ಚಿಕ್ಕಮಗಳೂರು: ಯುವತಿ ಮದುವೆಗೂ ಮುನ್ನ ತಾಯಿಯಾಗಿದ್ದಾಳೆ. ಈಕೆಯ ಅಕ್ರಮ ಸಂಬಂಧದ ವಿಷಯ ಹೊರಬಂದರೆ ಮನೆಯ ಗೌರವ ಹಾಳಾಗುತ್ತದೆ ಎಂದು ಹುಟ್ಟಿದ ಕೇವಲ ಒಂದು ನಿಮಿಷಕ್ಕೆ ನವಜಾತ ಮಗುವನ್ನು ಕತ್ತು ಹಿಸುಕಿ ಕೊಲೆ ಮಾಡಿಡಿರುವ ಹೃದಯವಿದ್ರಾವಕ ಘಟನೆ ಚಿಕ್ಕಮಗಳೂರಿನ ತರೀಕೆರೆ ತಾಲೂಕಿನ ಬಾವಿಕೆರೆ ಗ್ರಾಮದಲ್ಲಿ ನಡೆದಿದೆ.
ಮನೆಯಲ್ಲೇ ಹೆರಿಗೆ, ಮನೆಯಲ್ಲೇ ಕೊಲೆ
ಮಗುವಿನ ತಾಯಿ ವೃತ್ತಿಯಲ್ಲಿ ಸ್ಟಾಫ್ ನರ್ಸ್ ಆಗಿ ಕೆಲಸ ಮಾಡುತ್ತಿದ್ದಳು. ಮದುವೆಗೆ ಮೊದಲೇ ಗರ್ಭಿಣಿಯಾದ ಈಕೆ, ವಿಷಯ ಬೇರೆಯವರಿಗೆ ತಿಳಿದರೆ ಕುಟುಂಬದ ಪ್ರತಿಷ್ಠೆ ಹಾಳಾಗುತ್ತದೆ ಎಂದು ಹೆದರಿದ್ದಳು. 15 ದಿನಗಳ ಹಿಂದೆ ಮನೆಯಲ್ಲೇ ಹೆರಿಗೆ ನೋವು ಕಾಣಿಸಿಕೊಂಡಾಗ, ಆಸ್ಪತ್ರೆಗೆ ಹೋದರೆ ವಿಷಯ ಬಯಲಾಗುತ್ತದೆ ಎಂದು ನರ್ಸ್ ಆಗಿದ್ದ ಈಕೆಯೇ ತನ್ನ ತಂದೆ-ತಾಯಿ ಮತ್ತು ಅಜ್ಜಿಯ ಸಹಾಯದಿಂದ ಮನೆಯಲ್ಲೇ ಮಗುವಿಗೆ ಜನ್ಮ ನೀಡಿದ್ದಾಳೆ.
ಹಸುಗೂಸನ್ನ ಕಯ್ಯಾರೆ ಕೊಂದ ಅಜ್ಜಿ
ಮಗು ಹುಟ್ಟಿದ ಕೇವಲ ಒಂದೇ ನಿಮಿಷದ ನಂತರ ಆ ಹಸುಗೂಸನ್ನ, ಅದರ ಅಜ್ಜಿ ಕುತ್ತಿಗೆ ಹಿಸುಕಿ ಪ್ರಾಣ ತೆಗೆದಿದ್ದಾಳೆ. ಮಗು ಮೃತಪಟ್ಟ ನಂತರ ಅದರ ದೇಹವನ್ನು ಮನೆ ಪಕ್ಕದಲ್ಲೇ ಹೂಳಲು ಯತ್ನಿಸಿದ್ದರು.
ಬಯಲಾಗಿದ್ದು ಹೇಗೆ ?
ಈ ಬಗ್ಗೆ ಪಕ್ಕದ ಮನೆಯ ಯುವಕನಿಗೆ ಸಂಶಯ ಮೂಡಿದೆ. ಆತ ಸ್ಥಳಕ್ಕೆ ಹೋಗಿ ಪೊಷಕರ ವಿರುದ್ದ ಕಿಡಿಕಾರಿದ್ದಾನೆ. ಬಳಿಕ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ. ಅವರು ನೀಡಿದ ಮಾಹಿತಿಯ ಮೇರೆಗೆ ಲಕ್ಕವಳ್ಳಿ ಪೊಲೀಸರು ಸ್ಥಳಕ್ಕೆ ಧಾವಿಸಿ, ಪರಿಶೀಲನೆ ನಡೆಸಿದ್ದಾರೆ. ಸ್ಥಳದಲ್ಲಿ ಮಗುವಿನ ಶವ ಪತ್ತೆಯಾಗಿದ್ದು, ತನಿಖೆ ನಡೆಸಿದ ಪೊಲೀಸರಿಗೆ ಈ ಮರ್ಯಾದಾ ಹತ್ಯೆಯ ಹಿಂದಿನ ಭೀಕರ ಸತ್ಯ ತಿಳಿದು ಬೆಚ್ಚಿಬಿದ್ದಿದ್ದಾರೆ. ಸದ್ಯ ಲಕ್ಕವಳ್ಳಿ ಪೊಲೀಸರು ಮಗುವಿನ ತಾಯಿ, ಆಕೆಯ ತಂದೆ-ತಾಯಿ ಹಾಗೂ ಕೃತ್ಯ ಎಸಗಿದ ಅಜ್ಜಿಯನ್ನು ವಶಕ್ಕೆ ಪಡೆದಿದ್ದಾರೆ.
