ಸಾಮಾನ್ಯವಾಗಿ ಕಳ್ಳರು ಮನೆಗೆ ನುಗ್ಗಿದರೆ ಸದ್ದಿಲ್ಲದೆ ಸಿಕ್ಕಿದ್ದನ್ನು ದೋಚಿ ಪರಾರಿಯಾಗುತ್ತಾರೆ. ಆದರೆ ತಮಿಳುನಾಡಿನ ತಿರುನಲ್ವೇಲಿ ಜಿಲ್ಲೆಯಲ್ಲಿ ನಡೆದ ಒಂದು ಕಳ್ಳತನದ ಪ್ರಕರಣ ವಿಚಿತ್ರವಾಗಿದೆ. ಮನೆಯಲ್ಲಿ ಸಿಸಿಟಿವಿ ಕ್ಯಾಮೆರಾ ಕಂಡು ಭಾರಿ ಹಣ ಸಿಗಬಹುದು ಎಂದು ಆಸೆಯಿಂದ ಬಂದ ಕಳ್ಳನಿಗೆ ನಿರಾಶೆಯಾದಾಗ, ಆತ ನೇರವಾಗಿ ಮನೆ ಮಾಲೀಕನಿಗೇ ಪತ್ರ ಬರೆದಿರುವ ವಿಚಿತ್ರ ಘಟನೆ ನಡೆದಿದೆ.
ತಿರುನಲ್ವೇಲಿಯ ಪಲಯಪೆಟ್ಟೈ ಪ್ರದೇಶದ ಮನೆಯೊಂದಕ್ಕೆ ಮಧ್ಯರಾತ್ರಿ ಕಳ್ಳನೊಬ್ಬ ನುಗ್ಗಿದ್ದಾನೆ. ಮನೆಯ ಪ್ರವೇಶ ದ್ವಾರದಲ್ಲೇ ಸಿಸಿಟಿವಿ ಕ್ಯಾಮೆರಾ ಇರುವುದನ್ನು ಕಂಡು ಮನೆಯಲ್ಲಿ ಸಿಸಿಟಿವಿ ಕಂಡು ಸಂತೋಷಗೊಂಡಿದ್ದ. ಸಿಸಿಟಿವಿ ಹಾಕಿದ್ದಾರೆ ಎಂದರೆ ಮನೆಯಲ್ಲಿ ಕೋಟಿಗಟ್ಟಲೆ ಹಣ ಅಥವಾ ಕೆಜಿಗಟ್ಟಲೆ ಚಿನ್ನಾಭರಣ ಇರಲೇಬೇಕು ಎಂದು ಕನಸು ಕಾಣುತ್ತಾ ಕಳ್ಳತನ ಶುರು ಮಾಡಿದ್ದಾನೆ. ಮನೆಯ ಮೂಲೆ ಮೂಲೆಯನ್ನೂ ಜಾಲಾಡಿದರೂ ಆತನಿಗೆ ಕಣ್ಣಿಗೆ ಬಿದ್ದಿದ್ದು ಮಾತ್ರ ಕೇವಲ 2 ಸಾವಿರ ರೂಪಾಯಿ ಮಾತ್ರ.
ಒಂದು ಕಡೆ ಲಕ್ಷಾಂತರ ರೂಪಾಯಿ ಸಿಗುವ ನಿರೀಕ್ಷೆ, ಮತ್ತೊಂದು ಕಡೆ ಕೈಗೆ ಸಿಕ್ಕಿದ್ದು ಕೇವಲ ಚಿಲ್ಲರೆ ಹಣ. ಇದರಿಂದ ರೊಚ್ಚಿಗೆದ್ದ ಕಳ್ಳ, ಮನೆ ಮಾಲೀಕನಿಗೆ ಪತ್ರ ಬರೆದಿದ್ದಾರೆ. ಆ ಪತ್ರದಲ್ಲಿ, ಮನೆಯಲ್ಲಿ ಒಂದು ರೂಪಾಯಿ ಕೂಡ ಇಲ್ಲ, ಹೀಗಿರುವಾಗ ಯಾವ ಪುರುಷಾರ್ಥಕ್ಕೆ ಸಿಸಿಟಿವಿ ಹಾಕಿಕೊಂಡಿದ್ದೀರಿ ? ಎಂದು ನೇರವಾಗಿ ಪ್ರಶ್ನಿಸಿದ್ದಾನೆ. ಅಷ್ಟೇ ಅಲ್ಲದೆ, ಮುಂದಿನ ಬಾರಿ ಯಾರಾದರೂ ಕಳ್ಳತನ ಮಾಡಲು ಬಂದರೆ ಅವರು ನನ್ನಂತೆ ಮೋಸ ಹೋಗಬಾರದು, ಆದ್ದರಿಂದ ಮನೆಯಲ್ಲಿ ಸ್ವಲ್ಪ ಹಣವನ್ನಾದರೂ ಇಟ್ಟುಕೊಳ್ಳಿ ಎಂದು ಮಾಲೀಕನಿಗೆ ಉಚಿತ ಬುದ್ಧಿವಾದ ಹೇಳಿದ್ದಾನೆ.
ಹಾರ್ಡ್ ಡಿಸ್ಕ್ ಕಳ್ಳತನ:
ತನ್ನ ಮುಖ ಸಿಸಿಟಿವಿಯಲ್ಲಿ ಸೆರೆಯಾಗಿರಬಹುದು ಎಂದು ಅರಿತ ಕಳ್ಳ, ಕೊನೆಗೆ ಹೋಗುವಾಗ ಆ 2 ಸಾವಿರ ರೂಪಾಯಿ ಜೊತೆಗೆ ಸಿಸಿಟಿವಿಯ ಹಾರ್ಡ್ ಡಿಸ್ಕ್ (Hard Disk) ಅನ್ನೂ ಹೊತ್ತುಕೊಂಡು ಹೋಗಿದ್ದಾನೆ. ಈ ವಿಚಿತ್ರ ಕಳ್ಳತನದ ಬಗ್ಗೆ ಪೊಲೀಸರು ದೂರು ದಾಖಲಿಸಿಕೊಂಡಿದ್ದಾರೆ. ಈ ಕಳ್ಳನ ಪತ್ರದ ವಿಷಯ ತಿಳಿದ ಸ್ಥಳೀಯರು ಮತ್ತು ನೆಟ್ಟಿಗರು ಇದನ್ನು ತಮಾಷೆ ಮಾಡಿದ್ದಾರೆ.
ತಂತ್ರಜ್ಞಾನದ ಭದ್ರತೆ ಇದ್ದರೂ ಕಳ್ಳರು ತಮ್ಮ ಕೆಲಸವನ್ನು ಹೇಗೆಲ್ಲಾ ಮಾಡುತ್ತಾರೆ ಎಂಬುದಕ್ಕೆ ಇದೊಂದು ನಿದರ್ಶನ. ಆದರೆ, ಈ ಕಳ್ಳನ ಪ್ರಾಮಾಣಿಕ ಅಸಮಾಧಾನ ಮತ್ತು ಸಲಹೆ ಮಾತ್ರ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.
