ಭಾರತದ ಸಂಸದೀಯ ಇತಿಹಾಸದಲ್ಲಿ ಫೆಬ್ರವರಿ 1, 2026 ಒಂದು ಮಹತ್ವದ ದಿನವಾಗಲಿದೆ. ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಮಂಡಿಸಲಿರುವ ಈ ಬಾರಿಯ ಕೇಂದ್ರ ಬಜೆಟ್ ಕೇವಲ ಆರ್ಥಿಕ ಲೆಕ್ಕಾಚಾರವಲ್ಲ, ಬದಲಿಗೆ ದಶಕಗಳ ಕಾಲ ನಡೆದುಬಂದ ಸಂಪ್ರದಾಯವನ್ನೇ ಬದಲಿಸುವ ಕ್ರಾಂತಿಕಾರಿ ಹೆಜ್ಜೆಯಾಗಲಿದೆ. ಸ್ವಾತಂತ್ರ್ಯ ನಂತರದ 75 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಬಜೆಟ್ ಭಾಷಣದ ‘ಪಾರ್ಟ್ ಬಿ’ (Part B) ವಿಭಾಗಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿದೆ.
ಏನಿದು ಪಾರ್ಟ್ ಎ ಮತ್ತು ಪಾರ್ಟ್ ಬಿ ವ್ಯತ್ಯಾಸ?
ಸಾಮಾನ್ಯವಾಗಿ ಕೇಂದ್ರ ಬಜೆಟ್ ಭಾಷಣವನ್ನು ಎರಡು ಭಾಗಗಳಾಗಿ ವಿಂಗಡಿಸಲಾಗುತ್ತದೆ:
-
ಪಾರ್ಟ್ ಎ (Part A): ಇದು ಬಜೆಟ್ನ ಸುದೀರ್ಘ ಭಾಗ. ಇದರಲ್ಲಿ ದೇಶದ ಪ್ರಸ್ತುತ ಆರ್ಥಿಕ ಸ್ಥಿತಿಗತಿ, ವಿವಿಧ ಇಲಾಖೆಗಳಿಗೆ ನೀಡಲಾಗುವ ಅನುದಾನಗಳು, ಹೊಸ ಯೋಜನೆಗಳ ಘೋಷಣೆ ಮತ್ತು ಕೃಷಿ, ಶಿಕ್ಷಣ, ಆರೋಗ್ಯದಂತಹ ಕ್ಷೇತ್ರಗಳ ನೀತಿ ನಿರೂಪಣೆಗಳ ಬಗ್ಗೆ ವಿವರವಿರುತ್ತದೆ.
-
ಪಾರ್ಟ್ ಬಿ (Part B): ಇದು ತೆರಿಗೆ ಪ್ರಸ್ತಾವನೆಗಳಿಗೆ ಸಂಬಂಧಿಸಿದ ಭಾಗ. ಇದರಲ್ಲಿ ಆದಾಯ ತೆರಿಗೆ (Income Tax), ಕಾರ್ಪೊರೇಟ್ ತೆರಿಗೆ, ಜಿಎಸ್ಟಿ ಬದಲಾವಣೆಗಳು ಮತ್ತು ಸುಂಕಗಳ ವಿವರ ಇರುತ್ತದೆ. ಈ ಹಿಂದೆ ಎಲ್ಲಾ ಸಚಿವರು ಪಾರ್ಟ್ ಎ ಮೇಲೆ ಗಂಟೆಗಟ್ಟಲೆ ಭಾಷಣ ಮಾಡಿ, ಪಾರ್ಟ್ ಬಿಯನ್ನು ಸಂಕ್ಷಿಪ್ತವಾಗಿ ಮುಗಿಸುತ್ತಿದ್ದರು.
ಈ ಬಾರಿಯ ವಿಶೇಷತೆ ಏನು ?
ನಿರ್ಮಲಾ ಸೀತಾರಾಮನ್ ಅವರು ಈ ಬಾರಿ ಹಳೇ ರೂಢಿಯನ್ನು ಮುರಿದು, ಪಾರ್ಟ್ ಎ ಭಾಷಣವನ್ನು ಕಿರಿದುಗೊಳಿಸಿ, ಪಾರ್ಟ್ ಬಿ ಮೇಲೆ ಹೆಚ್ಚಿನ ಗಮನ ಕೊಟ್ಟಿದ್ದಾರೆ. ಅಂದರೆ, ಕೇವಲ ಅಂಕಿ-ಅಂಶಗಳ ಘೋಷಣೆಗಿಂತ ಹೆಚ್ಚಾಗಿ ಭವಿಷ್ಯದ ಆರ್ಥಿಕ ನೀತಿಗಳು, ತೆರಿಗೆ ಪದ್ಧತಿಯ ಸರಳೀಕರಣ, ರಫ್ತು ಉತ್ತೇಜನ ಮತ್ತು ಮುಂದಿನ 25 ವರ್ಷಗಳ ಆರ್ಥಿಕ ದೃಷ್ಟಿಕೋನದ (Amrit Kaal Goals) ಬಗ್ಗೆ ವಿವರವಾದ ಪ್ರಸ್ತಾವನೆ ಮಂಡಿಸಲಿದ್ದಾರೆ.
ಭಾನುವಾರ ಬಜೆಟ್: ಮತ್ತೊಂದು ದಾಖಲೆ
ಬಜೆಟ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಭಾನುವಾರದಂದು (ಫೆಬ್ರವರಿ 1) ಬಜೆಟ್ ಮಂಡನೆಯಾಗುತ್ತಿದೆ. ರಜೆಯ ದಿನವಾಗಿದ್ದರೂ ಆರ್ಥಿಕ ಮಾರುಕಟ್ಟೆ ಮತ್ತು ಸಾರ್ವಜನಿಕರ ಹಿತದೃಷ್ಟಿಯಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಅಲ್ಲದೆ, ಸತತ 9ನೇ ಬಾರಿಗೆ ಬಜೆಟ್ ಮಂಡಿಸುವ ಮೂಲಕ ನಿರ್ಮಲಾ ಸೀತಾರಾಮನ್ ಅವರು ಹೊಸ ಮೈಲಿಗಲ್ಲು ಸ್ಥಾಪಿಸುತ್ತಿದ್ದಾರೆ. ಪ್ರತಿ ಬಾರಿಯಂತೆ ಈ ಬಾರಿಯೂ ಪೇಪರ್ಲೆಸ್ (ಡಿಜಿಟಲ್) ಬಜೆಟ್ ಮಂಡನೆಯಾಗಲಿದ್ದು, ಟ್ಯಾಬ್ಲೆಟ್ ಮೂಲಕ ಸಚಿವರು ಭಾಷಣ ಓದಲಿದ್ದಾರೆ.
ತೆರಿಗೆದಾರರಿಗೆ ಈ ಬಾರಿ ಪಾರ್ಟ್ ಬಿ ಮೂಲಕ ಹೆಚ್ಚಿನ ವಿನಾಯಿತಿ ಸಿಗುತ್ತದೆಯೇ ? ತೆರಿಗೆ ಪದ್ಧತಿ ಮತ್ತಷ್ಟು ಸುಲಭವಾಗಲಿದೆಯೇ? ಎಂಬ ಕುತೂಹಲ ಇಡೀ ದೇಶದ ಜನತೆಯಲ್ಲಿದೆ.
