ಸಂಖ್ಯಾಶಾಸ್ತ್ರದ ಪ್ರಕಾರ ಜನ್ಮಸಂಖ್ಯೆ ವ್ಯಕ್ತಿಯ ಜೀವನದ ದಿಕ್ಕು, ಚಿಂತನೆ, ನಿರ್ಧಾರ ಹಾಗೂ ದೈನಂದಿನ ಘಟನೆಗಳ ಮೇಲೆ ಪ್ರಭಾವ ಬೀರುತ್ತದೆ ಎಂಬ ನಂಬಿಕೆ ಇದೆ. ನಿಮ್ಮ ಜನ್ಮದ ದಿನಾಂಕದ ಅಂಕೆಗಳನ್ನು ಸೇರಿಸಿ ಒಂದಕ್ಕೆ ತಂದುಕೊಂಡರೆ ಅದೇ ನಿಮ್ಮ ಜನ್ಮಸಂಖ್ಯೆ. ಉದಾಹರಣೆಗೆ 15 ರಂದು ಜನಿಸಿದವರು (1+5=6) ಜನ್ಮಸಂಖ್ಯೆ 6 ಆಗಿರುತ್ತದೆ. ಈ ರೀತಿಯಾಗಿ ನಿಮ್ಮ ಜನ್ಮಸಂಖ್ಯೆಯನ್ನು ತಿಳಿದುಕೊಂಡು, ಡಿಸೆಂಬರ್ 15ರ ಸೋಮವಾರದ ದಿನ ನಿಮ್ಮ ಜೀವನದಲ್ಲಿ ಎದುರಾಗಬಹುದಾದ ಸವಾಲುಗಳು, ಅವಕಾಶಗಳು ಹಾಗೂ ಎಚ್ಚರಿಕೆಗಳ ಬಗ್ಗೆ ಇಲ್ಲಿ ವಿವರಿಸಲಾಗಿದೆ.
ಜನ್ಮಸಂಖ್ಯೆ 1
ನೀವು ಕೈಗೊಂಡಿರುವ ವೃತ್ತಿ ಅಥವಾ ವ್ಯಾಪಾರ ನಿರೀಕ್ಷಿತ ದಿಕ್ಕಿನಲ್ಲಿಯೇ ಸಾಗಲಿದೆ. ಹಣಕಾಸಿನ ಹೊಂದಾಣಿಕೆ ಸುಗಮವಾಗಿದ್ದು, ಹಿಂದಿನ ಉಳಿತಾಯದ ಮಹತ್ವ ಈ ದಿನ ನಿಮಗೆ ಸ್ಪಷ್ಟವಾಗುತ್ತದೆ. ದಾಂಪತ್ಯ ಹಾಗೂ ಪ್ರೇಮ ಸಂಬಂಧಗಳಿಗೆ ಹೆಚ್ಚಿನ ಆದ್ಯತೆ ಸಿಗಲಿದೆ. ಗ್ಯಾರೇಜ್, ವಾಹನ ಬಿಡಿಭಾಗಗಳ ವ್ಯಾಪಾರಿಗಳಿಗೆ ಲಾಭದ ಯೋಗವಿದೆ. ಆಫರ್ ಗಳ ಹೆಸರಿನಲ್ಲಿ ಗೃಹೋಪಯೋಗಿ ವಸ್ತುಗಳನ್ನು ಖರೀದಿಸುವ ಸಾಧ್ಯತೆ ಇದ್ದರೂ, ಖರ್ಚಿನ ಮೇಲೆ ನಿಯಂತ್ರಣ ಇರಲಿ.
ಜನ್ಮಸಂಖ್ಯೆ 2
ನಿಮಗೆ ಪರಿಚಿತ ಕ್ಷೇತ್ರಗಳಲ್ಲಿಯೇ ನಿರೀಕ್ಷಿತ ಫಲಿತಾಂಶ ಪಡೆಯಲು ಹೆಚ್ಚು ಶ್ರಮ ಬೇಕಾಗುತ್ತದೆ. ನಿಮ್ಮ ಸುತ್ತಮುತ್ತ ಬದಲಾವಣೆಗಳ ಸುಳಿವು ಕಾಣಿಸುತ್ತದೆ. ಹೊಸ ಕೋರ್ಸ್ ಅಥವಾ ತರಬೇತಿ ಬಗ್ಗೆ ಆಲೋಚನೆ ಮೂಡುತ್ತದೆ. ಕೆಲವರು ತೃಪ್ತಿಯಿಂದಲೇ ಮುಂದುವರೆಯಿರಿ ಎಂದು ಸಲಹೆ ನೀಡಬಹುದು. ಹತ್ತಿರದ ವ್ಯಕ್ತಿಯೊಬ್ಬರ ಆರ್ಥಿಕ ಸಮಸ್ಯೆಗಳು ನಿಮ್ಮನ್ನು ಮಾನಸಿಕವಾಗಿ ಕಾಡುವ ಸಾಧ್ಯತೆ ಇದೆ.
ಜನ್ಮಸಂಖ್ಯೆ 3
ಸಂಯಮ ಮತ್ತು ತಾಳ್ಮೆಯೇ ನಿಮ್ಮ ಶಕ್ತಿ. ಇತರರು ಕೈಬಿಟ್ಟ ಕೆಲಸವನ್ನು ನೀವು ಯಶಸ್ವಿಯಾಗಿ ಮುನ್ನಡೆಸುವಿರಿ. ವ್ಯಾಪಾರ ರಹಸ್ಯಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬೇಡಿ. ಸ್ನೇಹಿತರು ಹಾಗೂ ಕುಟುಂಬದವರೊಂದಿಗೆ ಸಂತೋಷದ ಕ್ಷಣಗಳನ್ನು ಕಳೆಯುವ ಅವಕಾಶ ದೊರೆಯಲಿದೆ. ಲೇವಾದೇವಿ ವ್ಯವಹಾರದಲ್ಲಿ ಹೊಸ ನಿಯಮಗಳು ಅಥವಾ ಬದಲಾವಣೆಗಳನ್ನು ಅಳವಡಿಸಿಕೊಳ್ಳುವ ನಿರ್ಧಾರ ಕೈಗೊಳ್ಳಬಹುದು.
ಜನ್ಮಸಂಖ್ಯೆ 4
ನಿಮ್ಮ ಹೊಣೆಗಾರಿಕೆಯ ಮಿತಿಯೊಳಗೆ ಕೆಲಸ ಮಾಡುವುದು ಉತ್ತಮ. ಅತಿಯಾಗಿ ಮಾತನಾಡುವುದು ಅಥವಾ ಸಹಾಯ ಮಾಡುವ ಉದ್ದೇಶದಲ್ಲಿ ಹೆಚ್ಚು ತೊಡಗಿಸಿಕೊಂಡರೆ ನಂತರ ಪಶ್ಚಾತ್ತಾಪ ಉಂಟಾಗಬಹುದು. ವಸ್ತ್ರಾಭರಣಗಳ ಖರೀದಿಯಿಂದ ಖರ್ಚು ಹೆಚ್ಚಾಗುತ್ತದೆ. ಕ್ರೆಡಿಟ್ ಕಾರ್ಡ್ ಬಳಕೆಯಲ್ಲಿ ಎಚ್ಚರಿಕೆ ಅಗತ್ಯ. ಉದ್ಯೋಗಸ್ಥರಿಗೆ ಹೆಚ್ಚುವರಿ ಜವಾಬ್ದಾರಿಗಳು ಬರಬಹುದು.
ಜನ್ಮಸಂಖ್ಯೆ 5
ಪ್ರಯಾಣ ಹಾಗೂ ಕೆಲಸದ ಒತ್ತಡದಿಂದ ದಣಿವು ಕಾಡುತ್ತದೆ. ಸಂಬಂಧಿಗಳ ಮಾತುಗಳು ಅಥವಾ ಹಣಕಾಸಿನ ವಿಚಾರದಲ್ಲಿ ಸಂಗಾತಿಯ ನಿರ್ಧಾರ ಸಿಟ್ಟನ್ನುಂಟು ಮಾಡಬಹುದು. ಅನಿವಾರ್ಯವಲ್ಲದ ಕೆಲಸಗಳನ್ನು ಮುಂದೂಡುವುದು ಉತ್ತಮ. ಶಿಕ್ಷಣ ಸಂಸ್ಥೆ, ಡೇ ಕೇರ್ ನಡೆಸುವವರಿಗೆ ಹೊಸ ಹೂಡಿಕೆಯ ಸಂದರ್ಭ ಎದುರಾಗಬಹುದು. ಭೂಮಿಗೆ ಸಂಬಂಧಿಸಿದ ಅಭಿವೃದ್ಧಿ ಕಾರ್ಯಗಳ ಬಗ್ಗೆ ಚರ್ಚೆ ನಡೆಯಲಿದೆ.
ಜನ್ಮಸಂಖ್ಯೆ 6
ಬೆಳೆಗಾರರು, ವಿಶೇಷವಾಗಿ ಕಾಳುಮೆಣಸು ಬೆಳೆಗಾರರಿಗೆ ಆದಾಯದಲ್ಲಿ ಏರಿಕೆ ಕಾಣಬಹುದು. ವಿಲಾಸಿ ವಸ್ತುಗಳತ್ತ ಆಕರ್ಷಣೆ ಹೆಚ್ಚಾಗುತ್ತದೆ. ಸಹೋದ್ಯೋಗಿಗಳಿಗೆ ಹಣಕಾಸಿನ ನೆರವು ನೀಡುವ ಸಾಧ್ಯತೆ ಇದೆ. ವಿವಾಹ ಸಂಬಂಧಿತ ವಿಚಾರಗಳಲ್ಲಿ ಗೊಂದಲ ಉಂಟಾಗಬಹುದು. ಹಳೆಯ ವ್ಯಾಜ್ಯಗಳು ಬಗೆಹರಿಯುವ ಅವಕಾಶ ಸಿಗುತ್ತದೆ.
ಜನ್ಮಸಂಖ್ಯೆ 7
ಚುರುಕಾದ ನಿರ್ಧಾರಗಳು ಧನಾತ್ಮಕ ಫಲಿತಾಂಶ ನೀಡುತ್ತವೆ. ಹಣಕಾಸಿನ ಮೂಲಗಳನ್ನು ಪುನರ್ವಿಚಾರ ಮಾಡುವಿರಿ. ಆರೋಗ್ಯದ ಕಡೆ ನಿರ್ಲಕ್ಷ್ಯ ಬೇಡ. ವೈಯಕ್ತಿಕ ಸಂಬಂಧಗಳಲ್ಲಿ ಮಧ್ಯಪ್ರವೇಶ ಮಾಡದೆ ಇರುವುದೇ ಉತ್ತಮ. ಸಹೋದರ ಸಂಬಂಧಿಗಳಿಂದ ಸಹಾಯ ದೊರೆಯುತ್ತದೆ. ವ್ಯಾಪಾರದಲ್ಲಿ ಕೆಲವರಿಂದ ದೂರ ಉಳಿಯುವ ನಿರ್ಧಾರ ಕೈಗೊಳ್ಳಬಹುದು.
ಜನ್ಮಸಂಖ್ಯೆ 8
ಕುಟುಂಬದೊಂದಿಗೆ ಸಮಯ ಕಳೆಯುವುದು ಮನಸ್ಸಿಗೆ ನೆಮ್ಮದಿ ನೀಡುತ್ತದೆ. ಆದಾಯ ಹೆಚ್ಚಿಸಿಕೊಳ್ಳುವ ಪ್ರಯತ್ನ ಗಟ್ಟಿಯಾಗಿರುತ್ತದೆ. ಅಪರೂಪದ ವಸ್ತುಗಳ ಖರೀದಿ ಸಾಧ್ಯತೆ ಇದೆ. ಸರ್ಕಾರಿ ಕೆಲಸಗಳು ಮುನ್ನಡೆಯ ದಾರಿ ಕಾಣುತ್ತವೆ. ಭವಿಷ್ಯದಲ್ಲಿ ಮಹತ್ವದ ಪಾತ್ರ ವಹಿಸುವ ವ್ಯಕ್ತಿಯೊಬ್ಬರ ಪರಿಚಯವಾಗಬಹುದು. ನೇರವಾಗಿ ಮಾತನಾಡುವ ಶೈಲಿಯಲ್ಲಿ ಸಂಯಮ ಅಗತ್ಯ.
ಜನ್ಮಸಂಖ್ಯೆ 9
ಹೊಸ ಜವಾಬ್ದಾರಿಗಳ ಹೊರೆ ನಿಮಗೆ ದೊಡ್ಡದಾಗಿ ಕಾಣಬಹುದು. ಆಸ್ತಿಯ ಮಾರಾಟದ ಮೂಲಕ ಹೊಸ ವ್ಯವಹಾರ ಆರಂಭಿಸುವ ಆಲೋಚನೆ ಮೂಡುತ್ತದೆ. ಇತರರ ಅನಗತ್ಯ ಕುತೂಹಲ ನಿಮಗೆ ಬೇಸರ ತರಿಸಬಹುದು. ಸಾವಯವ ಉತ್ಪನ್ನಗಳ ವ್ಯಾಪಾರಿಗಳಿಗೆ ಉತ್ತಮ ಲಾಭದ ಸೂಚನೆ ಇದೆ. ಹೊಸ ಸಂಪರ್ಕಗಳು ವಿಶ್ವಾಸವನ್ನು ಹೆಚ್ಚಿಸಲಿದೆ.
