ಬೆಂಗಳೂರು (ಮಾ. 25): ಈದ್ ಹಬ್ಬದ ಮುನ್ನ ಓರ್ವ ಬಡ ಮುಸ್ಲಿಂ ಕುಟುಂಬಕ್ಕೆ ಬೃಹತ್ ಉಡುಗೊರೆ ನೀಡಲು ಭಾರತೀಯ ಜನತಾ ಪಕ್ಷ (ಬಿಜೆಪಿ) ಮುಂದಾಗಿದೆ. ‘ಸೌಗತ್-ಎ-ಮೋದಿ’ ಎಂಬ ವಿಶೇಷ ಕಿಟ್ಗಳನ್ನು ದೇಶಾದ್ಯಂತ 32 ಲಕ್ಷ ಬಡ ಮುಸ್ಲಿಂ ಕುಟುಂಬಗಳಿಗೆ ವಿತರಿಸಲು ಬಿಜೆಪಿ ಯೋಜಿಸಿದೆ. ಈ ಅಭಿಯಾನವನ್ನು ಬಿಜೆಪಿ ಅಲ್ಪಸಂಖ್ಯಾತ ಮೋರ್ಚಾ ಮಾರ್ಗದರ್ಶನದಲ್ಲಿ ನಡೆಸಲಾಗುತ್ತಿದ್ದು, 32,000 ಬಿಜೆಪಿ ಕಾರ್ಯಕರ್ತರು 32,000 ಮಸೀದಿಗಳಿಗೆ ಭೇಟಿ ನೀಡಿ ಈ ಉಡುಗೊರೆ ಹಸ್ತಾಂತರಿಸಲಿದ್ದಾರೆ.
ಈದ್ ಹಬ್ಬವನ್ನು ಬಡ ಮುಸ್ಲಿಂ ಕುಟುಂಬಗಳು ಸಂತೋಷದಿಂದ ಆಚರಿಸಲು ಸಹಾಯ ಮಾಡುವ ಉದ್ದೇಶದಿಂದ ಈ ಯೋಜನೆಯನ್ನು ಪ್ರಾರಂಭಿಸಲಾಗಿದೆ. ‘ಸೌಗತ್-ಎ-ಮೋದಿ’ ಕಿಟ್ಗಳಲ್ಲಿ ಈದ್ ಆಚರಣೆಗೆ ಅಗತ್ಯವಾದ ವಸ್ತುಗಳು ಒಳಗೊಂಡಿವೆ. ಇದರಲ್ಲಿ ವರ್ಮಿಸೆಲ್ಲಿ (ಶಾವಿಗೆ), ಖರ್ಜೂರ, ಒಣ ಹಣ್ಣುಗಳು, ಕಡಲೆ ಹಿಟ್ಟು, ತುಪ್ಪ ಅಥವಾ ಡಾಲ್ಡಾ ಹಾಗೂ ಮಹಿಳೆಯರಿಗೆ ಸೂಟ್ ಬಟ್ಟೆಗಳಿವೆ. ಇದಲ್ಲದೆ, ಹಬ್ಬದ ಸಂದರ್ಭದಲ್ಲಿ ಉಪಯುಕ್ತವಾಗಬಹುದಾದ ಇತರ ಅಗತ್ಯ ವಸ್ತುಗಳನ್ನು ಕೂಡಾ ಈ ಕಿಟ್ಗಳಲ್ಲಿ ಸೇರಿಸಲಾಗಿದೆ.
ಬಿಜೆಪಿ ಅಲ್ಪಸಂಖ್ಯಾತ ಮೋರ್ಚಾದ ರಾಷ್ಟ್ರೀಯ ಅಧ್ಯಕ್ಷ ಜಮಾಲ್ ಸಿದ್ದಿಕಿ ಅವರ ಮಾರ್ಗದರ್ಶನದಲ್ಲಿ ನಡೆಯುತ್ತಿರುವ ಈ ಅಭಿಯಾನ, ಇಂದಿನಿಂದ ನವದೆಹಲಿಯ ನಿಜಾಮುದ್ದೀನ್ನಲ್ಲಿ ಪ್ರಾರಂಭಗೊಂಡಿದೆ. ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಅವರ ಮಾರ್ಗದರ್ಶನದಲ್ಲಿ ನಡೆಯುತ್ತಿರುವ ಈ ಕಾರ್ಯಕ್ರಮ, ಬಡ ಮುಸ್ಲಿಂ ಸಮುದಾಯವನ್ನು ಆರ್ಥಿಕ ನೆರವು ನೀಡುವುದರ ಜೊತೆಗೆ, ‘ಕೆಲವು ದಲ್ಲಾಳಿಗಳು ಮತ್ತು ಗುತ್ತಿಗೆದಾರರ’ ಪ್ರಭಾವದಿಂದ ಮುಕ್ತಗೊಳಿಸಲು ಸಹಾಯ ಮಾಡುತ್ತದೆ ಎಂಬುದಾಗಿ ಬಿಜೆಪಿ ಹೇಳಿದೆ.
ಈ ಯೋಜನೆಯು ಕೇವಲ ಈದ್ ಹಬ್ಬದ ಸಂದರ್ಭದಲ್ಲಿ ಮಾತ್ರವಲ್ಲ, ರಂಜಾನ್ ತಿಂಗಳು, ಗುಡ್ ಫ್ರೈಡೇ, ಈಸ್ಟರ್, ನೌರುಜ್ ಮತ್ತು ಭಾರತೀಯ ಹೊಸ ವರ್ಷದಂತಹ ಸಂದರ್ಭಗಳಲ್ಲಿ ಸಹ ಮುಸ್ಲಿಂ ಸಮುದಾಯವನ್ನು ತಲುಪಲು ಯೋಜಿಸಲಾಗಿದೆ. ಜಿಲ್ಲಾ ಮಟ್ಟದಲ್ಲಿಯೂ ಈದ್ ಮಿಲದ್ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿದ್ದು, ಇದು ಬಿಜೆಪಿ ಮತ್ತು ಎನ್ಡಿಎಗೆ ರಾಜಕೀಯ ಬೆಂಬಲವನ್ನು ಪಡೆಯಲು ಸಹಾಯಕವಾಗಲಿದೆ. ಈ ಕಾರ್ಯಕ್ರಮವನ್ನು ಮುಸ್ಲಿಂ ಸಮುದಾಯದಲ್ಲಿ ಕಲ್ಯಾಣ ಯೋಜನೆಗಳನ್ನು ಪ್ರಚಾರಗೊಳಿಸುವ ಕಾರ್ಯದ ಕೊನೆಯ ಹಂತವೆಂದು ಬಿಜೆಪಿ ಅಲ್ಪಸಂಖ್ಯಾತ ಮೋರ್ಚಾ ವಕ್ತಾರ ಯಾಸಿರ್ ಜಿಲಾನಿ ತಿಳಿಸಿದ್ದಾರೆ.
ಸೌಗತ್-ಎ-ಮೋದಿ’ ಕಿಟ್ಗಳ ಬೆಲೆ ಸುಮಾರು 500 ರಿಂದ 600 ರೂ.ಗಳಷ್ಟಾಗಿದ್ದು, ಮಹಿಳೆಯರಿಗೆ ಬಟ್ಟೆ, ಪುರುಷರಿಗೆ ಕುರ್ತಾ-ಪೈಜಾಮಾ ಮತ್ತು ಮಕ್ಕಳಿಗೆ ಸಿಹಿ ತಿಂಡಿಗಳನ್ನು ಒಳಗೊಂಡಿರುತ್ತದೆ. ಈ ಕಿಟ್ಗಳ ವಿತರಣೆಯಿಂದ ಬಡ ಮುಸ್ಲಿಂ ಕುಟುಂಬಗಳು ತಮ್ಮ ಈದ್ ಹಬ್ಬವನ್ನು ಸಂತೋಷದಿಂದ ಆಚರಿಸಬಲ್ಲವು ಎಂಬುದಾಗಿ ಬಿಜೆಪಿ ವಿಶ್ವಾಸ ವ್ಯಕ್ತಪಡಿಸಿದೆ.
ಬಿಜೆಪಿ ಈ ಅಭಿಯಾನವನ್ನು ಬಿಹಾರ, ಉತ್ತರ ಪ್ರದೇಶ, ಪಶ್ಚಿಮ ಬಂಗಾಳ, ಕರ್ನಾಟಕ, ತೆಲಂಗಾಣ ಮತ್ತು ಇತರ ಪ್ರಮುಖ ರಾಜ್ಯಗಳಲ್ಲಿ ಜಾರಿಗೊಳಿಸಲಿದೆ.
