ಟೆಹ್ರಾನ್: ಮಧ್ಯಪ್ರಾಚ್ಯದಲ್ಲಿ ಅನಿರೀಕ್ಷಿತ ಮತ್ತು ಭಯಾನಕ ಬೆಳವಣಿಗೆಯೊಂದು ಸಂಭವಿಸಿದೆ. ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ನಡೆಸಿದ ಜಂಟಿ ವೈಮಾನಿಕ ದಾಳಿಯಲ್ಲಿ ಇರಾನ್ನ ಪರಮೋಚ್ಛ ನಾಯಕ ಆಯತೊಲ್ಲಾ ಅಲಿ ಖಮೇನಿ ಹತ್ಯೆಗೀಡಾಗಿದ್ದಾರೆ ಎಂಬ ಸುದ್ದಿ ಇಡೀ ಜಗತ್ತನ್ನು ಬೆಚ್ಚಿಬೀಳಿಸಿದೆ. ಈ ಬೆನ್ನಲ್ಲೇ ಇರಾನ್ ತನ್ನ ಅಸ್ತಿತ್ವದ ರಕ್ಷಣೆಗಾಗಿ ಮತ್ತು ಪ್ರತೀಕಾರದ ದಾಳಿಯನ್ನು ಸಂಘಟಿಸಲು ‘ಅಯತೊಲ್ಲಾ ಅಲಿರೆಜಾ ಅರಾಫಿ’ ಅವರನ್ನು ಮಧ್ಯಂತರ ಪರಮೋಚ್ಛ ನಾಯಕನನ್ನಾಗಿ (Interim Supreme Leader) ಘೋಷಿಸಿದೆ.
ಯಾರು ಈ ಅಲಿರೆಜಾ ಅರಾಫಿ?
1959ರಲ್ಲಿ ಜನಿಸಿದ ಅಲಿರೆಜಾ ಅರಾಫಿ, ಇರಾನ್ನ ಇಸ್ಲಾಮಿಕ್ ಗಣರಾಜ್ಯದ ಅತ್ಯಂತ ಪ್ರಭಾವಶಾಲಿ ಮತ್ತು ವಿದ್ಯಾವಂತ ಧರ್ಮಗುರುಗಳಲ್ಲಿ ಒಬ್ಬರು. ಇವರು ಕೇವಲ ಧಾರ್ಮಿಕ ಪಂಡಿತರಷ್ಟೇ ಅಲ್ಲದೆ, ಆಧುನಿಕ ತಂತ್ರಜ್ಞಾನ ಮತ್ತು ಜಾಗತಿಕ ರಾಜಕೀಯದ ಬಗ್ಗೆ ಅಪಾರ ಜ್ಞಾನ ಹೊಂದಿರುವವರು. ಅರಾಫಿ ಅವರು ಅರೇಬಿಕ್ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ನಿರರ್ಗಳವಾಗಿ ಮಾತನಾಡಬಲ್ಲ ಬಹುಭಾಷಾ ತಜ್ಞರಾಗಿದ್ದಾರೆ.
ಅವರ ವೃತ್ತಿಜೀವನದ ಪ್ರಮುಖ ಘಟ್ಟಗಳು:
ಆಧುನಿಕತೆಯ ಸ್ಪರ್ಶ ಮತ್ತು ಕೃತಕ ಬುದ್ಧಿಮತ್ತೆ (AI)
ಅಲಿರೆಜಾ ಅರಾಫಿ ಇತರ ಸಾಂಪ್ರದಾಯಿಕ ಧರ್ಮಗುರುಗಳಿಗಿಂತ ಭಿನ್ನವಾಗಿ ನಿಲ್ಲುವುದು ಅವರ ಆಧುನಿಕ ದೃಷ್ಟಿಕೋನದಿಂದ. ಇಸ್ಲಾಮಿಕ್ ಸಿದ್ಧಾಂತಗಳನ್ನು ಪ್ರಚಾರ ಮಾಡಲು ಮತ್ತು ದೇಶದ ಭದ್ರತೆಯನ್ನು ಬಲಪಡಿಸಲು ‘ಕೃತಕ ಬುದ್ಧಿಮತ್ತೆ’ಯನ್ನು (Artificial Intelligence) ಬಳಸಿಕೊಳ್ಳಬೇಕು ಎಂಬುದು ಇವರ ಪ್ರಬಲ ನಿಲುವಾಗಿದೆ. ತಾಂತ್ರಿಕ ಪ್ರಾವಿಣ್ಯತೆ ಹೊಂದಿರುವ ಇವರು ಇರಾನ್ನ ಯುವ ಪೀಳಿಗೆ ಮತ್ತು ಜಾಗತಿಕ ಸಮುದಾಯದೊಂದಿಗೆ ಸಂವಹನ ನಡೆಸಬಲ್ಲ ಶಕ್ತಿ ಹೊಂದಿದ್ದಾರೆ.
ಮಧ್ಯಂತರ ಮಂಡಳಿಯ ರಚನೆ
ಖಮೇನಿ ಅವರ ನಿಧನದ ನಂತರ ಇರಾನ್ ಸಂವಿಧಾನದ ಪ್ರಕಾರ ನಾಯಕತ್ವವನ್ನು ಹಸ್ತಾಂತರಿಸಲು ತಾತ್ಕಾಲಿಕ ನ್ಯಾಯಮಂಡಳಿಯನ್ನು ರಚಿಸಲಾಗಿದೆ. ಇದರ ಮುಖ್ಯಸ್ಥರಾಗಿ ಅಲಿರೆಜಾ ಅರಾಫಿ ಕಾರ್ಯನಿರ್ವಹಿಸಲಿದ್ದು, ಇವರ ಜೊತೆಗೆ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯಾನ್ ಮತ್ತು ಮುಖ್ಯ ನ್ಯಾಯಮೂರ್ತಿ ಘೋಲಮ್ಹೊಸೇನ್ ಮೊಹ್ಸೆನಿ ಎಜೆಯ್ ಮಂಡಳಿಯಲ್ಲಿದ್ದಾರೆ. ಈ ಮಂಡಳಿಯು ದೇಶದ ಮುಂದಿನ ಕಾಯಂ ಸುಪ್ರೀಂ ಲೀಡರ್ ಅನ್ನು ಆಯ್ಕೆ ಮಾಡುವವರೆಗೆ ಎಲ್ಲಾ ಅಂತಿಮ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಅಧಿಕಾರ ಹೊಂದಿರುತ್ತದೆ.
ಅರಾಫಿ ಮುಂದಿರುವ ಸವಾಲುಗಳು
ಸದ್ಯ ಇರಾನ್ ಯುದ್ಧದ ಹೊಸ್ತಿಲಲ್ಲಿದೆ. ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳುವ ಆವೇಶದಲ್ಲಿರುವ ಇರಾನ್ ಸೇನೆಯನ್ನು ಮುನ್ನಡೆಸುವುದು ಮತ್ತು ಜಾಗತಿಕ ಮಟ್ಟದಲ್ಲಿ ನಿರ್ಬಂಧಗಳನ್ನು ಎದುರಿಸುವುದು ಅರಾಫಿ ಮುಂದಿರುವ ಅತಿದೊಡ್ಡ ಸವಾಲು. ಅಮೆರಿಕದ ವಾಯುನೆಲೆಗಳ ಮೇಲೆ ಈಗಾಗಲೇ ಇರಾನ್ ದಾಳಿ ಆರಂಭಿಸಿದ್ದು, ಈ ಸಂಘರ್ಷವು ಮೂರನೇ ಮಹಾಯುದ್ಧಕ್ಕೆ ನಾಂದಿ ಹಾಡುತ್ತದೆಯೇ ಎಂಬ ಆತಂಕ ಸೃಷ್ಟಿಯಾಗಿದೆ.
