ನವದೆಹಲಿ: ‘ಐದೇ ನಿಮಿಷದಲ್ಲಿ ಆಟೋ ಸೇವೆ ಅಥವಾ ಪಡೆಯಿರಿ 50 ರೂ. ನಗದು’ ಎಂಬ ಮೋಸದ ಜಾಹೀರಾತು ನೀಡಿ ಗ್ರಾಹಕರನ್ನು ವಂಚಿಸುತ್ತಿದ್ದ ರ್ಯಾಪಿಡೋ ಸಂಸ್ಥೆಗೆ ಕೇಂದ್ರ ಗ್ರಾಹಕ ರಕ್ಷಣಾ ಪ್ರಾಧಿಕಾರ (CCPA) 10 ಲಕ್ಷ ರೂಪಾಯಿ ದಂಡ ವಿಧಿಸಿದೆ. ಗ್ರಾಹಕ ಹಕ್ಕುಗಳನ್ನು ಉಲ್ಲಂಘಿಸಿದ್ದಕ್ಕೆ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ.
ರ್ಯಾಪಿಡೋದ ಜಾಹೀರಾತುಗಳು ‘ಗ್ಯಾರಂಟಿ ಆಟೋ’ ಮತ್ತು ‘5 ನಿಮಿಷದಲ್ಲಿ ಆಟೋ ಸೇವೆ’ ಎಂಬ ಘೋಷಣೆಯೊಂದಿಗೆ ಗ್ರಾಹಕರನ್ನು ಸೆಳೆಯುತ್ತಿದ್ದವು. ಆದರೆ, ಈ ಭರವಸೆಗಳು ಹೆಚ್ಚಿನ ಸಂದರ್ಭಗಳಲ್ಲಿ ಈಡೇರದೆ, ಗ್ರಾಹಕರು ವಂಚನೆಗೊಳಗಾಗುತ್ತಿದ್ದರು. CCPA ತನಿಖೆಯಲ್ಲಿ, ಈ ಜಾಹೀರಾತುಗಳ ಷರತ್ತುಗಳು (T&C) ಓದಲಾಗದಂತಹ ಚಿಕ್ಕ ಅಕ್ಷರಗಳಲ್ಲಿ ಪ್ರದರ್ಶಿತವಾಗಿದ್ದವು. ಜೊತೆಗೆ, ಭರವಸೆ ನೀಡಿದ 50 ರೂಪಾಯಿ ನಗದಿನ ಬದಲಿಗೆ, ಕೇವಲ 7 ದಿನಗಳ ಮಾನ್ಯತೆಯ ‘ರ್ಯಾಪಿಡೋ ಕಾಯಿನ್ಗಳು’ ನೀಡಲಾಗುತ್ತಿತ್ತು. ಇದರಿಂದ ಗ್ರಾಹಕರಿಗೆ ಯಾವುದೇ ನಿಜವಾದ ಲಾಭವಿರಲಿಲ್ಲ.
ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ (NCH) ಮೂಲಕ ರ್ಯಾಪಿಡೋ ವಿರುದ್ಧ 1,799 ದೂರುಗಳು ದಾಖಲಾಗಿವೆ. 2023 ರ ಏಪ್ರಿಲ್ನಿಂದ 2024 ರ ಮೇವರೆಗೆ 575 ದೂರುಗಳು ಬಂದಿದ್ದರೆ, 2024 ರ ಜೂನ್ನಿಂದ 2025 ರ ಜುಲೈವರೆಗೆ 1,224 ದೂರುಗಳು ದಾಖಲಾಗಿವೆ. ಈ ದೂರುಗಳು ಸೇವಾ ನ್ಯೂನತೆ, ಅಧಿಕ ಶುಲ್ಕ ವಿಧಾನ, ಪಾವತಿಯ ಮರುಪಾವತಿ ವಿಳಂಬ, ಮತ್ತು ಭರವಸೆಯ ‘5 ನಿಮಿಷದ ಆಟೋ’ ಸೇವೆಯ ವಿಫಲತೆಯನ್ನು ಒಳಗೊಂಡಿವೆ. ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವ ಪ್ರಲ್ಹಾದ್ ಜೋಶಿ ಈ ದೂರುಗಳನ್ನು ಗಂಭೀರವಾಗಿ ಪರಿಗಣಿಸಿ, CCPAಗೆ ಕಟ್ಟುನಿಟ್ಟಿನ ಕ್ರಮಕ್ಕೆ ಸೂಚಿಸಿದ್ದರು.
ತನಿಖೆಯಲ್ಲಿ, ರ್ಯಾಪಿಡೋ ತನ್ನ ಜಾಹೀರಾತುಗಳ ಜವಾಬ್ದಾರಿಯಿಂದ ತಪ್ಪಿಸಿಕೊಳ್ಳಲು ‘ವೈಯಕ್ತಿಕ ಕ್ಯಾಪ್ಟನ್ಗಳು’ ಈ ಆಫರ್ಗಳನ್ನು ನೀಡುತ್ತಿದ್ದಾರೆ ಎಂದು ವಾದಿಸಿತ್ತು. ಆದರೆ, CCPA ಈ ವಾದವನ್ನು ತಿರಸ್ಕರಿಸಿ, ಕಂಪನಿಯೇ ಈ ಜಾಹೀರಾತುಗಳಿಗೆ ಹೊಣೆಗಾರ ಎಂದು ಸ್ಪಷ್ಟಪಡಿಸಿತ್ತು. ತಕ್ಷಣವೇ ಈ ಮೋಸದ ಜಾಹೀರಾತುಗಳನ್ನು ನಿಲ್ಲಿಸಲು ರ್ಯಾಪಿಡೋಗೆ ಕಟ್ಟುನಿಟ್ಟಿನ ನಿರ್ದೇಶನ ನೀಡಲಾಗಿದೆ.
ಗ್ರಾಹಕರಿಗೆ ಎಚ್ಚರಿಕೆಯಾಗಿ, CCPA ‘ಗ್ಯಾರಂಟಿ’ ಅಥವಾ ‘ಖಚಿತ’ ಎಂಬಂತಹ ದೊಡ್ಡ ಭರವಸೆಗಳನ್ನು ನೀಡುವ ಜಾಹೀರಾತುಗಳ ಬಗ್ಗೆ ಜಾಗರೂಕರಾಗಿರುವಂತೆ ಸೂಚಿಸಿದೆ. ಷರತ್ತುಗಳನ್ನು ಸ್ಪಷ್ಟವಾಗಿ ವಿವರಿಸದ ಆಫರ್ಗಳಿಂದ ದೂರವಿರಬೇಕು ಎಂದು ತಿಳಿಸಿದೆ. ಯಾವುದೇ ಸಮಸ್ಯೆ ಎದುರಾದರೆ, ಗ್ರಾಹಕರು ರಾಷ್ಟ್ರೀಯ ಗ್ರಾಹಕ ಸಹಾಯವಾಣಿ 1915ಗೆ ಕರೆ ಮಾಡಿ ಅಥವಾ NCH ಅಪ್ಲಿಕೇಶನ್ನಲ್ಲಿ ದೂರು ಸಲ್ಲಿಸಬಹುದು.
