ನವದೆಹಲಿ: ಭದ್ರತಾ ವೈಫಲ್ಯ ಮತ್ತು ಆಂತರಿಕ ಬಿಕ್ಕಟ್ಟುಗಳಿಂದ ಜರ್ಜರಿತವಾಗಿರುವ ಪಾಕಿಸ್ತಾನ, ಈಗ ತನ್ನ ಜಾಗತಿಕ ವೇದಿಕೆಗಳಲ್ಲಿ ಹೊಸದೊಂದು ರಾಜತಾಂತ್ರಿಕ ದಾಳ ಉರುಳಿಸಿದೆ. ಅಫ್ಘಾನಿಸ್ತಾನದ ತಾಲಿಬಾನ್ ಆಡಳಿತವು ತನ್ನ ವಿರುದ್ಧ ನಡೆಸುತ್ತಿರುವ ದಾಳಿಗಳ ಹಿಂದೆ ಭಾರತ ಮತ್ತು ಇಸ್ರೇಲ್ ದೇಶಗಳ ಕೈವಾಡವಿದೆ ಎಂದು ಇಸ್ಲಾಮಾಬಾದ್ ಅತ್ಯಂತ ಗಂಭೀರ ಆರೋಪ ಮಾಡಿದೆ.
ಇಸ್ರೇಲ್-ಭಾರತದ ಜಂಟಿ ತಂತ್ರ: ಪಾಕ್ ಆತಂಕ
ಇತ್ತೀಚೆಗಷ್ಟೇ ಮಧ್ಯಪ್ರಾಚ್ಯದಲ್ಲಿ ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆಯ ಸಂದರ್ಭದಲ್ಲಿ ಪಾಕಿಸ್ತಾನವು ಇರಾನ್ ಪರವಾಗಿ ರಾಜತಾಂತ್ರಿಕ ವಕಾಲತ್ತು ವಹಿಸಿತ್ತು. ಆದರೆ, ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇಸ್ಲಾಮಾಬಾದ್ನ ನಿಲುವನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿ ತನ್ನ ಕಾರ್ಯಾಚರಣೆ ಮುಂದುವರಿಸಿದ್ದವು. ಅಂದಿನಿಂದ ಇಸ್ರೇಲ್ನ ಕೆಂಗಣ್ಣಿಗೆ ಗುರಿಯಾಗಿರುವ ಪಾಕಿಸ್ತಾನಕ್ಕೆ, ಈಗ ಭಾರತ ಮತ್ತು ಇಸ್ರೇಲ್ ಜಂಟಿಯಾಗಿ ತನ್ನನ್ನು ಗುರಿ ಮಾಡುತ್ತಿವೆ ಎಂಬ ಭೀತಿ ಕಾಡತೊಡಗಿದೆ.
‘ತಾಲಿಬಾನ್ ಗೆ ಆಯುಧ ಪೂರೈಕೆ’ ಆಧಾರರಹಿತ ಆರೋಪ
ಪಾಕಿಸ್ತಾನ ರಕ್ಷಣಾ ಸಚಿವಾಲಯದ ಮೂಲಗಳ ಪ್ರಕಾರ, “ಭಾರತ ಮತ್ತು ಇಸ್ರೇಲ್ ದೇಶಗಳು ತಾಲಿಬಾನ್ ಪಡೆಗಳಿಗೆ ಅತ್ಯಾಧುನಿಕ ಆಯುಧ ಹಾಗೂ ಹಣಕಾಸಿನ ನೆರವು ನೀಡುತ್ತಿದ್ದು, ಪಾಕಿಸ್ತಾನದ ವಿರುದ್ಧ ಪರೋಕ್ಷ ಯುದ್ಧ (Proxy War) ಸಾರಲು ಪ್ರೇರೇಪಿಸುತ್ತಿವೆ” ಎಂದು ಆರೋಪಿಸಲಾಗಿದೆ. ಆದರೆ, ಈ ಆರೋಪಗಳಿಗೆ ಪಾಕಿಸ್ತಾನ ಯಾವುದೇ ಅಧಿಕೃತ ಸಾಕ್ಷ್ಯಗಳನ್ನು ಜಾಗತಿಕ ಸಮುದಾಯದ ಮುಂದೆ ಇಟ್ಟಿಲ್ಲ. ರಕ್ಷಣಾ ವಿಶ್ಲೇಷಕರ ಪ್ರಕಾರ, ಭಾರತದಂತಹ ಪ್ರಜಾಪ್ರಭುತ್ವ ರಾಷ್ಟ್ರವು ಉಗ್ರಗಾಮಿ ಹಿನ್ನೆಲೆಯ ತಾಲಿಬಾನ್ಗೆ ಆಯುಧ ನೀಡುವುದು ಅಸಾಧ್ಯದ ಮಾತು. ಪಾಕಿಸ್ತಾನವು ಜಾಗತಿಕವಾಗಿ ಅನುಕಂಪ ಗಿಟ್ಟಿಸಿಕೊಳ್ಳಲು ಇಂತಹ ಹತಾಶ ಆರೋಪ ಮಾಡುತ್ತಿದೆ ಎನ್ನಲಾಗಿದೆ.
ಮಿತ್ರರಾಗಿದ್ದವರೇ ಈಗ ಶತ್ರುಗಳು: ಪಾಕ್-ತಾಲಿಬಾನ್ ಸಂಘರ್ಷ
1990ರ ದಶಕದಲ್ಲಿ ತಾಲಿಬಾನ್ ಸಂಘಟನೆ ಜನ್ಮತಾಳಿದಾಗಿನಿಂದಲೂ ಅದಕ್ಕೆ ಪಾಕಿಸ್ತಾನದ ಮಿಲಿಟರಿ ಮತ್ತು ಐಎಸ್ಐ (ISI) ಬೆಂಬಲವಿತ್ತು ಎಂಬುದು ಬಹಿರಂಗ ಸತ್ಯ. ಭಾರತದ ವಿರುದ್ಧ ದಾಳಿ ನಡೆಸಲು ಪಾಕಿಸ್ತಾನ ಹಲವು ದಶಕಗಳ ಕಾಲ ಇವರನ್ನು ಬಳಸಿಕೊಂಡಿತ್ತು. ಆದರೆ, ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಪೂರ್ಣ ಪ್ರಮಾಣದ ಅಧಿಕಾರಕ್ಕೆ ಬಂದ ನಂತರ ಪರಿಸ್ಥಿತಿ ತಲೆಕೆಳಗಾಗಿದೆ. ಡ್ಯೂರಾಂಡ್ ಲೈನ್ (ಗಡಿ ರೇಖೆ) ವಿವಾದ ಹಾಗೂ ಟಿಟಿಪಿ (TTP) ಉಗ್ರರ ವಿಷಯದಲ್ಲಿ ಪಾಕ್ ಸೇನೆ ಮತ್ತು ತಾಲಿಬಾನ್ ನಡುವೆ ಈಗ ‘ಎಣ್ಣೆ-ಸೀಗೇಕಾಯಿ’ ಸಂಬಂಧ ಏರ್ಪಟ್ಟಿದೆ. ಇತ್ತೀಚಿನ ದಿನಗಳಲ್ಲಿ ಉಭಯ ದೇಶಗಳ ಗಡಿಯಲ್ಲಿ ಭೀಕರ ವೈಮಾನಿಕ ದಾಳಿ ಮತ್ತು ಗುಂಡಿನ ಚಕಮಕಿಗಳು ನಡೆಯುತ್ತಿದ್ದು, ಪಾಕ್ ಸೇನೆಗೆ ತಾಲಿಬಾನ್ ಪಡೆಗಳು ಭಾರಿ ತಿರುಗೇಟು ನೀಡುತ್ತಿವೆ.
ಭಾರತ ಮತ್ತು ಇಸ್ರೇಲ್ ಮೌನ
ತನ್ನದೇ ಕೃತ್ಯಗಳಿಂದ ಸೃಷ್ಟಿಯಾದ ತಾಲಿಬಾನ್ ಇಂದು ತನಗೆ ಭಸ್ಮಾಸುರನಾಗಿ ಕಾಡುತ್ತಿರುವುದನ್ನು ಮುಚ್ಚಿಡಲು ಪಾಕಿಸ್ತಾನ ಎಂದಿನಂತೆ ಭಾರತದ ಕಡೆಗೆ ಬೆರಳು ತೋರಿಸುತ್ತಿದೆ. ಪಾಕಿಸ್ತಾನದ ಇಂತಹ ಆಧಾರರಹಿತ ಮತ್ತು ನಿರಂತರ ಆರೋಪಗಳಿಗೆ ಭಾರತ ಹಾಗೂ ಇಸ್ರೇಲ್ ದೇಶಗಳು ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಭಾರತವು ಇಂತಹ ರಾಜತಾಂತ್ರಿಕ ಹೇಳಿಕೆಗಳನ್ನು ನಿರ್ಲಕ್ಷಿಸುವ ಮೂಲಕ ತನ್ನ ತಟಸ್ಥ ನಿಲುವನ್ನು ಮುಂದುವರಿಸಿದೆ.
