ಶರ್ಮಿಳಾ ಮಾಂಡ್ರೆಗೆ ಕಂಕಣಭಾಗ್ಯ..ಯಾರೀ ತಮಿಳು ಪ್ರೊಡ್ಯೂಸರ್.?

ನಮ್ಮೂರ ಯುವರಾಣಿ ಶರ್ಮಿಳಾ ಮಾಂಡ್ರೆಗೆ ಕಲ್ಯಾಣವಂತೆ. ವರನ್ಯಾರು ಗೊತ್ತೇನೆ ಓ ಕೋಗಿಲೆ ಅಂತ ಕೇಳುವ ಸಮಯ ಬಂದಿದೆ. ಯೆಸ್.. ಸದ್ದಿಲ್ಲದೆ ಸಿನಿಮಾ ಇಂಡಸ್ಟ್ರಿ ವ್ಯಕ್ತಿಯ ಕೈಯನ್ನೇ ಹಿಡಿಯೋಕೆ ಸಜ್ಜಾಗಿದ್ದಾರೆ ಸ್ಯಾಂಡಲ್‌ವುಡ್ ಸಜನಿ. ಇಷ್ಟಕ್ಕೂ ಎಂಗೇಜ್ಮೆಂಟ್ ಯಾವಾಗ..? ಮದ್ವೆ ಯಾವಾಗ..? ಹುಡುಗ ಯಾರು ಅನ್ನೋ ನಿಮ್ಮ ಕ್ಯೂರಿಯಾಸಿಟಿಗೆ ಉತ್ತರ ಇಲ್ಲಿದೆ.

• ಶರ್ಮಿಳಾಗೆ ಕಂಕಣಭಾಗ್ಯ.. ಯಾರೀ ತಮಿಳು ಪ್ರೊಡ್ಯೂಸರ್.?
• ಮಹಾರಾಜ ನಿರ್ಮಾಪಕ ಸುಧನ್ ಸುಂದರಂ ಜೊತೆ ಸಪ್ತಪದಿ
• ಜೂ-25ಕ್ಕೆ ಶರ್ಮಿಳಾ ಎಂಗೇಜ್ಮೆಂಟ್.. ಇದೇ ವರ್ಷ ಮದುವೆ
• ಹೊಸ ಬಾಳಿನ ಹೊಸ್ತಿಲಲ್ಲಿ ನಟಿ, ನಿರ್ಮಾಪಕಿ ಶರ್ಮಿಳಾ ಮಾಂಡ್ರೆ

ಇತ್ತೀಚೆಗೆ ಡಿಬಾಸ್ ದರ್ಶನ್‌‌ರ ಡೆವಿಲ್ ಸಿನಿಮಾದಲ್ಲಿ ನಟಿಸಿದ್ದ ನಟಿ ಶರ್ಮಿಳಾ ಮಾಂಡ್ರೆ, 39ರ ಹರೆಯದಲ್ಲಿ ಈಗ ಮದುವೆ ಆಗಿ ಹೊಸ ಬಾಳಿಗೆ ಕಾಲಿಡಲು ತುದಿಗಾಲಲ್ಲಿ ನಿಂತಿದ್ದಾರೆ. ಇಂಟರೆಸ್ಟಿಂಗ್ ಅಂದ್ರೆ ಶರ್ಮಿಳಾ ತಮ್ಮದೇ ಚಿತ್ರರಂಗದ ವ್ಯಕ್ತಿಯ ಕೈ ಹಿಡಿಯುತ್ತಿದ್ದಾರೆ. ಹೌದು.. ತಮಿಳು ಪ್ರೊಡ್ಯೂಸರ್ ಸುಧನ್ ಸುಂದರಂ ಜೊತೆ ಸಪ್ತಪದಿ ತುಳಿಯಲಿದ್ದಾರೆ ಕನ್ನಡದ ಚೆಲುವೆ ಶರ್ಮಿಳಾ.

ನಿಶ್ಚಿತಾರ್ಥ, ಮದ್ವೆ ಜೊತೆ ವರ ಸುಧನ್ ಸುಂದರಂ ಕುರಿತು ಆ ಮೇಲೆ ಹೇಳ್ತೀವಿ. ಆದ್ರೆ ಅದಕ್ಕೂ ಮುನ್ನ ಶರ್ಮಿಳಾ ಮಾಂಡ್ರೆ ಬಗ್ಗೆ ಡಿಟೈಲ್ಡ್ ಆಗಿ ಹೇಳಿಬಿಡ್ತೀವಿ ಕೇಳಿ. 2007ರಲ್ಲಿ ಬಿಡುಗಡೆ ಆದಂತಹ ಕನ್ನಡದ ಸಜನಿ ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ಶರ್ಮಿಳಾ, ಕನ್ನಡದ ಜೊತೆ ತೆಲುಗು, ತಮಿಳು ಚಿತ್ರಗಳಲ್ಲಿ ಕೂಡ ಮಿಂಚಿದ್ರು. ಬರೀ ನಟಿಯಾಗಿ ಅಷ್ಟೇ ಅಲ್ಲದೆ, ನಿರ್ಮಾಪಕಿ ಆಗಿಯೂ ಶರ್ಮಿಳಾ ಸಕ್ಸಸ್ ಆಗಿದ್ದಾರೆ. ಕನ್ನಡದಲ್ಲಿ ಎರಡು, ತಮಿಳಲ್ಲಿ 4 ಚಿತ್ರಗಳನ್ನ ನಿರ್ಮಿಸಿ ಅನ್ನದಾತೆ ಅನಿಸಿಕೊಂಡಿದ್ದಾರೆ.

ಗೋಲ್ಡನ್ ಸ್ಟಾರ್ ಗಣೇಶ್ ಜೊತೆ ಕೃಷ್ಣ, ದರ್ಶನ್-ಧರ್ಮ ಕೀರ್ತಿರಾಜ್ ನಟನೆಯ ನವಗ್ರಹ, ಸ್ವಯಂವರ, ಮಮ್ತಾಜ್, ಶಿವಣ್ಣನ ಮಾಸ್ ಲೀಡರ್, ಗಣೇಶ್-ಭಟ್ರ ಕಾಂಬೋನ ಗಾಳಿಪಟ-2 ಸೇರಿದಂತೆ ಸಾಕಷ್ಟು ಚಿತ್ರಗಳಲ್ಲಿ ನಟಿಸೋ ಮೂಲಕ ಚಿತ್ರರಂಗಕ್ಕೆ ತಮ್ಮದೇ ಆದ ಕೊಡುಗೆ ನೀಡಿದ್ದಾರೆ ಈ ಬ್ಯೂಟಿ ಶರ್ಮಿಳಾ ಮಾಂಡ್ರೆ. ಅದರಲ್ಲೂ ಆಕೆಯ ಸಾಲು ಸಾಲು ಸಾಂಗ್ಸ್ ಕಣ್ಮನ ತಣಿಸುವಂತಿವೆ.

ಶರ್ಮಿಳಾ ಮಾಂಡ್ರೆ ತಂದೆ ದಯಾನಂದ ಮಾಂಡ್ರೆ ಉದ್ಯಮಿ. ಶರ್ಮಿಳಾ ಅಜ್ಜ ರಮಾನಂದ ನಾರಾಯಣ್‌‌ರಾವ್ ಮಾಂಡ್ರೆ ನಿರ್ಮಾಪಕ, ವಿತರಕರಾಗಿದ್ದರು. ಸಂಗಮ್ ಚಿತ್ರಮಂದಿರ ಕೂಡ ಅವರದ್ದೇ ಆಗಿತ್ತು. ಹಾಗಾಗಿ ಶರ್ಮಿಳಾಗೆ ಚಿತ್ರರಂಗ ಪ್ರವೇಶ ಬಹಳ ಸಲೀಸಾಗೇ ಆಗಿತ್ತು. ಇಷ್ಟು ದಿನ ಸಿಂಗಲ್ ಆಗಿದ್ದ ಶರ್ಮಿಳಾ ಇದೀಗ ಪ್ರೊಡ್ಯೂಸರ್ ಜೊತೆ ಮಿಂಗಲ್ ಆಗೋ ಮೂಲಕ ದಾಂಪತ್ಯ ಜೀವನಕ್ಕೆ ಕಾಲಿಡ್ತಿದ್ದಾರೆ.

ಸುಧನ್ ಸುಂದರಂ ತಮಿಳು ಚಿತ್ರರಂಗದ ಸಕ್ಸಸ್‌‌ಫುಲ್ ಚಿತ್ರಗಳ ನಿರ್ಮಾಪಕರು. ಹೌದು.. ವಿಜಯ್ ಸೇತುಪತಿ ನಟನೆಯ ಮಹಾರಾಜ, ಇತ್ತೀಚೆಗೆ ತೆರೆಕಂಡ ಬ್ಲಾಕ್ ಬಸ್ಟರ್ ಸಿನಿಮಾ ತಾಯ್ ಕಿಳವಿ ನಿರ್ಮಾಪಕರು. ಈ ಹಿಂದೆ ಸೀತಾಕಾಥಿ, ಅನ್ನಾಬೆಲ್ಲೆ ಸೇತುಪತಿ, ಬೆಂಜ್, ಇರೈವನ್ ಚಿತ್ರಗಳಿಗೂ ಸುಧನ್ ಸುಂದರಂ ಬಂಡವಾಳ ಹೂಡಿದ್ದರು. ಪ್ಯಾಷನ್ ಸ್ಟುಡಿಯೋಸ್ ಅನ್ನೋ ತಮ್ಮದೇ ನಿರ್ಮಾಣ ಸಂಸ್ಥೆ ಹೊಂದಿರೋ ಸುಧನ್ ನೂರಾರು ಕೋಟಿ ರೂಪಾಯಿಗಳ ಒಡೆಯನೂ ಹೌದು. ಇತ್ತ ಶರ್ಮಿಳಾ ಕೂಡ ಬಾರ್ನ್ ವಿತ್ ಗೋಲ್ಡ್ ಸ್ಪೂನ್. ಸೋ ಇಬ್ಬರ ನಡುವೆ ಪರಸ್ಪರ ಸ್ನೇಹ ಏರ್ಪಟ್ಟು, ಪ್ರೇಮಾಂಕುರಿಸಿ, ಇದೀಗ ಕಲ್ಯಾಣ ಮಂಟಪದ ವರೆಗೆ ಕರೆದೊಯ್ಯುತ್ತಿದೆ.

ಇದೇ ಜೂನ್ 25ರಂದು ಬೆಂಗಳೂರಿನಲ್ಲಿ ಸುಧನ್ ಸುಂದರಂ ಜೊತೆ ಶರ್ಮಿಳಾ ಎಂಗೇಜ್‌ಮೆಂಟ್ ನಡೆಯುತ್ತಿದ್ದು, ಕುಟುಂಬಸ್ಥರು ಹಾಗೂ ಚಿತ್ರರಂಗದ ಅತ್ಯಾಪ್ತ ಗೆಳೆಯರಿಗಷ್ಟೇ ಆಹ್ವಾನ ನೀಡಲಾಗಿದೆಯಂತೆ. ಇವರುಗಳ ಕಲ್ಯಾಣ ಕೂಡ ಇದೇ ವರ್ಷದಲ್ಲಿ ನಡೆಯಲಿದ್ದು, ಆ ಬಗ್ಗೆ ಸದ್ಯದಲ್ಲೇ ಖುದ್ದು ಶರ್ಮಿಳಾ ಮಾಂಡ್ರೆ ಅವರೇ ಮಾಹಿತಿ ನೀಡಲಿದ್ದಾರಂತೆ.

ಬೀರಗಾನಹಳ್ಳಿ ಲಕ್ಷ್ಮೀನಾರಾಯಣ್, ಫಿಲ್ಮ್ ಬ್ಯೂರೋ ಹೆಡ್, ಗ್ಯಾರಂಟಿ ನ್ಯೂಸ್