ಮಧ್ಯಪ್ರಾಚ್ಯದಲ್ಲಿ (Middle East) ಇರಾನ್ ಮತ್ತು ಇಸ್ರೇಲ್ (Iran-Israel) ನಡುವೆ ಮುಂದುವರಿಯುತ್ತಿರುವ ಯುದ್ಧದ ಪರಿಣಾಮ ಭಾರತದ ಸಾಮಾನ್ಯ ಜನರ ಜೇಬಿಗೂ ತಟ್ಟಿದೆ. ಇಂಧನ ಮತ್ತು ಆಹಾರ ವಸ್ತುಗಳ ಬೆಲೆ ಏರಿಕೆಯ ಬಳಿಕ ಸಿದ್ಧ ಉಡುಪುಗಳ (Ready-made Garments) ಮಾರುಕಟ್ಟೆಯಲ್ಲೂ ಭಾರಿ ಏರಿಕೆಯ ಅಲೆ ಎದುರಾಗುವ ಸಾಧ್ಯತೆ ವ್ಯಕ್ತವಾಗಿದೆ. ದೇಶದ ಪ್ರಮುಖ ಜವಳಿ ವಾಣಿಜ್ಯ ಕೇಂದ್ರಗಳಲ್ಲಿ ಒಂದಾದ ಬೆಂಗಳೂರಿನ ಚಿಕ್ಕಪೇಟೆ (Chickpet) ಸೇರಿದಂತೆ ಹಲವು ಮಾರುಕಟ್ಟೆಗಳಲ್ಲಿ ಈಗಾಗಲೇ ಈ ಆತಂಕದ ವಾತಾವರಣ ಮನೆ ಮಾಡಿದೆ.

ಮುಂದಿನ ದಿನಗಳಲ್ಲಿ ರಂಜಾನ್ ಸೇರಿದಂತೆ ಹಬ್ಬಗಳ ಸರಮಾಲೆಯೇ ಇರುವುದರಿಂದ, ಈ ಸಮಯದಲ್ಲಿ ಬಟ್ಟೆಗಳ ಬೆಲೆ ಏರಿಕೆಯಾಗುವ ಸೂಚನೆ ಇದ್ದು, ವ್ಯಾಪಾರಿಗಳು ಮತ್ತು ಗ್ರಾಹಕರಲ್ಲಿ ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಯುದ್ಧದ ನೇರ ಮತ್ತು ಪರೋಕ್ಷ ಪರಿಣಾಮವಾಗಿ ಜವಳಿ ಉದ್ಯಮವು ಏಕಕಾಲದಲ್ಲಿ ಹಲವು ಸವಾಲುಗಳನ್ನು ಎದುರಿಸುತ್ತಿದೆ.

ರಫ್ತು ವ್ಯಾಪಾರಕ್ಕೆ ಹೊಡೆತ
ಭಾರತದಿಂದ ಕುವೈತ್, ಕತಾರ್, ಸೌದಿ ಅರೇಬಿಯಾ ಸೇರಿದಂತೆ ಪ್ರಮುಖ ಅರಬ್ ರಾಷ್ಟ್ರಗಳಿಗೆ ದೊಡ್ಡ ಪ್ರಮಾಣದಲ್ಲಿ ಜವಳಿ ಉತ್ಪನ್ನಗಳು ರಫ್ತಾಗುತ್ತಿವೆ. ವಿಶೇಷವಾಗಿ ಭಾರತೀಯ ಡೆನಿಮ್ (Denim) ಮತ್ತು ಕಾಟನ್ (Cotton) ಬಟ್ಟೆಗಳಿಗೆ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಭಾರಿ ಬೇಡಿಕೆಯಿದೆ. ಆದರೆ ಯುದ್ಧದ ಕಾರಣದಿಂದಾಗಿ ಈ ರಫ್ತು ವಹಿವಾಟು ಗಣನೀಯವಾಗಿ ನಿಧಾನಗೊಂಡಿದೆ. ಸಮುದ್ರ ಮಾರ್ಗದಲ್ಲಿ ಸರಕು ಸಾಗಣೆ ಅಸ್ತವ್ಯಸ್ತವಾಗಿರುವುದು ಮತ್ತು ವಿಮಾ ವೆಚ್ಚಗಳು ಏರಿಕೆಯಾಗಿರುವುದು ರಫ್ತು ವ್ಯಾಪಾರಕ್ಕೆ ದೊಡ್ಡ ಅಡ್ಡಿಯಾಗಿ ಪರಿಣಮಿಸಿದೆ. ಇದರಿಂದಾಗಿ ದೇಶೀಯ ಮಾರುಕಟ್ಟೆಯಲ್ಲೂ ಪೂರೈಕೆ ಸರಪಳಿ ಮೇಲೆ ಪರಿಣಾಮ ಉಂಟಾಗುವ ಸಾಧ್ಯತೆ ಇದೆ.

ಕಚ್ಚಾ ವಸ್ತುಗಳ ಆಮದು ವ್ಯತ್ಯಯ
ಇನ್ನೊಂದೆಡೆ, ಬಟ್ಟೆ ತಯಾರಿಕೆಗೆ ಅಗತ್ಯವಿರುವ ರಾಸಾಯನಿಕಗಳು (Chemicals) ಮತ್ತು ಬಣ್ಣಗಳ (Dyes) ಆಮದು ಪ್ರಕ್ರಿಯೆಯೂ ವ್ಯತ್ಯಯಗೊಂಡಿದೆ. ಇವುಗಳ ಪೂರೈಕೆ ಕಡಿಮೆಯಾಗಿರುವುದರಿಂದ ಉತ್ಪಾದನಾ ವೆಚ್ಚ ಏರಿಕೆಯಾಗುತ್ತಿದೆ. ಸಮುದ್ರ ಮಾರ್ಗದ ಸರಕು ಸಾಗಣೆ ವೆಚ್ಚ (Freight Charges) ಈಗಾಗಲೇ ಶೇ. 20 ರಷ್ಟು ಏರಿಕೆಯಾಗಿದ್ದು, ಇದು ನೇರವಾಗಿ ಅಂತಿಮ ಉತ್ಪನ್ನದ ಬೆಲೆಯ ಮೇಲೆ ಪ್ರಭಾವ ಬೀರಲಿದೆ.

ಸೂರತ್‌ನಲ್ಲಿ ದಾಸ್ತಾನು ಕೊರತೆ
ದೇಶದ ಪ್ರಮುಖ ಜವಳಿ ಉತ್ಪಾದನಾ ಕೇಂದ್ರವಾದ ಸೂರತ್‌ನಲ್ಲಿ (Surat) ಬಟ್ಟೆಗಳ ದಾಸ್ತಾನು (Inventory) ತೀವ್ರವಾಗಿ ಕಡಿಮೆಯಾಗುತ್ತಿದೆ. ಬೇಡಿಕೆಗೆ ತಕ್ಕಷ್ಟು ಪೂರೈಕೆ ಮಾಡುವುದು ಕಷ್ಟಕರವಾಗುತ್ತಿದೆ. ಉತ್ಪಾದನಾ ವೆಚ್ಚ ಏರಿಕೆ ಮತ್ತು ಕಚ್ಚಾ ವಸ್ತುಗಳ ಕೊರತೆಯಿಂದಾಗಿ ಸೂರತ್‌ನ ಗಿರಣಿಗಳು ಉತ್ಪಾದನೆ ಪ್ರಮಾಣವನ್ನು ಕಡಿತಗೊಳಿಸಿವೆ. 

ಗ್ರಾಹಕರಿಗೆ ಎಚ್ಚರಿಕೆ ಗಂಟೆ
ಪರಿಸ್ಥಿತಿ ಹೀಗೇ ಮುಂದುವರಿದರೆ, ಬರುವ ಏಪ್ರಿಲ್ ತಿಂಗಳಿನಿಂದ ರೆಡಿಮೇಡ್ ಬಟ್ಟೆಗಳ ದರದಲ್ಲಿ ಶೇಕಡ 10 ರಿಂದ 15 ರಷ್ಟು ಏರಿಕೆ ಸಂಭವಿಸಬಹುದು ಎಂದು ವ್ಯಾಪಾರ ವಲಯದ ತಜ್ಞರು ಅಂದಾಜಿಸಿದ್ದಾರೆ. ಉತ್ಪಾದನಾ ವೆಚ್ಚದಿಂದ ಹಿಡಿದು ಸಾಗಣೆ ವೆಚ್ಚದವರೆಗಿನ ಎಲ್ಲಾ ಹೆಚ್ಚಳದ ಭಾರವು ಕೊನೆಗೆ ಸಾಮಾನ್ಯ ಗ್ರಾಹಕನ ಮೇಲೆಯೇ ಬೀಳಲಿದೆ. ಹಬ್ಬಕ್ಕೆ ಹೊಸ ಬಟ್ಟೆ ಖರೀದಿಸುವ ಕನಸು ಕಾಣುತ್ತಿರುವವರಿಗೆ ಇದು ದೊಡ್ಡ ಹೊಡೆತವಾಗಿ ಪರಿಣಮಿಸಲಿದೆ.