ನವದೆಹಲಿ, ಆಗಸ್ಟ್ 04: ಯುಪಿಐ (UPI) ಮೂಲಕ ಡಿಜಿಟಲ್ ಪಾವತಿಗಳು ವೇಗವಾಗಿ ಹೆಚ್ಚುತ್ತಿರುವ ಹಿನ್ನೆಲೆ ಬಳಕೆದಾರರು ತಮ್ಮ ದೈನಂದಿನ ಖರ್ಚಿನ ಲೆಕ್ಕ ಇಟ್ಟುಕೊಳ್ಳಲು ನೆರವಾಗುವ ಹೊಸ ಎಐ (AI) ಆಧಾರಿತ ವೈಶಿಷ್ಟ್ಯವನ್ನು ಗೂಗಲ್ (Google) ಪರಿಚಯಿಸಿದೆ. ಭಾರತದಲ್ಲಿನ Google Pay ಬಳಕೆದಾರರಿಗಾಗಿ ‘Ask Google Pay’ ಎಂಬ ಹೊಸ ಫೀಚರ್ ಬಿಡುಗಡೆ ಮಾಡಲಾಗಿದ್ದು, ಇದು ವೈಯಕ್ತಿಕ ಹಣಕಾಸು ನಿರ್ವಹಣೆಯನ್ನು ಇನ್ನಷ್ಟು ಸುಲಭಗೊಳಿಸುವ ಗುರಿ ಹೊಂದಿದೆ.
ಯಾವ ಸಮಸ್ಯೆಗೆ ಪರಿಹಾರ?
ಪ್ರತಿದಿನ ನಡೆಯುವ ಸಣ್ಣ-ಪುಟ್ಟ ಯುಪಿಐ ವಹಿವಾಟುಗಳು ತಿಂಗಳ ಕೊನೆಯಲ್ಲಿ ದೊಡ್ಡ ಮೊತ್ತವಾಗಿ ಪರಿಣಮಿಸುವುದು ಸಾಮಾನ್ಯ. ಇಂತಹ ಸಂದರ್ಭದಲ್ಲಿ ಹಣ ಎಲ್ಲಿಗೆ ಖರ್ಚಾಯಿತು ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಹಲವರಿಗೆ ಸವಾಲಾಗುತ್ತದೆ. ಒಂದು ಕಪ್ ಚಹಾ, ಸ್ವಲ್ಪ ತಿಂಡಿ, ಜ್ಯೂಸ್, ಪೆಟ್ರೋಲ್ – ಇಂತಹ ದೈನಂದಿನ ಸಣ್ಣ ವಹಿವಾಟುಗಳು ಸೇರಿ ತಿಂಗಳಾಂತ್ಯಕ್ಕೆ ಸಾವಿರಾರು ರೂಪಾಯಿಗಳಾಗುತ್ತವೆ. ಇದೇ ಸಮಸ್ಯೆಗೆ ಪರಿಹಾರವಾಗಿ ಗೂಗಲ್ ತನ್ನ ಜೆಮಿನಿ (Gemini) ಕೃತಕ ಬುದ್ಧಿಮತ್ತೆ ಮಾದರಿಯ ನೆರವಿನಿಂದ ‘Ask Google Pay’ ಅನ್ನು ಅಭಿವೃದ್ಧಿಪಡಿಸಿದೆ.
ಹೇಗೆ ಕೆಲಸ ಮಾಡುತ್ತದೆ?
ಈ ಫೀಚರ್ ಬಳಕೆದಾರರ ವಹಿವಾಟಿನ ಮಾದರಿಯನ್ನು ವಿಶ್ಲೇಷಿಸಿ, ಹಣ ಎಲ್ಲಿ ಹೆಚ್ಚು ಖರ್ಚಾಗುತ್ತಿದೆ, ಉಳಿತಾಯವನ್ನು ಹೇಗೆ ಹೆಚ್ಚಿಸಬಹುದು ಎಂಬುದರ ಬಗ್ಗೆ ವೈಯಕ್ತಿಕ ಸಲಹೆಗಳನ್ನು ನೀಡುತ್ತದೆ. ಅಲ್ಲದೆ ಪ್ರವಾಸ, ಶಾಪಿಂಗ್ ಅಥವಾ ಇತರ ಖರ್ಚುಗಳಿಗೆ ಸೂಕ್ತವಾದ ಕ್ರೆಡಿಟ್ ಕಾರ್ಡ್‌‌ಗಳ ಕುರಿತು ಮಾಹಿತಿ ನೀಡುವುದರ ಜೊತೆಗೆ, SIP, ಕ್ರೆಡಿಟ್ ಸ್ಕೋರ್, ಚಕ್ರಬಡ್ಡಿ ಹಾಗೂ ವಿವಿಧ ತೆರಿಗೆ ಪದ್ಧತಿಗಳಂತಹ ಹಣಕಾಸು ವಿಷಯಗಳ ಬಗ್ಗೆಯೂ ಪ್ರಶ್ನೆಗಳಿಗೆ ಉತ್ತರ ನೀಡುತ್ತದೆ.
ಬಳಕೆದಾರರು ಪಠ್ಯ ಅಥವಾ ಧ್ವನಿ ಮೂಲಕ ತಮ್ಮ ಪ್ರಶ್ನೆಗಳನ್ನು ಕೇಳಬಹುದು. ಪ್ರಶ್ನೆಗೆ ಉತ್ತರ ನೀಡುವ ವೇಳೆ Google Pay ಬಳಕೆದಾರರ ವಹಿವಾಟಿನ ಇತಿಹಾಸ ಹಾಗೂ CIBIL ವರದಿಯ ಮಾಹಿತಿಯನ್ನು ಬಳಸಿಕೊಂಡು ವೈಯಕ್ತಿಕ ಸಲಹೆಗಳನ್ನು ನೀಡಲಿದೆ. ಉದಾಹರಣೆಗೆ, “ನಾನು ಕಳೆದ ತಿಂಗಳು ಫುಡ್ ಡೆಲಿವರಿಗೆ ಎಷ್ಟು ಖರ್ಚು ಮಾಡಿದ್ದೇನೆ?” ಅಥವಾ “ನನ್ನ ಉಳಿತಾಯವನ್ನು ಹೇಗೆ ಹೆಚ್ಚಿಸಬಹುದು?” ಎಂಬ ಪ್ರಶ್ನೆಗಳಿಗೆ ಇದು ತಕ್ಷಣ ಉತ್ತರಿಸುತ್ತದೆ.
ಸಕ್ರಿಯಗೊಳಿಸುವುದು ಹೇಗೆ?
ಈ ಸೇವೆ ಸ್ವಯಂಚಾಲಿತವಾಗಿ ಕಾರ್ಯನಿರ್ವಹಿಸುವುದಿಲ್ಲ. ‘Personalisation within Google Pay’ ಎಂಬ ಆಯ್ಕೆಯನ್ನು ಬಳಕೆದಾರರು ಸ್ವತಃ ಸಕ್ರಿಯಗೊಳಿಸಬೇಕು. ಈ ಆಯ್ಕೆ ಡೀಫಾಲ್ಟ್ ಆಗಿ ಆಫ್ ಆಗಿರುತ್ತದೆ. Google Pay ಅಪ್ಲಿಕೇಶನ್‌ನ ಸೆಟ್ಟಿಂಗ್‌ಗಳಲ್ಲಿ ‘Privacy & Security’ ವಿಭಾಗದ ‘Data and Personalisation’ ಆಯ್ಕೆಗೆ ಹೋಗಿ ಈ ಸೌಲಭ್ಯಗಳನ್ನು ಆನ್ ಮಾಡಿದ ತಕ್ಷಣವೇ ‘Ask Google Pay’ ಬಳಸಲು ಸಾಧ್ಯವಾಗುತ್ತದೆ.
ಈ ವೈಶಿಷ್ಟ್ಯವನ್ನು ಬಳಸಲು ಮೊದಲು Personalisation ಅನ್ನು ಸಕ್ರಿಯಗೊಳಿಸಿ, ಬಳಿಕ Google Pay ಹೋಮ್ ಸ್ಕ್ರೀನ್‌ನ ‘Money’ ವಿಭಾಗಕ್ಕೆ ತೆರಳಿ ‘Ask About Your Finances’ ವಿಭಾಗದಲ್ಲಿರುವ ‘Ask a Question’ ಆಯ್ಕೆಯನ್ನು ಬಳಸಬಹುದು. ಗೂಗಲ್ ತನ್ನ ಬಳಕೆದಾರರ ಡೇಟಾ ಗೌಪ್ಯತೆಗೆ (Privacy) ಆದ್ಯತೆ ನೀಡಿದ್ದು, ಎಲ್ಲಾ ಡೇಟಾ ಎನ್ಕ್ರಿಪ್ಟ್ ಆಗಿರುತ್ತದೆ.
Flex by Google Pay – ಹೊಸ ಕ್ರೆಡಿಟ್ ಕಾರ್ಡ್
ಇದರ ಜೊತೆಗೆ ಗೂಗಲ್ ತನ್ನ Flex by Google Pay ಸೇವೆಯನ್ನೂ ವಿಸ್ತರಿಸಿದೆ. SBI ಸಹಯೋಗದಲ್ಲಿ ಹೊಸ Google Pay Flex SBI Card ಪರಿಚಯಿಸಲಾಗಿದ್ದು, ಈ ಕಾರ್ಡ್ ಅನ್ನು RuPay ಹಾಗೂ VISA ಎರಡೂ ನೆಟ್ವರ್ಕ್ ಗಳಲ್ಲಿ ಬಳಸಬಹುದಾಗಿದೆ. ಈ ಕಾರ್ಡ್ ಬಳಕೆದಾರರಿಗೆ ಪ್ರತಿಯೊಂದು Flex ವಹಿವಾಟಿನಲ್ಲೂ ‘Stars’ ರೂಪದಲ್ಲಿ ಬಹುಮಾನ ದೊರೆಯಲಿದ್ದು, ಒಂದು ಸ್ಟಾರ್ಗೆ ಒಂದು ರೂಪಾಯಿ ಮೌಲ್ಯ ಇರಲಿದೆ. ಕ್ರೆಡಿಟ್ ಕಾರ್ಡ್ ಬಾಕಿಯನ್ನು ಸುಲಭ ಕಂತುಗಳಾಗಿ (EMI) ಪರಿವರ್ತಿಸುವ ಅವಕಾಶವೂ ಇದರಲ್ಲಿ ಲಭ್ಯವಿದೆ.
ವಿಶೇಷ ರಿಯಾಯಿತಿಗಳು
Flex ಕಾರ್ಡ್ ಬಳಕೆದಾರರಿಗೆ ಒಂದು ವರ್ಷದವರೆಗೆ Google AI Plus ಚಂದಾದಾರಿಕೆಯಲ್ಲಿ 50 ಶೇಕಡಾ ರಿಯಾಯಿತಿ ನೀಡಲಾಗುತ್ತದೆ. ಅಲ್ಲದೆ, ದೈನಂದಿನ ಖರೀದಿಗಳ ಮೇಲೆ ಹೆಚ್ಚುವರಿ ರಿವಾರ್ಡ್ಗಳು ಹಾಗೂ Google Pixel ಸ್ಮಾರ್ಟ್ಫೋನ್‌ಗಳ ಖರೀದಿಗೂ ವಿಶೇಷ ರಿಯಾಯಿತಿಗಳು ದೊರೆಯಲಿವೆ.
ಯಾರಿಗೆ ಉಪಯೋಗ?
ಈ ಫೀಚರ್ ವಿಶೇಷವಾಗಿ ತಮ್ಮ ದೈನಂದಿನ ಖರ್ಚಿನ ಮೇಲೆ ನಿಗಾ ಇಡಲು ಬಯಸುವ ಯುವಜನರು, ಉದ್ಯೋಗಿಗಳು ಮತ್ತು ಉದ್ಯಮಿಗಳಿಗೆ ಉಪಯುಕ್ತವಾಗಿದೆ. ಯುಪಿಐ ವಹಿವಾಟುಗಳು ಪ್ರತಿದಿನ ಹೆಚ್ಚುತ್ತಿರುವ ಕಾರಣ, ಖರ್ಚಿನ ಮಾದರಿ ಅರ್ಥಮಾಡಿಕೊಳ್ಳಲು ಇದು ಸಹಾಯಕವಾಗಿದೆ. ಬಜೆಟ್ ಯೋಜನೆ, ಉಳಿತಾಯ ಗುರಿಗಳು ಮತ್ತು ಹಣಕಾಸು ನಿರ್ಧಾರಗಳಿಗೆ ಇದು ಮಾರ್ಗದರ್ಶನ ನೀಡುತ್ತದೆ.
