ಇಂಡಿಯನ್ ಸಿನಿಮಾಗಳ ಮೇಲೆ ಟ್ರಂಪ್ ಕಣ್ಣು ಬಿದ್ದಿದೆ. ಅಮೆರಿಕದ ಬಾಕ್ಸ್ ಆಫೀಸ್‌‌ನಲ್ಲಿ ಕೋಟಿ ಕೋಟಿ ಲೂಟಿ ಮಾಡ್ತಿರೋ ಭಾರತೀಯ ಸಿನಿಮಾಗಳಿಗೆ ಬ್ರೇಕ್ ಹಾಕೋಕೆ ಮಾಸ್ಟರ್ ಪ್ಲ್ಯಾನ್ ರೂಪಿಸಿದ್ದಾರೆ ದೊಡ್ಡಣ್ಣ. ಇನ್ಮೇಲೆ ಮೊದಲಿನಂತೆ ಅಮೆರಿಕದಲ್ಲಿ ಸಿನಿಮಾಗಳನ್ನ ರಿಲೀಸ್ ಮಾಡೋಕೆ ಆಗಲ್ಲ. ಮಾಡಿದ್ರೂ ದೊಡ್ಡ ಪ್ರಮಾಣದ ಹಣ ಜೇಬು ತುಂಬಲ್ಲ. ಅದ್ಯಾಕೆ ಅಂತೀರಾ..? ಈ ಸ್ಟೋರಿ ನೋಡಿ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಚಿತ್ರರಂಗಕ್ಕೆ ಹೊಸ ಸುಂಕ ನೀತಿ ಜಾರಿಗೊಳಿಸಿದ್ದಾರೆ. ಅದರಂತೆ ಇನ್ಮೇಲೆ ಅಮೆರಿಕದ ಹೊರಗಡೆ ತಯಾರಾದ ವಿದೇಶಿ ಸಿನಿಮಾಗಳಿಗೆ 100% ಟ್ಯಾಕ್ಸ್ ಅನ್ವಯ ಆಗಲಿದೆ. ಹೌದು.. ಈ ರೀತಿಯ ಮಹತ್ವದ ಸುಂಕ ಪದ್ಧತಿಯನ್ನ ಜಾರಿಗೊಳಿಸೋ ಮೂಲಕ ವಿಶ್ವ ಸಿನಿದುನಿಯಾಗೆ ಬಿಗ್ ಶಾಕ್ ನೀಡಿದ್ದಾರೆ ಟ್ರಂಪ್.
ಅಂದಹಾಗೆ ಇದರಿಂದ ದೊಡ್ಡ ಹೊಡೆತ ಬೀಳುವುದು ನಮ್ಮ ಭಾರತೀಯ ಚಿತ್ರರಂಗಕ್ಕೆ. ಶಾರೂಖ್ ಖಾನ್, ಆಮೀರ್ ಖಾನ್, ಸಲ್ಮಾನ್ ಖಾನ್, ಅಕ್ಷಯ್ ಕುಮಾರ್, ರಜನೀಕಾಂತ್, ದಳಪತಿ ವಿಜಯ್, ಯಶ್, ವಿಕ್ಕಿ ಕೌಶಲ್, ಜೂನಿಯರ್ ಎನ್‌ಟಿಆರ್, ಮೋಹನ್‌ಲಾಲ್, ಪ್ರಭಾಸ್, ಅಲ್ಲು ಅರ್ಜುನ್ ಹಾಗೂ ರಾಮ್ ಚರಣ್ ಅಂತಹ ಬಿಗ್ ಸ್ಟಾರ್‌‌ಗಳ ಸಿನಿಮಾಗಳಿಗೆ ಕಂಟಕ ಕಾದಿದೆ. ಭಾರತ ಹೊರತಾಗಿ ಈ ಇಂಡಿಯನ್ ಸ್ಟಾರ್ಸ್‌ ಅತಿಹೆಚ್ಚು ಬಾಕ್ಸ್ ಆಫೀಸ್ ಗಳಿಸುತ್ತಿದ್ದಿದ್ದು ಅಮೆರಿಕದಲ್ಲಿ. ಹಾಗಾಗಿ ಈಗ ದೊಡ್ಡ ಮಟ್ಟದ ಹೊಡೆತ ಬೀಳಲಿದೆ.
ರಾಜಮೌಳಿಯ ಬಾಹುಬಲಿ, ತ್ರಿಬಲ್ ಆರ್ ಸಿನಿಮಾಗಳು. ಪ್ರಶಾಂತ್ ನೀಲ್‌ರ ಕೆಜಿಎಫ್, ಸಲಾರ್ ಚಿತ್ರಗಳು. ರಣ್‌ಬೀರ್ ಕಪೂರ್‌ರ ಅನಿಮಲ್, ವಿಕ್ಕಿ ಕೌಶಲ್‌ರ ಛಾವ, ಶಾರೂಖ್ ನಟನೆಯ ಪಠಾಣ್, ಅಲ್ಲು ಅರ್ಜುನ್‌‌ರ ಪುಷ್ಪ ಸೇರಿದಂತೆ ಸಾಕಷ್ಟು ಇಂಡಿಯನ್ ಸಿನಿಮಾಗಳು ನೂರಾರು ಕೋಟಿ ಬೃಹತ್ ಮೊತ್ತವನ್ನು ಅಮೆರಿಕದಿಂದಲೇ ಲೂಟಿ ಮಾಡಿದ್ದವು. ಆಗ ಟ್ಯಾಕ್ಸ್ ಇರಲಿಲ್ಲ. ಆದ್ರೀಗ ಟ್ಯಾಕ್ಸ್ ಶೇಕಡಾ 100ರಷ್ಟು ವಿಧಿಸೋ ಮೂಲಕ ಶಾಕ್ ನೀಡಿದ್ದಾರೆ ಟ್ರಂಪ್. ಇನ್ಮೇಲೆ ಇಂಡಿಯನ್ ಚಿತ್ರಗಳು ಅಲ್ಲಿ ರಿಲೀಸ್ ಆದ್ರೆ ಜೇಬು ತುಂಬೋದು ಅಷ್ಟಕ್ಕಷ್ಟೇ. ಕಾರಣ ಅರ್ಧಕ್ಕರ್ಧದಷ್ಟು ಹಣ ಟ್ಯಾಕ್ಸ್ ರೂಪದಲ್ಲಿ ಕಟ್ಟಬೇಕಾಗುತ್ತದೆ.
ಅಂದಹಾಗೆ ಭಾರತೀಯ ಸಿನಿಮಾಗಳು ಸೇರಿದಂತೆ ವಿದೇಶಿ ಚಿತ್ರಗಳಿಂದ ಹಾಲಿವುಡ್‌ಗೆ ಎಫೆಕ್ಟ್ ಆಗ್ತಿದೆ. ಇದು ರಾಷ್ಟ್ರೀಯ ಭದ್ರತಾ ಬಿಕ್ಕಟ್ಟು ಕೂಡ ಹೌದು ಎಂದಿರೋ ಟ್ರಂಪ್, ಹೊಸ ಟ್ರೇಡ್ ನೀತಿ ಜಾರಿಗೆ ತಂದಿದ್ದಾರೆ. ಅಮೆರಿಕದ ಹೊರಗಡೆ ತಯಾರಾದ ಯಾವುದೇ ಸಿನಿಮಾಗೆ ಶೇಕಡಾ ನೂರರಷ್ಟು ಟ್ಯಾಕ್ಸ್ ಕಟ್ಟಿಟ್ಟ ಬುತ್ತಿ. ಇದು ಹಾಲಿವುಡ್ ಸಿನಿಮಾಗಳಿಗೂ ಎಫೆಕ್ಟ್ ಆಗಲಿದೆ ಅನ್ನೋದು ಹಲವರ ವಾದವಾಗಿದೆ. ಕಾರಣ ಸಾಕಷ್ಟು ಹಾಲಿವುಡ್ ಚಿತ್ರಗಳು ಅಮೆರಿಕದ ಹೊರಗೆ ತಯಾರಾಗುತ್ತಿವೆ.
ಅಮೆರಿಕದಲ್ಲಿ ಚಲನಚಿತ್ರೋದ್ಯಮ ವೇಗವಾಗಿ ಸಾಯ್ತಿದೆ ಅಂದಿರೋ ಟ್ರಂಪ್, ವಿದೇಶಿಗರು ಅಮೆರಿಕದ ನಿರ್ಮಾಪಕರನ್ನ ಹಾಗೂ ಹಾಲಿವುಡ್ ಸ್ಟುಡಿಯೋಗಳನ್ನ ಅಮೆರಿಕದಿಂದ ದೂರ ಸೆಳೆಯುತ್ತಿದ್ದಾರೆ ಅಂತ ಅಭಿಪ್ರಾಯಪಟ್ಟಿದ್ದಾರೆ. ಹೀಗಾಗಿ ಟ್ರೇಡ್ ವಾರ್‌‌ನ ಬೇರೆ ವಿಷಯದಲ್ಲಿ ಮಾಡೋದು ಬಿಟ್ಟು ಚಿತ್ರರಂಗದ ಮೇಲೆ ಮಾಡಿರೋದ್ರ ಬಗ್ಗೆ ವಿಶ್ವದಾದ್ಯಂತ ವ್ಯಾಪಕ ಚರ್ಚೆಗಳು ನಡೆಯುತ್ತಿವೆ. ಇದು ಹಾಲಿವುಡ್‌ಗೆ ಶಾಪವಾಗುತ್ತೋ ಅಥ್ವಾ ವರದಾನವಾಗುತ್ತೋ ಗೊತ್ತಿಲ್ಲ. ಆದ್ರೆ ಇಂಡಿಯನ್ ಸಿನಿಮಾಗಳಿಗೆ ಮಾತ್ರ ದೊಡ್ಡ ಮಟ್ಟದ ಆಘಾತ ತಂದೊಡ್ಡಿದೆ.
ತ್ರಿಬಲ್ ಆರ್ ಸಿನಿಮಾದಿಂದ ಹಾಲಿವುಡ್ ಮಂದಿಯ ಕಣ್ಣು ಕೆಂಪಗಾಗಿಸಿದ್ದ ರಾಜಮೌಳಿಯೂ ಇದಕ್ಕೆ ಒಂದು ಕಾರಣವಾಗಿರೋದ್ರಲ್ಲಿ ಅಚ್ಚರಿಯಿಲ್ಲ. ಹೌದು.. ಆಸ್ಕರ್ ಅಂಗಳಕ್ಕೆ ಎಂಟ್ರಿ ಕೊಟ್ಟಂತಹ ತ್ರಿಬಲ್ ಆರ್, ಟ್ರಂಪ್ ಗಮನಕ್ಕೆ ಬರುವಂತಾಯ್ತು. ಹಾಗಾಗಿಯೇ ಟ್ಯಾಕ್ಸ್ ಹೇರುವ ಮೂಲಕ ಭಾರತೀಯ ಚಿತ್ರಗಳಿಗೆ ಕಡಿವಾಣ ಹಾಕಲು ಮುಂದಾದಂತಿದೆ ಟ್ರಂಪ್. ಇದು ಮುಂದಿನ ದಿನಗಳಲ್ಲಿ ಯಾವೆಲ್ಲಾ ರೂಪಗಳನ್ನು ಪಡೆಯುತ್ತೆ ಅನ್ನೋದನ್ನ ಇನ್ನಷ್ಟೇ ನಿರೀಕ್ಷಿಸಬೇಕಿದೆ.
ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್
