ಸಾಮಾನ್ಯವಾಗಿ ಮನೆ ಊಟ ಬೇಜಾರಾದ್ರೆ, ಏನಾದರೂ ವಿಭಿನ್ನವಾಗಿ ತಿನ್ನಬೇಕೆನಿಸಿದರೆ, ಅಡುಗೆ ಮಾಡಲು ಸಮಯವಿಲ್ಲದಿದ್ದರೆ ಆನ್ಲೈನ್ ಫುಡ್ ಮೊರೆ ಹೋಗುತ್ತೇವೆ. ಅಂದರೆ ಆದಷ್ಟು ಫಾಸ್ಟ್ ಫುಡ್ ಸೇವಿಸುತ್ತೇವೆ. ಆದರೆ ಇಂತಹ ಸೇವೆಗಳ ಬಗ್ಗೆ ಕೆಲವೊಮ್ಮೆ ಕೇಳಿಬರುವ ಘಟನೆಗಳು ಗ್ರಾಹಕರಲ್ಲಿ ಆತಂಕ ಉಂಟುಮಾಡುತ್ತವೆ. ಏಕೆಂದರೆ ಆನ್ಲೈನ್ ಆಹಾರ ಪೂರೈಕೆ ಪ್ಲಾಟ್ಫಾರ್ಮ್ ಝೋಮ್ಯಾಟೋದಲ್ಲಿ ಬಿರಿಯಾನಿ ಆರ್ಡರ್ ಮಾಡಿದ ಗ್ರಾಹಕನೊಬ್ಬನಿಗೆ ಶಾಕಿಂಗ್ ಅನುಭವವಾಗಿದೆ.
ಝೋಮ್ಯಾಟೋನಲ್ಲಿ ಆರ್ಡರ್ ಮಾಡಿದ ಬಿರಿಯಾನಿಯಲ್ಲಿ ನಾಯಿಯ ಕಾಲನ್ನು ಹೋಲುವ ಮಾಂಸದ ತುಂಡು ಸಿಕ್ಕಿದೆ ಎಂದು ಗ್ರಾಹಕನೊಬ್ಬ ಆರೋಪಿಸಿದ್ದು, ಈ ಕುರಿತು ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ವಿಡಿಯೋ ಕಂಡು ಅನೇಕರು ಆತಂಕ ವ್ಯಕ್ತಪಡಿಸಿದ್ದಾರೆ.
ವೈರಲ್ ಆಗಿರುವ ವಿಡಿಯೋದಲ್ಲಿ ವ್ಯಕ್ತಿಯೊಬ್ಬ ಬಿರಿಯಾನಿಯೊಳಗೆ ಸಿಕ್ಕಿದ ಮಾಂಸದ ತುಂಡನ್ನು ಕೈಯಲ್ಲಿ ಹಿಡಿದು ತೋರಿಸುತ್ತಾರೆ. ಅದು ಕೋಳಿ ಅಥವಾ ಕುರಿಯ ಕಾಲುಗಳಂತೆ ಕಾಣುವುದಿಲ್ಲ, ಬದಲಾಗಿ ನಾಯಿಯ ಕಾಲಿನಂತಿದೆ ಎಂದು ಅವರು ಹೇಳಿಕೊಂಡಿದ್ದಾರೆ. ಈ ವಿಡಿಯೋವನ್ನು @wosgnn ಎಂಬ ಎಕ್ಸ್ (ಟ್ವಿಟ್ಟರ್) ಖಾತೆಯಿಂದ ಹಂಚಿಕೊಳ್ಳಲಾಗಿದ್ದು, ಕೆಲವೇ ಗಂಟೆಗಳಲ್ಲಿ ಸಾವಿರಾರು ಜನರ ಗಮನ ಸೆಳೆದಿದೆ.
ಈ ವಿಡಿಯೋ ವೈರಲ್ ಆದ ನಂತರ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಆರಂಭವಾಗಿದೆ. ಕೆಲವರು ಈ ಘಟನೆ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದು, ಆನ್ಲೈನ್ ಮೂಲಕ ಆಹಾರ ಆರ್ಡರ್ ಮಾಡುವಾಗ ಹೆಚ್ಚು ಎಚ್ಚರಿಕೆಯಿಂದ ಇರಬೇಕು ಎಂದು ಹೇಳಿದ್ದಾರೆ. ಇನ್ನೂ ಕೆಲವರು ಈ ವಿಚಾರವನ್ನು ಹಾಸ್ಯವಾಗಿ ತೆಗೆದುಕೊಂಡು “ಡಾಗ್ ಬಿರಿಯಾನಿ”, “ಬೌ ಬೌ ಬಿರಿಯಾನಿ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ.
Wow ! Delicious 😋 Dog Biryani 🤡 pic.twitter.com/ExnDWsy6uD
— void (@wosgnn) March 12, 2026
ಆದರೆ ಅನೇಕ ನೆಟ್ಟಿಗರು ಈ ಆರೋಪದ ಬಗ್ಗೆ ಅನುಮಾನವೂ ವ್ಯಕ್ತಪಡಿಸಿದ್ದಾರೆ. ವಿಡಿಯೋದಲ್ಲಿ ಕಾಣಿಸುವಂತೆ, ವ್ಯಕ್ತಿ ಈಗಾಗಲೇ ಬಿರಿಯಾನಿಯ ಬಹುಪಾಲು ತಿಂದ ನಂತರ ಈ ಮಾಂಸದ ತುಂಡು ಕಂಡುಬಂದಂತೆ ಕಾಣುತ್ತಿದೆ ಎಂದು ಕೆಲವರು ಸೂಚಿಸಿದ್ದಾರೆ. ಆದ್ದರಿಂದ ಇದು ನಿಜವಾಗಿಯೂ ನಾಯಿಯ ಕಾಲೇನಾ ಅಥವಾ ಬೇರೆ ಯಾವ ಪ್ರಾಣಿಯ ಭಾಗವೋ ಎಂಬುದನ್ನು ದೃಢಪಡಿಸಲು ವೈಜ್ಞಾನಿಕ ಪರೀಕ್ಷೆ ಅಗತ್ಯವಿದೆ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ.
ಮತ್ತೊಬ್ಬರು ಕಾಮೆಂಟ್ ಮಾಡುತ್ತಾ, ಈ ಘಟನೆಗೆ ಆನ್ಲೈನ್ ಪ್ಲಾಟ್ಫಾರ್ಮ್ ಅನ್ನು ನೇರವಾಗಿ ದೋಷಾರೋಪಣೆ ಮಾಡುವುದಕ್ಕಿಂತ, ಆಹಾರ ಯಾವ ಹೋಟೆಲ್ನಿಂದ ಆರ್ಡರ್ ಮಾಡಲಾಗಿದೆ ಎಂಬುದನ್ನು ಸ್ಪಷ್ಟಪಡಿಸಬೇಕು ಎಂದು ಹೇಳಿದ್ದಾರೆ.
ಇದರ ನಡುವೆ, ಈ ಘಟನೆ ಕುರಿತು ಇನ್ನೂ ಝೋಮ್ಯಾಟೋ ಸಂಸ್ಥೆಯಿಂದ ಅಧಿಕೃತ ಪ್ರತಿಕ್ರಿಯೆ ಬಂದಿಲ್ಲ. ಸಾಮಾನ್ಯವಾಗಿ ಇಂತಹ ಪ್ರಕರಣಗಳಲ್ಲಿ ಆಹಾರದ ಮಾದರಿಯನ್ನು ಪ್ರಯೋಗಾಲಯಕ್ಕೆ ಕಳುಹಿಸಿ ಪರಿಶೀಲಿಸುವ ಮೂಲಕ ಮಾತ್ರ ನಿಜಾಸ್ಥಿತಿ ತಿಳಿದುಬರುತ್ತದೆ ಎಂದು ತಜ್ಞರು ಹೇಳುತ್ತಾರೆ.
