ಮಲಯಾಳಂನ ಬಾಕ್ಸ್ ಆಫೀಸ್ ಹಿಟ್ ಮಾರ್ಕೋ ಸಿನಿಮಾದ ಸೀಕ್ವೆಲ್ ಬರ್ತಿಲ್ಲ. ಬರೋದೂ ಇಲ್ಲ. ಹೀಗಂತ ಸ್ವತಃ ನಾಯಕನಟ ಉನ್ನಿ ಮುಕುಂದನ್ ಅವರೇ ಸ್ಪಷ್ಟ ಪಡಿಸಿದ್ದಾರೆ. ಟಾಕ್ ಆಫ್ ದಿ ಟೌನ್ ಆಗಿದ್ದ ಹಿಟ್ ಮೂವಿಯ ಮುಂದುವರೆದ ಭಾಗ ಕೈ ಬಿಡೋಕೆ ಕಾರಣವೇನು.
ಕಳೆದ ವರ್ಷಾಂತ್ಯದಲ್ಲಿ ಅಂದ್ರೆ ಡಿಸೆಂಬರ್ 20ಕ್ಕೆ ವರ್ಲ್ಡ್‌ವೈಡ್ ರಿಲೀಸ್ ಆದ ಮಲಯಾಳಂ ಸಿನಿಮಾ ಮಾರ್ಕೋ. ಹನೀಫ್ ಅದೇನಿ ಬರೆದು, ನಿರ್ದೇಶಿಸಿದ್ದ ಈ ಸಿನಿಮಾದಲ್ಲಿ ಉನ್ನಿ ಮುಕುಂದನ್ ನಾಯಕನಟನಾಗಿ ಬಣ್ಣ ಹಚ್ಚಿದ್ದರು. ಕೇವಲ 30 ಕೋಟಿ ಬಜೆಟ್‌‌ನಲ್ಲಿ ತಯಾರಾದ ಈ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಬರೋಬ್ಬರಿ 110ಕ್ಕೂ ಅಧಿಕ ಕೋಟಿ ಗಳಿಸೋ ಮೂಲಕ ಎಲ್ಲರ ಹುಬ್ಬೇರಿಸಿತ್ತು.
ಸಿನಿಮಾದ ಕ್ಲೈಮ್ಯಾಕ್ಸ್‌‌ನಲ್ಲಿ ಸೀಕ್ವೆಲ್ ಬಗ್ಗೆ ಹಿಂಟ್ ನೀಡಲಾಗಿತ್ತು. ಚಿತ್ರತಂಡದ ನಿರೀಕ್ಷೆಯಂತೆ ಮಾರ್ಕೋ ಚಿತ್ರ ಗಲ್ಲಾ ಪೆಟ್ಟಿಗೆಯಲ್ಲಿ ಧೂಳೆಬ್ಬಿಸಿ, ಹಂಡ್ರೆಡ್ ಕ್ರೋರ್ ಕ್ಲಬ್ ಕೂಡ ಸೇರಿತು. ಆಗ ಸೀಕ್ವೆಲ್ ಮಾಡುವ ಚಿತ್ರತಂಡದ ಆಶಯ ಮತ್ತಷ್ಟು ಗಟ್ಟಿಗೊಂಡಿತ್ತು. ಆದ್ರೆ ರಿಲೀಸ್ ಬಳಿಕ ಟಾಕ್ ಆಫ್ ದಿ ಟೌನ್ ಆದ ಈ ಸಿನಿಮಾ, ಪಾಸಿಟಿವ್‌ಗಿಂತ ನೆಗೆಟೀವ್ ಆಗಿಯೇ ಜಾಸ್ತಿ ಚರ್ಚೆ ಆಯ್ತು.
ಸಾಮಾನ್ಯವಾಗಿ ಹೀರೋಗಳು ಬಣ್ಣ ಹಚ್ಚಿ ನಟಿಸ್ತಾರೆ. ಆದ್ರೆ ಈ ಮಾರ್ಕೋ ಚಿತ್ರಕ್ಕಾಗಿ ನಾಯಕನಟ ಉನ್ನಿ ಮುಕುಂದನ್ ರಕ್ತವನ್ನೇ ಹಚ್ಚಿಕೊಂಡು ಅಭಿನಯಿಸಿದ್ರು. ಕ್ರೌರ್ಯವೇ ಈ ಚಿತ್ರದ ಜೀವಾಳವಾಗಿತ್ತು. ಅದೇ ಕಾರಣಕ್ಕೆ ಸೆನ್ಸಾರ್ ಬೋರ್ಡ್‌ ಕೂಡ ಎ ಸರ್ಟಿಫಿಕೇಟ್ ನೀಡಿ, ಕಡ್ಡಾಯವಾಗಿ ವಯಸ್ಕರಿಗೆ ಮಾತ್ರ ಅನ್ನೋ ಮುದ್ರೆ ಹಾಕಿತ್ತು. ಆದಾಗ್ಯೂ ಕೂಡ ಮೇಕಿಂಗ್‌ನಿಂದ ತಕ್ಕಮಟ್ಟಿಗೆ ಒಂದು ವರ್ಗದ ಮಂದಿಗೆ ರುಚಿಸಿತ್ತು.
ರಾಕಿಭಾಯ್ ಯಶ್‌‌ರ ಕೆಜಿಎಫ್, ರಣ್‌ಬೀರ್ ಕಪೂರ್ ನಟನೆಯ ಅನಿಮಲ್ ಪಾತ್ರಗಳನ್ನ ಮೀರಿಸುವಂತಹ ಕ್ರೌರ್ಯ ಈ ಮಾರ್ಕೋನಲ್ಲಿತ್ತು. ಈತ ಕತ್ತಿ ಹಿಡಿದ್ರೆ ಸಾಕು ಮಾರಣಹೋಮ ಕಟ್ಟಿಟ್ಟ ಬುತ್ತಿ ಆಗ್ತಿತ್ತು. ರಕ್ತದ ಹೊಳೆಯೇ ಹರಿಸುತ್ತಿದ್ದ, ಶವಗಳ ರಾಶಿ ಮಾಡ್ತಿದ್ದ. ಹಾಗಾಗಿ ಮಾರ್ಕೋ ಸಿನಿಮಾಗೆ ಎಷ್ಟು ಮಂದಿ ಸೂಪರ್ ಅಂತ ನೆಚ್ಚಿಕೊಂಡ್ರೋ, ಅದರ ಎರಡು ಪಟ್ಟು ಮಂದಿ ಸಿನಿಮಾದ ಕ್ರೌರ್ಯತೆ ಬಗ್ಗೆ ತೆಗಳಿದ್ದರು. ಅದರಲ್ಲೂ ತಾಯಿಯ ಹೊಟ್ಟೆಯಲ್ಲಿರೋ ಮಗುವನ್ನು ಬಲವಂತವಾಗಿ ಹೊರತೆಗೆಯುವ ಖಳನಟ, ವೆಪನ್‌‌ನಿಂದ ಕರುಳ ಬಳ್ಳಿ ಕಟ್ ಮಾಡುವ ಅಮಾನವೀಯ ದೃಶ್ಯಕ್ಕೆ ಎಲ್ಲಿಲ್ಲದ ವಿರೋಧ ವ್ಯಕ್ತವಾಗಿತ್ತು.
ಇದೆಲ್ಲವನ್ನು ಗಮನದಲ್ಲಿಟ್ಟುಕೊಂಡು ಸ್ವತಃ ಉನ್ನಿ ಮುಕುಂದನ್ ಮಾರ್ಕೋ ಸೀಕ್ವೆಲ್‌ಗೆ ಫುಟ್‌ಸ್ಟಾಪ್ ಇಟ್ಟಿದ್ದಾರೆ. ಅಭಿಮಾನಿಯೊಬ್ಬ ಕೇಳಿರುವ ಪ್ರಶ್ನೆಗೆ ಸೋಶಿಯಲ್ ಮೀಡಿಯಾದಲ್ಲಿ ಉತ್ತರಿಸಿರೋ ಉನ್ನಿ, ಹೀಗೆಂದಿದ್ದಾರೆ.
ಮಾರ್ಕೋ ಸೀರೀಸ್ ಬಗ್ಗೆ ನಾಯಕನಟ ಸ್ಪಷ್ಟನೆ
‘ಬ್ರೋ..ಕ್ಷಮೆ ಇರಲಿ. ನಾನು ಮಾರ್ಕೋ ಸೀರೀಸ್ ಮಾಡುವ ಯೋಜನೆಯನ್ನು ಕೈ ಬಿಟ್ಟಿದ್ದೇನೆ. ಈ ಪ್ರಾಜೆಕ್ಟ್ ಸುತ್ತ ಸಾಕಷ್ಟು ನೆಗೆಟಿವಿಟಿ ಹಬ್ಬಿದೆ. ಮಾರ್ಕೋಗಿಂತ ದೊಡ್ಡದಾದ ಹಾಗೂ ಉತ್ತಮವಾದ ಸಿನಿಮಾ ಮಾಡಲು ಪ್ರಯತ್ನಿಸುತ್ತೇನೆ. ನಿಮ್ಮ ಪ್ರೀತಿಗೆ ಚಿರಋಣಿ.’
ಸಾಮಾನ್ಯವಾಗಿ ಕಲಾವಿದರು ಸದಾ ದುಡ್ಡು ಮಾಡೋದನ್ನೇ ನೋಡ್ತಾರೆ. ಆದರೊಟ್ಟಿಗೆ ಸಾಮಾಜಿಕ ಬದ್ದತೆ ಕೂಡ ನೋಡುವವರು ಬಹಳ ವಿರಳ. ಆ ನಿಟ್ಟಿನಲ್ಲಿ ಉನ್ನಿ ಮುಕುಂದನ್ ನಿರ್ಧಾರಕ್ಕೆ ಎಲ್ಲೆಡೆಯಿಂದ ಪ್ರಶಂಸೆಗಳು ವ್ಯಕ್ತವಾಗುತ್ತಿವೆ. ಸೋ ಮಾರ್ಕೋ-2 ನಿರೀಕ್ಷೆಯಲ್ಲಿರೋರು ಆ ಆಸೆಯನ್ನ ಬಿಟ್ಟುಬಿಡಿ ಅಂತ ಡೈರೆಕ್ಟ್ ಆಗಿಯೇ ಸ್ಪಷ್ಟಪಡಿಸಿದ್ದಾರೆ ನಾಯಕನಟ.
