ಇಂದಿನ ಆಧುನಿಕ ಯುಗದಲ್ಲಿ ಕೃತಕ ಬುದ್ಧಿಮತ್ತೆ (AI) ಜಗತ್ತನ್ನೇ ಆಳುತ್ತಿದೆ. ವಿಶೇಷವಾಗಿ ಐಟಿ-ಬಿಟಿ ವಲಯದಲ್ಲಿ ಎಐ ತನ್ನದೇ ಆದ ಛಾಪನ್ನು ಮೂಡಿಸಿದೆ. ಮನುಷ್ಯನ ದೈನಂದಿನ ಬದುಕಿನಲ್ಲಿ ಎಐ ಎಷ್ಟು ಪ್ರಭಾವ ಬೀರಿದೆ ಎಂದರೆ, ಎಐ ಸಹಾಯವಿಲ್ಲದೆ ಕೆಲಸ ನಿರ್ವಹಿಸುವುದು ಅಸಾಧ್ಯ ಎನ್ನುವಷ್ಟರ ಮಟ್ಟಿಗೆ ತಂತ್ರಜ್ಞಾನ ಬೆಳೆದಿದೆ.
ಬೀದಿಗೆ ಬಂತು ಸಾವಿರಾರು ಉದ್ಯೋಗಿಗಳ ಬದುಕು
ಇತ್ತೀಚಿನ ವರದಿಗಳ ಪ್ರಕಾರ, ಎಐ ತಂತ್ರಜ್ಞಾನವು ಐಟಿ-ಬಿಟಿ ಕ್ಷೇತ್ರದಲ್ಲಿ ವ್ಯಾಪಕವಾಗಿ ಬಳಕೆಯಾಗುತ್ತಿರುವುದರಿಂದ ಸಾವಿರಾರು ಜನರು ಉದ್ಯೋಗ ಕಳೆದುಕೊಳ್ಳುವ ಭೀತಿ ಎದುರಿಸುತ್ತಿದ್ದಾರೆ. ಸಾಫ್ಟ್ವೇರ್ ಕಂಪನಿಗಳು ಎಐ ಮೇಲೆ ಅತಿಯಾಗಿ ಅವಲಂಬಿತವಾಗುತ್ತಿವೆ. ನೂರು ಜನ ಮಾಡಬೇಕಾದ ಕೆಲಸವನ್ನು ಎಐ ಅತ್ಯಂತ ಕಡಿಮೆ ಸಮಯದಲ್ಲಿ, ಕೆಲವೇ ಮಂದಿ ಸಿಬ್ಬಂದಿಯ ಸಹಾಯದೊಂದಿಗೆ ಮಾಡಿ ಮುಗಿಸುತ್ತಿದೆ. ಪ್ರಮುಖವಾಗಿ ಚಾಟ್ ಜಿಪಿಟಿ (ChatGPT), ಜೆಮಿನಿ (Gemini) ಮತ್ತು ಆಂಥ್ರೋಪಿಕ್ ಸಂಸ್ಥೆಯ ಕ್ಲೋಡ್ (Claude/Mythos) ನಂತಹ ಎಐ ಸಾಧನಗಳು ಮನುಷ್ಯನ ಕೆಲಸದ ವೇಗವನ್ನು ಮೀರಿಸುತ್ತಿವೆ. ಇದರಿಂದಾಗಿ ಉದ್ಯೋಗ ಮಾರುಕಟ್ಟೆಯಲ್ಲಿ ದೊಡ್ಡ ಮಟ್ಟದ ಪಲ್ಲಟ ಉಂಟಾಗಿದ್ದು, ನೂರಾರು ಕುಟುಂಬಗಳು ಆತಂಕಕ್ಕೆ ಒಳಗಾಗಿವೆ.
ಸೈಬರ್ ಸೆಲ್ಗೆ ಸವಾಲಾದ ಅತ್ಯಾಧುನಿಕ ಎಐ ತಂತ್ರಜ್ಞಾನ
ಹೀಗಿರುವಾಗಲೇ, ಅಮೆರಿಕಾ ಸೇರಿದಂತೆ ಭಾರತ ಹಾಗೂ ಇತರ ದೇಶಗಳನ್ನು ಆತಂಕಕ್ಕೆ ತಳ್ಳಿರುವ ಮತ್ತೊಂದು ವಿಷಯವೆಂದರೆ ಎಐನ ದುರ್ಬಳಕೆ. ಇದರಲ್ಲಿ ‘ಕ್ಲೋಡ್’ (Claude/Mythos) ತಂತ್ರಜ್ಞಾನದ ಅತಿಮಾನುಷ ಸಾಮರ್ಥ್ಯದ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ. ಈ ಎಐ ಮಾದರಿಗಳು ಎಷ್ಟು ಶಕ್ತಿಶಾಲಿಯಾಗಿವೆ ಎಂದರೆ, ಇವುಗಳನ್ನು ತಪ್ಪಾಗಿ ಬಳಸಿದರೆ ದೇಶದ ಭದ್ರತೆಗೂ ಧಕ್ಕೆ ತರಬಲ್ಲವು ಎಂಬ ಆತಂಕ ವ್ಯಕ್ತವಾಗಿದೆ.
ರಕ್ಷಣಾ ವ್ಯವಸ್ಥೆ ಮತ್ತು ಬ್ಯಾಂಕಿಂಗ್ಗೆ ಕುತ್ತು
ಈ ಅತ್ಯಾಧುನಿಕ* ಎಐ* ತಂತ್ರಜ್ಞಾನಗಳು ಸ್ವಯಂ ಚಾಲಿತವಾಗಿ ಯೋಜನೆಗಳನ್ನು ರೂಪಿಸುವ ಸಾಮರ್ಥ್ಯ ಹೊಂದಿವೆ. ಸ್ವಲ್ಪ ಯಾಮಾರಿದರೂ ದೇಶದ ರಕ್ಷಣಾ ವ್ಯವಸ್ಥೆಯ ರಹಸ್ಯಗಳು, ಸೈಬರ್ ಭದ್ರತೆ ಮತ್ತು ಬ್ಯಾಂಕ್ ಖಾತೆಗಳ ಮಾಹಿತಿಗಳನ್ನು ಹ್ಯಾಕ್ ಮಾಡುವಷ್ಟು ಬಲವನ್ನು ಇವು ಹೊಂದಿವೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. ಯಾವುದೇ ಮನುಷ್ಯನ ಹಸ್ತಕ್ಷೇಪವಿಲ್ಲದೆ ಸ್ವತಂತ್ರವಾಗಿ ಕಾರ್ಯನಿರ್ವಹಿಸುವ ಈ ಆ್ಯಪ್ಗಳು ಸೈಬರ್ ಕ್ರಿಮಿನಲ್ಗಳ ಕೈ ಸೇರಿದರೆ ಆಗುವ ಅನಾಹುತ ಅಷ್ಟಿಷ್ಟಲ್ಲ.
ಒಟ್ಟಿನಲ್ಲಿ, ಎಐ ತಂತ್ರಜ್ಞಾನವು ಮನುಷ್ಯನ ಕೆಲಸವನ್ನು ಸುಲಭಗೊಳಿಸುವ ಬದಲು, ಕೆಲಸವನ್ನೇ ಕಸಿಯುತ್ತದೆಯೇ ಎಂಬ ಆತಂಕ ಐಟಿ ಉದ್ಯೋಗಿಗಳಲ್ಲಿ ಮನೆಮಾಡಿದೆ. ತಂತ್ರಜ್ಞಾನದ ಬೆಳವಣಿಗೆಯ ಜೊತೆಜೊತೆಗೆ ಉದ್ಯೋಗ ಭದ್ರತೆ ಮತ್ತು ಸೈಬರ್ ಸುರಕ್ಷತೆಯೂ ಸರ್ಕಾರದ ಮುಂದಿರುವ ದೊಡ್ಡ ಸವಾಲಾಗಿದೆ.
