“ಯಾವ ಸೈಡಿಗೆ ಮಲಗುವುದು ಆರೋಗ್ಯಕ್ಕೆ ಒಳ್ಳೆಯದು?”: ಇಲ್ಲಿ ತಿಳಿಯಿರಿ

ದಿನವಿಡೀ ಕೆಲಸ, ಓಡಾಟ, ಒತ್ತಡದ ನಡುವೆ ದೇಹ ಹಾಗೂ ಮನಸ್ಸು ತುಂಬಾ ದಣಿದಿರುತ್ತದೆ. ಆ ದಣಿವನ್ನು ನಿವಾರಿಸುವ ಏಕೈಕ ಉತ್ತಮ ಮಾರ್ಗವೆಂದರೆ ಉತ್ತಮ ನಿದ್ರೆ (Good Sleep). ತಜ್ಞರ ಪ್ರಕಾರ, ಪ್ರತಿದಿನ ಕನಿಷ್ಠ 7–8 ಗಂಟೆಗಳ ಆಳವಾದ ನಿದ್ರೆ ದೇಹದ ಶಕ್ತಿಯನ್ನು ಪುನಃ ತುಂಬುತ್ತದೆ. ಆದರೆ ಎಷ್ಟು ಸಮಯ ಮಲಗುತ್ತೇವೆ ಎಂಬುದಷ್ಟೇ ಅಲ್ಲ, ಯಾವ ರೀತಿಯಲ್ಲಿ ಮತ್ತು ಯಾವ ಬದಿಯಲ್ಲಿ ಮಲಗುತ್ತೇವೆ ಎಂಬುದೂ ಆರೋಗ್ಯಕ್ಕೆ ಬಹಳ ಮುಖ್ಯ.

ಆಯುರ್ವೇದ ಶಾಸ್ತ್ರದಲ್ಲಿ ನಿದ್ರೆಯ ಭಂಗಿಗೆ (Sleeping Posture) ವಿಶೇಷ ಮಹತ್ವವಿದೆ. ಮಲಗುವ ದಿಕ್ಕು ಮತ್ತು ಬದಿ ನಮ್ಮ ಜೀರ್ಣಕ್ರಿಯೆ, ಉಸಿರಾಟ, ಹೃದಯ ಆರೋಗ್ಯ ಹಾಗೂ ಮೆದುಳಿನ ಕಾರ್ಯಕ್ಷಮತೆಯ ಮೇಲೂ ಪ್ರಭಾವ ಬೀರುತ್ತದೆ.

ಯಾವ ಬದಿಯಲ್ಲಿ ಮಲಗುವುದು ಉತ್ತಮ?

ತಜ್ಞರ ಹೇಳುವಂತೆ ಎಡಭಾಗಕ್ಕೆ ಮಲಗುವುದು ಅತ್ಯುತ್ತಮ ಎಂದು ಪರಿಗಣಿಸಲಾಗಿದೆ. ಎಡಬದಿಯಲ್ಲಿ ಮಲಗುವುದರಿಂದ ದೇಹ ಸಂಪೂರ್ಣವಾಗಿ ವಿಶ್ರಾಂತಿ ಪಡೆಯಲು ಸಹಾಯವಾಗುತ್ತದೆ ಎಂದು ಹೇಳಲಾಗಿದೆ.

ಎಡಭಾಗಕ್ಕೆ ಮಲಗುವುದರಿಂದ ಜೀರ್ಣಕ್ರಿಯೆ ಸುಧಾರಿಸುತ್ತದೆ. ಅಲ್ಲದೆ ಆಮ್ಲೀಯತೆ (Acidity), ಗ್ಯಾಸ್ಟ್ರಿಕ್ ಸಮಸ್ಯೆಗಳು ಕಡಿಮೆಯಾಗುತ್ತವೆ. ಗರ್ಭಿಣಿಯರಿಗೆ ಎಡಭಾಗಕ್ಕೆ ಮಲಗುವುದು ರಕ್ತ ಸಂಚಾರವನ್ನು ಸುಧಾರಿಸಿ, ಗರ್ಭದಲ್ಲಿರುವ ಶಿಶುವಿನ ಆರೋಗ್ಯಕ್ಕೂ ಸಹಕಾರಿ.

ಇದಲ್ಲದೆ, ಎಡಬದಿಯಲ್ಲಿ ಮಲಗುವುದರಿಂದ ಗೊರಕೆ (Snoring) ಹಾಗೂ ನಿದ್ರೆಯಲ್ಲಿ ಉಸಿರುಗಟ್ಟುವಿಕೆ (Sleep Apnea) ಸಮಸ್ಯೆಗಳಿಗೆ ಸಹ ಪರಿಹಾರ ಸಿಗುತ್ತದೆ.

ಬೆನ್ನಿನ ಮೇಲೆ ಮಲಗುವುದು ಎಷ್ಟು ಸೂಕ್ತ?

ಬೆನ್ನಿನ ಮೇಲೆ ಮಲಗುವುದು ಕೂಡ ಒಳ್ಳೆಯ ನಿದ್ರಾಭಂಗಿಯೆಂದು ತಜ್ಞರು ಹೇಳುತ್ತಾರೆ. ಈ ರೀತಿ ಮಲಗಿದರೆ ಬೆನ್ನುಮೂಳೆ ನೇರವಾಗಿರುತ್ತದೆ ಮತ್ತು ದೇಹದ ಭಂಗಿ (Posture) ಸುಧಾರಿಸುತ್ತದೆ. ಕುತ್ತಿಗೆ ಹಾಗೂ ಬೆನ್ನಿಗೆ ಒತ್ತಡ ಕಡಿಮೆಯಾಗುತ್ತದೆ. ಆದರೆ ಈ ಭಂಗಿಯಲ್ಲಿ ಗೊರಕೆ ಸಮಸ್ಯೆ ಇರುವವರಿಗೆ ಸ್ವಲ್ಪ ಸಮಸ್ಯೆ ಆಗಬಹುದು.

ಯಾವ ಭಂಗಿಯನ್ನು ತಪ್ಪಿಸಬೇಕು?

ಹೊಟ್ಟೆಯ ಮೇಲೆ ಮಲಗುವುದನ್ನು ಸಂಪೂರ್ಣವಾಗಿ ತಪ್ಪಿಸುವುದು ಉತ್ತಮ. ಈ ರೀತಿ ಮಲಗುವುದರಿಂದ ಕುತ್ತಿಗೆ ಮತ್ತು ಬೆನ್ನಿನ ಮೇಲೆ ಹೆಚ್ಚಿನ ಒತ್ತಡ ಬೀಳುತ್ತದೆ. ಇದರ ಪರಿಣಾಮವಾಗಿ ಕುತ್ತಿಗೆ ನೋವು, ಬೆನ್ನುನೋವು ಉಂಟಾಗಬಹುದು. ದೀರ್ಘಕಾಲ ಈ ಭಂಗಿಯಲ್ಲಿ ಮಲಗಿದರೆ ಮೆದುಳು ಮತ್ತು ಉಸಿರಾಟದ ಮೇಲೂ ದುಷ್ಪರಿಣಾಮ ಬೀರುತ್ತದೆ.

ಉತ್ತಮ ಮತ್ತು ಆಳವಾದ ನಿದ್ರೆ ಪಡೆಯಲು ಉಪಾಯಗಳು

ಉತ್ತಮ ನಿದ್ರೆ ಪಡೆಯಲು ಕೇವಲ ಭಂಗಿ ಸಾಕಾಗುವುದಿಲ್ಲ. ಜೀವನಶೈಲಿಯಲ್ಲೂ ಕೆಲವು ಬದಲಾವಣೆ ಅಗತ್ಯ.

• ನಿಮ್ಮ ದೇಹಕ್ಕೆ ಸೂಕ್ತವಾದ ಹಾಸಿಗೆಯನ್ನು ಆಯ್ಕೆಮಾಡಿ. ತುಂಬಾ ಗಟ್ಟಿಯಾದ ಅಥವಾ ತುಂಬಾ ಮೃದು ಹಾಸಿಗೆ ಸಮಸ್ಯೆ ಉಂಟುಮಾಡಬಹುದು.

• ಆರಾಮದಾಯಕ ಬೆಡ್‌ಶೀಟ್‌ಗಳನ್ನು ಬಳಸಿರಿ. ಚುಚ್ಚುವ ಅಥವಾ ಅಸಹನೀಯ ಬಟ್ಟೆಗಳು ನಿದ್ರೆಗೆ ಅಡ್ಡಿಯಾಗುತ್ತವೆ.

• ಸರಿಯಾದ ದಿಂಬನ್ನು ಆರಿಸಿ. ತಪ್ಪಾದ ದಿಂಬು ಕುತ್ತಿಗೆ ನೋವು ಹಾಗೂ ತಲೆನೋವಿಗೆ ಕಾರಣವಾಗಬಹುದು.

• ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಎದ್ದೇಳುವುದು ರೂಢಿಸಿಕೊಳ್ಳಿ. ಸ್ಥಿರ ವೇಳಾಪಟ್ಟಿ ನಿದ್ರೆಯ ಗುಣಮಟ್ಟವನ್ನು ಹೆಚ್ಚಿಸುತ್ತದೆ.

• ಕತ್ತಲೆ ಮತ್ತು ಮೌನ ವಾತಾವರಣದಲ್ಲಿ ಮಲಗಲು ಪ್ರಯತ್ನಿಸಿ. ಬೆಳಕು ಮತ್ತು ಶಬ್ದ ಮನಸ್ಸನ್ನು ಅಶಾಂತಗೊಳಿಸುತ್ತದೆ.

• ಮದ್ಯಪಾನ ಹಾಗೂ ತಡರಾತ್ರಿ ಮೊಬೈಲ್ ಬಳಕೆಯಿಂದ ದೂರವಿರಿ. ಇವು ನಿದ್ರೆಯ ಮೇಲೆ ಕೆಟ್ಟ ಪರಿಣಾಮ ಬೀರುತ್ತವೆ.

ಉತ್ತಮ ಆರೋಗ್ಯಕ್ಕೆ ಉತ್ತಮ ನಿದ್ರೆ ಅತ್ಯಗತ್ಯ. ಸರಿಯಾದ ಮಲಗುವ ಭಂಗಿ ಮತ್ತು ಶಿಸ್ತುಬದ್ಧ ಜೀವನಶೈಲಿ ಅಳವಡಿಸಿಕೊಂಡರೆ ದೇಹವೂ ಮನಸ್ಸೂ ಸದಾ ಚೈತನ್ಯದಿಂದಿರುತ್ತದೆ.