ವಡೋದರಾ ಬಿಸಿಎ ಕ್ರೀಡಾಂಗಣದಲ್ಲಿ ನಡೆದ ಮಹಿಳಾ ಪ್ರೀಮಿಯರ್ ಲೀಗ್ (WPL) 2026ರ ಫೈನಲ್ ಪಂದ್ಯ ಕ್ರಿಕೆಟ್ ಅಭಿಮಾನಿಗಳಿಗೆ ರೋಮಾಂಚಕ ಕ್ಷಣಗಳ ಜೊತೆಗೆ ದೊಡ್ಡ ವಿವಾದಕ್ಕೆ ಗುರಿಯಾಗಿದೆ. ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮಹಿಳಾ ತಂಡ ಎರಡನೇ ಬಾರಿ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದರೂ, ಪಂದ್ಯದ ಕೊನೆಯ ಓವರ್ನಲ್ಲಿ ನಡೆದ ಒಂದು ಕ್ಷಣ ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಅದೇ ರಾಧಾ ಯಾದವ್ ಹಿಟ್ ವಿಕೆಟ್ ಆಗಿದ್ದಾರಾ? ಎಂಬ ಪ್ರಶ್ನೆ ಎದ್ದಿದೆ.
ಪಂದ್ಯದ ಅಂತಿಮ ಓವರ್ನಲ್ಲಿ RCBಗೆ ಗೆಲುವಿಗಾಗಿ ಕೆಲವೇ ರನ್ಗಳು ಬೇಕಿದ್ದವು. ಶ್ರೀ ಚರಣಿ ಎಸೆದ ಓವರ್ನಲ್ಲಿ ರಾಧಾ ಯಾದವ್ ನಿರ್ಣಾಯಕ ಪಾತ್ರ ವಹಿಸಿದರು. ನಾಲ್ಕನೇ ಎಸೆತವನ್ನು ಅವರು ಎಕ್ಸ್ಟ್ರಾ ಕವರ್ ದಿಕ್ಕಿಗೆ ಜೋರಾಗಿ ಬಾರಿಸಿದ ಕ್ಷಣದಲ್ಲೇ, ವಿಕೆಟ್ ಮೇಲಿದ್ದ ಬೈಲ್ಸ್ ಉರುಳಿದ ದೃಶ್ಯ ಪ್ರಸಾರದಲ್ಲಿ ಕಾಣಿಸಿತು. ಇದನ್ನು ಗಮನಿಸಿದ ಕೆಲ ಅಭಿಮಾನಿಗಳು ಮತ್ತು ವೀಕ್ಷಕರು, “ರಾಧಾ ಯಾದವ್ ಹಿಟ್ ವಿಕೆಟ್ ಆಗಿದ್ದಾರೆ” ಎಂದು ಸಾಮಾಜಿಕ ಮಾಧ್ಯಮಗಳಲ್ಲಿ ಕಾಮೆಂಟ್ಗಳ ಸುರಿಮಳೆ ಸುರಿಸಿದರು.
ಆದರೆ ನಿಜವಾಗಿ ಏನಾಯಿತು ಎಂಬುದು ರಿಪ್ಲೇ ದೃಶ್ಯಗಳನ್ನು ಗಮನಿಸಿದಾಗ ಸ್ಪಷ್ಟವಾಗಿದೆ. ರಾಧಾ ಯಾದವ್ ಹಿಂದೆ ಸರಿದು ಶಾಟ್ ಆಡಿದ ಸಂದರ್ಭದಲ್ಲಿ, ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ವಿಕೆಟ್ ಕೀಪರ್ ಲಿಝೆಲ್ ಲೀ ಅವರ ಕೈ ಅಜಾಗರೂಕತೆಯಿಂದ ಸ್ಟಂಪ್ಗೆ ತಾಕಿತು. ಅದೇ ಸಮಯದಲ್ಲಿ ರಾಧಾ ಬ್ಯಾಟ್ ಬೀಸಿದ್ದರಿಂದ, ಎರಡೂ ಕ್ರಿಯೆಗಳು ಒಂದೇ ಕ್ಷಣದಲ್ಲಿ ನಡೆದಂತೆ ಕಾಣಿಸಿಕೊಂಡವು. ಮುಂಭಾಗದ ಕ್ಯಾಮೆರಾದಲ್ಲಿ ನೋಡಿದರೆ ಹಿಟ್ ವಿಕೆಟ್ ಆಗಿದಂತೆ ಭಾಸವಾಗುತ್ತದೆ. ಆದರೆ ಎಡಭಾಗದ ಸೈಡ್ ಆಂಗಲ್ ಕ್ಯಾಮೆರಾದಲ್ಲಿ ಲಿಝೆಲ್ ಲೀ ಅವರ ಕೈ ಸ್ಟಂಪ್ಗೆ ತಾಗುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತದೆ.
ಕ್ರಿಕೆಟ್ ನಿಯಮಗಳ ಪ್ರಕಾರ, ಬ್ಯಾಟ್ಸ್ಮನ್ ಸ್ವತಃ ಬ್ಯಾಟ್ ಅಥವಾ ದೇಹದಿಂದ ಸ್ಟಂಪ್ ಅಥವಾ ಬೈಲ್ಸ್ ಬೀಳಿಸಿದರೆ ಮಾತ್ರ ಅದನ್ನು ಹಿಟ್ ವಿಕೆಟ್ ಎಂದು ಪರಿಗಣಿಸಲಾಗುತ್ತದೆ. ಇಲ್ಲಿ ಬೈಲ್ಸ್ ಬೀಳಲು ಕಾರಣವಾದದ್ದು ಕೀಪರ್ನ ಸ್ಪರ್ಶವಾಗಿರುವುದರಿಂದ, ರಾಧಾ ಯಾದವ್ ಔಟ್ ಎಂದು ಘೋಷಿಸುವ ಪ್ರಶ್ನೆಯೇ ಇಲ್ಲ. ಅಂಪೈರ್ಗಳು ಕೂಡ ಮರುಪಂದ್ಯಗಳನ್ನು ಪರಿಶೀಲಿಸಿ ಸರಿಯಾದ ತೀರ್ಮಾನ ಕೈಗೊಂಡರು.
ರಾಧಾ ಯಾದವ್ ಬಾರಿಸಿದ ಚೆಂಡು ಬೌಂಡರಿ ದಾಟುತ್ತಿದ್ದಂತೆ RCB ಆಟಗಾರ್ತಿಯರು ಮೈದಾನಕ್ಕೆ ನುಗ್ಗಿ ಸಂಭ್ರಮಾಚರಣೆಯಲ್ಲಿ ತೊಡಗಿದರು. ಆದರೆ ಡಗೌಟ್ನಲ್ಲಿದ್ದ ಕೆಲ ಆಟಗಾರ್ತಿಯರು ಮತ್ತು ಅಭಿಮಾನಿಗಳು ಅಧಿಕೃತ ದೃಢೀಕರಣಕ್ಕಾಗಿ ಕೆಲ ಕ್ಷಣಗಳು ಕಾಯಬೇಕಾಯಿತು. ಪಂದ್ಯದ ನಂತರ ಮಾತನಾಡಿದ ಶ್ರೇಯಾಂಕ ಪಾಟೀಲ್, “ನಾವು ಗೆದ್ದಿದ್ದೇವೆ ಎಂಬ ಖಚಿತತೆ ಸಿಗುವವರೆಗೂ ಎಲ್ಲರೂ ತುಸು ಒತ್ತಡದಲ್ಲೇ ಇದ್ದೆವು” ಎಂದು ಹೇಳಿದರು. ಮುಖ್ಯ ಕೋಚ್ ಮಲೋಲನ್ ರಂಗರಾಜನ್ ಕೂಡ ಅಂಪೈರ್ಗಳ ತೀರ್ಮಾನ ಸರಿಯಾಗಿತ್ತು ಎಂದು ಸ್ಪಷ್ಟಪಡಿಸಿದರು.
ಈ ಫೈನಲ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್ ಮಹಿಳಾ ತಂಡ 203 ರನ್ಗಳ ಭಾರೀ ಗುರಿಯನ್ನು ನಿಗದಿಪಡಿಸಿತ್ತು. ಫೈನಲ್ ಪಂದ್ಯಗಳಿಗೆ ಇದು ಸಾಮಾನ್ಯವಾಗಿ ಗೆಲುವಿನ ಸ್ಕೋರ್ ಎಂದು ಪರಿಗಣಿಸಲಾಗುತ್ತದೆ. ಆದರೆ RCB ಅದನ್ನು ಸವಾಲಾಗಿ ಸ್ವೀಕರಿಸಿತು. ಆರಂಭದಲ್ಲೇ ಗ್ರೇಸ್ ಹ್ಯಾರಿಸ್ ವಿಕೆಟ್ ಕಳೆದುಕೊಂಡರೂ, ಸ್ಮೃತಿ ಮಂಧಾನ ಹಾಗೂ ವೋಲ್ ನಡುವೆ ನಡೆದ ಮಹತ್ವದ ಪಾಲುದಾರಿಕೆ ಪಂದ್ಯದ ದಿಕ್ಕನ್ನೇ ಬದಲಿಸಿತು.
ನಂತರ ರಿಚಾ ಘೋಷ್ ಹಾಗೂ ರಾಧಾ ಯಾದವ್ ಅವರ ಧೈರ್ಯವಂತ ಆಟ, ಜೊತೆಗೆ ಡೆಲ್ಲಿ ತಂಡದ ಕೆಲ ಫೀಲ್ಡಿಂಗ್ ತಪ್ಪುಗಳು, ವಿಶೇಷವಾಗಿ ಮಿನ್ನು ಮಣಿ ಕೈಬಿಟ್ಟ ಕ್ಯಾಚ್ ಪಂದ್ಯವನ್ನು RCB ಪರವಾಗಿ ತಳ್ಳಿತು. ಅಂತಿಮ ಓವರ್ನಲ್ಲಿ ರಾಧಾ ಯಾದವ್ ಬಾರಿಸಿದ ಎರಡು ಸತತ ಬೌಂಡರಿಗಳು RCBಗೆ ಐತಿಹಾಸಿಕ ಎರಡನೇ WPL ಪ್ರಶಸ್ತಿಯನ್ನು ತಂದುಕೊಟ್ಟವು. ಇದರಿಂದಾಗಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ನಾಲ್ಕನೇ ಬಾರಿ ಫೈನಲ್ನಲ್ಲಿ ರನ್ನರ್-ಅಪ್ ಆಗಿ ತೃಪ್ತಿಪಡಬೇಕಾಯಿತು.
