ಐಚಿ-ನಗೋಯಾ: ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್‌ನಲ್ಲಿ ಕರ್ನಾಟಕದ ಮೈಸೂರಿನ ಕುವರಿ ಪ್ರಣವಿ ಅರಸ್ ಭಾರತೀಯ ಕ್ರೀಡಾ ಇತಿಹಾಸದಲ್ಲಿ ಹೊಸ ಅಧ್ಯಾಯ ಬರೆದಿದ್ದಾರೆ. ಮಹಿಳಾ ವೈಯಕ್ತಿಕ ಗಾಲ್ಫ್ ಸ್ಟ್ರೋಕ್ ಪ್ಲೇ ಸ್ಪರ್ಧೆಯಲ್ಲಿ ಅದ್ಭುತ ಪ್ರದರ್ಶನ ನೀಡಿದ 23 ವರ್ಷದ ಪ್ರಣವಿ ಅರಸ್ ಚಿನ್ನದ ಪದಕ ಗೆದ್ದು, ಏಷ್ಯನ್ ಗೇಮ್ಸ್‌ನ ವೈಯಕ್ತಿಕ ಗಾಲ್ಫ್ ವಿಭಾಗದಲ್ಲಿ ಚಿನ್ನ ಗೆದ್ದ ಮೊದಲ ಭಾರತೀಯ ಮಹಿಳಾ ಗಾಲ್ಫರ್ ಎಂಬ ಐತಿಹಾಸಿಕ ದಾಖಲೆ ನಿರ್ಮಿಸಿದ್ದಾರೆ.
ನಾಲ್ಕು ದಿನಗಳ ಕಾಲ ನಡೆದ ಮಹಿಳಾ ವೈಯಕ್ತಿಕ ಗಾಲ್ಫ್ ಸ್ಪರ್ಧೆಯಲ್ಲಿ ಪ್ರಣವಿ ಒಟ್ಟು 15-ಅಂಡರ್ 265 ಸ್ಕೋರ್ ದಾಖಲಿಸಿದರು. ಅಂತಿಮ ಸುತ್ತಿನಲ್ಲಿ ಅವರು ಈವನ್-ಪಾರ್ 70 ಸ್ಕೋರ್ ಮಾಡಿದ್ದು, ಸಿಂಗಾಪುರದ ಶ್ಯಾನನ್ ಟ್ಯಾನ್ ಹಾಗೂ ಚೀನಾದ ಯಿನ್ ರುಯೋನಿಂಗ್ ಅವರನ್ನು ಒಂದು ಸ್ಟ್ರೋಕ್ ಅಂತರದಿಂದ ಹಿಂದಿಕ್ಕಿ ಚಿನ್ನದ ಪದಕ ತಮ್ಮದಾಗಿಸಿಕೊಂಡರು.
ಟ್ರಿಪಲ್ ಬೋಗಿ ಬಳಿಕ ಅದ್ಭುತ ಕಮ್‌ಬ್ಯಾಕ್
ಪ್ರಣವಿ ಅವರ ಗೆಲುವಿನ ಹಾದಿ ಅಷ್ಟು ಸುಲಭವಾಗಿರಲಿಲ್ಲ. ಮೂರನೇ ದಿನದ ಸ್ಪರ್ಧೆ ಮುಕ್ತಾಯಗೊಂಡಾಗ ಅವರು ಮೂರು ಸ್ಟ್ರೋಕ್‌ಗಳ ಮುನ್ನಡೆಯೊಂದಿಗೆ ಅಂತಿಮ ಸುತ್ತಿಗೆ ಪ್ರವೇಶಿಸಿದ್ದರು. ಆದರೆ ಅಂತಿಮ ದಿನದ ಮೂರನೇ ಹೋಲ್‌ನಲ್ಲಿ ಟ್ರಿಪಲ್ ಬೋಗಿ ದಾಖಲಾದ ಪರಿಣಾಮ ಅವರ ಮುನ್ನಡೆ ಸಂಪೂರ್ಣವಾಗಿ ಕಳೆದುಹೋಯಿತು. ಒಂದು ಹಂತದಲ್ಲಿ ಚಿನ್ನದ ಪದಕದ ಹೋರಾಟ ಮತ್ತಷ್ಟು ರೋಚಕವಾಗಿತ್ತು.
ಆದರೆ ಒತ್ತಡಕ್ಕೆ ಸಿಲುಕದೆ ಪ್ರಣವಿ ಮತ್ತೆ ಲಯಕ್ಕೆ ಮರಳಿದರು. ಅಂತಿಮ ಸುತ್ತಿನ ಉಳಿದ ಹೋಲ್‌ಗಳಲ್ಲಿ ಪ್ರಮುಖ ಬರ್ಡಿಗಳನ್ನು ದಾಖಲಿಸುವ ಮೂಲಕ ಅಗ್ರಸ್ಥಾನವನ್ನು ಮರಳಿ ಪಡೆದರು. ಅಂತಿಮವಾಗಿ 15-ಅಂಡರ್ 265 ಸ್ಕೋರ್‌ನೊಂದಿಗೆ ಸ್ಪರ್ಧೆಯನ್ನು ಮುಗಿಸಿ, ಕೇವಲ ಒಂದು ಸ್ಟ್ರೋಕ್ ಅಂತರದಲ್ಲಿ ಚಿನ್ನದ ಪದಕ ಖಚಿತಪಡಿಸಿಕೊಂಡರು.
ಅಂತಿಮ ಹೋಲ್‌ನಲ್ಲೂ ಪ್ರಣವಿ ಮೇಲೆ ಒತ್ತಡವಿತ್ತು. ಆದರೆ ನಿರ್ಣಾಯಕ ಹಂತದಲ್ಲಿ ಪಾರ್ ಉಳಿಸಿಕೊಳ್ಳುವ ಮೂಲಕ ಅವರು ತಮ್ಮ ಮುನ್ನಡೆಯನ್ನು ಕಾಯ್ದುಕೊಂಡರು. ಹೀಗಾಗಿ ಮೈಸೂರಿನ ಈ ಪ್ರತಿಭೆ ಏಷ್ಯನ್ ಕ್ರೀಡಾಕೂಟದ ಗಾಲ್ಫ್ ಅಂಗಳದಲ್ಲಿ ಭಾರತದ ಹೆಸರನ್ನು ಚಿನ್ನದ ಅಕ್ಷರಗಳಲ್ಲಿ ದಾಖಲಿಸಿದರು.
2002ರ ಬಳಿಕ ಗಾಲ್ಫ್‌ನಲ್ಲಿ ಭಾರತಕ್ಕೆ ವೈಯಕ್ತಿಕ ಚಿನ್ನ
ಪ್ರಣವಿ ಅರಸ್ ಅವರ ಈ ಸಾಧನೆ ಭಾರತೀಯ ಗಾಲ್ಫ್ ಇತಿಹಾಸದಲ್ಲೂ ವಿಶೇಷ ಸ್ಥಾನ ಪಡೆದಿದೆ. ಏಷ್ಯನ್ ಗೇಮ್ಸ್ ಗಾಲ್ಫ್‌ನಲ್ಲಿ ಭಾರತ ಕೊನೆಯ ಬಾರಿ ಪುರುಷರ ವೈಯಕ್ತಿಕ ಚಿನ್ನದ ಪದಕವನ್ನು 2002ರಲ್ಲಿ ಶಿವ ಕಪೂರ್ ಮೂಲಕ ಗೆದ್ದಿತ್ತು. ಇದೀಗ 24 ವರ್ಷಗಳ ಬಳಿಕ ಗಾಲ್ಫ್‌ನ ವೈಯಕ್ತಿಕ ವಿಭಾಗದಲ್ಲಿ ಭಾರತ ಮತ್ತೊಮ್ಮೆ ಚಿನ್ನ ಗೆದ್ದಿದ್ದು, ಈ ಬಾರಿ ಮಹಿಳಾ ವಿಭಾಗದಲ್ಲಿ ಪ್ರಣವಿ ಅರಸ್ ಇತಿಹಾಸ ನಿರ್ಮಿಸಿದ್ದಾರೆ.
ಮಹಿಳಾ ಗಾಲ್ಫ್‌ನಲ್ಲಿ ಇದಕ್ಕೂ ಮುನ್ನ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಅತ್ಯುತ್ತಮ ವೈಯಕ್ತಿಕ ಸಾಧನೆ 2023ರ ಹ್ಯಾಂಗ್‌ಝೌ ಕ್ರೀಡಾಕೂಟದಲ್ಲಿ ಅದಿತಿ ಅಶೋಕ್ ಗೆದ್ದ ಬೆಳ್ಳಿ ಪದಕವಾಗಿತ್ತು. ಇದೀಗ ಪ್ರಣವಿ ಆ ದಾಖಲೆಯನ್ನು ಮೀರಿ ಚಿನ್ನದ ಪದಕಕ್ಕೆ ಮುತ್ತಿಟ್ಟಿದ್ದಾರೆ.
ತಂಡಕ್ಕೂ ಬೆಳ್ಳಿ ಪದಕ
ಪ್ರಣವಿ ಅವರ ವೈಯಕ್ತಿಕ ಚಿನ್ನದ ಜೊತೆಗೆ ಭಾರತದ ಮಹಿಳಾ ಗಾಲ್ಫ್ ತಂಡವೂ ಏಷ್ಯನ್ ಗೇಮ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದು ಗಮನ ಸೆಳೆದಿದೆ. ಪ್ರಣವಿ ಅರಸ್, ಒಲಿಂಪಿಯನ್ ಅದಿತಿ ಅಶೋಕ್ ಮತ್ತು ದೀಕ್ಷಾ ದಾಗರ್ ಒಳಗೊಂಡ ಭಾರತೀಯ ತಂಡ 14-ಅಂಡರ್ 546 ಸ್ಕೋರ್‌ನೊಂದಿಗೆ ಎರಡನೇ ಸ್ಥಾನ ಪಡೆದಿದೆ. ಚೀನಾ 22-ಅಂಡರ್ 538 ಸ್ಕೋರ್‌ನೊಂದಿಗೆ ತಂಡದ ಚಿನ್ನ ಗೆದ್ದಿದೆ.
