2024ರಲ್ಲಿ ರವಿ ಮೋಹನ್ ಮತ್ತು ಆರತಿ ರವಿಯ ವಿಚ್ಛೇದನದ ನಂತರ, ರವಿ ಮೋಹನ್ (ನಟ ಜಯಂ ರವಿ) ಮತ್ತೆ ಸುದ್ದಿಯಲ್ಲಿದ್ದಾರೆ. ಆರತಿ ರವಿಯಿಂದ ಬೇರ್ಪಟ್ಟ ಬಳಿಕ, ರವಿ ಮತ್ತು ಗಾಯಕಿ ಕೆನಿಶಾ ಫ್ರಾನ್ಸಿಸ್ ಒಟ್ಟಿಗೆ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿದ್ದು, ವಿವಾದವನ್ನು ಮತ್ತಷ್ಟು ತೀವ್ರಗೊಳಿಸಿದೆ. ಮೇ 8ರಂದು, ಚೆನ್ನೈನಲ್ಲಿ ನಡೆದ ಚಲನಚಿತ್ರ ನಿರ್ಮಾಪಕ ಇಶಾರಿ ಗಣೇಶ್ ಅವರ ಮಗಳ ಮದುವೆಯ ಆರತಕ್ಷತೆಯಲ್ಲಿ ರವಿ ಮತ್ತು ಕೆನಿಶಾ ಒಟ್ಟಿಗೆ ಭಾಗವಹಿಸಿದ್ದರು. ಈ ಘಟನೆಯ ಬೆನ್ನಲ್ಲೇ, ಆರತಿ ರವಿ ಸಾಮಾಜಿಕ ಮಾಧ್ಯಮದಲ್ಲಿ ಖಡಕ್ ಪೋಸ್ಟ್ ಹಂಚಿಕೊಂಡಿದ್ದರು.
ಮೇ 10ರಂದು, ಮತ್ತೊಮ್ಮೆ ಇಶಾರಿ ಗಣೇಶ್ ಅವರ ಮಗಳ ವಿವಾಹ ಆರತಕ್ಷತೆಯಲ್ಲಿ ರವಿ ಮೋಹನ್ ಮತ್ತು ಕೆನಿಶಾ ಒಟ್ಟಿಗೆ ಕಾಣಿಸಿಕೊಂಡರು. ಈ ಕಾರ್ಯಕ್ರಮದಲ್ಲಿ ರವಿ ಮತ್ತು ಕೆನಿಶಾ ಜೋಡಿಯ ಫೋಟೋಗಳು ಮತ್ತು ವೀಡಿಯೊಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿವೆ. ಈ ಘಟನೆಯು ಆರತಿಯ ಸಾಮಾಜಿಕ ಮಾಧ್ಯಮದ ಪೋಸ್ಟ್ನಲ್ಲಿ ವ್ಯಕ್ತಪಡಿಸಿದ ಗಂಭೀರ ಆರೋಪಗಳಿಗೆ ರವಿ ಯಾವುದೇ ಪ್ರತಿಕ್ರಿಯೆ ನೀಡದೇ, ಕೆನಿಶಾ ಜೊತೆಗೆ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದಾರೆ.
ಈ ವಾರದ ಆರಂಭದಲ್ಲಿ, ರವಿ ಮತ್ತು ಕೆನಿಶಾ ಒಟ್ಟಿಗೆ ಸಂಗೀತ ಸಮಾರಂಭದಲ್ಲಿ ಭಾಗವಹಿಸಿದ್ದರು. ಆರತಿಯಿಂದ ಬೇರ್ಪಟ್ಟ ನಂತರ ಇದು ರವಿಯ ಮೊದಲ ಸಾರ್ವಜನಿಕ ಕಾರ್ಯಕ್ರಮವಾಗಿತ್ತು. ಈ ಘಟನೆಯ ಬಳಿಕ, ಆರತಿ ತಮ್ಮ ಸಾಮಾಜಿಕ ಮಾಧ್ಯಮದಲ್ಲಿ ಭಾವನಾತ್ಮಕ ಪೋಸ್ಟ್ ಹಂಚಿಕೊಂಡಿದ್ದರು. ಈ ಪೋಸ್ಟ್ಗೆ ಖುಷ್ಬೂ ಸೇರಿದಂತೆ ಹಲವು ನಟಿಯರು ಬೆಂಬಲ ವ್ಯಕ್ತಪಡಿಸಿದ್ದಾರೆ.
ಆರತಿಯ ಪೋಸ್ಟ್ನಲ್ಲಿ, ರವಿ ತನ್ನಿಂದ ಮತ್ತು ತಮ್ಮ ಇಬ್ಬರು ಗಂಡು ಮಕ್ಕಳಿಂದ ದೂರವಾಗುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ. “ನನ್ನ ವಿಚ್ಛೇದನ ಪ್ರಕ್ರಿಯೆ ಇನ್ನೂ ನಡೆಯುತ್ತಿದೆ. ಒಂದು ವರ್ಷದಿಂದ, ನಾನು ಮೌನವನ್ನು ರಕ್ಷಾಕವಚದಂತೆ ಧರಿಸಿದ್ದೇನೆ. ಇದು ನನ್ನ ದೌರ್ಬಲ್ಯದಿಂದಲ್ಲ, ಬದಲಿಗೆ ನನ್ನ ಮಕ್ಕಳಿಗೆ ಶಾಂತಿಯ ಅಗತ್ಯವಿತ್ತು. ಆದರೆ, 18 ವರ್ಷಗಳ ಕಾಲ ಪ್ರೀತಿ, ನಿಷ್ಠೆ ಮತ್ತು ನಂಬಿಕೆಯಿಂದ ಒಡನಾಡಿದ ವ್ಯಕ್ತಿ, ತಾನು ಭರವಸೆ ನೀಡಿದ ಜವಾಬ್ದಾರಿಗಳಿಂದ ದೂರ ಸರಿದಿದ್ದಾನೆ,” ಎಂದು ಆರತಿ ಬರೆದಿದ್ದಾರೆ.
ಆರತಿ ತಮ್ಮ ಪೋಸ್ಟ್ನಲ್ಲಿ, “ನನ್ನ ಮೇಲೆ ಕೆಲವು ಆರೋಪಗಳಿವೆ. ಅವು ನಿಜವಾಗಿದ್ದರೆ, ನಾನು ಬಹಳ ಹಿಂದೆಯೇ ನನ್ನ ವೈಯಕ್ತಿಕ ಹಿತಾಸಕ್ತಿಗಳನ್ನು ರಕ್ಷಿಸಿಕೊಂಡಿರುತ್ತಿದ್ದೆ. ಆದರೆ, ನಾನು ಪ್ರೀತಿಯನ್ನು ಆಯ್ಕೆ ಮಾಡಿದೆ. ಆದರೆ, ಆ ಪ್ರೀತಿಯನ್ನು ದೌರ್ಬಲ್ಯ ಎಂದು ಪರಿಗಣಿಸಲಾಗುತ್ತಿದೆ. ನಾನು ಇದಕ್ಕೆ ಸುಮ್ಮನಿರುವುದಿಲ್ಲ,” ಎಂದು ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ.
ತಮ್ಮ ಮಕ್ಕಳ ಕುರಿತು ಮಾತನಾಡುತ್ತಾ, “ನನ್ನ ಮಕ್ಕಳಿಗೆ ಭದ್ರತೆ ಮತ್ತು ಸ್ಥಿರತೆ ಬೇಕು, ಮೌನವಲ್ಲ. ಅವರು ಕಾನೂನು ಷರತ್ತುಗಳನ್ನು ಅರ್ಥಮಾಡಿಕೊಳ್ಳಲು ತುಂಬಾ ಚಿಕ್ಕವರು. ನಾನು ಹೆಂಡತಿಯಾಗಿ ಅಥವಾ ಅನ್ಯಾಯಕ್ಕೊಳಗಾದ ಮಹಿಳೆಯಾಗಿ ಮಾತನಾಡುತ್ತಿಲ್ಲ. ತಂದೆ ಎಂಬುದು ಕೇವಲ ಬಿರುದಲ್ಲ, ಅದು ಜವಾಬ್ದಾರಿ ಎಂದ ಆರತಿ, “ನಾನು ಮತ್ತು ಕಾನೂನು ಇಬ್ಬರೂ ಒಂದೇ ರೀತಿಯಲ್ಲಿ ನಿರ್ಧರಿಸುವವರೆಗೆ ನಾನು ಆರತಿ ರವಿಯಾಗಿಯೇ ಇರುತ್ತೇನೆ. ಮಾಧ್ಯಮಗಳಿಗೆ, ಕಾನೂನು ಪ್ರಕ್ರಿಯೆ ಮುಗಿಯುವವರೆಗೆ ನನ್ನನ್ನು ಮಾಜಿ ಪತ್ನಿ ಎಂದು ಕರೆಯಬೇಡಿ,” ಎಂದು ವಿನಂತಿಸಿದ್ದಾರೆ.
